NITRITI 1
1
Notou Allah pai tes mun nyeng hagom
1Ei nimbie him ngat tirigi Allah kinyon ei nipai tes dihyeisi kin mpia-bbed him kin mun di joti nya hagomti, 2lene dihyeisi dini wer minu bigyo ba, jo sinsiou. Muk di roi sindem biam bidem dihyei nisurti-nipekti hagom ba, nidinditi di dindi-kai nggai kep hagom. Mpe dima ne Allah de nisindemti#1:2: Nipas kep Allah de nisindemti cem kei lene nipas kep Allah Ninnei cem kei lene nipas kep hou di cut kwei leu Allah cem kei lene nipas kep hou di nimig ten bibor cem kei. ugwa-kwei ei minyei ngwa dip. 3#2Kor. 4:6 Lene Allah pai “Ma nipigati piga. Leu api nipigati piga.” 4Lene ningon llei sut nipigati di piga leu api Noni kwas nipigati leu nidinditi bijo ter leu yam. 5Ba, Noni jem nipigati ninyeng “Njap” lene jem nidinditi ninyeng “Mmun.” Nok rino mmun pren leu api njap tek ba, gima ne njap gi nigom ri.
6 #
2Ptr. 3:5
Lene Allah pai bu “Ma niban di bikwas minyei ei mpia ttou nsi can bijo ter leu yam tau.” 7Gima rino Noni pai tes niban di bikwas minyei ei mpia ttou nsi can ba, bihi jo bijehei lene bihi jo anai. Lene dem igbit nipaisi. 8Lene Noni jem niban di bikwas minyei leu yam dima ninyeng “Mpia-bbed Him”. Nok rino mmun pren leu api njap tek ba, gima ne njap gi nican ri.
9Leu api Allah pai bu “Ma minyei gi hi di jo ei mpia-bbed him nibehei pima biam sok yam ei gom leu binhyepo dihyei ninjek dip tau ei nibreisi.” Lene dem igbit nipaisi. 10Lene Noni jem dihyei ninggati dima ninyeng “Mam Bei” ba, jem minyei di biam sok yam ei gom ninyeng “Muk Ngei”. Lene ningon llei tirigi Noni ngat mun di Noni pai tes dima. 11Leu api Allah pai bu “Ma njita di bon ningan kin biei di bon ningat kin ningan hagom hei bidem dihyei nisurti-nipekti hagom leu binhyepo ningan hei bidem ninyeng hagom.” Lene dem igbit nipaisi. 12Gima rino njita ngan kin biei ngat kin ningan hagom hei bidem dihyei nisurti-nipekti hagom. Lene Allah ningon llei tirigi ngat mun di Noni pai tes dima yok. 13Nok rino mmun pren leu api njap tek ba, gima ne njap gi niningai ri.
14Lene Allah pai bu “Ma nipigati nibousi nya tau hak ei mpia-bbed him leu binhyepo bikwas njap leu mmun ba, bindo igbit njap kin ari bingwam kin bed di biang hou kin bed di biang mpia ngei nijeisi nya hagom. 15Nipigati nibousi nya mipiga ei mpia-bbed him ba, com digai dihyeisi.” Lene dem igbit nipaisi. 16Nok gima lene Allah pai tes nipigati nibousi di nindig ningat can. Gi hi di mpia njap di nindig bibor rinok nibousi mem njap lene gi hi di bed mmun di nindig lai-lai de rinok nibousi mem mmun. Lene Noni pai tes ham mpia-bbed him cem hagom. 17Lene Noni kon nipigati nibousi ningat can dima hacem ei mpia-bbed him leu binhyepo com digai dihyeisi. 18Ba, nipigati nibousi nya hi nok nibousi mem njap lene hi nok nibousi mem mmun. Leu binhyepo kwas nipigati ter leu nidinditi. Leu api Allah ningon llei tirigi ngat mun di Noni pai tes dima yok. 19Nok rino mmun pren leu api njap tek ba, gima ne njap gi nibitai ri.
20Lene Allah pai bu “Ma wau nya kin mun di ha minyei kan nya hagom ngwig ei muk ngeisi ba, ha nya hagom dimba-dimba nyen ei hou him.” 21Gima rino Allah pai tes mindhe-ndhe di nindig krop di igyaijo ei muk jou kin mindhe-ndhe hi gom hi gom di igyaijo ei minyeisi kin ha nya hi gom hi gom cem. Lene ningon llei bibor tirigi ngat mun di Noni pai tes dima yok. 22Lene Noni njei mun di kei bak mun dima yok hagom bipai bak mun di igyaijo ei minyeisi “Suar jidigek kep muk ngeisi nisurti-nipekti hagom.” Lene pai bak ha nya cem “Suar jidigek ba, jimangti kum eisi kikau.” 23Nok rino mmun pren leu api njap tek ba, gima ne njap gi nimuhwi ri.
24Lene Allah pai “Ma mindhe-ndhe nya igya bidem dihyei nisurti-nipekti hagom leu binhyepo idigek kep mpia. Gi hi di bong bigbehei nya kin gi hi di tungwatu nya ighyen kep nya cem gi nindig nya kin nimien nya hagom.” Lene dem igbit nipaisi. 25Gima rino Noni pai tes mindhe-ndhe nya bitug kep dihyeisi hagom ba, ningon llei tirigi ngat mun di Noni pai tes dima yok.
26 #
1Kor. 11:7
Lene Allah pai bu “Nogindini ma ipai tes tungwatu nya noyam kin nyeni ba, idat nyeti. Leu binhyepo inyeng tak kep wau nya kin ha nya kin mindhe-ndhe nindigsi nya hagom. Gi hi di tungwatu nya ighyen kep kin gi hi di ibong bigbehei nya kin gi nindig nya kin nimien nya cem hagom.” 27#Mat. 19:4; Mrk. 10:6 #Kej. 5:1-2 Gima rino Allah pai tes tungwatu nya ba, bingon noyam kin Nonti. Noni pai tes no di pinai kin no di sop cem. 28Lene Noni njei mun di kei bak yoni bipai “Ma jiyai jimunggwom bat nya imang bibor leu binhyepo jide nintun him yamti di bram yam nya midigek kep mpia bikieng kep dihyei nisurti-nipekti binyohou hagom. Dita jeni bijinyeng tak kep wau nya kin ha nya kin mindhe-ndhe di ibong bigbehei nya hagom. 29Lewo dipai tes njita di bon ningan kin ningat kin biei ngat di bon ningan cem hagom bije nok jide njita. 30Noro mem mindhe-ndhe nya kin ha nya hagom lene dipai tes mintu-minta kin mahai meng hagom bigyem nok ide njita.” Lene dem igbit nipaisi. 31Lene Allah ngig niyai kep mun di Noni pai tes nya hagom ba, ningon llei bibor. Nok rino mmun pren leu api njap tek ba, gima ne njap gi nimuhwindagom ri.
Pašlaik izvēlēts:
NITRITI 1: HAD
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties