Matius 8
8
At Yesus nen ap omanggi u konanggo negen inayuk mende welagike mende pano kagakike wene
(Markus 1:40-45; Lukas 5:12-16)
1At Yesus ndom oba nen wusa wagikemo, akoni dogalegat nandokukasik at omborlik laguka. 2Lagonem, ap omanggi u konanggo salek inayuk mende oba welagike mende oba wagikesik, indibagal yunggulogo somak yisikesik nen, men yogokike,
“Yesus newe o. Kat nen pano kagat nabigin ambegen kalok, erlok pano kagat nabusagat o,” yiluk yogokike. 3Esigit diluk yogokikemo, Yesus nen ap etnogo inggi paʼbiluk nen,
“Nakla nen pano kagat kabigin ambigirikmoat o. Eti paga, koba pano asin o,” yiluk yogoko nggorlek eranogoat u konanggo salek inayuk mende etnogo mondok dek atluk ebe pano agike. 4Pano agikemo, at Yesus nen, men yogokike.
“Kat nen, Yesus nen esigit diluk kagat nake o, yiluk, akoni amberek mondok yogisagup o. Ap Allah indewerek mende nen ilenggen kiyawak nen oba lalok men kagatno o. At Musa nen yisi dogolik,
Akoni inoba pano atluk, Allah ake esigit diluk ʼbiyausak o, yiluk yisike ndak-ndagat ʼbiyasinem didaguwak nen, agake ʼbiya lano,” yiluk yogokike.
Yesus nen ap tentara inewe anduwanengge omanggi u kagakike wene
(Lukas 7:1-10)
5Esigit diluk yogokikesik nen, o Kapernaum unggisinem, ap tentara inewe nggok omanggi Yesus oba wagikesik nen, men yogokike,
6“Newe! An nanduwanengge omanggi inggi iyok aborlok dek mondok uma windik dogolik, kenet weyak warigogo,” yiluk yogokikemo 7at Yesus nen,
“An nen pano kagasi wisigin o,” yiluk yogokikemo nen, it ap tentara inewe nggok etnogo nen,
8“Iya! Newe! An ap elegeatma, kat an naguma unggi lausak erlok dek o. Kebe ya nen kane yumo an nanduwanengge eti pano asigin o. 9An nen, neugi nggokndek inapma dogolik inane kolkik, nen, an nagoromi tentara napma dogolik nane kolkik, kagarigogima, an nen, at omanggi
Lan o, yiluk yogoko kalok, liligogoat. Nen omanggi
Kat eme o, yiluk yogoko kalok, wirigogoat o. Nen, nanduwenengge omanggi
Yi kagatno, yogoko kalok, kagarigogoat o,” yiluk yogokikemo 10at Yesus asuk kolkikesik nen, akoni at omborlik laguka mende yomenogo men yogisasike,
“Iya! Ap yi endainggen noba eberogonat panggot deke eti kak, it akoni Israel mende omanggi inendainggen esigit diluk panggot disinem iyiligogo dek mende nayuk a, yiluk eberogonat yokisigi o.
11Nen, omanggi yi yokisak. Akoni inebe dogalegat ombo eloma nen, wema eloma nen, nombae mbogot oba mende apma unggiluk nen, Abraham inom, Ishak inom, Yakub inom, iyago nuwogoluk nandorli wisugun o. 12Mende, it akoni Israel mende eti, o etoma irat indewerek asusak mende, sikmangge o amum werekma etoma laʼbiyamo, inaik nggirlim mak-mak kagako dogolik, di ako de ako mondok dogogun o,” yiluk yogisasike. 13Esigit diluk yogisasikesik nen, at Yesus nen ap tentara inewe nggok etnogo men yogokike,
“Kebe lan o. Kat kendainggen an noba panggot diluk, kakla nen,
Esigit diluk pano kagat nisusak yiluk ambegen eti kagat, kagat lasuwak o,” yiluk yisi nggorlek eranogoat, anduwanengge etnogo oba pano agike.
Kwe Petrus akowan inom, akoni amberek inom, Yesus nen u pano kagarinakike wene
(Markus 1:29-34; Lukas 4:38-41)
14Esigit diluk kagakikesik nen, at Yesus Petrus aguma lagike mende, kwe Petrus akowan oba u aganggen weyak nen, windik werekma ilenggen kasike. 15Ilenggen kasikesik, Yesus nen inggi paga pakasikemo, oba u aganggen mondok nggogat welagike etnogo dek agike. Dek agikemo, kwe etnogo melagikesik at Yesus yamakasi lagike.
16Esigit diluk kagako nggorlek, o arat ki agikemo, akoni kugi inobabut weyak mende inakla unggiluk welaguka mende wogisek Yesus oba wagukama, at ane omanggi pasigat kugi inobabut weyak mende inakla nen mukogo wula ʼbiyigik, u warek mende taʼbokogonat pano kagarinakik, kagakike. 17Esigit diluk kagakike eti, at Yesaya Allah wene yogisasi lagike mende etnogo nen kolal mbalko dogolik,
“Nit yi u ndi u waganigogo mende eti at nen waganogo deget diyigik, ninobatne dek atluk kai arigogi mende eti pano kagat ninakik, kagakike o,” (Yes. 53:4)
yiluk yisike eti ndak-ndagat asuwagaluk kagakike o.
Akoni Yesus omborlik liligogi wene
(Lukas 9:57-62)
18Akoni dogalegat Yesus oba wagukama ilenggen ʼbiriyalok nen, at agoromi ane waganggo laguka mende yomenogo men yogisasike,
“Nit nggu warogo i aik ilibagangge eta luwok o,” yiluk yogisasike. 19Esigit diluk yogisasikesik werekma, it ap Allah wene kolal mbalek indewerek mende omanggi Yesus oba wagikesik nen, men yogokike,
“Newe. An kat nggomangge ligin kalok, komborlik mondok noko dogogin o,” yiluk yogokike. 20Esigit diluk yogokikemo, at Yesus nen,
“Yengge kelo eti, ai palek agat kulelogo anggolakla werek. Nen, sewe putluk liligogo mende eti, ai palek weregat. Mende, an abat endak lasi wagagi yi, noge yisi dogusakma nago palek mondok dek o,” yiluk yogokike. 21Esigit diluk yogokikemo ap at ane waganggo laguka mende omanggi nen, men yogokike,
“Yesus newe. An nombae watlasusakma, eti ndak agatma sali lak nen, kat nen,
Lan o, yiluk yoknetnok nek yiluk yokigi o,” yiluk yogokike. 22Esigit diluk yogokikemo at Yesus nen, men yogokike,
“Togot diyalok nen, nomborlik eme. Warek mende kalok, it akoni inebe warek mende negen werek etoma nenat salinako dogowak o,” yiluk yogokike.
Yesus nen i kokdabu nggogat mende aborlok deget disike wene
(Markus 4:35-41; Lukas 8:22-25)
23Esigit diluk yiluk yogisalok nen, at Yesus ebe nggu akla unggisikemo, at agoromi ane waganggo laguka mende yomenogo inomat unggisuka. 24Unggisukasik nggu akla lagonem, kwiyakne aninirogo pulka wagikemo, i kokdabu nen nggu wako dogolik akla i ambem kerokogo yenggeli unggisi nggorlek, at Yesus noge yisi lagike. 25Noge yisinem, agoromi eragalilu wagukasik ilugut kasi dogolik, men yogokuka,
“Yesus. Nit i lugun yoma, ndil ninabin o,” yiluk yogokuka. 26Esigit diluk yogokukama, at Yesus nen,
“Nenaluk kinayuk arigogi? Kinendainggen an noba panggot duʼbuk yoma!” yiluk ane yilik yilik melagikesik kwiyakne etnogo inom, i kokdabu etnogo inom,
“Kaborlok,” yiluk mberikikemo, aborlok mondok dek agike. 27Esigit diluk kagakikemo, it agoromi ane waganggo laguka mende yomenogo nen pogorako dogolik, men yisuka,
“Iya! Ap yi ta ambegep? Kwiyakne inom, i kokdabu inom, at ane kologo dek aga eti ninayuk a!” yiluk pogorakuka.
Ap inebe mbere kugi inobabut weyak mende inakla unggiluk werekma Yesus nen wula ʼbiyasike wene
(Markus 5:1-20; Lukas 8:26-39)
28Yabunggane, ap Gadara mende inaguma i yenggelek aik ilibagangge wundalkuka kak, it ap inebe mbere kugi inobabut weyak mende inakla unggisikemo welaguka mende eranogo warek ʼbiyiligogoma etoma nen Yesus oba waguka. It ap eti inanini mondok weyak nen, akoni it inayuk nen kolak etingge mondok lago laguka dek mendeat, Yesus wagikemo oba duki wagukasik, 29inane nggokogonat, men yogokuka,
“Kat Allah aʼbut yi. Kat nen, nit nena kagat ninabigiluk wagan. Nit ninasusak oba awan werek nggorlegat, kat ndak ninasigiluk wagan yi!” yiluk yogokuka. 30Eta amot paga o etoma eragalilungge korogat wam mondok dogalegat nggonak nasi laguka. 31Nggonak nasi werekma, it kugi inobabut weyak mende it ap inebe mbere eranogo inakla dogolik men yogokuka,
“Yesus. Kat, ninebe wula ʼbinanigiluk kalok, wam dogalegat nggonak niligogi eloma inakla yukatlasi luwok nen, laʼbinanin o,” yiluk inane inaʼbuwarek inaʼbuwarek yogokuka. 32Esigit diluk yogokukama, at Yesus nen,
“Lani o,” yiluk yogisasike. Yogisasikemo, it kugi inobabut weyak mende ap eranogo inakla nen duki lagukasik wam dogalegat nggonak nasi laguka yomenogo inakla yukat lasi lagukama, wam yomenogo mondok taʼbokogonat kum yiluk nggatma i yenggelekma mondok wusasukasik i laguka. 33Esigit diluk i lagukama nen, it akoni wam inanggorlem welaguka mende inayuk atluk,
“Yigit diluk kagat laga o,” yiluk yonggo o unggul nggokma mbirlika lagukasik nen, it ap inebe mbere eranogo inabok inomat mbilelogo yogisasuka. 34Esigit diluk yogisa lagukama it akoni o etoma welaguka mende Yesus ʼbika wagukasik nen,
“Kat kebe o yoma dogusak dek o. Lausak o,” yiluk inane obatnerogonat yogokuka.
Pašlaik izvēlēts:
Matius 8: DNA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties