Luka 21
21
Kɛɛ-Musila Kɔ-Fan
(Maraka 12.41-44)
1Yisa ye Alla-Bato-Bɔn la tumɛ min, a ya nɔnfulu-tigi donu yen, anu bi anuna kɔ-fannu sala wodi sa tinɛ rɔ nyɔ. 2A ya kɛɛ-musi bolo-kolɔn do fanan yen. A ye wodi-mɛsɛni fila sala a rɔ. 3Yisa ko, “N bi a fɔla wo ye ko kɛɛ-musi bolo-kolɔn kɛ ara min sa, wo kolo doinu bɛɛtɛ ko. 4Bawo doinu ya min sa, anu ya wo bɔ anuna nɔnfulu-wɛ denu tɔ. Kɔnɔ iko ale bolo-kolonyanɛ ye nya min, a ara a beli-fan bɛɛ sa a rɔ.”
Alla-Bato-Bɔn Wayan-Koe Fɔ-Koe
(Matiyu 24.1-2; Maraka 13.1-2)
5Ala karan-dan donu bi kumala nun ka a bɛn Alla-Bato-Bɔn wara-koe ma. Kuru-nyimɛ minnu bi nyɔ, anubɛ mɔgɛnu ya kɔ-fan minnu di Alla ma Bato Bɔnla ko la, anu bi kawala wonu ma. Yisa ko, 6“Wo ye min bɛɛ yenna kɛ la, tumɛ ye nala, kuri kɛnu, hali kelen bɛrɛn ti to a gbɛ rɔ. A bɛɛ ra si nyɛnsɛn.”
Kawandili ka a Bɛn Tɔrɔyɛ Ma
(Matiyu 24.3-14; Maraka 13.3-13)
7Anu ya Yisa manyinika ko, “Karan-mɔgɔ, kɛ si ma tumɛ nyamintan? Tamasere nyamintan si a yira ma la ko a kɛ-tumɛ ara ke?”
8Yisa ya a yabi ko, “Wo ni a ma wo fɛrɛma. Wo kana sɔn, mɔgɔ-wo-mɔgɔ ni wo mayuwaya bawo mɔgɔ siyaman si na n tɔgɛ rɔ ka a fɔ ko, ‘Ale le nde la!’ Anu si a fɔ fanan ko, ‘A wati ara ke!’ Kɔnɔ wo kana bila wonu fɛ. 9Wo wa kɛlɛ-koenu anubɛ murutiya-koenu namɔɛn tumɛ min, wo kana kilan. A fɛrɛ sa fɔ wonu ni ma kɔnɔ ala ban ma wonu na fɔlɔn.”
10Wo kɔma, Yisa ko, “Sibolo-gbɛrɛnu si wuli anu nyɔgɔn kan ma. Nyamanɛnu si wuli anu nyɔgɔn kan ma. 11Dugu-yɛrɛyɛran si kɛ anubɛ kɔnkɔ-fitinɛ anubɛ kiraya-fitinɛnu kan tina siyaman tɔ. Ko-makilannɛnu anubɛ tamasere-wɛnu si kɛ san-kole rɔ fanan. 12Kɔnɔ yanni koe kɛ bɛɛ ni ma, anu si wo bira ka wo bɛnsɛnkɔninya. Anu si wo ladon Yahudiya-dina-bɔnnu na ka wo kiti ka wo mara. Anu si ta wo la mansɛnu anubɛ kun-tiginu bara ndela ko la. 13Wo si ma lafɛrɛ la wo ye ka kibara-nyimɛ lake. 14Yanni a wati ni ke, wo ni wo hɛnkili masɔ ko wo si wo nyɛrɛ fɛka nya min, wo kana hɔn wola ko la 15#Luka 12.11-12 bawo n si kumɛnu don wo da rɔ ka hɛnkili di wo ma. Wo si min fɔ, hali wo yogo kelen ti ke wo sɔsɔla ka wo nɔ. 16Wo sɔrɔnnɛnu wo, wo na-kelen-nyɔgɛnu wo, wo kebila-nyɔgɛnu wo, wo diyana-mɔgɛnu wo, wonu dama si wo don wo yogenu bolo tɔ, ado anu si donu faga wo rɔ. 17Bɛɛ si wo kɔn ndela ko la 18kɔnɔ hali wo, wo kun-sigi kelen bɛrɛn ti to-a-rɔ. 19Wo ni wo sɔ yiri bawo wo si ni-bɛrɛ sɔrɔn wo le fɛ.
Yerusalɛm Kasara-Koe Fɔ-Koe
(Matiyu 24.15-21; Maraka 13.14-19)
20“Wo wa Yerusalɛm lafoonɛ yen kɛlɛ-dannu na tumɛ min, wo si a lɔn worɔ ko a kasara-tumɛ ara gbɛrɛn. 21Minnu bi Yudiya nyamanɛ rɔ, wonu ni anu buri kɔnkɛnu tɛma. Minnu bi soe burɔ, anu ni bɔ nyɔ rɔ. Minnu bi sɛnɛ rɔ, wonu kana sɛgi soe. 22#Hoseya 9.7 Wo bɛɛ si ma tɔrɔya-telenu na, ado Allata kitabu ya min fɔ, wo bɛɛ ni bɔ-a-la. 23Wo telenu tɔ, gbalo-belebele si na musu-kolomɛnu anubɛ denbɛnu kuma! Gbalo-yogoma-wɛ si na nyamanɛ kɛ rɔ. Allala diminyɛ si na mɔgɛ kɛnu kan ma. 24Donu si faga faan la. Donu si ta yɔɔnyɛ rɔ nyamanɛ bɛɛ rɔ. Sibolo-gbɛrɛnu si Yerusalɛm radɔn ha anuta wati ban tumɛ.
Hadama-Dan Na-Koe
(Matiyu 24.29-31; Maraka 13.24-27)
25 #
Aiseya 13.10; Isikiyɛli 32.7; Yowɛli 2.31; Lankɛnimayɛ 6.12-13 “Tamaserenu si sa tele anubɛ karɛ anubɛ lolenu ma. Duninya-mɔgɛ bɛɛ yigi si tɛgɛ ka kilan kɔgɔ-yi wɔyɔ-kan anubɛ a mɔrɔn-wɛla ko la. 26Min bi nala kɛla duninya bɛɛ rɔ, anu bi wo makɔnɔna. Mɔgɛnu kuma si kɔ ha anu ni kirɔn-a-la bawo san-koleta-sɛnbɛnu ta si maga ka bɔ anu gbɛ rɔ. 27#Daniyɛli 7.13; Lankɛnimayɛ 1.7 Nba, nde, Hadama-dan si bɔ gbɛ rɔ wo wati rɔ. N bi nala banda-fin-gbɛ rɔ sɛnbɛ anubɛ gbiliya-ba rɔ. 28Koe kɛnu da wa bira tumɛ min, wo ni wo sɔ gben! Wo ni wo kunyɛnu nasɔ bawo wo kisi-tumɛ ara gbɛrɛn.”
Toro-Kurita Karan
(Matiyu 24.32-35; Maraka 13.28-31)
29Wo kɔma, Yisa ya tili kɛ tɛgɛ anu ye. A ko, “Wo ni wo hɛnkili to toro-kuri anubɛ kɔlɔma-toe bɛɛ ko. 30Wo wa anu yen anu matiila tumɛ min, wo si a lɔn worɔ ko samɛ ara gbɛrɛn. 31A ye wo nya na le, wo wa koe kɛ bɛɛ yen mala tumɛ min. Wo si a lɔn worɔ ko Allala mansayɛ na-tumɛ ara gbɛrɛn.
32“Wo ni wo hɛnkili to kɛ ko! Minnu bi anu kɛndɛ la kɛ wati rɔ, yanni wo bɛɛ ni faga, koe kɛ bɛɛ si bɔ-a-la. 33San-kole anubɛ dugu-kole si tenbi kɔnɔ nna kumɛ ti tenbi mumɛ!
Ya Lakalan-Koe
34“Wo ni a ma wo fɛrɛma wo nyɛrɛla ko la! Wo kana wo nyɛrɛ ma nugulamɛ anubɛ gbɛɛ-minnɛnu na. Wo kana hɔn niyi-kɛ-koenu na. Ni wo ya wonu ma, tele wo si wo latɛrɛna. 35A si duninya-mɔgɛ bɛɛ latɛrɛna iko gbɛrɛ si soge latɛrɛna nya min. 36Wo ni wo yɛ lakalan ka madiyali kɛ tuma-wo-tuma alako wo ni sɛnbɛ sɔrɔn ka tanka koe kɛ bɛɛ ma minnu si ma. Wo ni sɛnbɛ sɔrɔn alako wo si wo sɔ nde, Hadama-dan yakɔrɔ nya min.”
37 #
Luka 19.47
Tele-wo-tele, Yisa ye mɔgɛnu karanna Alla-Bato-Bɔn la. Suyi wa ke tumɛ min, a ni ta ki Ɔlifi kɔnkɛ kuma. 38Mɔgɛnu si suri subaga-dɛ ma ka ta Alla-Bato-Bɔn la anu tole masɔ tinɛ a la.
Pašlaik izvēlēts:
Luka 21: KCLB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Kuranko Common Language Bible © The Bible Society in Sierra Leone, 2006.