YOHANES 2
2
1A'nogo hilingiti lagaukwasik, nogo inenggi pire ilugen, inenggi ekheba nen he, o Galilea o sili ekhe enu Kana andi, ap ekhe agwe igetunem Yesus agaisa ayonggo fesukwama andoma inom welagaukwa. 2Andoma were'ma at Yesus agoromi ane wanhi lagaukwa mene inomat inayonggo fesukwama lagaukwasik welagaukwaat. 3Lagaukwasik werek kwelek, anggur enggen amusu keralek mene mondogat lek agaikhemo re, Yesus agaisa nen at mel yagatikhe: ”It anggur enggen amusu keralek mene legagama werego,” iluk yagatikhe. 4A'nogo yagatikhemo, at Yesus nen he, mel yagatikhe: ”Eige. Nagaisa. An nen hilingisigin oba oan higit asi wagi'lek werek kwelek, haren an nenahalok yaganeten?” iluk yagatikhe. 5A'nogo yagatikhe meneat he, at agaisa nen, it he ita mene eisewerek inamingmingengge omanogo inoba mel yagaisasikhe: ”Aren, yi'nogo hilingi'ni, ikhe halok he, at igin mene andiat hilingi'no,” iluk yagaisasikhe. 6It afuni Yahudi mene nen fageat andoma nenat hilingiti logolik he, yi mene ti mene inom, inebene inom, sobalogo nek hilingitarek mene faget iwak torom hangge ebe helep mene hilingik hokhondek mene 6 en andoma fesukwama welagaikhe. Torom hangge andi ebe lombok elonggoma re, i 100 liter hangge hinasu hak elok welagaikhe.
7A'nogo were'ma re, at Yesus nen it inamingmingengge mene omanogo yagaisikhi logolik he, mel yagaisasikhe: ”Iwak torom hangge aromaba i hina'ni o,” iluk yagaisasikhemo, ambem ele sophogo hinatukwa. 8A'nogo hinatukwama re, at Yesus nen it yagaisikhi logolik he, mel yagaisasikhe: ”Yogo. Hinatep mene andi ekhe keralogo ap kain seni eisewerek mene wogosi lani o,” iluk yagaisasikhemo wogosi lagaukwa. 9Iren i keralogo wogosi lagaukwasi'mo andi nen he, i ebe yi'nogo mene iluk inelu welagaukwa meneat he, at kain a'nogo nek he, ”Koma nen waluk wagaikha,” iluk onggot logolik he, i a'nogo anggur enggen amusuat hilinglagaikhemo, enduk mikhasikhe re fano nen he, ap agwe igetukwa mene welagaikhe a'nogo ane fakhasikhe. 10Ane fakhasikhemo wagaikhemo re, wene mel yagatikhe: ”Afuni mondogat anggur enggen amusu wogisikhi logolik he, fano mene tak wogisugunem, ninghogo nunggunem en, hobuk weak mene wogisagarek meneat he, harenek he, fano mene hinagaisogo fisogo welagendigen hobuk weinamet fegen yi, nailo e,” iluk yagatikhe.
11At Yesus ebe futfouwageluk elalin mene ekhe hilnigiti'le'ma attak hilingitikhe re, o Galilea o sili Kana logolik hilingitkhe andi. A'nogo hilingitikhe andiba, at fogeratarek mene inelurogo yagaisasikhemo, it at agoromi ane wanhi lagaukwa mene omanogo Yesus ebe futfesukwasik, inendawinggen at oba eberogoat himbiret fesukwa.
12A'nogo arat hilingitukwasik he, at Yesus ebe inom, agaisa inom, agaila'lak inom, agoromi ane wanhi lagaukwa mene inom, inom o Kapernaum lagaukwa. Lagaukwasik he, inenggi endebat enek welagaukwa.#Mat. 4:13
Yesus Allah awi wuri'mo kwisikhesik tegelhikhe wene
(Mat. 21:12-13; Mrk. 11:15-17; Luk. 19:45-46)
13Andoma werema nen, it afuni Yahudi mene nen he: ”Attagat Allah nen telninafikhe,” iluk, inendawimo eberek logolik wam domba warogo seni hokho isatarek mene enu Paskah faget nogoin oba arat horok agaikhemo re, Yesus o Yerusalem pisikhe.#Kel. 12:1-27 14Pisikhesik he, Allah awi wuri'mo kwisikhe hak he, it afuni onggo palharek mene, wam sapi inom, domba inom, sue pel hangge mene inom, onggo wanhik, it ekhe andoma hurek logolik rupiah onggo palhik ugunem at eilenggen isasikhe. 15A'nogo hilingitunem eilenggen isasikhessik he, hele kumbi meneba wam sapi inom, domba inom, lambisogengge fi'ni-fe'nerogo yei wathigik Allah awi wuri'mo nen mugusogo wulakfisigik, e talek oba Rupiah onggo huniti lagaukwa mene omanogo abel endenogo pilel-palelhogo lakfisigik, 16it afuni sue pel hangge mene onggo wanhi lagaukwa mene omanogo wenagisigik isikhe. A'nogo wenagisikhi logolik he, ”Sue yoma helaluk wulibi lani o. An neisena awi wuri'mo yoma, yi mene ti mene onggo palharek oba hangge palhi lagep yi re, a'nogo hilingiti logogun mondok lego,” iluk wenagisasikhe. 17A'nogo wenagisasikhemo, it ap at agoromi ane wanhi lagaukwa mene omanogo inendawimo nen he,
”Attagat it ap ekhe nen Allah aneba
lisu palogo fikhi logolik he, mel isukwama werek a'nogo:
Allah neisena, Hat hawi wurik andi faget an nendawinggen nunggunem he
nendawimo warikhi lagi,
iluk lisu palhukwama werek anggigi,”
iluk inendawimo ebetukwa.#Mzm. 69:10
18Yesus nen it ap omanogo a'nogo yagaisasikhemo, it ap kaindek Yahudi mene nen Yesus ebe wenageti logoligat he, mel yagatukwa: ”Haren hilingiten yi re, eisewerek logolik hilingisu hagat hilingitenma, iluk futhobagauwogen he, elalin mene ekhe hilingisin ta,” iluk wenagetukwa. 19A'nogo wenagetukwama, at Yesus nen he, mel yagaisasikhe: ”Allah awi wurik yi meisalini o. Arat meisalumo re, an nen hobuk nenggi pireba wuti logombik nenggi ekheba nen arat wusigin o,” iluk yagaisasikhe. #Mat. 26:61, 27:40; Mrk. 14:58, 15:29 20A'nogo yagaisasikhemo re, it ap kaindek Yahudi mene omanogo nen he, mel yagatukwa: ”Aha! Allah awi yi oan wutu kwelek 46 tahun welago meneat he, haren, nenggi pire wuti logombigen, nenggi ekheba nen arat wusigin iluk egen andi re, elogat wusu hagen egen a? Elo'lego,” iluk yagatukwa. 21A'nogo yagatukwa mene re, Yesus nen wene Allah awi wurik faget isikhe andi, o wurik mene faget isikhe fuk. At onggwarek ebe fagerat isikhe o. 22Wene a'nogo isikhesik, hobuk ebe wa'lagaikhesigen eluk agaikhemo, it ap at agoromi ane wanhi lagaukwa mene omanogo nen: ”Wene yi attagat yaganisugunem ninesanggo holhugu mene,” iluk inendawimo ebetukwasik, Allah ane lisu palek inom, wene Yesus nen yagaisasikhe mene a'nogo inom, futfesukwasik inendawimo nen eberogoat anggasukwa.
Yesus nen afuni mondogat inendawimo elu welagarek wene
23A'nogo isukwasik werek kwelek, o Yerusalem it afuni Yahudi mene wam domba warogo seni Paskah nunggu kwelek, at Yesus andoma inom logolik ebe futfouwageluk, elalin mene hilingirik lagaikhe andi nen he, afuni hokhorogo ineilenggen hasukwasik inendawinggen at oba himbiret fesukwa. 24A'nogo himbiret fesukwa meneat he, at Yesus onggwarek enek he, it inebe mondogat inobabut elu andi nen he, ”Eberogoat wo'nabugun,” iluk endawinggen it inoba himbiret figi'lek welagaikhe. 25Afuni inendawimo at elu mondok welagarek andi nen he, afuni ekhe nen: ”It ekhe inobabut yiginik,” iluk at yagasugun mondok elo'lego.
Pašlaik izvēlēts:
YOHANES 2: inohap
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties