Matewu 10
10
Ta Yesu loko ahlawula vapostola va khume ni vambirhi
(Marka 3:13-19; Luka 6:12-16)
1Loko Yesu avitanile vajondzisiwa va yena va khume ni vambirhi, avanyika matimba yohlongola mimoya ya chaka ni matimba ya kuhanyisa hinkwavu lava vaxanisiwaka hi mavabzi ya tinxakaxaka.
2Mavito ya vapostola lava va khume ni vambirhi hi lawa: Wosungula i Simoni lweyi ativiwaka hi vito ra Petrosi, kulandza Andreya makwavu, na Yakobe n'wana Zebedewu, na Yohani makwavu; 3Filipi na Bartolomewu; Tomasi na Matewu muhakelisi wa rhesa; Yakobe, n'wana Alfewu, na Tadewu; 4Simoni wa Kanana, na Yudasi Iskariyota, lweyi angaxenga Yesu.
Ta kurhumiwa ka lava va khume ni vambirhi
(Marka 6:7-13; Luka 9:1-6)
5Yesu arhuma lava va khume ni vambirhi, ndzhaku ka loko avalayile aku: Mingatshukeni miya ka vamatiko; nasvona mingangheneni madoropeni ya Vasamariya, 6kambe yanani ka Vaisrayele, lavalahlekeke kufana ni tinyempfu. 7#Vona ni: Luk. 10:4-12. “Kutani loko mili karhi mifamba, chumayelani miku: ‘Mfumu wa matilo wu le kusuhi.’” 8Hanyisani lavavabzaka, mipfuxa vafi, mibasisa va nhlokonho, mihlongola madimoni. Minyikiwile mahala; na n'wina, nyikani mahala. 9Mingatshukeni miteka male ya golidi kumbe ya silivhere hambi ya koporo asvikhwameni sva n'wina; 10#Vona ni: I Kor. 9:14; I Tim. 5:18. mingafambeni ni nkwama wa timbuva ta ndlela, male kumbe sviyambalu svoncinca, hambi masandhazi, kumbe nhonga, hikuva mutirhi afaneliwa hi svakuja sva yena.
11Hinkwaku lomu minghenaka kona, doropeni hambi asvidoropanini, lavani njangu lowu wungamiyamukelaka, kutani mitshama ka wona kukondza misuka. 12Loko minghena muntini, xewetani. 13Loko munti wolowo wufanela, kurhula ka n'wina akute henhla ka wona; kambe loko svingawufaneli, kurhula ka n'wina akutlhelele ka n'wina. 14#Vona ni: Mint. 13:51. Kutani loko vangamiyamukeli, kumbe loko vangayingisi marito ya n'wina, muntini wolowo, kumbe doropeni rolero, humani miphuhuna ntsurhi milengeni ya n'wina. 15#Vona ni: Mat. 11:24; Gen. 19:24-28. Nitiyisile nili ka n'wina: Hi siku ra kuyavanyisa, tiko ra Sodoma na Gomora ritavevukiseliwa kutlula doropa rolero.
Ta maxangu lawa mangatahumelela
16 # Vona ni: Luk. 10:3. Vonani, nimirhuma na mifana ni tinyempfu xikarhi ka mahlolwa; hi kolaho ke tlharihani kufana ni tinyoka, miva lavorhula kufana ni svituvana. 17#Vona ni: Mar. 13:9-11; Luk. 12:11-12; 21:12-15. Tivoneleni, hikuva vanhu vataminyiketa atihubzeni, vamiba hi minkhavi masinagogeni ya vona. 18Nasvona mitayisiwa mahlweni ka tindhuna ni le mahlweni ka tihosi hikolaho ka mina, lesvaku miveka vumboni ka vona ni ka vamatiko. 19Kambe siku leri vaminyiketaka ka vona, mingakanakaneni hi lesvi mingatavula svona ni mavulavulela yakona; hikuva svosvo, mitanyikiwa svona nkarhini wolowo. 20Ahi n'wina mingatavulavula, kambe i Moya wa Tatana wa n'wina lowu wungatavulavula hi n'wina.
21 # Vona ni: Mar. 13:12; Luk. 21:16. Makwavu atanyikela mun'wana makwavu lesvaku adlawa, ni tatana atayendlisa svosvo ka n'wana wa yena; vana vatapfukela vapsali va vona, vavadlaya. 22#Vona ni: Mat. 24:9,13; Mar. 13:13; Luk. 21:17. Mitavengiwa hi vanhu hinkwavu hikolaho ka vito ra mina; kambe lweyi angatatiyisela kufika makumu, hi yena lweyi angataponisiwa. 23Loko vamixanisa doropeni leri, tsutsumelani ka rin'wana, hikuva nitiyisile nili ka n'wina: N'wana-wa-Munhu atahumelela na mingasitlhanganisa madoropa hinkwawu ya Israyele.
24 # Vona ni: Luk. 6:40; Yoh. 13:16; 15:20. Mujondzisiwa ahi nkulu ka mujondzisi wa yena, ni xikarawa ahi nkulukumba ka n'winyi wa xona. 25#Vona ni: Mat. 9:34; 12:24; Mar. 3:22; Luk. 11:15. Sviringene loko mujondzisiwa angahundzuka lweyi afanaka ni mujondzisi wa yena, ni loko xikarawa xingahundzuka lexi xifanaka ni n'winyi wa xona. Loko n'winyi wa njangu vamuchulile lesvaku i Belzebule, ka va njangu wa yena svitatlula mpimo.
Ta lweyi afanelaka kuchaviwa
(Luka 12:2-7)
26 # Vona ni: Mar. 4:22; Luk. 8:17. Hikolaho mingatshukeni michava vanhu, hikuva aku na xilo lexingafunengetiwa lexingatakala xingafununguliwi, ni xilo xa xihundla lexingatakala xingativiwi. 27Lesvi nimibzelaka svona axinyameni, svivuleni kuvonakaleni; ni lesvi misvitwaka svihleveteliwa tindleveni, svihuweleleni asvichungweni sva tiyindlo.
28Mingatshukeni michava lavadlayaka miri, na valihava matimba yodlaya moya; kambe chavani lweyi anga ni matimba yolovisa moya ni miri wa munhu Tiheleni.
29Xana svindzingiri svimbirhi asvixaviwi hi “sentavhu” yin'we ntsena ke? Kasi akungawi ni xin'we xa svona hansi, handle ka kurhandza ka Tatana wa n'wina. 30Xilesvo, loko kuli n'wina, hambi yili misisi ya tinhloko ta n'wina yihlayiwile hinkwayu. 31Hikolaho mingachaveni; n'wina mitlula svindzingiri lesvotala hi risima.
Ta kuvula Kriste mahlweni ka vanhu
(Luka 12:8-9)
32Mani na mani lweyi angatanivula mahlweni ka vanhu, na mina nitamuvula mahlweni ka Tatana wa mina lweyi anga matilweni. 33Kambe mani na mani lweyi angatanilandzula mahlweni ka vanhu, na mina nitamukaneta mahlweni ka Tatana wa mina lweyi anga matilweni.
Matlhari matshan'weni ya kurhula
(Luka 12:51-53; 14:26-27)
34Mingatshukeni mipimisa lesvaku nitile kutisa kurhula misaveni; kambe, nitisa tlhari, kungali kurhula. 35#Vona ni: Mik. 7:6. Hikuva nitile kutahambanisa
“‘munhu ni tatana wa yena,
nhwanyana ni mamana wa yena,
mamanyana ni n'wingi wa yena;
36ni svirho sva njangu wa munhu
svitava valala va yena.’ ”
37Lweyi arhandzaka tatana wa yena kumbe mamana wa yena kutlula mina, asvimufaneli kuva wa mina; svitano ni lweyi arhandzaka n'wana wa yena waxinuna kumbe waxisati kutlula mina. 38#Vona ni: Mat. 16:24; Mar. 8:34; Luk. 9:23. Nasvona, lweyi angatekiki xihambanu xa yena anilandza anganifaneli. 39#Vona ni: Mat. 16:25; Mar. 8:35; Luk. 9:24; 17:33; Yoh. 12:25. Lweyi alavaka kutihlayisela vutomi bza yena, atalahlekeliwa hi bzona; kambe lweyi alahlekeliwaka hi vutomi bza yena hikolaho ka mina, atabzikuma.
Ta hakelo
(Marka 9:41)
40 # Vona ni: Mar. 9:37; Luk. 9:48; 10:16; Yoh. 13:20. Lweyi amiyamukelaka, waniyamukela; ni lweyi aniyamukelaka, ayamukela lweyi anirhumeke. 41Lweyi ayamukelaka muprofeta hi lesvi anga muprofeta, atakuma hakelo yofana ni ya muprofeta; ni lweyi ayamukelaka lweyi alulameke hi lesvi anga lweyi alulameke, atakuma hakelo yofana ni ya lweyi alulameke. 42Nitiyisile nili ka n'wina: Mani na mani lweyi anyikaka hambi wuli ndzheko wa mati yotitimela ka mun'we wa lavatsongo lava, hi kutiva lesvaku i mujondzisiwa wa mina, angakala angapfumali hakelo ya yena.
Pašlaik izvēlēts:
Matewu 10: NTC2014
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Novo Testamento Changana © Bible Society of Mozambique, 2014.