Yohanes 19
19
1Asogo egesema re, at Pilatus pobuk ’gwegeitik e, Yesus ’go’bu woruagoluk wogentesi. 2Asogo wogentesimu, is ap tentara a’ge en ap ’gaindek a’ge ene’gare-’gare ’buktak onobogwi ai ’gela’ge, orlok a’bik a’ge hwanesogo Yesus a’gul pam ’buktak pogulat, sum orogole wibe’gen werak a’ge ’gela’ge, ap ’gaindek ’buktak onobogwi a’ge ’gela’ge ’buktak pogulat, tigisa. 3Asogo tigisarik e, enebe hopha ’gugulat e, disogo mo’gulegisa,
“Aphwami Yahudi a’ge onue ’gain onuk logo a’ge ano harat hegi o, ohuk!” oluk mo’gulogulat orogole pam ene’gik sapu a’ge en worogu legesa. 4Asogo worogu legesema, at Pilatus ano pobuk is ap Yahudi a’ge il entil liplau wagarik e, disogo mo’gulentesi,
“Ap yu logwe. Yethemit! At wene ebam pegep a’ge ’bele’gegis a’ge re, at wiak mesik tegeimu hegi modok erlak ai his henaluk emagoluk lebikpou wegi o,” oluk mo’gulentesimu, 5at Yesus ’gare-’gare ’gela’ge orlok a’ge ano a’gul pam ’buksogoat, ye, sum orogole wibe’gen werak a’ge ’gela’ge ano ogo ’buksogoat, liplau wagama, at Pilatus en e,
“Ap yu henil yethau manis!” oluk mo’gulentesimu, 6is ap Allah eiye a’ge onuelak ’gaindek emin, is ap Allah owi werik ’gwelakharok welagai a’ge emin, Yesus ebe enil hegesarik eniak loksogoat ngai-wai ogulat e,
“At ebe e pam edikpoluk werip a! E pam edikpoluk werip a!” oluk eniak ningsogoat mo’gulegisema, at Pilatus en e, disogo mo’gulentesi,
“An en, at wiak tegei a’ge mesik hegi modok erlak ai en e, his honu’gwarek honumu en at ebe wik-wok e pam edikpoluk werip o,” oluk mo’gulentesimu, 7is ap Yahudi a’ge ebano en e, disogo mo’gulegisa,
“At en eselat e,
An nebe Allah omlogo, egei ai en, wene Allah en nenesa’go weregei wene, nis en togu lege ai hegitsogo, at ebe woru elirat o. Holuk e, woru opogu lege o,” oluk mo’gulegisa. 8Wene asogo mo’gulegisema, at Pilatus esa’go hwelegeitik e, ebenagaikmu ogorlok modok aga. 9Asogo ogorlok modok agarik e, Yesus woluk togolik owene enebam pogulat, no’gorlogulat, tugumu ebano ’gwegeitik, disogo mo’gulentesi,
“Hat howi edip o ’geba,” oluk mo’gulesi a’geat de, at Yesus en o’go u erlakma en mo egei. 10Iak erlak mo egeimu, at Pilatus en pobuk disogo mo’gulesi,
“Hat an nemin weneane u hebit a? Hat herle hebilogo ukhobo emin, ye, e pam edikhoboluk wathobu emin, an eiye welegi ano, hat heperlak a?” oluk mo’gulesimu, 11at Yesus en e, disogo mo’gulesi,
“At Allah en e,
Hat en wene aphwami enebam pasulat, no’gorliselat, taga lomup o, oluk hat eiye hebelep erlakma re, hat en wene nebam po miayat o. Ai en e,
Hat wiak tigen, oluk wene hebam weiyat ’gela’ge oruak a’geat de, at ap mesik en an nebe wokho hat he’gik pam nobou waga a’ge ai nak e, wiak tegei, oluk wene lok ’gela’geat ebam oruak o,” oluk mo’gulesimu, 12at Pilatus esa’go hwelegeitik e, Yesus herle hebilogo paigoluk walhesi a’geat de, is ap Yahudi a’ge ebano eniak loksogoat ngai-wai ogulat e, disogo mo’gulegisa,
“Sa en,
An nebe ’gain onuk logo a’ge, oluk u’gwarek en oso holuk e, ap ’gain Kaisar emin il ’belak a’geat o. Holuk e, hat en at ai herle hebilogo lebikpagun holuk e, hat ’gain Kaisar emin ’bali a’ge puk o. Il ’belak a’geat oluk, hopul o,” oluk mo’gulegisema, 13at Pilatus esa’go hwelegeitik, Yesus ebe woluk liplau wagarik e, o seli ebe onuk Helep Delakma ogwi a’ge ai, is aphwami Ibrani a’ge eniak pam e, onuk Gabata ogu legesema eba e delakma hweriogo welat, wene enebam pogulat, no’gorlogulat, tugumu ebano huraga. 14Huraga ai erlige re, hubet o’gwe seni Paskah nil louwogoluk, di a’ge yu a’ge odoksogo pogukhwe, jam 12 ’gela’ge erlige ’birl-’burl huraga. Huragarik, aphwami Yahudi a’ge disogo mo’gulentesi,
“Logwe. Ap yema his honue ’gain onuk logo a’ge yu henil hemit o!” oluk mo’gulentesimu, 15is en eniak ningsogo ngai-wai ogulat e,
“At ebe werip o! Werip o! E pam edikpoluk werip o!” oluk mo’gulegisema, at Pilatus en e, disogo mo’gulentesi,
“An en his honue ’gain onuk logo a’ge yu, e pam edikpoluk woru opogu legep a?” oluk mo’gulentesimu, is ap Allah eiye a’ge onuelak ’gaindek en e, disogo mo’gulegisa,
“Nis nonue ’gain onuk logo a’ge mesik erlak o. We, Kaisar emategat o,” oluk mo’gulegisema, 16at Pilatus en e, Yesus ebe e pam edikpoluk woruagoluk wogentesi. Asogo wogentesimu re, Yesus ebe woluk liplau wegesa.
At Yesus e pam edikpoluk werigisa wene
(Matius 27:32-44; Markus 15:21-32; Lukas 23:26-43)
17Woluk liplau womogoluk e, e Yesus ebe edikpoluk woru a’ge ano u’gwarek en woluk louwagoluk emarlo pam pegesarik, duk nis neniak pam e, onuk Ena’guluak ’Belak duk pam u ’gela’ge, is aphwami Ibrani a’ge eniak pam e, onuk Golgota ai liplau wegesa. 18Wegesarik e, ebano Yesus ebe e pam ’burl edikpoluk e, is ap muon ’biren eminat abel pema-pema edigenebegesa. 19Asogo edigenebegesema re, at Pilatus en e, pelal disogo oluk wesi,
“YESUS OWI O NAZARET A’GE APHWAMI YAHUDI A’GE ONUE ’GAIN ONUK LOGO A’GE,” oluk pelal wokho wogentesimu re, e Yesus edikpegesa a’ge ano pam dopnorak pegesa. 20Pelal ai re, aphwami Ibrani a’ge emin, Roma a’ge emin, Yunani a’ge emin, eniak pam wokho pesimu oruakma re, o kota en e, Yesus e pam edikpoluk werigisema ebano walek puk. We, horogatma oluk e, aphwami Yahudi a’ge a’bigat pelal wogo a’ge ano onuk mo’gulogu legesa. 21Asogo pelal wesimu, is ap Allah eiye onuelak ’gaindek en Pilatus disogo mo’gulegisa,
“Aphwami Yahudi a’ge onue ’gain onuk logo a’ge oluk, pelal wasu puk o. We, disogo wemen,
Ap yu en eselat e,
An aphwami Yahudi a’ge onue ’gain nonuk logo a’ge, egei, oluk wemen o,” oluk mo’gulegisa a’geat de, 22at Pilatus en e, disogo mo’gulentesi,
“An pelal wegi a’ge aiat wogo welemak o!” oluk mo’gulentesi. 23Asogo mo’gulentesimu, is ap tentara a’ge en, Yesus ebe e pam edikpegesarik e, osum no’gorlak enebe lo’bok mesik-mesik so’busogo horlouwogoluk, sum ebe uganatma re, me’gisogo pegesa. Ye, osum o’borl o’gwe a’ge daksogo egeik a’ge puk. At e, yat ’bekhit luktak egeik a’ge ’buktak welaga a’ge horlouwogoluk e, 24#Mzm. 22:18is-is nak agaikhe en e, agaikhe mo’guleselat e,
“Sum yu ’balul erlak o. We, sa ’gela’ge horlouwa oluk helebe’gen hwik-hwik a’ge tuok o,” oluk egesa. Asogo egesa ai re, Allah iak pelal wokho pegesema, disogo oruak o,
“An nosum no’gorlak so’burontoluk e,
nosum o’borl o’gwe a’ge horlouwogoluk helebe’gen hwik-hwik tigisa o,”
oluk egesema pelal wokho pegesa a’ge oruak hegitsogo, is ap tentara a’ge en asogoat tigisema demat aga ai o. 25Asogo tugukhwe, Yesus ia emin, ia ot emin, hwe Maria ap Klopas ugwe emin, hwe Maria owi o Magdala a’ge ano emin, e Yesus ebe edikpoluk werigisema eragam edik welegesa. 26At ia emin, osi iak wogu legesa a’ge mesik ede hwedik modok welago a’ge ano emin, eragam asogo edik oruakma il entesirik, at ia mo’guleselat e,
“Hwe yu nia. Hat homlogo aiat o,” oluk mo’gulesirik, 27at ot ano mo’guleselat e,
“Not. Hat hia aiat o,” oluk osokhwe erianoat Yesus ia ano, at ot ano emin welemagoluk owi pam woluk laga.
At Yesus ebe waraga wene
(Matius 27:45-56; Markus 15:33-41; Lukas 23:44-49)
28 #
Mzm. 69:21; 22:15 Arat asogo tolukmu en, at Yesus ogola en e,
“Di wene yu wene ’berlek arat ologun wusogo tegis o,” oluk alukmu no oluk e, Allah iak pelal wokho pegesa a’ge demat emagoluk,
“An ik nele o,” egei. 29Asogo egeimu, eba en ik e’be pam anggur e’gen a’bosu esik wiak a’ge na’gogo oruakma, hwali sabus ’gela’ge pam udalogo e paiyo pam dongtak poluk e, Yesus emdema pei ligegesa. 30Asogo wogegisema, oduk nekhesirik e, disogo egei,
“Arat tegis o!” oluk, odogun ’gonu otluk ebe arat lebeksogo waraga.
At Yesus abel akhit wa’gun dainsogo
werigisa wene
31Ai erlige re, hubet o’gwe agauwa sabit a’ge pam Allah paget weat wolomogoluk tigisa. A’geat de, agauwa sabit a’ge pam Allah paget weat nin hwedik nan hwedik welagai ’gela’ge puk. We, muat logo a’ge wolomogoluk no oluk e, disogo egesa,
“Agauwa Allah paget weat oruakhwe is enebe e pam edigenebegesa a’ge ai werak a’ge e pamat wolom e, nenebit o,” oluk, ap werak ebano onuak porloksogo poluk, hebilogo ’belabonobo ’bumogoluk, is ap Yahudi a’ge en, at Pilatus ’gonu mo’gulesi legesa. 32Asogo ’gonu mo’gulesi legesema, is ap tentara a’ge ebano wegesarik e, is ap Yesus emin e pam edigenebegesa a’ge ebano mesik oyuk porloksogo pogulat, mesik ogo oyuk porloksogo pogulat, tigisa. 33Asogo tigisarik e, Yesus enil ’gwelakhegesa ’gal arat waragama re, oyuk porlok tu erlakma en ukpegesa. 34Asogo ukpegesa a’geat de, is ap tentara ebano a’ge mesik en e, Yesus abel akhit wa’gun dainsogo weregeimu, ele’gwe en emep emin, ik emin, liplau waga. 35Asogo tegei a’ge ai, his pobi tuagoluk, ap mesik il welaga a’ge en wene ai obok ’baksogo oso yo. Ye, at en ogo re,
“Demat nil dokhumsogoat hegirik obok ’baksogo mo’gulentegis o,” oluk e, at alugat o. 36#Kel. 12:46; Bil. 9:12; Mzm. 34:20Wene asogo aga ai re, Allah iak pam pelal disogo oluk wokho pegesema oruak o,
“At uak porlok tua modok erlak o,”
oluk egesa. 37#Zak. 12:10; Wah. 1:7Ye, mesik e,
“At ebe wa’gun pam dainsogo werak poluk enil welema o,”
oluk, egesema Allah iak pam pelal wokho pegesa a’ge oruakma demat emagoluk asogo tigisa ai o.
At Yesus ebe werak owikmu pei legesa wene
(Matius 27:57-61; Markus 15:42-47; Lukas 23:50-56)
38Asogo tigisema, ap Yusuf, owi o Arimatea a’ge, Yesus eragam ’gwegeitik, ap Yahudi a’ge ogorlok en e, iak hisakho wasu laga a’ge ai en, Yesus werak waigoluk ’gain Pilatus ’gonu mo’gulesi laga. Asogo ’gonu mo’gulesimu, at Pilatus en e,
“I o. Op o,” oluk mo’gulesimu, at Yusuf en Yesus werak ano wau waga. 39#Yoh. 3:1,2Asogo wau wagama, at Nikodemus, naduk huba’go Yesus e’bek waga a’ge ano en, e mur e’gen a’bosu emin, e mesik a’bosu e’ben op a’ge emin, ne’garlok-he’garloktak poluk e’gin e, 30 kilo ’gela’ge woluk Yusuf emin wegesa. 40Asogo emin wegesarik e, is aphwami Yahudi a’ge en werak a’ge salonobogwi ’gela’geat a’bosu egilogo sum lenan a’ge pam e’girlogo pegesa. 41At Yesus e pam edikpoluk werigisema eragam ebano yabuk e owi yogo a’ge mesik welaga. Yabukmu ebano owik mesik ’gerat ebale heli’gogo pegesa a’ge werak mesik owan po erlak a’ge welaga. 42Asogo oruakma, hubet o’gwe, is aphwami Yahudi a’ge agauwa sabit a’ge pam Allah paget weat wolomogoluk, owik ano horoksogoatma oluk e, werak ano owikmu ano pegesa.
Pašlaik izvēlēts:
Yohanes 19: Wul
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties