Yohanes 17
17
At Yesus nen agarumi inobasik sembayan isikhe wene
1-2At Yesus nen wene itithogon yogeisasikhesik, at uroak lekhogon ileken pogot oba liakhasikhesik nen, men isikhe,
“Nopase. An hagatnabugun etnogo arat asi aga o. Hat nen haganeat akhuni aperek woknikhigin meke inebe tomok an ha'but nen hagarinabumo iniluk motok dogoagaluk akhuni tha'bokhogonat niki baga 'bisigin iti nen, hat hebe kogotdageik nen, an ha'but kogotdani me o, nopase. 3It akhuni nen,
Allah hogorasusak ebe meke arlik-arlegat motok welagarek, iluk, hebe inilu ageik, nen an Yesus Kristus la'ani agaginmo wagagi meke yi nebe inilu ageik, hagariogei iti re, iniluk motok welageikharek erlo itiat o. 4An nen agat oba yi meke ti meke hagasuagaluk meldanhigin etnogo yabu ebe arat hagakhe lagarik tirliphogonat hagakhi iti baga nen kogotdagagi o. 5Nopase. Agat aban walhigidek dogolik, nipisagat kok welagagu etnogo meke, yogotak hat werekma etoma kogotdanino. 6Akhuni agat oba meke hat nen haganeat woknikhigin meke tha'bokhogonat, hat hebe inilu asuagaluk yakulisigi o. It inebe hat meke an woknikhiginmo nogo nen, hat hane hologo hagakharek o. 7Yogotak yi wene ti wene tha'bokhogonat hat nen woknikhigin meke iti, it nen,
Allah nenat wogokhikhemo, iluk arat hutdega o. 8Wene hat nen yoknikhigin meke emenogo, it arat yogeisigima, arat waganhasik an nobasik ekhe dogolik,
Allah nen la'i ageikhemo, at werekma nen eberogonat wageikhe, iluk inilu ageikhasik nen, nebe hutdanha o.
9An nen it inobasik sembayan ekhe lagei o. An sembayan ekhe lagei yi, it akhuni agat oba yoma meke tha'bokhogonat inobasik ekhe lagei 'buk. It hat ha'buri meke hat nen an woknikhigin iti nen, it inobasigat sembayan ekhe lagei o. 10An meke tha'bokhogonat, hat mekeat o. Nen, hat meke tha'bokhogonat, an mekeat o. It hagariogei iti baga, an kogotdaniogei o. 11Yogotak an nen, agat oba yoma erapik dogogin dek o. Hat 'bikheasigin mekeat he, it anek, agat oba yoma dogogun o. Hat weak hagakhidek karelek motok welagatek meke, nopase. Nit nipisak ninebe opakiat welagorek etnogo hak, it itithogonat inebe opakiat dogoak nen, hat hetaga kok meke an thalnakhigin iti baga, it hagasik dogono o, nopase. 12An it ninom yoma dogolik, hat hetaga meke an thalnakhigin etnogo baga, it inebe nalasinogo iluk, hagasik werekma, it aperek nalageidek o.
At iti nalasigin, iluk, hat hane isigin meke holal waganogo 'bisukha meke etnogo ebe asuagaluk, nalasusak obaat nalaga o. 13An nebe hoba wisigin mekeat, yogotak an agat oba ya dogolik, an nakla arleken akhegerek iti hak, it inakla arleken motok akhoagaluk, wene tha'bokhogonat iti yokhikhi o. 14Hat hane etnogo it arat yogeisigi o. Nen, an nebe akhuni agat oba meke yoma inagot dek iti hak, it itithogonat inebe akhuni agat oba meke inagarumi dek iti nen, it akhuni agat oba meke nen ina'it motok hagarinabiogei o. 15Hat nen, it akhuni agat oba meke inakla nen it anek kigilogo woginabinok nen iluk kino yokhekhe lagei 'buk. At weak meke etnogo nen weagarinabigiluk inoba wagunem, hat nen therisik dogonok nen iluk yokhekhe lagei o. 16An nebe it akhuni agat oba meke inagot dek iti hak, it itithogonat it akhuni agat oba meke inagarumi 'buk. Degat o. 17Hat hane egetek iti, ebe weneat. Nen, hane ebe wene iti baga, it inebe hat hekarek hasigat dogoak nen wenago 'bisan o. 18Hat nen an nebe akhuni agat oba meke inoba la'ani agagin iti hak, an nen it itithogonat akhuni agat oba meke inoba la'isigi o. 19It inebe hat hekaerek hasik ebe wene baga wenago dogoagaluk, an it inobasik nebe hat 'bagagirik wenago welagei o.
20Nopase. It iti inarligat hasik anek sembayan ekhe lagei 'buk. Dek o. It aperek ninat meke, it nen wene yakulisa lugun oba inetaiken an noba hakotdugun meke inomat inobasik sembayan ekhe lagei o. 21Nopase. An nen kino yokhekhe lagei yi, men iluk. An nen nopase hat nipisak hunik, nen, nopase hat nen an nipisak hunik, welagorek iti hak, it itithogonat inebe tha'bokhogonat opakiat dogoagaluk kino yokhekhe lagei o. Itithogon werekma, it akhuni agat oba meke nen, ekhe dogolik,
At he, opase nenat la'i ageikhe iti eberogonat, iluk hutduagaluk, it inebe nit ninom hunigat dogouok o. 22Nit ninebe opakiat welagorek iti hak, it itithogonat inebe opakiat dogoagaluk, an nebe hat nen kogotdanhigin hak, an nen it arat kogotdisigi o. 23It eberogonat inebe opakiat dogoak nen, it nen an ninom hunik, nen hat nen an nipisak hunik dogouok o. Itithogon dogogun halok, it akhuni agat oba meke nen ekhe dogolik,
At he, opase nen la'i ageikhesik ebe etaiken hunik welagarek iti hak, it inebe at wogokhikhe meke etaiken hunik welagarek o, iluk inilu atluk hutdugun. 24Allah nopase. Hat nen agat aban walhigidek dogolik, an nebe hetaiken hunik welagagin iti nen, hogotnakhe dogoagaluk kogotdanhigin etnogo, it hat nen haganeat woknikhigin meke emenogo inileken neoagaluk, o an dogoginmo etoma, it ninomat dogosak warlok o. 25Allah mothogon anek hagakhetek meke, nopase. It akhuni agat oba meke hat hebe inokodek mekeat, an anek, hat nilu o. Nen, it hat nen woknikhigin meke anek,
At nen la'i ageikhe iluk, iniluat o. 26Nopase. Hat nen an hakmutnakhigin etnogo, it-it itithogonat nakmu-hakmurogon dogolik, an nebe it ninom hunik dogouogoluk, hat hetaga ilik hawene yogeisekhe lagarik ageikhe inomat yogeisekhe dogoginat o,” iluk sembayan isikhe.
Pašlaik izvēlēts:
Yohanes 17: LAIDNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties