YOHANES 11
11
Yesus eigdoumesa Lasarus dau gomom
1Se lona hom, kaba, sud hom en moho Lasarus, en areba medam namcir. En, kaba, en eigtou se cinogo Betania geb deinyor cinogo Yerusalem se leng Yudea meren hancob ingga. Betania gin, kaba, Mariam dara Marta sug lan lagun ingga toua. 2Mariam gin, kaba, en eng gida hom gedig en ehin aremoung mohu men ouwadebeda se maman Adehsud en mohora sug nosa. Hanoba en eic enin mougt modi agunin dau en mohora touohob. En eng meijemeito Lasarus gareba medam gini. 3Dangga sug en areba medam dag ginohob, kaba, en medamouwera gini lan lasa marir deinaugb Yesus, landagai: Adehsud, sud hom gedig ban abdoc gororougb en, kaba, en areba medam namcir.
4Sug Yesus ouman dau gini, kaba, en auni dou men logodeh, endagai: Men gareba gin, kaba, emoho gomom namcirero. Doba en areba dag gin dauntoba lusud leigdoumesa dan indina Allah aman amoho agasam icira gin toua. Anai dan toua dedag Allah Meisi Mohora Hom naugb gin touohob.
5Yesus, kaba, en medoc gororougb Marta, dara Mariam, dara Lasarus len gin namcir. 6Doba sug en ouman dag Lasarus areba medam, kaba, en emeihweda sungga dedemedero. Doba en eigtou lona hwai debin ginahabi, en emeihweda. 7Dangga sug lona hwai debin ginohob, kaba, en enara dou men logodeh deit, endagai: Yen yin. Maman macicugb dig Yudea ucugbda.
8Doba men logodeh len len dougwo en, lendagai: Adehsud, dagiro, naugwe hang, ban becicugb dig Yudea deita? Anai leng Yahudi lesedeb naugb len led ban sug nosohob.
9Doba Yesus auni ucugb dou len, endagai: Sug mouf inggebga naugb lusud, kaba, augwan adedim dag ijam sisa hobjerai. Gini misenei? You, gini misenohob. Dangga hang, gareg en ec naugb mouf gini, kaba, en emetohobro touwero. Doba en ec dara geigouhw namcir. Anai en eiya, doba sud hom gedig en eic mouf naugb aisema lusud se cinogo gin augwan, kaba, eni moongga desij enaba. 10Doba sug en ec se lobeigbogo mogud, kaba, en etohobro bobsara namcir. Anai sud hom gedag mouf gin, kaba, en edug dau enohob.
11Sug Yesus enara dag gin dauwohob, kaba, en enara dou len ucan deit, endagai: Maman mamsi Lasarus graga en atoudohob. Dangga hang, dan demeihweda naugb demdebir ens.
12Sug men logodeh louman gin, kaba, len len dougwo en, lendagai: Adehsud, sug en atoudohob, kaba, cum, eic eigouhw ucugb dou en. Hang maman mamderses en touwero. 13Len loudesa Lasarus atou misen, hang len lemenara dangga. Doba areg Yesus enara dou len graga, kaba, en aimeh dag Lasarus en omom misenohob. 14Hang Yesus emenara aimeh dou len deitero. Doba en enara misen namcir dou len, endagai: Lasarus en omom misenohob. 15Doba eigouhw naugb yen dag dan indug sunggaro. Anai sug yen yeiya dau indan geicara dou en se lona daiyamo gin, kaba, eic dag yen yemeija meijuwesa dan deitero. Doba eic dag yen meigdoc ebdebin an dan toua terimda. Dangga dan indoc momogo touwero, doba dan indoc eigouhw an gin namcir. Hang yen yin, maihwedaud Lasarus iteitoginda.
16Sug Yesus men logodeh len louman dau gini, kaba, sud hom dau len, en moho Tomas, en enara bad mesir len gus medoc mes, endagai: Yen yin. Maman maimo maman Adehsud gini, dauntoba len ledeic gomom dou maman toueda. Dara lusud leija Tomas en moho dag lang marogoc agacgecim gin toua.
Yesus ens enin ainyes dag enin eng eigdoumesa lusud dau gomom
17Sug Yesus dara men logodeh len ledebeij se Betania ginohob, kaba, len leiya, doba lusud lec Lasarus se lona hoguohob. 18Dara Betania gini, kaba, emeb aigus dau Yerusalemero. Doba eb deinyorim namcir. 19Dangga hang, leng Yahudi leinyana dau cinogo ingga, kaba, len toua len len naugb ledenara lad Marta dara Mariam mardoc mes an marjemeito gomom gin toua.
20Sug Marta ouman dag Yesus en toua edagunyohob, kaba, en obga dagasenda. Doba Mariam, kaba, en eigtou se tu deb naugb en ougwan ared namcir. 21Sug Marta edagasa Yesusohob, kaba, en eiyagarij en, endagai: Adehsud, sug ban bemen sugraga, kaba, dan injemeito en emomom dag ginero. Doba ban beigtou aigusi dau aman, hang en emomom gini. 22Doba inggaida. Anai dan decinaga dag areg ban bacgeij dau Allah, kaba, en auni dou ban toua.
23Doba Yesus oho mer debin en, endagai: Ban abjemeito en emeises.
24Dangga Marta en auni en mer ucugb dou en, endagai: Dan decinaga dau sug Allah eigdoumesa lusud dau gomom ucugb se lona sug ouwedocahabi, en emeigdoumesa dan injemeito Lasarus en toues.
25Doba Yesus en dougwo en, endagai: Danin eng deigdoumesa lusud dau gomom ucugb. Dara dan deic maireseb menau geb huhugb dou len toua. Dangga gareg en medoc ebdebin an dan, kaba, en emomom namcirero. Doba sug en omom dag ginohob, kaba, dan demeigdoumesa en aud maireseb menau geb huhugb ucugb deits. 26Dangga gareg dan deic maireseb menau dou enohob, kaba, en emomom deit touwero. Doba maireseb huhugb eb naugb en terimda, anai en medoc ebdebin an danohob. Ban bod abina debsa areg dan den dou ban ginohobei?
27Doba sug Marta ouman Yesus eijidougwo en dag gin, kaba, en eigdoumesa en moho, endagai: Adehsud, dan dod indina debsa ban an areg ban ben dou dan graga gin namcir. Anai dan decinaga bang Allah Meisi misen gouwaden dau bogo se cinogo gini naugb ban beigdoc emen dau emen gogom augwan namcir. Hang ban bedag sud hom gedig Allah esedeb en naugb en esa en aud emen gin touohob.
28Sug Marta auni dag graga dou Yesus dauwohob, kaba, en ecicugb dig tueda naugb sug en edeija medemeito Mariam. Hanoba en ec luluf dou en, endagai: Nanan Adehsud eijidougwo ban, anai en toua moongginohob. 29Sug Mariam ouman gin, kaba, en eisa dedemeda. Hanoba en eihweda naugb sug en edagasa Yesus toua. 30Anai Yesus, kaba, en emedebeij cinogo Betaniabuma. Doba en eigtou se ucina mogumsi sug Marta agasa en deb grag dousaba.
31Sug leng Yahudi gedig len leigtou desij Mariam se men tu naugb len lenara lad en medoc mes graga len leiya, doba Mariam eisa dedemeda dig medigo gabeda, kaba, len toua leisa ucan en. Anai len loudesa endag en eihweda naugb sug en edeb se aremogougb moda dous.
32Sug Mariam edebeij Yesus se us gragohob, kaba, en eic mohorbrida badedeij cinogo deseino en. Hanoba en eiyagarij en, endagai: Adehsud, sug ban bemen sugraga, kaba, dan injemeito en emomom dag ginero. Doba ban beigtou aigusi dau aman, hang en emomom gini.
33Sug Yesus en eiya, doba Mariam eiyagarij en. Dara leng Yahudi gedig len loucan enohob len laugwan leb dangga toua, kaba, en medoc eisaugb namcir. Hanoba en medoc enmohomoho, kaba, en eijidougwo len dara mer medam, endagai: 34Yen yedec en deb sugiro?
Sug en eijidougwo len dangga, kaba, len launi dou en, lendagai: Adehsud, ban bin naugb emen emdens dou banahabi. 35Len leicara dag gin, kaba, Yesus eb medam debin len namcir. Anai en eiya, doba len laugwan loudesa dag Lasarus en omom namcirohob.
36Sug leng Yahudi leiya, doba en eb dag gin, kaba, len loudesa endag en eb an Lasarus. Dangga hang, len lenara doum, lendagai: Yen yeiya en medoc gororougb Lasarus gin namcir, hang en toua emeb an en gini.
37Doba ligbum, kaba, len lenara ceg ceg en, lendagai: Sud hom gin, kaba, en esga lusud gus merires naugb sug len leiya lo asesa ucugwohob. Dangga dagiro, naugwe hang, en emen dougwo Lasarus, dauntoba en emomom touwero? Doba en omom namcirohoba?
Yesus eigdoumesa Lasarus dau gomom ucugb
38Sug Yesus en ouman, doba len lenara ceg ceg en dag gini, kaba, eic en medoc enmohomoho medam deit. 39Dangga sug en edebeij aremogougb modohob, kaba, en arougb len dara mer medam, endagai: Yen yegririj igdohos meh dau. En arougb len dag gini, anai aremogougb moda gin, kaba, dag igdohos mes dous. Dangga, kaba, len leic igdahab meh lauf dougwo toua.
Doba Lasarus medamouwa Marta, kaba, en en dougwo Yesus, endagai: Adehsud, dangga, isnaro. Anai len lec en se lona hogu beiyemohob.
40Doba Yesus, kaba, en enara bauwun en mer, endagai: Ban ben dougwo dan dag gin, anara? Anai dan den dou ban graga dag sug ban abdoc ebdebin an dan, kaba, dan demens dau Allah men goubesa dou ban touesa?
41Sug len louman Yesus mer an gin, kaba, len laimo en mer naugb legririj igdohos meh dau gin toua. Sug len leicara dag ginohob, kaba, Yesus oho mergo dig bogo. Hanoba en enara dou en Mena, endagai: Akeinya, dan den sijo medam dou ban, anai dan decinaga dag ban boc ban abums dou dan indir terimda. 42Dangga hang, areg dan dacgeij dau ban iteitogini, kaba, dan demacgeij naugb danin touwero. Doba dan dacgeij dau ban, dauntoba sug lusud gini len leiya, kaba, len merdoc ebdebin an dan dag ban besa dan aud lenohob. Anai naugb danin, kaba, dan decinaga dag ban bemoc ban abums dougwo dan indir mougwa hom touwero. Doba ban bou dou dan an areg dan den dou ban terimdohob.
43Sug Yesus enara dag gin dou en mena dauwohob, kaba, en eija Lasarus dara mer medam, endagai: Lasarus, ban beisa dau igdohos mes en. 44Dangga sud hom gomom graga, kaba, en agunyen. Doba minc meti gedig lusud lahud en mesira dara mohora, dara minc meti gedig len laihiron dougwo mebes augwan eb smougb mougwaba.
Dangga, kaba, Yesus arougb len deit, endagai: Yen yesga areg geb se mos gin augwan dau en. Hanoba yen yarges en beihweda.
Leng Yahudi meren mougtir lehilon ucina naugb sug len leic gomom dou Yesus
(Mat. 26:1-5; Mrk. 14:1-2; Luk. 22:1-2)
45Sug leng Yahudi gedig len loucan Mariam graga len leiya ganusbus gini, kaba, len leinyana merdoc ebdebin an Yesus toua. 46Doba ligbum dau len, kaba, len leihweda naugb len ledoho ledas Yesus an men geicara gini dou leng Parisi toua. 47Dangga sug leng Parisi len louman dau Yesus men ganusbus ginohob, kaba, leni dara gembala gesa taij meren mougtir an meren Majelis len laugwan loucimdeb naugb len lohw merdocedoum eisaugb Yesus toua.
Sug len loucimdebohob, kaba, len leijidougwom, lendagai: Sud hom gini en aben ganusbus einyana terimdaha. Dangga maman mab ara dara sud hom gina? 48Anai sug maman mamsoho en deb, kaba, lusud lemaimo maman deitero. Doba len laugwan merdoc ebdebin an en dous. Dangga cum, kaba, leng Roma meren mougtir len leinesa maman cinogo gin naugb len lod Allah Men Tuari augwan baisoboro. Dara len leic mor mor dou maman hancob augwan toua dangga.
49Doba Gembala Gesa Taij Meren Mougt Mera Medam se arisogomoc ingga, en moho Kayapas, kaba, en esa mer debin len, endagai: Yen yenara dag yen meiju edgom, anara? 50Eigouhw naugb sud hom en omom dous dau gedag maman lusud laugwan lemomom, isnaro.
51Doba areg Kayapas en en dou len gini, kaba, en emen dau enin medoc mesero. Doba sug en edag Gembala Gesa Taij Meren Mougt Mera Medam se arisogomoc inggohob, kaba, Allah enin eng arautut en naugb en medoc ens deb eisaugb Yesus sug en omom naugb leng Yahudi meren sesar augwan toua. 52Dara en emomom naugb leng Yahudi meren sesar hom gin dousero. Doba en omom naugb Allah mehir geb se cinogo gus augwan toua. Dauntoba len lemaisobororo, doba en ouci len laugwan debinim hom dous. 53Dangga sug mougtir len louman Kayapas mer an ginohob, kaba, len lohw merdocedoum se lona ingga naugb sug len leic gomom dou Yesus namcir.
54Sug Yesus ecinaga ginohob, kaba, en emeic maga ainyes se leng Yahudi merufu dag nosa deitero. Doba en eihwedan men logodeh dau leng Yudea meren hancob gini dig cinogo hom, moho Epraim, geb deinyor lomougwisa naugb len leigtou sungga dous.
55Doba lona ingga, kaba, irir sug leng Yahudi lougwan ared debin lona sug Allah esga len merjemouwer dau cinogo Mesir sug nosohob. Dangga leinyana len len dau dingan dingan naugb leisaugb dig Yerusalem. Dauntoba len ledu lenin meraga ecabeci deseino Allah nosa dauwahabi, len lemougwanara se lona gouji gin toua. 56Dangga sug len graga ledoucimdeb se Allah Men Tuari maga, kaba, len lehilon dougwo Yesus sungga. Hanoba len leijidougwom, lendagai: Yen youdesa dagiro? Sug maman maugwanara gini, kaba, en toua emensei? 57Len len dangga doum, anai gembala gesa taij meren mougtir dara leng Parisi len lesulou len deb nosohob, dag gareg en eiya Yesus mog sugiro, kaba, len leden dou len toua, dauntoba len lagaigeij en namcir.
Pašlaik izvēlēts:
YOHANES 11: INOSOU
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
ALLAH MEN GOS DOU MENAU © Indonesian Bible Society 1996, 2016