Iruruputo 5
5
Ananaiasi ni Sapaira
1Melai kala pado maba Ananaiasi va kikelani ta obeta evake sai o reko Sapaira sase, ni vota okai tatabaraovake nioqako miduku. 2Melai vota ota ka koake kama kobu koa seleni koa miduku kale ko puratema tu o ṉavi kaqe, ni voko reko melai ko vati zolaekake koa kalo, ni kama kobu pala ta o katimake se apositolo madu. 3Nio Pita ta eri kiolake vokasi, “Ananaiasi, noi sole inio ṉota ṉo lekasa pueva vo Setani ṉoko bulo kale ni ṉota ṉo lipalipaeva vo Tabu ala Auvana ṉo taka ṉeamuko kale kama kobu seleni ṉo ṉoqai tatabaraolama lomaloma kale azo ko puratalama kale azo? 4Puliako ṉo kai tatabarao koa miduku, kota ṉoko, ni lula ṉoqai tatabaraova ko saita melai ṉoda rovea kati lulueko ṉo ṉaviko kerukeru koa seleni. Noi sole inio ṉoda lipata ta koa pado ama seleni ṉo qatiṉela kinola? Ṉota pui ṉo lipalipata maba kasi, melai ṉota ṉo lipalipata Baṉara kasi!” kiolake. 5Nio so keru Ananaiasi o viqa keru ko, vota ota piake ni ota vouvake. Nio kiadamu seke viqeni koa bazu ta keta matu ṉake. 6Ni kake lasive rusu ta ke amaqeake, ni keta va sudekake voko vouma tupu, ni ke vati saqorake koa zaekale azo, ni kepa mutavake vo.
7Ni zouke aoa tiniavo jari inio voko reko ko pui ko paqumukake koko ereivako quli, ta ko amaqeake koa pade kale. 8Nio Pita ta o kuimaekake ko ni eri kiolake, “Bazuela, noi nio? Ko ikio koa kiadama seleni ṉo ni ṉovo lasive qe koalama qeko miduku ko tatabara kio?”
Nio kota eri kikolake, “Zio, koa kiadama ikio.”
9So sole Pita ta eri kiolake kokasi, “Noi sole inio ṉo ni ṉovo lasive ta qe korotikala tu qeta qe madoevo vo Baṉara vo Tabu ala Auvana? Sea lasive rusu se kepa mutavani ṉovo lasive ta veutu ketaketa kebeta eva, ni seta mata kepa boriṉou ṉo ni ke ṉati saqorou!” kiolake. 10Nio maba koa taku kale inio kota kota piake voko kiti ko sipole ni kota vouvake. Ni se lasive rusu ta ke amaqeake ni ke keake ta kota lula kota vouva, so sole seta ke borikake ko ni ke kati saqorake pade kale azo ni kepa mutakake kovo lasive ko ketaketa. 11Nio koa pado ama lotu qoqono ni sea kiadamu seke viqeni koko bazu ta keta matu ṉake.
Kubo aqasiele ama iruruputo
12Ni se apositolo madu ta ke erekake kubo piza kama ni aqasiele ama iruruputo se maba madu kasi. Ni sea kiadamu seke tuvevo puteni ta ke padoivake mati Solomone ko Sebesebe kale. 13Ni sea kiadamu se pui koa poqala kale amu ta keta ṉake nio pui ke mati zomanake se, melai sea kiadamu sea maba poso ta ke rauraemake se. 14Ni matu ti matu kubo madu ta ke tuvevo puevake vo Lekasa Jisu ti ke amaqeake koa poqala kale—kubo lasive poso ni rekoreko melai. 15Nio se apositolo madu ke erekema quli kale avo inio maba poso ta ke mati olake se vere amu keve poso tona ni seta ke tekuemake boribori topi ni kobo topi sai tu vo Pita o alokatou keru ta voko laumuna ta ko laumunaemou se ni ke urikou kikelake sole. 16Ni matu kubo maba madu ta ke kuevake Jerusalema peuru ko ketaketama peuru poso kale azo, ni ke mati kuevake se vere amu ni se ziolo komai onobatani, ni sea kiadamu ta keta urikake.
Apositolo madu ko niumaniumaemo
17Nio vo Ṉisa Siama ni voko baerebaere poso se koa so keru ama poqala maba poso Sadiusi madu ma kikeveni, ta kemai matu pasoike se apositolo madu, so sole seta ke vatoekake tu seta ke ereko kama quli tu ke niumaemo se kikelake. 18Nio seta ke noqoemake se apositolo madu ni ke vaemake pirito pade kale. 19Melai koa ipu kale inio kala pado vo Baṉara vo mateana ta opa veukake koa pirito pade ko tibulu poso, ni o saqorimake se apositolo madu, ni eri kiolake sekasi, 20“Olamo ni pa lojomo Jelepade ko taqo kale, ni pa mai bazuekomo kiadama maba poso komia vaini ama lotu saevo ko bazu,” kiolake. 21Nio se apositolo madu ta ke zoripatake, nio omadeu lekito inio seta ke amaqeake Jelepade ko taqo kale ni ke taniekake nianiiekato.
Ni vo Ṉisa Siama ni voko baerebaere poso ta ke padoemake kiadama Jiu ama lotu tanatanamu matuma padoilo Kauniseli ko kale, ni seta ke soroekake ko bazu pirito pade kasi tu ke mati zio se apositolo madu seko kuleto kikelake. 22Melai so keru seko iruruputo ko maba madu ke baroake sai, ta pui ke meake se apositolo madu pirito pade kale. So sole seta keta vaitake Kauniseli madu kasi; ni eri kikela, 23“So keru eṉe ṉe barola keru pirito pade kasi, ta kota lokalokamu ni kiadama vailo ko maba madu ta kebeta eva veutu kasi; melai so keru eṉe ṉe veuka keru koa tibulu, puliala kala pado ṉeba veala pade ko poro kale!” kikelake. 24Nio so keru se raura kama siama madu ni se Jelepade ke kati vailani ko kuleto ala ke viqa keru ko, seta matu niuniala kekai evake loma quli kio esa koko ereima se apositolo madu kasi ni esa mata loma quli kio ko puratikou mata. 25Ni kala maba ta o amaqeake ni eri kiolake sekasi, “Viqomo! Sea maba poso meme vaemalani pirito pade kale ta kebe nianiiekima se maba poso Jelepade kale!” kiolake. 26Nio se Jelepade ke kati vailani ko kuleto ala ta o olake voko maba poso sase tu ke mati vaito se apositolo madu sekasi. Seta pui ke rajarajaemake, melai ke vanonoriemake, ako seta keta ma ṉake se maba madu ta ke taimou lado kale sole.
27Nio seta ke mati amaqeake se apositolo madu ni ke lojoemake Kauniseli madu ko kuleto, nio vo Ṉisa Siama ta o kaqarimake se ni eri kiolake, 28“Eṉeta lula ṉe qatimela me matu piza kama bazu tu pui me nianiiekato nea maba Jisu ko ṉikale, melai keatini meta lula me ereka! Meta lula me aerikala meko nianiiekato kiadama Jerusalema peuru ko poro kale, ni meta meqai zaria tu kuiripato saṉa iṉelo voko voukale!” kikelake.
29Nio Pita ni sea apositolo madu ta ke opatake ni eri kikelake, “Eṉeko koidi ta zorivo vo Baṉara, pui maba. 30Animeko taite poso vo Baṉara ta o saevive vo Jisu voukale azo, meko vouvaevo vo ko tova me batoeve keru korosi topi. 31Baṉara ta o koivievo vo voko palo rana vasi tu Vilua pikopiko ni Pakio o elo, tu o katimo ko taku se Izireli amu tu ke lilizio ni ke kovo seko sarueko ko akoezato. 32Eṉeta ṉeqai bazubazutani ṉela komi eṉe ṉe qevema quli—eṉe ni vo Tabu ala Auvana, vo Baṉara vo puaro seke zorivani vo kasi,” kikelake.
33Nio so keru koa Kauniseli ko maba poso ke viqa keru ko, seta keta matu iqaike ni keka zariake vouvaemo se apositolo madu. 34Melai kala pado sekale ala, kala Parese Qamelieli o ṉi sala, vo Mosese ko Bazu okai nianiiekateni ni maba poso keta va matu paṉaovini, ta o lojoake ko Kauniseli kale. Ni vota o bazuemake se tu seta ke saqorimo saita kupele se apositolo madu, 35so maqa inio vota eri kiolake sea tanatanamu kasi, “Me Izireli amu mela, meta taka balauvomo ko me meqai zariako mai ereko nia maba poso. 36Kerukeruekomo so keru Tiudasi kasa o eve keru, vo o raurarauraini ta vota matula maba kioveni, ni ariku paizana maba tiniavo ta ke luluevake vo. Melai vota ke vouvaevake ni seke lulueveni ta keta birebireike ni vo o erekema quli ta kota vouvake.
37“Ni koko tova Jiudasi ta mata o puratake Qalili ala maba atailo ko taku keru, vota oka kuletake matuma vaki melai ke vouvaevake ni vo ke lulueveni ta azama buara keta evake. 38Kokale avo inio, aṉata a bazuemela me tu meta pui me erekou kama quli tu memai niumaeko nia maba poso. Vaemomo se! Seke erekako ta maba kasi ko tanitako tea, kota ṉiaṉiala pide kota elou, 39melai ko kuevako Baṉara kasi azo tea, meta pui meba roveovou koqo imo se. Ni meta me roveo nio kelo meko vati kanaekinio vo Baṉara!” kiolake.
Nio koa padopadoilo kale amu ta ke luluekake vo Qamelieli ko uri ama kerukeru sama pesio. 40Nio seta ke amaqimako se apositolo madu, ni ke sisiparu puemake se ni bazu saṉa ke imake tu seta mata pui tova bazubazuto ke elou vo Jisu ko ṉikale kikelake, saita inio seta ke rupasimake se. 41Ni so keru se apositolo madu ke vaeke keru koa matuma padopadoilo, seta keta matu zoleike, ako Baṉara ta o kerukerueme se ta seta ke male tu tola ni qurato kekai toraeko vo Jisu ko ṉi. 42Ni kiadama ṉaniu poso kale seta ke olake Jelepade kale ni maba poso ko pade poso kasi ni seta pui ke lalamatake kai nianiiekato ni kai bazubazuto vo Jisu ta vo Baṉara o soroeveni Pakio kio sama Uri ama Bazu.
Pašlaik izvēlēts:
Iruruputo 5: BLBNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
The New Testament in the Bilua language, Solomon Islands © The Bible Society of the South Pacific, 1995.