YOHANES 3
3
Nikodemus Yesus oba wagaikhesik emberek wene ane isukwa wene
1Afuni Yahudi mene inoe kain ap Farisi mene inawene fisogo welagaikhe mene ekhe enu Nikodemus. 2At ap andi o hubanggo inenggi ekhe sambul Yesus oba wagaikhesik he, mel yagatikhe: ”Guru noe. Ap ekhe Allah emberek hundik lek halok he, haren elalin mene hilingirik nikhi lagen andi hak, hilingisu mondok elo'lego. Andi nen he, haren wene yaganisoageluk Allah nen lakhobagai wagama wagen, iluk ninelu ago,” iluk yagatikhe. 3A'nogo yagatikhemo, at Yesus nen he, mel yagatikhe: ”Afuni Allah nen inebe hobuk inambotkwe taginafi'lek halok he, at awe a'ma fisikherek oba andoma ineilenggen hogoin mondok lego, iluk nane eberogoat yagaheti lagi,” iluk yagatikhemo, 4at Nikodemus nen he, mel yagatikhe: ”Ah! Afuni inalueba nen ninggi'nogo hobuk taginabu hak anggegen. Inagaisawi inalabutmo kumo nen hobuk elok taginabu hak nogo? Elo'lego,” iluk yagatikhemo. 5At Yesus nen he, mel yagatikhe: ”Afuni iba inom, Allah Areagun oba nen inom, taginafi'lek halok, Allah nen awe a'ma fisikherek oba andoma kugun mondok lego, iluk nane eberogoat yagaheti lagi. 6Nen, afuni nen taginaferek andi, afuni meneat ta'lagaikharego. Nen Allah Areagun en taginaferek andi, Allah Aregun nenat ket taginaferego. 7Hit hinebe lombok hobuk hinambotkwe ket ta'lasugun, iluk yagaheti andi nen, Eige! Nailo e, iluk hendawinggen fitun o. 8Sogoi andi, we, erabisak hesangge fun hugunem he, ane nek hesanggo holhi lagen meneat he, ebe re, koma nen heat weri'logo. Nen koma kwe heat lili'logo. Honggot andi. Andi hak he, afuni Allah Areagun en inebe lombok a'nogoat taginaferego,” iluk yagatikhe.
9A'nogo yagatikhemo, at Nikodemus nen he, mel isikhe: ”Wene egen andi ninggi'nogo hilinginabigin mene faget egen,” iluk heinok wokhasikhemo re,
10at Yesus nen he, mel yagatikhe: ”Noe. Hat hebe re, afuni Yahudi mene wene yagaisegendek meneat he, an nen wene yagaheti andi futfegen le'ma higi. I a? 11Niren wene ninelu meneat yagahisigik, nineilenggen hogo meneat eberogoat iluk pilingisogo yagahisigik, ogorek meneat he, ninane andi holhi'lek hinobakhe nene hilingiti lagep iluk, nane eberogoat yagaheti lagi. 12An nen kweangma wene faget yagahisugunem he, hiren eberogoat iluk futfikhi lagep lek halok he, an nen pogoroba wene faget yagahisamo hobuk ninggi'nogo nen wene andi eberogoat iluk futfogoin anggegep? Futfogoin mondok lego.” iluk yagatikhe. 13A'nogo yagatikhesik mel isikhe: ”Ap ekhe kweangma nen pogoroba mondok lagagi'lek. We an pogoroba nen abat ta'lasi pi wagagi andi aro.
14-15Nen, ap Musa o leimo afuni le'ma andoma logolik kisu hangge hilingisogo eba menfesikhe andi hak, it afuni yoma inendawinggen an abat ta'lasi wagagi mene yi noba himbiret fogoin mene nek he, inebe lombok ineluk mondok logouwageluk, an a'nogoat mennobagagun obaat mennobagagun aro.#Bil. 21:9 16Yi afuni ti afuni Allah endawi mondogen inendawinggen an noba eberogoat himbiret fogoin mene halok enek, inebe lombok wa'la'luk he, nongagi'lek ineluk mondok logouwageluk, At amlogo an nebe misigat tago mene wogisasikhe. 17Nen, an Allah amlogo kweangma yoma laknobagai wagaikhe andi re, yi afuni ti afuni wene inoba fuluk weagerinabuageluk laknobagai wagaikhe fuk. We, inebe telinabuageluk laknobagai wagaikhe o. 18Halok, sa nen endawinggen an noba eberogoat himbiret fikhe halok he, Allah nen wene oba fuluk weaget fagain lek meneat he, sa nen endawinggen an Allah amlogo misigat tago mene yi noba eberogoat himbiret figi'lek andi nenat weaget fagain mene wene arat oba fikhemo werego. 19Nen, Allah nen wene inoba fikherek andi re, ebe yi'nogo. An nen selegerinafirek mene nebe arat kweangma pi wagagi meneat he, afuni inobabut weak hilingitarek andi nen he, At selek andi ninabiro. Athe, o mum andiat ninamolo, iluk inendawimo anggagarek. 20Nen, it afuni weak hilingiri'lagwi mene inebe lombok inendawimo nen anggikhi logolik he, nit selek andiba logoin halok, nit weak hilingitorek mene faget lasimbik weinam asinogo, iluk anggagaresik, an selek mene yi inabiren he, noba wagi'lek kamo agarek. 21A'nogo inendawimo anggagarek meneat he, it ekhe inobabut higithogo hilingiri'lagwi mene nek inebe lombok, inendawimo anggikhi logolik he, Allah ninom hundik logolik yi'nogo fano hilingiti lagoma, iluk, weinam asuageluk. an selek mene noba wagaikharego,” iluk yagatikhe.
Yohanes nen Yesus abok fakhogo yagaisasikhe wene
22A'nogo arat yaga'luk he, hobuk at Yesus ebe inom, agoromi ane wanhi lagaukwa mene inom, inom o Yudea pisukwasik afuni ima pelaginafi logolik inenggi endebat hak welagaukwa. 23-24A'nogo hilingiti lagaukwa andem higit he, Yohanes ima pelaginafi lagaikhe mene a'nogo enggi hele warogo o inenggi hele warek fisagarek oba oan kwelakfigi'lek logolik he, o enu Ainon o Salim era'lu andoma i hokho andi nen afuni ima pelaginabuageluk, Yohanes oba wagunem he, ima pelaginafi lagaikheat.#Mat. 14:3; Mrk. 6:17; Luk. 3:19-20
25A'nogo ima pelaginafu were'ma, at Yohanes agoromi ane wanhi lagaukwa mene inom, it ap Yahudi mene ekhe inom, inomen it afuni Yahudi mene nen yi mene ti mene ebene sobalogo nek hilingitaresi'mo andi nen he, wene andi faget hokhorogo palhi lagaukwa. 26Wene palhi lagaukwasik, Yohanes oba lagaukwasik he, mel yagatukwa: ”Guru noe. Ap ekhe hat hemberek i Yordan aik eliba logolik, at faget abok pilingisogo yaganisasigin mene a'nogo nen ima pelaginafunem afuni inebe mondogat at oba weri'lagwi o,” iluk yagatukwa. 27A'nogo yagatukwama aren he, mel yagaisasikhe: ”Ap yi sani. Nagoromi. Ap ekhe Allah nen yagati'le'ma, at onggwarek endawimo nen kagalogo higit hilingisu elo'lego. 28Ap andi Mesias afuni telinabuageluk Allah nen ayonggo fuluk lakfei wesigin isikhe a'nogo re, an he lek, meneat he, at hobuk wesigeluk, an attak laknobagai wagama wagi o, iluk yagahisugunem hit arat hinesanggo holhi lagagip anggigi.#Yoh. 1:20 29Nen, ap ekhe agwe ikhikhe halok he, he andi ebe agun ap andi aro. Nen ap agwe ikhagain mene werek andi agailak ekhe era'lu mendek logolik, at ane ugunem esanggo hologo logolik endawimo nen agaiyek hikherek hak, an yogondak a'nogo nendawimo nagaiyek hokhorogo hikhi lagi o. 30Ap andi enu werek asigin obaat, enu werek agik, an nenu legasigin obaat, nenu legagik, igin o,” iluk yagaisasikhe.
At pogoroba nen pi wagaikhe mene a'nogo faget isikhe wene
31Nen afuni mondogat he, inenu lek enek. We, at po'lima nen pi wagaikhe mene andiat kain enu werego. Ap ekhe ebe kweangma nen tago mene halok, ebe kweangma meneatma, wene kweangma aweneat ikherego. It afuni mondogat inenu legat hak werek kwelegat he, ap ekhe pogoroba nen pi wagaikhe mene andiat enu esin lego werego. 32At eilenggen hasikhe mene inom, esanggo holhikhe mene inom, fakhogo yagaisugu kwelek meneat he, it afuni mondogaren he, aren wene pilingisogo yagaisikherek mene andi, inobakhe nene herakfisili'lagwi. 33A'nogo herakfisagarek meneat he, it afuni ekhe nen he, Aren wene pilingisogo yaganisikherek mene andi eberogoat, iluk Allah ane andi wanharego. 34At Allah nen lakfei wagaikhe mene andi, Allah Areagun elele wanhi'lek mondogat wogetikhe andi nen Allah aneat yaganisikherego. 35At eisena nen amlogo ebe endawinggen hundik logolik, yi mene ti mene mondogat at eisewerek logouwageluk wogetikhe.#Mat. 11:27; Luk. 10:22 36Halok he, sa nen endawinggen Allah amlogo oba eberogoat himbiret fili'logo halok ineluk logogun mene eise agasik werego. Meneat he, sa nen, at amlogo andi ane holhi'lek obakhe nene herakfisili'logo halok, ineluk mondok logogun mene andi eise asigin lek. We Allah a'mage oba fembik logogin o.
Pašlaik izvēlēts:
YOHANES 3: inohap
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties