La'isasikhe 11
11
Petrus nen Kornelius ima usa'isikhe meke pilinerogo akhuni Yerusalem meke yogeisa lageikhe wene
1It akhuni aperek nen he,
“It akhuni itikmanke meke Allah ane waganha o,” iluk isukhama, it ap Yesus nen inayoko 'biluk la'isasikhe meke emenogo men, Allah a'buri o Yudea meke men, inasuk holhukha. 2Itithogon holhukhasik werekma nen, at Petrus ebe yabokane Yerusalem usasinem, it akhuni inoado aperlagap palek dogolik inetaiken Yesus oba hakotdisukha meke emenogo nen wenagakhukha. 3Wenagakhe dogolik,
“Hat hebe it akhuni inoado aperlagap palek dek meke inoba lagatik nen, hipiri hinom opakimo neke lagasip wagan iti nenaluk,” iluk wenagakhukha. 4Itithogon wenagakhukhama, at Petrus nen wene erloma nenat pilinerogo men yogeisasikhe,
5“An o Yope etoma sembayan ekhe dogolik, na'bikaka oba men higi. Su kain kok ukut pere nen pere ugu meke herle kilogo pogot oba nen nalilu usa'i agunem na'bikaka hekhe dogolik nileken higi. 6Itithogon higirik, nileken hanorogon kolakhigi hak, su kain iti akla agat oba welagarek meke yi wam ti wam, yi 'bagei ti 'bagei, yi warlo ti warlo, nen, pogot oba hitluk nekharek meke, yi thue ti thue tha'bokhgonat ukharlek werekma nileken higi. 7Itithogon hasinem, at Allah nen, tha ane heat yoknekhe dogolik,
Petrus. Hebe melatluk ethoma warogo nan o, iluk yoknekhe. 8Itithogon yoknekhe mekeat, an nen he,
Dek o. Noe. Usa meke men, yoalhidek welagarek meke men, 'bugurlagat halok an napema ageikhe motok kolakhidek o, iluk yogokhi. 9Itithogon yogokhi meke re, at ane etnogo yabokane pogot oba nen men yoknekhe,
Allah nen,
Hano, nausak, iluk ekhe meke halok, hat nen,
Usa, nausak dek, iluk hakla apugun o, iluk yoknekhe. 10Itithogon iki pere baga yoknekhesik ageikhe yoknetluk nen, yabokane yi meke ti meke iti tha'bokhogonat pogot oba nen apuke lekhogo lia'ekhe. 11Itinem, ap inebe henagan o Kaisarea nen la'isa ageikhama, o an ap huso werekma wageikha. 12Wageikhama nen, Allah Agoreke nen an men yoknekhe,
Ninom lausak erlok dek, iluk hakla wene munini ebekhidegat, hinom lano o, iluk yoknekhe. Itithogon yoknekhemo nen, it Allah a'buri o Yope meke inebe 6 oba wageikhasik yoma werek yi ninomat o Kaisarea lago. Lagosik, nit tha'bokhogonat ap Kornelius aila ukogo. 13Ukogosikmo, at Kornelius nen he,
An ya werekma nen, malaikat Allah nen yoko usa'isa agarek meke emenogo ageikhe uma yoma usa'agasik metek werekma nileken higi. At yoma metek dogolik, wene men yoknekhe,
Ap ageikhe etaga Simon Petrus o Yope etoma werek etnaga yoma wisuagaluk, ap ageikhe at ayoko la'isano. 14At nen hat hebe men, hoe hagot men, ha'buri men, Allah nen tilhinabuagaluk, wene yokhisagein meke werek o, iluk yoknekhe, iluk ekhe. 15Ekhemo nen, an wene yogeisoagaluk erlo baga aban isi werekma, Allah Agoreke ebekeram nit ninoba usa'ageikhe iti hak, it yabokane inoba usa'aga iti. 16Inoba usa'agama nen, ninoe Etagapogot nen wene men iluk isikhe meke nakla ebekhi,
Yohanes nen ima usa'inageikhe meke e, Allah nen Agoreke hinoba usa'isigin o, iluk isikhe meke iti oba ebekhi. 17Ninetaiken ninoe Etagapogot Yesus Kristus oba hakotdisinem, Agoreke it dek, nit dek, ninom tak-tagat woknisekherek iti. Halok he, Allah nenat itithogon woknisugunem, an nen,
It wogeisekhe 'buk, iluk wene palusak nogo? Erlok dek o,” iluk yogeisasikhe.
18At Petrus nen itithogon yogeisasikhemo, it nen wenagakhe lagoukha etnogo, yabokane thogotdiluk men isukha,
“Halok he, Allah obabut hano nen, nit hagatninakherek hagat, it akhuni itikmanke meke inobabut hebelagunem iniluk motok dogoagaluk erlok hagarinabusagat higi,” iluk Allah hogorakhukha.
Allah a'buri o Antiokhia nen hagakhe lagoukha wene
19At Stefanus etnogo ebe wakhukhasik nen, Allah a'buri yi aik ti aik hagarinakhe dogolik, sigisik-mugisik hagakhe lagoukhama, lo o propinsi Fenisia men, Siprus men, kota Antiokhia men, wagoukhasik, wene it akhuni Yahudi meke anek yogeisekhe lagoukha. 20It itithogon hagakhe lagoukha mekeat, it aperek inom lo lagoukha meke inai, o Siprus meke men, o Kirene meke men, o kota Antiokhia wagoukhasik, wene hano wene ninoe Etagapogot Yesus hagakhikhe wene iti, it akhuni inukuloak etaga Yunani meke yogeisasukhaat. 21Itithogon yogeisugunem, ninoe Etagapogot inomat dogolik, obatnerogon yomageisugunem akhuni inebe doalegat nen,
“Wene iti eberogonat higi,” iluk waganiluk nen, inobabut hebelogo inelokhe at wogokhukha. 22Itithogon hagakhukhama, it akhuni aperek nen,
“It Yesus ane waganhasik, inobabut hebelha o,” iluk inbaok ekhe lagoukhama it Allah a'buri, o Yerusalem natogokhe lagoukha meke emenogo inasuk holhukhasik nen, at Barnabas ayoko 'biluk, ebe o Antiokhia la'i agoukha. 23-24At Barnabas iti, obabut hano dogolik, etaiken Yesus oba hakotdiluk motok werekma, Allah Agoreke akla kerlekhogon welageikhe iti nen, la'i agoukhama, wageikhesik ileken hisalok, akla nen,
“Allah obabut hano nen hano hagarinakhemo werek higi,” iluk akla arleken akhasikhe. Akla arleken akhasikhesik,
“Hit tha'bokhogonat hinetaiken ninoe Etagapogot oba hakotdiluk, at hinom hunigat motok dogono o,” iluk inasuk wakhikhe. Inasuk wakhe lageikhemo, akhuni doalegat, ninoe Etagapogot werekma dapuldiluk inebe wiak-wayakhogon hagatlagoukha.
25Inebe itithogon doalegat aga korlek, at Barnabas yabokane at Saulus ebe herarik, o Tarsus wageikhe. 26Wageikhesik, ebe herago wolok nen, o Antiokhia lageikhe. O etoma lageikhesik, satu tahun dogolik, it ipisak at Allah a'buri inom natogotdiluk, akhuni doalegat wene yakulisekhe lagoukha. It akhuni Yesus ane waganhunem inukuloak etaga Kristen egarek iti, ebekeram o Antiokhia etoma nen inetaga thalinakhukha.
27Itinem he, it ap Allah ane yogeisekhe lagoukha meke aperek o Yerusalem nen o Antiokhia dagei agoukha. 28It wagoukha iti meke, ap ageikhe etaga Agabus iti, Allah Agoreke nen akla kagalhikhemo, melageikhesiknen men yogeisasikhe,
“O yi ai ti ai tha'bokhogonat hipiri no kogat hugun o,” iluk yogeisasikhe. Yogeisasikhe iti, ebe ap etaga Klaudius ebe kok dogolik hagasik werekma hagatlageikhe iti.
29Iti hipiri no ebe aban hagatlageidek werek korlek, it akhuni Yesus ane waganhukha meke emenogo nen he,
“Halok he, nit ninebe tomok uang ninikimo aga meke tak-tagat Allah a'buri ninagarlak lak ninerugi o propinsi Yudea etoma natogokharek meke yomageisauwok nen natogorlogo la'uok o,” iluk wene palhukhasik uang natogokhukha. 30Itithogon natogokhukhasik, Barnabas Saulus ipisak nen, inikimo wolok lalok, it ap Allah a'buri therisik welagoukha meke iniki baga 'bi loagaluk la'isasukha iti.
Pašlaik izvēlēts:
La'isasikhe 11: LAIDNT
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties