KADADDIYAN 7
7
Banjir
1PANGERAN adhabu ka Ennoh, “Sengko' tao ja' pera' ba'na manossa se ajalannagi Tang parenta. Daddi kassa' ba'na ban saessena bengkona maso' ka parao rowa. 2-3Giba keya samacemma mano' ban samacemma keban se halal pettong judhu ebang, dineng keban se haram sajudhu ebang bai. Parlona sopaja samacemma keban ban mano' ta' sampe'a mate kabbi, me' olle badha se pas adhu'-budhu' e bume. 4Pettong are aggi' Sengko' matorona ojan se ta' kera badha terrangnga pa' polo are pa' polo malem abidda, sopaja lok-mahlok se odhi' se ecepta'agi Sengko' padha'a tompes kabbi.” 5Ennoh alampa'agi sakabbinna papakonna PANGERAN jareya.
6E bakto banjir jareya dhateng, yuswana Ennoh nem atos taon. 7#Mat. 24:38-39; Luk. 17:27 Ennoh ban rajina, ban tra-pottrana sarta binena tra-pottrana, laju padha maso' ka dhalem paraona sopaja salamedda dhari banjir jareya. 8Samacemma mano' ban keban, se halal ban se haram, dhu-sajudhu ebang 9maso' ka parao jareya abareng Ennoh, akantha se edhabuwagi Allah ka Ennoh. 10Saellana olle pettong are dhari jareya, bume topo ban banjir.
11 #
2Ptr. 3:6
E naleka yuswana Ennoh la nem atos taon, e tanggal petto bellas bulan dhuwa', somberra aeng se badha e dhalem bume reya leddu' kabbi, jalanna aeng e langnge' padha beddhul. 12Ojan toron, abidda pa' polo are pa' polo malem. 13E are jareya keya, Ennoh ban rajina maso' ka paraona, abareng ban pottrana se katello, iya areya Sem, Ham ban Yafet sarta binena pottrana se katello jareya. 14Samacemma mano' ban keban, se epeyara oreng ban se odhi' e alas, se raja otaba se kene', epamaso' ka parao jareya. 15Lok-mahlok se odhi' jareya maso' dhu-sajudhu ka dhalem paraona, abareng ban Ennoh, 16menorot se epakonnagi Allah ka Ennoh. Saellana kabbi padha maso', labangnga parao jareya laju ekanceng bi' PANGERAN.
17Banjirra terros ta' nyorot sampe' pa' polo are; aengnga ongga sampe' parao jareya ngambang. 18Aengnga sajan tenggi, ban parao jareya ajalan egiba aeng. 19Aengnga sajan tenggi sampe' nong-gunong se paleng tenggi nyellem ta' etangale'e. 20Aeng jareya gi' terros atamba tenggi sampe' pettong meter e attasanna konco'na nong-gunong. 21-23Mahlok se odhi' e bume padha mate kabbi, epatompes bi' Allah: manossa, keban ban no'-mano' tadha' karena. Se gi' odhi' coma Ennoh ban reng-oreng sarta ban-keban se badha e parao jareya. 24Aeng jareya paggun ta' endha' nyorot sampe' saratos saeket are abidda.
Pašlaik izvēlēts:
KADADDIYAN 7: MAD
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties