Yohanes 14
14
Yesus nen, “An o hit dogogunmo kareli ligin,” iluk wene warisasikhe wene
1At Yesus nen wene itithogon yogeisasikhesik nen, yabokane men yogeisasikhe,
“Nagarumi. Hit hinakla nen,
Eiye, iluk hinelabut hisik dogogup o. Hinetaiken Allah oba hakotdigik, an noba hakotdigik, hagakhe dogono o. 2An nopase aila etoma, o hit dogoumo oboluk doalegat thelek werek o. Itithogon dek dogolepma, an o hit dogoumo kareli ligin, iluk yokhisele dek o. 3An o etoma arat lalok hit hinaila arat karelogo 'biluk nen, an dogoginmo etoma ninom dogouok nen iluk, napuke wokhinabi isigin o. 4Nen, o an liginmo iti, holak ebe hit hiniluat o,” iluk yogeisasikhemo, 5at Tomas nen, men yogokhikhe,
“Noe. O hat liginmo iti ninokodekma, holak iti nikithogon nen ninilu asusak o,” iluk yogokhikhemo 6at Yesus nen, men yogokhikhe,
“Holak inom, ebe wene inom, inilugurinakherek inom, iti an nebeat o. At tha nen an noba wageidek halok, nopase werekma ukusak motok erlok dek o,” iluk yogokhikhesik, 7it tha'bokhogonat yogeisekhe dogolik,
“Hit an nebe hinilu agap iti, an nopase hinilu asiginat o. Hinilu asigin iti, hurli yogotak hurli nen, at ebe hinilu ageik, hinileken higik, arat hekhe lagap o,” iluk yogeisekhe lageikhemo, 8at Filipus nen, men yogokhikhe,
“Noe. Ninileken halok ninetaiken hapukhogon dogoagaluk, hat hopase iti ebe yakulnisan o,” iluk yogokhikhemo, 9at Yesus nen, men yogokhikhe,
“Filipus nagot o. An o haganeat eloma nenat ninom welago mekeat he, hat nen an nebe hutdanhidek welaganma higi, e a? At tha nen an ileken neekhe iti, an nopaseat ileken hekhe o. Itithogon mekeat he, hat nen,
Hopase iti yakulnisan o, iluk egen iti nikithogon nen egen. 10An nen nopase nipisak hunik, nen, nopase nen an nipisak hunik, welagorek iti, hat hutdekhe lagan dek a?” iluk yogokhikhesik it tha'bokhogonat yogeisekhe dogolik,
“An nen wene yokhisegerek iti, an nakla nen kagalogo yokhisegerek 'buk. Dek o. An nopase nipisak hunik dogolik, an nane baga nen igik, niki baga nen hagakhik, hagakherek meke iti, at ekaerek nenat hagariogo o. 11An nenat nopase nipisak hunik, nen, nopase nen an nipisak hunik, welagorek igi iti, eberogonat iluk, hit nen hutdini o. Iti hutdusak erlok dek halok he, an hagakhe lagei meke iti hinileken halok, hutdanini o. 12Tha nen etaiken an noba hakotdekhe halok, an hagakhe lagei meke iti, at nen hagakhe dogoginat o. An hagakhe lagei iti, herlekha'bugat negen meke re, an nopase oba ligin iti nen, at tha nen etaiken an noba hakotdiluk welagarek meke iti nen ebenageigat kokhogonat hagakhe dogogin o, iluk nane eberogonat yokhisigi o. 13Nen, at tha nen, yi meke ti meke an netaga palogo Allah kino yogokhe halok, an a'but nen hagakhunem, it akhuni nen nopase hogorasuagaluk, an nenat hagasigin o. 14Itithogon hagasigin iti nen, hit nen yi meke ti meke an netaga palogo kino yoknekhe dogono. Itithogon kino yoknekhep halok he, an nen hagasigin o,” iluk wene warisasikhe.
Yesus nen, “Allah Agoreke wokhisagein,” iluk abok yogeisasikhe wene
15At Yesus nen wene itithogon warisasikhesik nen, wene ageikhe men yogeisasikhe,
“Hit an hinetaiken hunik halok he, an nen hit yigithogon hagakhe dogono, tigithogon hagakhe dogono, iluk yokhisekhe lagei meke iti hagakhe dogogun o. 16-17Itithogon hagakhunem, hit yomakhisekhe dogolik, hinom motok dogobageik nen iluk, an nen nopase kino yogosumo, at nen at ageikhe usakhisasigin o. At iti ebe Allah Agoreke ebe wene yokhisekhe dogogin meke. Itithogon hinoba usakhisasumo, it akhuni agat oba meke nen, at iti ebe inokodegat. Nen, ebe inileken hugun degat, iti nen ebe waganusak erlok degat o. Itithogon mekeat he, hit anek he, at ebe hinom dogolik, hinakla motok dogogin iti nen, at ebe hinilu dogogun o. 18An meneke, hit hinebe yekerugi irlagakot meke negen thogotdinageiluk ligin dek o. Yabokane napuke 'bithisasiginat o. 19Niniki herlekha'bugat dogoluk nen, akhuni agat oba meke inileken neagun motok dek mekeat he, hit anek he, an nilugat dogogin, nen hit yabokane hinilugat dogogun iti nen, hinileken neagun o. 20Itithogon hinileken neagun itinem, an nopase nipisak hunik welago, nen, hit an ninom hunik, nen an hit ninom hunik welago meke iti, hinilu asigin o. 21At tha nen, an nen, yigithogon hagakhe dogono, tigithogon hagakhe dogono, iluk yokhisigi meke iti, nane hologo hagakherek halok he, an nebe etaiken hunik meke at itiat o. Nen, nopase nen at iti etaiken hunigat o. Nen, an nen at iti netaiken hunik dogolik, nebe hutdanuagaluk yakulisigin o,” iluk yogeisasikhemo, 22ap Yudas Iskariot etnogo 'buk. At he, Yudas ninat meke ageikhe nen, men yogokhikhe,
“Noe.Hat hebe hutdaguagaluk, akhuni tha'bokhogonat yakulisigidek, nit anek yakulnisagein iti nenaluk nen,” iluk yogokhe lageikhemo, 23at Yesus nen, men yogeisasikhe,
“At tha nen, an nebe etaiken hunik halok he, nane hologo hagakhe dogogin o. Nane hologo hagakhe dogoumo, nopase nen at iti etaiken hunik dogogin o. Itithogon dogolik, an nopase nipisak ap iti oba witluk, at ninom motok dogogun o. 24Nen, at tha nen, an etaiken hunik dek halok he, an nane hologo hagakherek dek itiat o. An nane hit holhe lagap iti re, an nane meke 'buk. An nopase la'ani ageikhe meke etnogo aneat o.
25-26Wene iti an nebe hit ninom dogolik, yokhisekhe lagei. Meke re, an nopase nen at Agoreke hit yomakhisekhe dogoagaluk, an netaga baga usakhisasumo, at nen yi wene ti wene tha'bokhogonat yakulhisigik, an nen yokhisekhe lagei meke iti tha'bokhogonat hinakla ebethisigik, hagakhe dogogin o. 27Halok he, hit hinetaiken hapukhogon dogoagaluk an netaiken hapukhogon welagarek meke wokhisalok ligin o. Iti akhuni agat oba meke nen wogeisegarek iti hak wokhisagein dek iti nen, hinelabut hisik dogolik hinayuk agup o. 28An ligin mekeat he, yabokane napuke hinoba wisigin o, iluk yokhisigi etnogo arat hinasuk holhep apigi. An nebe hinetaiken hunik dogolepma, an nopase ebe kogat, nen, an nebe erlok dek iti nen he, an nopase oba ligin iti hasik hinakla arleken akhelep o. 29Wene tha'bokhogonat yokhisigi iti ebe hagatlasigin halok, hit nen,
Wene yoknisasikhe etnogo arat hagatlaga yi, iluk hutdiluk, hinetaiken an noba hakotdubageik iluk, wene iti ebe aban hagatlageidek werek korlek, abok tak yokhisigi o. 30Akhuni agat oba meke inoe kok etnogo ebe wiriogo iti nen he, an wene doalegat yokhisagein dek o. At iti wisigin mekeat he, an at iki baga welageidek o. 31Itithogon mekeat he, an nopase netaiken hunik welagarek iti akhuni agat oba meke inilu asuagaluk, an nopase nen nasuk warogo yoknekherek mekeat hagakhe lagei o,” iluk yogeisasikhesik nen,
“Nagarumi. Luok nen melatni o,” iluk yogeisasikhe.
Pašlaik izvēlēts:
Yohanes 14: LAIDNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties