YOHANES 6
6
Yesus kwas njita tut tungwatu nya ibou sribu muhwi
(Mat. 14:13-21; Mrk. 6:30-44; Luk. 9:10-17)
1Njap poi ser lene Yesus ngkwei hanyen ug ei Igpong Galilea nite dima ug. Tungwatu nya ijem igpong dima ninyeng hi Igpong Tiberias. 2Noni kwei krau lene imang bibor ingwig kep Noni lewo ingat mindur di Noni bibon nya tirigi bindei ba, yo di inggwen ikei hanyen. 3Yesus kui ug ei nungug tou gom leu api kuk No bigwam jug#6:3: Nipas kep kuk No bigwam jug: Guru nya ei nijam mimbrek ngan tu ikuk yok bigwam jug tirigi ikinyon ei ningginau tungwatu nyati. lene yo di igya kui Noni ingat rima bit Noni. 4Mpe dima lene tto bou mem mben Yahudi ibon pesta kep Njap Ndig Paskah dideu su. 5Yesus mian ser mpia ttou nsi dima bingat tungwatu nya imang bibor di induk yam kwei ttai Noni. Gima rino Noni hig ser Filipus “Ipek njita ei sirigitou mem ibitri yo dini yahagom i?” (6Yesus hig singgre Filipus nok leu binhyepo bingon noni lewo Noni kos tut ningon kanti tut mun dima bon mem yok tu.)
7Filipus buhup “Gino iba mitiei buhun nitig sratus can#6:7: Nipas kep mitiei buhun nitig sratus can: Ei nijam dima ne no di yai midyai mem njap jei gom ngat mitug ndei nimuhup nok mitiei buhun nitig gom ngat. (Angig ayai kep Mat. 20:2). bipek roti lene gima dem bi lewo bikwop tungwagom-gom miyem njita poi mien he.”
8Andreas di Simon Petrus nikinjoi di ya kui Yesus pai biNoni, 9“Mot gom di pwoi roti nindak muhwi kin wau can he ningat rin bit nye. Noro ningat ne njita dima dem mem ibitri tungwatu ningot ndig dini bi.”
10Yesus pai “Ma jicuk yahagom bigwam jug.” (Mpia ttou nsi dima bon abris nghousi nindig bibor.) Gima rino yahagom igwam jug. Andigpoi nya di isrig yokti imangti ibou sribu muhwi. 11Lene Yesus krau roti nindak muhwi bipai sigyo kep bak Allah leu api kki bitri yo di igwam ei mpia dima yahagom. Nok gima tut wau cem ba, Noni pai sigyo kep leu api bitri yok ba, yahagom igyem njita bindei yok. 12Tirigi igyem njita bindei yok tu lene Yesus pai bak yo di igyai kui Noni “Ma jimbus njita niken keyam leu binhyepo bihi cut mangkrei ei dihyeisi bi.” 13Leu api imbus roti niken di yo dima yahagom igyem leu roti nindak muhwi pima ei bansi simnaibrimigcanti ba, hagom ut.
14Tirigi tungwatu ningot ndig dima yok ingat mindur di Yesus bibon lene ipai biyam “Jit jit, No dini ne Nabi#6:14: Nipas kep Nabi: Angig ayai kep Yoh. 1:21. di ingon ya mem di mikwei ei dihyeisi dini pima ri.” 15Yesus kan tut bipia mbigom yo dima ibidip huk Noni mem gima ita Noni nok nibou ndig mem yok. Gima rino Noni kes yok ei ba, kui ug ei minu nungug tou mangti dima kou.
Yesus mbut nimig ei minyei ngwa dip
(Mat. 14:22-23; Mrk. 6:45-52)
16Mmunti lene yo di igya kui Yesus ijuk ug ei igpong nipimat ba, 17ibri ut bingkwei hanyen ug ei minu ndig Kapernaum ei igpong nite dima ug. Mmun bidindi-kai su lo, Yesus ttau kep yok bigyo. 18Jei bi lene hou di nimig ten bibor kui yokti ba, muk cem tti nindig bibor. 19Yoni itig minyei biyuug ei nahacanti lene ingat lo, Yesus mbut nimig ei minyei ngwa dip bahatap yok. Nok rino ingwes mba tut. 20Noro Noni mbrua kep yok “Ma jittin au. Da pa ri!” 21Lene iba ingon di nggan-triot biya um Noni leu api Noni bri ut bit yok. Lene bindei ba, ide ut ug krau igpong nintig dip kros ei mpia ttou nsi di itig minyei biyuug ndam pima.
Tungwatu nya inggok ser Yesus
22Njapti kui bu lene tungwatu ningot ndig di igwam ei minyei nite dima ug ei mpia ttou nsi di Yesus kes yo ei pima ikan kep bipia annani ut gom ngat kwei piar ei mpia ttou nsi dima. Ba, ikan kep bipia Yesus bri ut dima bit yo di igya kui Noni bi. Yongkom he ibri ut noro Yesus gwam mam bei. 23Jei bi lene timiei minu ndig Tiberias nya ibri ide ut bikwei krau mpia ttou nsi di tungwatu ningot ndig igyem roti di Yesus pai sigyo kep eisi pima. 24Tirigi yo dima ingat lo, Yesus kin yo di igya kui Noni imbut leu su lene iba ut bitot minyei ngwa dip hanyen ug ei minu ndig Kapernaum binggok ser Noni.
Yesus ne roti niyai niyaijo nijep ri
25Tirigi yo dima ittau kep Yesus ei igpong nite dini kwei lene ihig ser Noni “Guru e, akwei apig su i?”
26Yesus buhup “Dipai nijit bije bipia jinggok ser Da drek dip gi jingon dorti tut mindur di dibibon nya bi. Noro drek dip roti di jiyem bindei je pima. 27Ma jicom jahanggwap tut roti di mipror yon au. Noro ma jicom jahanggwap tut roti di bit bon pror yon kan bi di bindei ba, jiyai niyaijo nijep di jo kikau. Munggwom Tungwatu Nipmot yai roti dima bije lewo Nicig Allah ndo brei bipia joi sut Noni tu.”
28Yo dima ihig ser Noni “Niyai midyai mindei leu binhyepo niyai igbit Allah ningon kanti mem nye i?”
29Yesus buhup “Allah ningon kanti mem je rinok gini. Ma jiba jingon com No di Noni cuk kwei su.”
30Yo dima ibuhup “Andigpoi e, abon mindur leu binhyepo ningat bou niyai him ba, niba ningon com Na. Abon mindur mindei i? 31#Kel. 16:4, 15; Mzm. 78:24 Lewo ide pung di intun him nya igyem njita manna ei iggum ndigsi bit leu nok Allah nihyet pai ‘Noni yai roti leu gwamti biyok ba, igyem.’ ”
32Lene Yesus buhup “Dipai nijit bije bipia Musa yai roti leu gwamti bije bi noro Dicig yai roti ningat-ngat leu gwamti bije. 33Lewo roti di Allah yai bije dima ne No di juk kwei leu gwamti biyai niyaijo nijep bak tungwatu dihyeisi dini nya ri.”
34Yo dima ibuhup “Andigpoi e, ayai roti dima binye biniyem ninghig-niker ei siri.”
35Yesus pai biyok “Dinok roti di bindei ba, tungwatu nya igyai niyaijo nijep. No di bit Da minggum bu bi ba, no di ba ningon com Da minggobiau cem bi.
36Noro bit leu nok gi dipai bije. Mbro nok gino jingat Da bou jiyai him tu lo, jiba jingon com Da bi. 37Bikwop yo di Dicig kes yok biDa yahagom minggre kin Da leu api dirok yo di inggre kin Da ei bi sren. 38Lewo dijuk kwei leu gwamti leu binhyepo diyai midyai bit leu Danti dingon kanti bi noro bit leu No di cuk Da kwei ningon kanti. 39No di cuk Da kwei ningon kanti rinok gini. Bikwop yo di Noni kes yok biDa lene hi mipror bi. Noro midiwin yok hanyen leu imai eisi ei Njap Ningwig Honti. 40Lewo Dicig joi sut gima tungwatu nya yahagom ingat igbit Allah Nipmot leu api iba ingon com Noni apino yo dima igyai niyaijo nijep di jo kikau lene diwin yok hanyen leu imai eisi ei Njap Ningwig Honti.”
41Mben Yahudi sindi inso Noni drek dip nihyet di pai biyok bipia Noni ne roti di juk kwei leu gwamti ri. 42Ihig yam ser “No dini ne Yesus di Yusuf nipmot pima rin bi e? Nikan tut nicig-nipmem nya tu! Nggon rino Noni pai sut Nonti bipia juk kwei leu gwamti i?”
43Lene Yesus pai biyok “Ma jinso Da bu au. 44Bit bon hi nggre kin Da kan bi gino Dicig di cuk Da kwei buwak no dima kwei biDa bi. No di kwei ndam Da lene midiwin no dima leu nimai eisi hanyen mem Njap Ningwig Honti. 45#Yes. 54:13 Bit leu nok gi ipas ei Srat Nabi nya nibokti ‘Allah ngginau tungwatu nya yahagom ingonti.’ Bikwop no di miap Dicig nihyet biningon dorti tut ne no dima nggre kin Da. 46Gi dipai dima ndo bipia hi ngat Dicig bou niyai him tu ne bi. Noro Nongkom di juk kwei leu Allah ngat Nicig bou niyai him tu.
47Ma jingon jo kep bipia bikwop no di ba ningon com Da yai niyaijo nijep di jo kikau ei ningonti tu. 48Dani ne roti di yai niyaijo nijep ri. 49Jide pung di jintun him nya igyem manna ei iggum ndigsi noro imai bingwig. 50Gino jiba roti di kwei leu gwamti kin manna binai yam lene roti di kwei leu gwamti bindei ba, yo di igyem kep roti dima imai bi. 51Dani ne roti di yai niyaijo nijep di juk kwei leu gwamti ri. No di yem roti dini miyai niyaijo nijep di jo kikau. Roti di diyai binoni ne dinghui rin ba, diyai roti dini bak tungwatu nya leu binhyepo igyai niyaijo nijep.”
52Imiap nihyet dima lene mben Yahudi isrep yam tut bihig yam ser “Notou No dini yai Nonti ninghui binye ba, igyem i?”
53Lene Yesus pai biyok “Ma jiyok ngon kep bipia gino jiyem Munggwom Tungwatu Nipmot ninghui bijidut ninggrom bi lene bit bon jiyai niyaijo nijep ei jingonti kan bi. 54Bikwop no di yem dinghui ba, dut dinggrom cem lene no dima rino yai niyaijo nijep di jo kikau ei ningonti. Midiwin noni hanyen leu nimai eisi mem Njap Ningwig Honti. 55Lewo dinghui ne njita ningat-ngat rin ba, dinggrom cem ba anggur ngei ningat-ngat ri. 56Bikwop no di yem dinghui bidut dinggrom cem lene no dima ningon jo gom kin Da ba, dingon jo gom kin noni. 57Dicig di cuk Da kwei ne niyaijo nijep nibousi ri. Diyaijo tug hon Noni. Nok gima cem tut no di yem dinghui. Noni yai niyaijo nijep tug hon Da. 58Gi dipai dini tut roti di juk kwei leu gwamti noro dem kep manna di jide pung di jintun him nya igyem bi. Yoni igyem kep manna noro jei bi lene igyaijo ngwig hon nohonti. Noro no di yem roti dini yai niyaijo nijep di jo kikau.”
59Yesus ba nihyet dini bingginau tungwatu nya ei mben Yahudi ide ig mbusyameisi ei minu ndig Kapernaum.
Tungwatu ningot ndig di ibit-bit nyen Yesus ingkwei hanyen
60Tungwatu ningot ndig di ibit-bit nyen Yesus di imiap nihyet dima ipai biyam “Nihyet dima buhun bibor. Tou rimice tut i?”
61Yesus kan tut mun di inso tut. Gima rino Noni hig ser yok “Dihyet dini bindei ba, jingon cut leu bijingkwei hanyen ug rin e? 62Notou mem je gino jingat Munggwom Tungwatu Nipmot tirigi kui hanyen ug ei nitimieisi bou jiyai him i? 63Allah Ninnei Nongkom yai niyaijo nijep bak tungwatu nya. Tungwatu nya ide nisindemti dem mem bi. Dihyet di dipai bije bindei ba, jiyai Allah Ninnei bitut niyaijo nijep di jo kikau ei jingonti. 64Mbro nok gima lo, jibou poi jiba jingon com Da bi.” (Habiei ei nimbie him ne Yesus kan tut yo di iba ingon com Noni bi kin no di mitri Noni.) 65Lene Noni binut nihyet bu bipai “Gima ripo dipai bije bipia gino Dicig buwak tungwagom kwei binggre kin Da bi lene bit bon no dima bit Da kan bi.”
66Hon kep njap dima kui lene tungwatu ningot ndig di ibit-bit nyen Yesus ikes Noni bingkwei leu Noni. 67Lene Yesus hig ser ibou simnaibrimigcan di igya kui Noni “Jeni cem jikes Da bijingkwei leu Da rin e?”
68 #
Mat. 16:16; Mrk. 8:29; Luk. 9:20 Simon Petrus pai biNoni “Tuhan e, nibit tou bu i? Lewo nihyet Ade yai niyaijo nijep di jo kikau binye. 69Niba ningon com Na biningon ngkiem tut bipia Nani ne No Di Ningon Kwes di Allah cuk kwei ri.”
70Yesus buhup “Dani ripo didimig jibou simnaibrimigcan pima bi e? Noro jigom ne nibou ninnei rom nya ri.” 71Yesus nipaisi dima tut Yudas di Simon Iskariot nipmot. Mbro nok gino Yudas nggre kin ibou simnaibrimigcan di igya kui Yesus lo, noni tri Yesus.
Pašlaik izvēlēts:
YOHANES 6: HAD
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties