Yohanes 18
18
At Yesus ebe tenak pei legesa wene
(Matius 26:47-56; Markus 14:43-50; Lukas 22:47-53)
1At Yesus en se’ban asogo arat oluk e, at osi iak wogu legesa a’ge ebano at ebe emin liplai legesarik, ik onuk Kidron ik etle akhit yabuk e e’gen no’gwi a’ge owi yogo’gwe libegesarik osi eneminat eba ’gwigisa. 2At Yesus osi iak wogu legesa a’ge ebano agauwa pobuk naduk eba odokti laga legesarikmu no oluk e, at Yudas Yesus woruagoluk yo’go laga a’ge ano yabuk ano aluk welaga. 3Asogo alukmu no oluk e, is ap Allah eiye a’ge onuelak ’gaindek emin, is ap Farisi a’ge emin en e, onosi Allah owi ’gwelakharok welegesa a’ge yo’go onoboluk peragenebegesema, at Yudas en tentara a’ge esan logolak mesik enemin wogonoboluk, segen emin, wa’gun emin, di esaga yu esaga emin, woluk eba legesa. 4Legesema, at Yesus en,
“An nebe pobuk disogo taknobouwa o,” oluk ’berlegat aluk welaga ai en e, ene’bek wagarik e, disogo mo’gulentesi,
“His sa palo til wegep,” oluk mo’gulentasu lagama, 5is en e,
“Yesus owi Nazaret a’ge ano palo til wege o,” oluk mo’gulegisema, at Yesus en e,
“Ai nebe anat o,” oluk mo’gulentesi. Asogo osokhwe, at Yudas Yesus woruagoluk yo’go laga a’ge ano eneragam edik welaga. 6Edik oruakhwe, at Yesus en e,
“Ai nebe anat o,” oluk mo’gulentasukhwe, is ebano maming hogulat e, ono’borlhan en erle’galogo ’bou til-til laga legesa. 7Asogo lagaihwe, at Yesus en pobuk mesik emin disogo mo’gulentesi,
“His sa palo til wegep,” oluk mo’gulentesimu, is en e,
“Yesus owi Nazaret a’ge ano palo til wege o,” oluk mo’gulegisema, 8at Yesus en e, disogo mo’gulentesi,
“Ai nebe anat o, oluk nadugat mo’gulhentegis ebano re. His anat palo nebil wegep holuk e, an nosi yema louwagoluk ugenebemit o,” oluk mo’gulentesi. 9Asogo mo’gulentesi ai re, owan lailo erlak oruakhwe nadugat, at Yesus en Allah mo’guleselat e,
“Naik Allah o. Aphwami hat en woknigen a’ge ebano mesik nalom erlak o,” oluk mo’gulesi a’ge ano iak demat emagoluk asogo mo’gulentesi ai o. 10Asogo mo’gulentasukhwe, at Simon onuk mesik Petrus ano e’garok ai erlige tenakho oruakma lisogo wesirik e, ap ’gain Allah eiye a’ge eragam a’ge onuk Malkus ai weriogoluk lelhesi ’gal e, esa’go ’bekhit akhit sebasogo ’bo pesi. 11#Mat. 26:39; Mrk. 14:36; Luk. 22:42Asogo ’bo pesimu, at Yesus en disogo mo’gulesi,
“Petrus. He’garok hauwak o’gwe ebalema ’gwelakpemen o. Aphwami en ik na’gogo wogontogwiam no’gwi ai ’gela’ge, an naik en,
Hat di obotut yu obotut takhobouwa o, oluk mo’gulnesi a’ge ai hegitsogo taknobo mia epegen? Erlak o. Taknoboat o,” oluk mo’gulesi.
At Yesus e’gik herle wusogo woluk,
ap onuk Hanas e’bek wegesa wene
12Wene asogo oluk egeimu re, is ap tentara a’ge esan logolak ebano onue ’gain mesik emin, ye, is ap Yahudi a’ge Allah owi ’gwelakharok welagai a’ge emin, enemin en e, at Yesus ebe tenak poluk, e’gik herle werigisa. 13E’gik herle wusogo naduk-naduk ap Hanas e’bek woluk wegesa. Ap Hanas ai ebe re, is ap Allah eiye a’ge onue ’gain tahun ai pam welaga a’ge onuk Kayafas ai iemal. 14#Yoh. 11:49,50At Kayafas ai ebe re, nadugat is ap Yahudi a’ge mo’gulentasulat e,
“We, nis ’berlegat nenebaget ap mesigat a’ge mesik warom ai re, obat o,” oluk enesa’go weregei a’ge anoat o.
At Petrus en, “An nebe Yesus ot puk o,”
oluk elabe tegei wene
(Matius 26:69-70; Markus 14:66-68; Lukas 22:55-57)
15-16Asogo woluk wegesema, at Simon onuk mesik Petrus ano en, at Yesus osi iak wogu legesa a’ge mesik e’birek Yesus e’berlik wegesa. Asogo wegesarik, at Petrus nak e, leget o’borl akhit ebela pam de, ’godukmu oruakhwe, at Yesus ot mesik ai re, ap Allah eiye a’ge onue ’gain ano en ebe alukmu no oluk e, at Yesus e’birek ap ’gain ai owi selimu ’gwigisa. ’Gwigisarik e, at Yesus ot, ap Allah eiye a’ge onue ’gain en ebe aluk a’ge ano, pobuk togolik liplau waga. Liplau waga ’gal, hwele mesik aphwami libom ’guom tugumu ’godukmu ’gagalak welago a’ge ano en e’birek weneane egesarik e, Petrus woluk ’gwegei. 17Asogo woluk ’gwisoma, at hwele ano ’goduk libom ’guom tugumu ’gagalak welago a’ge ano en Petrus mo’guleselat e,
“Hat e, at yu osi iak wogwi a’ge ebano erlak no? At osi a’geat o,” oluk mo’gulesimu, at Petrus en e,
“An e, erlak o,” egei. 18Asogo egeitik oruakhwe, o ai erlige re, sogwei a’bik en e, is eneragam a’ge emin, is ap Allah owi ’gwelakharok welagai a’ge emin, odouk mu’galegisarik e, edik welat sogwei oro’gugumu re, at Petrus ene’bek lagarik eneminat sogwei oro’gogulat edik welegesa.
Ap Allah eiye a’ge onue ’gain ano en
Yesus emdema wesi wene
(Matius 26:59-66; Markus 14:55-64; Lukas 22:66-71)
19Asogo sogwei oro’gugukhwe, ap Allah eiye a’ge onue ’gain ano en, at Yesus ebam hin wokhasulat e,
“Hat hosi hiak wogwi a’ge ai salak de. Ye, hat hiak mo’gulentasu legen ai, ’gesogo no,” oluk ebam hin wokhesimu, 20at Yesus en disogo mo’gulesi,
“An en aphwami ’gwiangma a’ge wene mo’gulentasulat e, ’baksogo nak mo’gulentasu legi o. O is aphwami Yahudi a’ge ’berlegat odoktak poluk se’ban ogwi’gwe emin, Allah owi werikmu emin, eba nak mo’gulentasu legi o. Wene hisakho mesik eselegi modok erlagat a’geat de, 21an nebam hin wokniasu legen ai nopaget. An en wene mo’gulentasuam is arat enesa’go holugumu re, an en wene mo’gulentasu legi a’ge ai, is enalugat oruak o. Holuk e, is enebam hin wogentemen o,” oluk osoam e, 22ap Allah owi ’gwelakharok welagai a’ge ebano mesik ebe eria edik welat e, at Yesus e’gik dagosadak weriselat, disogo mo’gulesi,
“Ap Allah eiye a’ge onue ’gain yu en mo’gulhosoam, hat en wene asogo mo’gulom no? Mia o,” oluk mo’gulese lagama, 23at Yesus en e, disogo mo’gulesi,
“An niak dagansogo egi holuk, wene dagansogo egi a’ge ’baksogo mo’gulnorogunmu re! Niak hegit egi a’ge pagerat, dagosadak watnebigen ai, nopaget,” oluk mo’gulesimu, 24pobuk at Hanas en, at Yesus e’gik herle wusogoat, at Kayafas ebe ap Allah eiye a’ge onue ’gain ano e’bek woluk wemagoluk perakpou waga.
At Petrus en, “An nebe Yesus ot puk o,”
oluk pobuk elabe tegei wene
(Matius 26:71-75; Markus 14:69-72; Lukas 22:58-62)
25Asogo yo’go perakpou wagama wegesema re, at Simon onuk mesik Petrus ano odouk mu’gelakma erianoat sogwei ere’giselat edik oruakma, is aphwami en e, disogo mo’gulegisa,
“Hat e, at osi iak wogwi a’ge ebano erlak no? Hat at osi a’geat o,” oluk mo’gulegisema, at en e,
“An e, erlak o,” oluk elabe tegei. 26Elabe tegeimu re, ap Allah eiye onue ’gain a’ge ano eragam a’ge mesik, at Petrus en esa’go saboksogo ’bo pesi a’ge ano are mesik en e,
“Hat e, hebe at emin yabuk e e’gen owi yogoma oruakma nil hiegi ebano re,” oluk mo’gulesimu, 27at Petrus en e,
“Erlak o,” oluk elabe tegei. Asogo elabe tagokhwe erianoat sue ayam iak egei.
At Yesus e’gik herle wusogo
ap Pilatus wogosu wegesa wene
(Matius 27:1-2,11-14; Markus 15:1-5; Lukas 23:1-5)
28Asogo toluk, sue iak egeimu hubet siaksogo at Yesus ap ’gain Kayafas oruakma en, owene enebam pogulat, no’gorlogulat, tugumu ebano woluk wegesa. Woluk wegesarik e, Yesus nak olema ’gwelakpegesarik,
“Nis seni Paskah ano a’ge no’gulomma re, nonomuat ’gumu re, nis wiak omulno,” oluk e, owene enebam pogulat, no’gorlogulat, tugumu eba ’gwilo erlakma en, we, o selimu mo egesa. 29O selimu mo egesema re, at Pilatus ene’bek liplau wagarik e, disogo mo’gulentesi,
“Malik logwe. Ap yu wene no’gosogo ebam pegeptik en woluk wegep,” oluk mo’gulentesimu, 30is en e, disogo mo’gulegisa,
“At yu wiak telip erlak wellepma re, hat he’bek woluk wolo erlagat o,” oluk mo’gulegisema, 31at Pilatus en e, disogo mo’gulentesi,
“Ap yu woluk laguptik e, his en togwi hegitsogoat honu’gwarek en wene ebam pogulat, no’gorlogulat, tip o,” oluk mo’gulentesimu, is ap Yahudi a’ge en e, disogo mo’gulegisa,
“Nis nonomu en wene enebam poluk waronobu mia ani o,” oluk mo’gulegisa. 32#Yoh. 3:14; 12:32Eniak asogo mo’gulegisa ai re, at Yesus en wene pageat mo’gulentasulat,
“An disogo taknoboluk watnobua ani o,” oluk ese laga a’ge ano, is asogo tigisema, at iak ano demat aga o. 33Is Yahudi a’ge en asogo mo’gulegisema, at Pilatus owene enebam pasulat, no’gorliselat, tagoma ano togolik ’gwegeitik, at Yesus ebam iak pakholuk e, disogo mo’gulesi,
“Aphwami Yahudi a’ge onue ’gain onuk logo a’ge ano harat a?” oluk mo’gulesimu, 34at Yesus en e, disogo mo’gulesi,
“Hat en wene an nobok e’gen ai re, hat hogola en ’gagalogo e’gen a? At e, is aphwami pema en mo’gulhegisema en de, e’gen a,” oluk mo’gulesimu, 35at Pilatus en e, disogo mo’gulesi,
“Wene mo’gulnigen ai re, an nebe ap Yahudi a’ge de, mo’gulnigen a? Is ap hu’gwarek hue hari emin, ap Allah eiye a’ge onuelak ’gaindek emin, enemin en, hat hebe an woknegisa ai re, hat no’gosogo tigenma o,” oluk mo’gulesimu, 36at Yesus en e, disogo mo’gulesi,
“An en aphwami neragam enebasu legi ai re, aphwami ’gwiangma a’ge en eneragam onobogwi ai ’gela’ge puk. Erlak o. We, an neragam enebasu legi ai re, ’gwiangma a’ge wellepma re, nosi en an nebe is ap Yahudi a’ge wogonto mia o, oluk, nebe erlele woknobuogoluk emin ebelip a’geat de, an neragam enebasu legi ai ’gwiangma a’ge erlak ai en e, erlele woknobua erlak o,” oluk mo’gulesimu, 37at Pilatus en e,
“Holuk e, hat demat ’gain honuk logo a’ge hwi a,” oluk ese lagama, at Yesus en e, disogo mo’gulesi,
“An nebe ’gain nonuk logo a’ge hat e’gen aiat o. Ai pagerat an en dem wene obok ’baksogo mo’gulentasu leigoluk nebe ’gwiangma yema dakla ’bu egi o. Aphwami wene dem wene ai oruak akhit lai legesa a’ge enebe lo’bok an niak enesa’go hologwi o,” oluk mo’gulese lagama, 38at Pilatus en e,
“Wene dem wene ai no wene no,” oluk mo’gulesi.
At Yesus ebe modok woruagoluk wene ebam pegesa wene
(Matius 27:15-31; Markus 15:6-20; Lukas 23:13-25)
Wene asogo mo’gulesirik e, at Pilatus pobuk ap Yahudi a’ge ene’bek liplau wagarik e, disogo mo’gulentesi,
“An en at wene ebam pegep a’ge ’bele’gegis a’ge re, at wiak mesik tegeimu hegi modok erlak o. 39Asogo a’geat de, his en seni Paskah no’gulat, ap herle werak a’ge mesik herle hebilhontouwagoluk ’gonu mo’gulnogwiam, hebilhentasu legi ano en e, his ap Yahudi a’ge honue ’gain onuk logo a’ge yu herle hebilhonto henagai ya? Henebit a,” oluk mo’gulentesimu, 40is en eniak ’beraksogo a’bigat ogulat e, disogo mo’gulegisa,
“Erlak o. At ai herle hebelogup erlak o! We, at Barabas aiat herle hebilnentemen o!” oluk mo’gulegisa. At Barabas ai re, ebabut wiak welat yogorlia wasu laga a’ge paget en de, egesa o.
Pašlaik izvēlēts:
Yohanes 18: Wul
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties