Luka 2
2
Kawi kaku Yesu
(Mateyu 1.18-25)
1Ndipo kunguŵa mu mazuŵa ghenigho, kungutuwa kwaku Kaisare Augusto lamulu, lakuti, ulembeke uzengi wose. 2Chenichi chenga chilemba chakudanga weche Kureniyo nduna yaku Siriya. 3Ndipo ŵanguruta wose kwachilembeka, yose ku muzi waku yija. 4Ndipo Yosefe nayo, kutuwa ku Galile, ku muzi Nazarete, wangukwere ku Yuda, ku muzi waku Davidi, wo uzumbulika Betelehemu, chifukwa kuti wenga wamunyumba ndi wa mbumba yaku Davidi; 5kwachilembeka pamoza ndi Mariya, wakujaririka ndi iyo, wakuŵa wa nthumbu yikuru. 6Ndipo kunguŵa, ŵeche kweniko yiwo, ghangufiskika mazuŵa ghake ghakupapiya. 7Ndipo wangupapa mwana-munthurumi wake wakudanga; ndipo wangumvungiya, ndi wangumlalika mu murgheru. Pakuti kwengavi kwaku wo malo mu nyumba wa ŵalendo.
Ŵaliska ndi ŵangelo
8Ndipo kwenga ŵaliska mu charu chenichiya ŵakutandara mu dondu, ndi ŵakulindizga maulinda ghausiku pa mskambu wawo. 9Ndipo mungelo wa Mbuya wanguma paku wo, ndi unkhankhu wa Mbuya wanguŵaŵaliya kwakuzunguliya: ndipo ŵangopa ndi chopu chikuru. 10Ndipo wanguŵanene mungelo yo, “Mungopanga; chifukwa alereni, ndikutauliyani chimwemwe chikuru, chenicho chikaŵiyanga ŵanthu wose: 11pakuti wakuwiyani le, mu muzi waku Davidi, Mtaski mweniyo ndi Kristu Mbuya. 12Ndipo chenichi nchisimikizgu kwaku imwe; mwamsaniya litema lakurungika, lakugona mu murgheru.” 13Ndipo kwamabuchibuchi kunguŵa pamoza ndi mungelo mzinda wa liŵanja lakuchanya, ŵakuthamika Chiuta, ndi ŵakuti,
14“Unkhankhu kwaku Chiuta mu mdengwendi,
ndi panupasi chimangu mu ŵanthu mwaku wo wakondwere.”
15Ndipo kunguŵa, penipo ŵangelo ŵangutuwako kwaku wo ndi kuruta kuchanya, ŵaliska nawo ŵangunenerana, “Tiyeni mpaka ku Betelehemu, ndi tiwone nkhani yeniyi yakuŵapo, yo Ambuya ŵatiziŵiska.” 16Ndipo ŵanguza ŵakutinthimika, ndipo ŵangusaniya wose Mariya ndi Yosefe, ndi litema lo lakugona mu murgheru wo. 17Ndipo ŵachiwona, ŵanguwandiska vyapa nkhani yakuneneka kwaku wo yapa mwana yo. 18Ndipo wose ŵakuvwa ŵangutondwa paku vyo vingukambika ndi ŵaliska kwaku wo. 19Kweni Mariya wasungirizganga nkhani zenizi zose, kuziŵika mu mtima wake. 20Ndipo ŵaliska ŵanguwe, ŵakukankhuska ndi ŵakuthamika Chiuta paku vyose vyo ŵanguvwa ndi ŵanguwona, nge ndimo kungukambikiya kwaku wo.
21Ndipo penipo ghangufiskika mazuŵa ghankhonde ndi ghatatu gha kumchinjiya, lingudanika zina lake Yesu, lo lingudanika ndi mungelo wenga wandazuuke iyo mu chibali.
Yesu watoreke ku kasopi
22Ndipo penipo ghangufiskika mazuŵa gha chiphotoka chawo mwa dangu laku Mosese ŵangumtole ku Yerusalemu kwachimpereka ku Ambuya, 23(mo kwalembeke mu dangu la Mbuya, “Munthurumi yose wakubanuwa chibali wakadanikanga wakupaturikiya ku Ambuya”) 24ndi kwachipereka sembe, uli ndi cho chakulembeka mu dangu la Mbuya, “Njiŵa ziŵi, pamwenga viunda viŵi.”
Simeoni ndi Anna
25Ndipo awonani kwenga munthu mu Yerusalemu, zina lake Simeoni; ndipo munthu mweniyo wenga mrunji ndi wakusopa, wakulereze sangarusku laku Yisraele: ndipo Mzimu Wakupaturika wenga pake. 26Ndipo kunguvumbulikiya iyo ndi Mzimu Wakupaturika, kuti wangawona nyifwa cha wandawone Kristu wa Mbuya. 27Ndipo mu Mzimu wanguza mu kasopi: ndipo ŵachiserezga ŵapapi wo ko kana Yesu, kuti wakachitiye mwa karusu ka dangu, 28sono Simeoni wangukaronde mu manja ghake, ndipo wangumtumbika Chiuta ndi wanguti,
29“Sono mfwatuweni muŵanda winu, Ambuya,
mwa nkhani yinu, mu chimangu,
30pakuti ghawona maso ghangu utaski winu,
31wo mwarongosole pa chisku cha makamu ghose;
32ukweru wakuvumbuliya ŵaMitundu,
ndi unkhankhu wa khamu linu Yisraele.”
33Ndipo wiske ndi nyina ŵazizwanga ndi vyo vingukambikiya paku iyo; 34ndipo Simeoni wanguŵatumbika, ndi wanguti kwaku Mariya nyina,
“Awona mwenuyu wajarikikiya ku chibwanganduka
ndi chiyuka vya ŵanandi mwaku Yisraele;
ndi ku chisimikizgu chakususkika;
35ndipo lipanga liporotenge mu uzimu waku wamweni;
alinga kuti ghavumbulike maghanaghano gha mitima yinandi.”
36Ndipo kwenga Anna, mchimikazi, mwana munthukazi waku Panuele, wamu fuku laku Ashere wenga wakugonera mazuŵa ghanandi, wakujaririya ndi mrumi virimika vinkhonde ndi viŵi kutuwa ku umwali wake, 37mweniyo so wenga choko cha virimika machumi ghankhonde ndi ghatatu pachanya vinayi, mweniyo kuti watuwangako ku kasopi cha, wakusopa ndi kufunga ndi maniniziku usiku ndi msana. 38Ndipo wanguti wafikapo pa ora lenilo, wawongiyanga Chiuta, ndipo wangukambiya vyaku iyo kwaku wose ŵakulereze uwombozi wa Yerusalemu.
39Ndipo penipo ŵangufiska vyose vya mwa dangu la Mbuya, ŵanguwere ku Galile, ku muzi wawo Nazarete. 40Ndipo kana ko kangukuwa, ndi kadimbanga, kakuzazika ndi zeru: ndipo wezi waku Chiuta wenga pake.
Yesu pa uhurwa wake we mu kasopi
41Ndipo ŵarutanga ŵapapi ŵake chirimika ndi chirimika ku Yerusalemu ku njonesku ya Phaska.#2.41 Phaska: uku nkhuti kujumphapo ŵaka kwa mungelo pa nyumba za ŵaYisraele mu Egipiti. 42Ndipo penipo wanguŵa wa virimika chumi ndi viŵi, wanguti wakweriyako ku Yerusalemu mwa karusu ka njonesku, 43ndipo po dghera lingumara ŵachiwe, Yesu, mhurwa yo, wangujariya vuli mu Yerusalemu; ndi kuti ŵanguziŵa cha ŵapapi wo; 44kweni, pakughanaghaniya iyo kuŵa mu mpingu, angwenda rwendo la zuŵa limoza; ndipo ŵampenjanga mu ŵabali ndi vinini: 45ndipo pakureka ku msaniya, ŵanguwere ku Yerusalemu, ŵakumpenjapenja. 46Ndipo kunguŵa pavuli pa mazuŵa ghatatu, ŵangumsaniya mu kasopi wakuja pasi mukati mu ŵasambizgi, ndi wakuŵavwa ndi wakuŵafumba: 47ndipo wose ŵakumuvwa ŵarwitanga pa uteska wake ndi mayankhu ghake. 48Ndipo ŵachiwona, ŵanguzizwa; ndipo ŵanyina ŵanguti, kwaku iyo, “Wamwana, watichitiyanji viyo? Awona, ausu ndi ine ŵachisungu takupenjanga.” 49Ndipo wanguŵanene, “Mwandipenjiyanganji? Asi mwaziŵanga kuti kutenere ine kuŵa mwaku vyo vya Ada?” 50Ndipo iwo kuti ŵanguwamo cha mu lineno lo wangukamba nawo. 51Ndipo wangusikiya pamoza nawo, ndi ŵangufika ku Nazarete; ndipo wenga wakuthera kwaku wo: ndipo nyina wasungirizganga makani ghose gho mu mtima wake. 52Ndipo Yesu wakuwanga mu zeru ndi mu msinkhu, ndi mu wezi kwaku Chiuta ndi ŵanthu.
Pašlaik izvēlēts:
Luka 2: TongaMw
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible Society of Malawi