MATIUS 4
4
Bilis ainyen Yesus se lomougwisa
(Mrk. 1:12-13; Luk. 4:1-13)
1Sug Mena Gogoufu ohw dau bogaden naugb eigtou desij Yesusohob, kaba, en ahwan en aud usi hom se lomougwisa naugb Bilis ainyen en sungga. 2Dangga sug Yesus en ehig dau ared se lona sud hwai, dara loba sud hwaiyohob, kaba, sireben namcir. 3Hanoba Bilis en en aud en naugb ainyen en. Sug Bilis edebeij Yesusohob, kaba, en enara dou en endagai: Bang Allah Meisi misen, kaba, ban benara dou igdahab einyana geb gini bedag roti naugb ban bet.
4Doba Yesus auni dou en, endagai: Musa en og deb se Surad Injil Meb Mohon debohob, endagai: Lusud lemeic merireseb dau sug len let ared misen dousero. Doba dau sug len lesogwesa areg asesa Allah enin medoc mes toua.
5-6Dobnaro, kaba, Bilis ahwan Yesus aud Allah Men Tuari medgomori se cinogo gecabeci, moho Yerusalem, naugb en ainyen en sungga deit. Hanoba en enara dou en, endagai: Bang Allah Meisi misen, kaba, ban bahacugb banin dau sugini dig cinogo gaihida. Anai sud hom en erba ugwaremer se Surad Injil Meb Mohon an debohob, endagai:
Allah en emarougb men malaikadir an bans.
Hang len lemoc len merisira naugb ban,
dauntoba ban abohora emoc igdahab touwero.
7Doba Yesus auni dou en, endagai: Musa en og deb eisaugb gin se Surad Injil Meb Mohon deb touohob, endagai: Yen yemainyen Adehsud meijen Allah en touwero.
8Dobnaro, kaba, Bilis ahwan Yesus aud menmod gagas medam hom naugb en ens dau mougt mera medam se cinogo gini meren hancob dara meren ariloboc geigouhw gebsa augwan dou en toua. 9Hanoba en ainyen en deit, endagai: Ban becguna naugb besijaresa dan, kaba, dan deic areg dan dens dou ban gragohob augwan dou ban dag banin aban namcir.
10Doba Yesus en auni Bilis mer ucugb deit, endagai: Setan, ban beihwededau dan namcir. Anai Musa en og deb eisaugb gini se Surad Injil Meb Mohon deb sug nosa touohob, endagai: Yen yecguna yesijaresa meijen Adehsud Geis Huhugb. Dara yen yeicara yaimo en toua. Anai enin dous eng meijen Allah misen.
11Sug Yesus ecicugb Bilis ineg danggohob, kaba, Bilis ougbdedau en namcir. Hanoba Allah men malaikadir len len naugb len lagauwesa en toua.
Yesus ebiji naugb en ebedbed dou lusud aimougtut se leng Galilea meren hancob
(Mrk. 1:14-15; Luk. 4:14-15)
12-13Doba sug Yesus en ouman dag len lagaigeij Yohanes naugb louf en se tu gesisugohob, kaba, en emeigtou se leng Yudea meren hancob gin deitero. Doba en eisa dau sungga dig leng Galilea meren hancob deitda. Sug en edebeij sungga, kaba, en emeigtou se en gun Nasared touwero. Doba en eitig naugb en eigtou se Kapernaum dous. Anai cinogo ingga, kaba, eb se leng Sebulon dara Nabtali meren hancob geb deinyor Tiberias mebera. 14En eicara dag gini dauntoba esogwa deisa areg sud hom gesai Allah moro sug nosa, en moho Yesaya, en og deb sug nosohob, endagai:
15Leng se Sebulon dara Nabtali maran hancob, dara leng se dum mebera, dara leng se cinogo aud igda agunya se Yordan nagama, dara lugmahara se leng Galilea meren hancob,
kaba, len laugwan gini leigtou se lobeigbogo nosohob.
16Doba sud hom en moho dag mouf eririj medam, en en naugb aisema len deitohob.
Dara leng leigtou se cinogo gomom meniha,
kaba, sud hom, en moho mouf, en agunya aud len touohob.
17Dangga ebiji dau sug Yesus en eigtou se Kapernaum graga, kaba, en ebedbed dou lusud, endagai: Yen yesga meijen sesar, dara yen yahau an dougwo toua. Anai lona naugb sug Allah oiharaga yen ucugb, kaba, edebeij deinyor namcirohob.
Yesus eija men logodeh merug hogu sug aimougtut
(Mrk. 1:16-20; Luk. 5:1-11)
18Se lona hom sug Yesus oci Galilea mebera, kaba, en eiya Simon dara en magto Andreas lan larba diara debin hosei deb gini. Anai maran geicara dag lan lahilon hosei dous terimda. Lusud leija Simon en moho toua dag Petrus.
19Dangga Yesus en dougwo lan, endagai: Yan yaimo dan. Anai dan douwan dens meijouhw dou yan naugb yan yahwan lusud aud dan, dauntoba len ledag indan logodeh, aninim dag yan yarba diara debin hosei gin toua. 20Sug lan lauman Yesus eija lan dangga inegohob, kaba, lan larges diara deb. Hanoba lan laimo en namcir toua.
21Sug Yesus en eda deitohob, kaba, en eiya Sebedeus meisi lahwai, lan maroho Yakobus dara en magto Yohanes, lan eng lagon maran diara gobogougb dougwo deb se ing mes gini. Dara lan marna Sebedeus en toua moongga desij lan. Sug Yesus eiya lan, kaba, en eija lan toua, endagai: Yan toua, yan naugb yaimo dan. 22Sug lan lauman Yesus eija lan dangga inegohob, kaba, lan larges maran ij dara marna toua deb. Hanoba lan laimo Yesus namcir.
Yesus esai Allah moro dara eic geigouhw dou lusud leinyana
(Luk. 6:17-19)
23Sug Yesus eija len gragohob, kaba, en ec mohora acec leng Galilea meren hancob naugb en esai Allah moro geigouhw dau sug en ouwan oiharaga lusud ucugb dou len se meren tuari augwan. Dara en edidib meijouhw dau augwan gin dou len toua. Hanoba en eic geingmos agauwesa dou leng areber, dara leng meraga omomtom len laugwan toua. 24Sug lusud leiya dau gini, kaba, len lagaha merir an men geicara gini se Galilea dara leng Siria meren hancob augwan toua. Dangga hang, len lemahwan leng areber aingma aingma, dara leng merna mog mog einesa len merdoc mes, dara leng ugweber, dara leng merohora dara merisira agaim dou Yesus naugb en eic geigouhw dou len laugwan toua. 25Dangga lusud dau leng Galilea meren hancob, dara lusud dau Cinogo Sisa ladedim hom meren hancob, dara lusud dau cinogo Yerusalem, dara lusud dau leng Yudea meren hancob, dara leng leigtou se Yordan nagama, kaba, len leinyana leila ucan Yesus naugb laimo en toua.
Pašlaik izvēlēts:
MATIUS 4: INOSOU
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
ALLAH MEN GOS DOU MENAU © Indonesian Bible Society 1996, 2016