Markus 6
6
Akoni o Nazaret mende nen, Yesus inakla kai disuka wene
(Matius 13:53-58; Lukas 4:16-30)
1Yabunggane, at Yesus o etoma nen dukisikesik, enggaerek ago erloma lagike. Lagonem, agoromi ane waganggo laguka mende yomenogo omborlik laguka. 2Lagukasik, ininggi 7 paga Hari Sabat Allah ake werlegat dogolik, o akoni Yahudi mende sembayan yiligogoma inebe dogalegat werekma inoba unggisikesik, wene yanggul isasike. Yanggul isasinem, it inebe dogalegat yomenogo nen, men yisuka,
“Iya! Ninayuk o. Ap yi esigit diluk kagarik liligogo eti nggoma nen yanggul kesik kagarigogo. Akla nggagalek mondok eti wene nena wene akla dogolik yoknisiligogo. Inggi pagiyasinem elalinat kagarinabigogo eti ninggit diluk kagarinabigogo. 3At ebe kwe Maria eyak o paligogo mende etnogo dek? Agoromi omborlik mende, Yakobus inom, Yoses inom, Yudas inom, Simon inom, kigi. Nen, irugi nit ninom welago yoma dek?” yiluk inakla kai disukasik nggolelogo togot disuka. 4Inakla kai disukama, at Yesus nen men yogisasike,
“It ap Allah wene yogisiligogi mende eti o yi ai ndi ai lagonem, akoni amberek nen inalon palinabigogi mende, o inenggaerek inago erloma lagonem it ineugi inagakugi inom, inago omanggimo dogoligogi mende inom, it nenat, inalon palinabigogi dek o,” yiluk yogisasike. 5Esigit diluk kagakuka eti paga, at Yesus o etoma dogolik elalin mende omanggi kagakidek togot disike. It akoni u inoba mende inebe mbererlagat inggi pagiyalok pano kagarinakike. 6Kagarinakikesik, it akoni etoma mende nen at ebe inakla kai disuka eti paga, at akla nen,
“Iya! Nayuk o,” yiluk ambasikesik yabunggane o etoma eragalilu o palekmangge wene yanggul isalik noko lagike.
Yesus nen, ap inebe 12 paga inayonggo ʼbiluk laʼbiyasike wene
(Matius 10:5-15; Lukas 9:1-6)
7Esigit diluk yanggul isalik noko dogolik, ap inebe 12 paga yomenogo waisasikemo wagukama, inebe mberendek dombokigik laʼbiyagaluk inayonggo ʼbiluk, kugi inobabut weyak mende akoni inakla unggisukasik werekma mukogo wula ʼbiyilik lowagaluk, at obatne wogisasike. 8Wogisasikesik inasuk wako dogolik, men yogisasike,
“Kit, kolagarlem mende pasik yi mende ndi mende omanggi mondok wolok lagup o. Segerlugat wolok lano o. Wolok lago dogolik, kimbiri inom, kolagarlemngge nggino yiluk su yukarlusak mende inom, uang inom, omanggi mondok waganggup o. 9Kinayok agut arligat yikogo lago dogolik, kinowado paga su mberendek yikidek omanggiat yikogo lano,” yiluk yogisalok omanggi men yogisasike,
10“Akoni inoba lalok, o ya unggigik, nda unggigik, unggisi dogogup o. Unggugunmo etomaat dogoluk o ninmo luwogoluk kalok etoma nenat duki witluk lano o. 11It akoni o omanggi nen kinebe wokinakik, kinane kolkik, kagakidek kalok, o etomala nen duki lago dogolik, it o etoma mende inakla diduwagaluk, kiniyok kola negen korogo ʼbiluk duki witno,” yiluk inasuk warogo laʼbiyasike. 12It yomenogo esigit diluk laʼbiyasikemo lago dogolik, akoni men yogisilik laguka,
“Kit weyak kagarigogi mende eti togot diyalok kinobabut kwalatni o,” yiluk yogisilik noko dogolik, 13kugi inobabut weyak mende dogalegat akoni inakla unggiluk werekma mukogo wula ʼbiyigik, u inoba welaguka mende inebe dogalegat minyak ambusu inunggulowak oba wusabogo pano kagarinakik, kagarik laguka.
Yohanes ima wusa ʼbiyasi lagike mende etnogo ebe wakuka wene
(Matius 14:1-12; Lukas 9:7-9)
14Yesus agoromi nen esigit diluk kagarinabik lagonem, at Yesus endaga akoni o ya nda etoma inilu agukasik abok yisinem, at endaganggok Herodes asuk kolkikeat. Esigit diluk kagakonem it akoni amberek nen men yisi laguka,
“Yohanes ima wusa ʼbinasi lagike mende ebe wakama watlaga etnogo iluk agasik waga kigi. Esigit diluk iluk agasik eti paga kagasusak dek mende elalinat kagarigogo o.” yigik, 15nen, it amberek nen,
“Dek o. Eti at Elia ebeat o,” yigik, it amberek nen,
“Dek o. It ap paganeat Allah wene yogisasi laguka mende nen yogisasi laguka kagat, yogisilik liligogo eti at ebe it eti mende omanggi selekma agasik liligogo,” yigik, ebe Yesus mendeat esigit diluk yisi laguka. 16Esigit diluk yisinem abok at Herodes asuk kolkikesik men yisike,
“Dek o. At Yohanes arlonggop ade mbalogo wakima watlaga etnogo yabunggane iluk agasik kagarigogoat o,” yiluk yisike. 17-18Esigit diluk yisike eti, pagane at Herodes nen agot Filipus age endaga Herodias eti waganggikemo at Yohanes nen men yogoko lagike,
“Kat nen kagot age waganusak dekma waganggen eti waganek dogusak erlok dek o,” yiluk alep-yabungga enggarli warogo yogoko lagike eti paga, at nen ap inayonggo ʼbisikemo Yohanes ebe pakasukasik wolok wagukasik inggi kerle warogo o ininggi kerle warogo ʼbiyiligogoma nggola ʼbisuka. 19-20Nggola ʼbisukama werekma, at kwe Herodias nen, at akla uwa dogolik,
“Yohanes eti mondok naʼit,” yiluk at Herodes nen wasuwagaluk akla nggagalko lagike mende, at Herodes akla nen men ambasi lagike,
“At Yohanes ebe Allah nen laʼbi wagikemo dogolik obabut morat kagarigogo,” yiluk aren mbalogo ebe alon palko dogolik wasusak erlok dek agikemo, ebe irli waganogo pago welagike. Pago dogolik, ane kolko dogu warlok nen kolko lagike mende, kolko dogolik, wene munini dogalegat ebeko lagike. 21Esigit diluk ebeko werekma, at Herodes ebe endak lagike paga kurli arat asi wagikemo, pesta nggok iyago nuwogoluk, agoromi pemerintah nggokndek inom, ap tentara ineugi inom, ap inendaga werek o Galilea agum mende inom, iyago nuwogoluk inayonggo ʼbisikemo nandokuka etinem, at kwe Herodias akla nen,
“An nen Yohanes mondok naʼit, wasuwak ambaligogo etnogo yogondak erlok yi paga wasuwak,” yiluk ambasike. 22Esigit diluk ambasikesik, pesta iyago nonggonem, at eyak korlak sarlisik mende nggola ʼbisikemo unggisikesik endai uwak saʼbik uwak saʼbok wako dogolik, pano mondok wakikemo, at Herodes ebe inom, ap unggisuka mende yomenogo inom, inakla arlenggen aguka. Inakla arlenggen agukama, at endaganggok Herodes eti nen men yogokike,
“Kat nen nena mende nggino yokneken kalok wokisiginat o. 23O yoma an nggok dogolik pagisek dogoligogoma kat nen,
Eti mende warlok, yegen kalok, kisogo minggirlogo pelak wokisiginat o,” yiluk Allah endaga kumbuk mbalogo yogokike. 24Yogokikemo at korlak sarlisik etnogo dukisikesik agoya oba lagikesik men yogokike,
“An nen nena mende nggino yik,” yiluk yogokikemo at nen, men yogokike,
“At Yohanes ima wusa ʼbiyiligogo mende etnogo unggulowak mbalogo wokisuwak nen, nggino yogotno,” yiluk yogokike. 25Esigit diluk yogokikemo eranogoat, at endaganggok etnogo ʼbika lagikesik men yogokike,
“Nombae, at Yohanes ima wusa ʼbiyiligogo mende etnogo unggulowak mbalogo piring nggok sabak paga ndemerogo yogondak yaat woknitnok o. At etiat warlok,” yiluk yogokikemo, 26at nggok Herodes etnogo akla mondok weyak agike. Esigit diluk weyak agike mende,
“An nen nagoromi ninom pesta iyago nonggo dogolik inilka paga,
Allah endaga kumbuk mbalogo eberogonat wokisigin o, yiluk abok yogokirikmo, togot dusak naʼit o. Wogosiginat o,” yiluk akla ambasike. 27Esigit diluk akla ambasikesik, ap tentara akoni ininggi kerle warek pagisek welaguka mende omanggi men yogokike,
“Yohanes etnogo arlonggop ade ʼbogokogo unggulowak mbalogo wolok witno,” yiluk laʼbisike. Laʼbisikemo o ininggi kerle warogo ʼbiyiligogoma lagikesik, Yohanes ebe arlonggop ade ʼbogokogo wakikesik unggulowak mbalkike. 28Mbalkikesik, unggulowak mbalek piring nggok sabak mende paga ndemerogo korlak sarlisik etnogo wogosi wagike. Wogokikemo at nen, agoya wogosi lagike. 29Esigit diluk kagakukama, akoni nen,
“Yohanes esigit diluk wakama warek werek,” yiluk yisukama, it Yohanes agoromi ane waganggo laguka mende yomenogo inasuk kolkukasik ebe warek etnogo wagani wagukasik, oila warek ʼbiyiligogoma ʼbi lagukasik werekma, at Herodes nen Yesus abok kolkikesik
“Yohanes iluk agasik kagarigogo kigi,” yiluk yisike o.
Akoni inebe 5.000 paga Yesus nen kimbiri melagisasike wene
(Matius 14:13-21; Lukas 9:10-17; Yohanes 6:1-14)
30It ap Yesus nen inayonggo ʼbiluk laʼbiyasike mende yomenogo suguluk at oba nandorli wagukasik nen, men yogokuka,
“Nit nen yigit diluk kagako, ndigit diluk kagako. Wene yigit diluk yanggul isogo, ndigit diluk yanggul isogo,” yiluk mbilelogo yogokuka. 31Esigit diluk yogokonem, akoni dogalegat etoma lagik, wagik, kagakonem kimbiri ninggit diluk naʼbugat kagat lagikemo, at Yesus nen agoromi men yogisasike,
“Set ʼbugurlagat walubagik nen, o akoni inaren dekma ninasokneat mbontogo luwok o,” yiluk yogisasike. 32Esigit diluk yogisasikesik at ebe inom it inasokneat nggu warogo, o akoni inaren dekma wundalkuka. 33Wundalkonem, it akoni dogalegat inilenggen lagiyalok nen,
“It etnogo eti kigi,” yiluk didiyasuka. Didiyalok, it o yi ai ndi ai dombok taʼbokogonat nen i aik obangge mbirirli alebagik inelokoma nandorli lagukasik werekma, it Yesus agoromi inom yomenogo yabunggane wundalkuka. 34Wundalkukasik, at Yesus nggu akla nen dukisi dogolik, akoni dogalegat yomenogo ilenggen lagiyalok nen inaʼbuwa iyasikesik men yisike,
“Domba pagisek dogoligogi kak, it yoma pagisek dogu mende inebe dek nen werek yi. Inaʼbuwa o,” yiluk yi wene ndi wene dogalegat yanggul isasi lagike. 35Yanggul isasi nggorlek, o liyok yisikemo, Yesus agoromi ane waganggo laguka mende yomenogo oba wagukasik nen, men yogokuka,
“Nit o yoma akoni inaren dekma werekma, o arat liyok yeke yi. 36Akoni yoma, eragalilungge o unggul nggokmangge ʼbugurlagatmangge inambiri inenggaerek inake onggo mbali lowak nen, laʼbiyan o,” yiluk yogokuka. 37Esigit diluk yogokukama, at Yesus nen,
“Kit nenat melagisani o,” yiluk yogisasikemo, it nen men yogokuka,
“Iya! Akoni nen yabu ininggi omanggi pasik kagakonem, ininggi onggo uang wogisiligogi eti negen mende, nit nen 200 wolok, roti onggo mbalogo akoni yigirlikmo erlok melagisawagaluk yegen? Erlok dek o,” yiluk yogokuka. 38Esigit diluk yogokukama, at Yesus nen, men yogisasike,
“Kit kimbiri roti meren werek. Kinilenggen ʼbika lani o,” yiluk yogisasikemo, it inilenggen ʼbika lagukasik nen wagukasik,
“Kimbiri roti 5. Nen, ikan mbere,” yiluk yogosi waguka. 39Yogosi wagukama, at nen, men yogisasike,
“Akoni yoma inebe kelaben enggama sabulengga ndalek mondokma etoma enggen wagan kigik korek larik lowak nen yogisani o,” yiluk agoromi yogisasikemo 40it nen akoni dogalegat yomenogo yogisasukama inebe selalik selalik korek larik lagukama inebe amberek 100, amberek 50, enggen wagan kigik korek larik laguka o. 41Esigit diluk arat korek larik lagukama, at Yesus nen kimbiri roti 5 eranogo inom, ikan mbere eranogo inom, inggimo waganggikesik nen ilenggen mbogot oba liyakasikesik nen, Allah keyagi warogo roti eranogo nggusogo, agoromi ane waganggo laguka mende nen akoni dogalegat yomenogo sumburisawagaluk wogisasike. Nen, ikan mbere eranogo esigit dilugat it taʼbokogonat sumburisawagaluk mbalogo wogisasikeat. 42Sumburisasukama, it inebe taʼbokogonat inaʼit togonat nasuka. 43Esigit diluk nasukasik nen, roti nggusik amberek inom, ikan mbalek amberek inom, ndindurogo ʼbisukama Yesus agoromi nen nandorlogo mul yago mende 12 paga ambem kerokigik yukarlogo ʼbisuka. 44Kimbiri roti mende nasuka eti ap arlek inebe 5.000 paga wenaginakuka.
Yesus iyok i agum obangge ʼbilik wagike wene
(Matius 14:22-33; Yohanes 6:15-21)
45Esigit diluk arat nasukama eranogo nen, at Yesus nen, agoromi ane waganggo laguka mende yomenogo men yogisasike,
“An akoni dogalegat yoma laʼbiyak nen, kit ndak nggu akla unggiluk, o Betsaida aik ilibagangge etoma wundali lani o,” yiluk ane obatnerogonat yogisasike.
46Esigit diluk yogisasikemo wundali lago nggorlek, at Yesus nen it akoni yomenogo arat laʼbiyalok, at sembayan yigiluk ndom oba dagasike. 47Dagisikesik at agoromi yomenogo i yenggelekma nggu warogo ndurlem kisogo werek nggorlek, Yesus arligat ndom oba werekma o arat ki agike. 48O ki agikemo nen, kwiyakne inelokomangge nen pulka wagonem, it nggu aninirogo warik wagonem, Yesus ilenggen lagiyasike. Ilenggen lagiyalok nen, o wisigiluk kagako nggorlek, at iyok i agum obangge ʼbilik inoba wagikesik nen, ineragalilungge mbiyokogo lagaluk kagakike. 49-50Esigit diluk kagakonem, it taʼbokogonat nen at iyok i agum obangge ʼbilik wagonem inilenggen lakalok ebe monggat salek inagut lalok inayuk nen inane naik yisuka. Esigit diluk yisinem eranogoat, at Yesus nen men yogisasike,
“Nagoromi, kinagurakma. An nebeat wirigogo. Kinayuk agup o,” yiluk yogisasike. 51Esigit diluk ane paginabiluk nen nggu paga inoba unggisikemo, kwiyakne etnogo dek agike. Dek agikemo, it nen,
“Iya. Ninayuk o,” yiluk mondok pogorakuka. 52Esigit diluk pogorakuka eti alebat roti ndindurogo wogisasike etnogo didigidek inakla mbugat dogolik, yabunggane kwiyakne dek agikemo pogorakuka o.
Yesus nen akoni o Genesaret mende inoba u pano kagarinakike wene
(Matius 14:34-36)
53Esigit diluk kagakukama, at Yesus agoromi inom o Genesaret, i yenggelek etnogo aik ilibagangge wundalkukasik nen, nggu etnogo kol o ndilogo ʼbisuka. 54Nggu kol o ndilogo ʼbiluk dukisinem, it akoni etoma mende nen eranogoat,
“Yesus agoromi inom eti,” yiluk didiyasuka. 55Didiyasukasik nen, mbirirli o ya nda etoma lagukasik it amberek nen,
“Yesus o etoma werek,” yiluk, yisinem inasuk kolkukasik, akoni inoba u warek mende o mberlagogo Yesus oba wogisek wago laguka. 56At Yesus ebe o unggul nggokma unggigik, o ʼbugurlagatma unggigik, o asokneat mbontogo palekma unggigik, kagakonem, it akoni nen it amberek inoba u warek mende wogisek o silimo ʼbiya wago laguka. ʼBiya wago lagukama it nen,
“Yesus, kiyom ilugunat nininggi pakawok a?” yiluk inane inaʼbuwarek inane yogokukasik, it at iyom ininggi pakasuka mende taʼbokogonat inoba pano aguka.
Pašlaik izvēlēts:
Markus 6: DNA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties