Yohanes 19
19
139 “Barabas piyal nisan o,” yiluk yisukama, at Pilatus yabunggane unggisikesik nen, Yesus ndugi wasuwagaluk wogisasike. 2Esigit diluk wogisasikemo, it ap tentara nen ap nggokndek mende inenggare-nggare yikiligogi eti kak, arlok weyak mende manggona warogo Yesus unggulowak oba yiʼbigik, su elokonggen nggiʼbi-nggiʼbi warek negen, ap nggokndek yikiligogi mende negen yiʼbigik, kagakuka. 3Esigit diluk yiʼbisukasik inebe korokogo unggisi dogolik, men yogokuka,
“Akoni Yahudi mende inewe endaganggok ninewe wa,” yiluk yogoko dogolik ininggi agut paga elokonggen dambuk wako laguka. 4Esigit diluk wasugun ambasuka, at Pilatus etnogo yabunggane it akoni Yahudi mende ʼbiriya duki lagikesik nen, men yogisasike,
“Warligi yi. Lakani! At wene oba ʼbegepma mbilelki mende, at weyak omanggi kagakemo kigi mondok dek eti kinilu asubagik nen yiluk wulakiya wagi o,” yiluk yogisasikemo, 5at Yesus arlok mende nggare-nggare negen etnogo unggul oba yuguat, nen, su elokonggen nggiʼbi-nggiʼbi warek negen etnogo yuguat, duki lagikemo, at Pilatus nen,
“Ap yi kinilenggen ʼbikani!” yiluk yogisasikemo, 6it ap Allah indewerek mende ineugi nggokndek inom, it ap Allah ago palek anggorlem werek mende inom, Yesus inilenggen kasukasik inaneyak nggogat walko dogolik,
“At ebe o paga mendiluk watno o! O paga mendiluk watno o,” yiluk inane obatnerogonat yogokukama, at Pilatus nen, men yogisasike,
“An nen, at weyak kagake mende omanggi kigi mondok dek eti paga, kit kinenggaerek kinoba dombok at ebe waganogo o paga mendiluk watno o,” yiluk yogisasikemo, 7it ap Yahudi mende yomenogo nen, men yogokuka,
“At nen yisi dogolik,
An nebe Allah aʼbut, yisike eti paga, wene Allah nen ninasuk wakike wene, nit nen kagarigogi eti ndak-ndagat, nit nen ebe wasusak erlogat o. Eti paga, wasusak ambaligogi,” yiluk yogokuka. 8Wene esigit diluk yugun ambasuka, at Pilatus asuk kolkikesik nen, ayuk mondok nggokogonat agike. 9Esigit diluk ayuk agikesik, Yesus wolok suguluk o nggok palekma etnogo unggisikesik men yogokike,
“Kat kago erlo o nggoma,” yiluk yogokike mende, at Yesus nen onggo yigidek puk agike. 10Ane yigidek puk agikemo, at Pilatus nen yabunggane men yogokike,
“Kat an nimbisak wenenggak yusak kaʼit a? An nen kat kerle piyalogo togot dagusak inom, nen, o paga mendagaluk kasusak inom, anat inde werek eti kat konggodek a?” yiluk yogokikemo, 11at Yesus nen, men yogokike,
“At Allah nen,
Kat nen wene akoni inoba ʼbigik, nggokik, kagako dogono, yiluk kat indewerek ʼbagilep dekma, kat nen wene noba ʼbanusak erlok degat o. Eti paga,
Kat weyak kagaken, yiluk wene koba ʼbugurlagat werek mende, at omanggi nen an nebe waganogo kat kinggi paga ʼbani waga mende etiat, weyak kagake, yiluk wene nggok oba werek o,” yiluk yogokikemo, 12at Pilatus asuk kolkikesik nen, Yesus kerle piyalogo ʼbigiluk walkasike mende, it ap Yahudi mende yomenogo inaneyak nggogat walko dogolik, men yogokuka,
“Ap ta nen,
An nebe nendaganggok, yiluk enggaerek nen yisi kalok, ap nggok Kaisar, Naʼit, yiluk ambiligogo. Kat nen at eti kerle piyalogo wula ʼbegen kalok, kat ap Kaisar kimbisak kunik mende dek o. At kinom weyak mende ambogo,” yiluk yogokukama, 13at Pilatus asuk kolkikesik nen, Yesus ebe wolok duki lagikesik nen, o sili endaga Nggit Ndalekma. It akoni Ibrani mende inane paga, endaga Gabata yisi lagukama etoma o mberlago paga korek dogolik, wene inoba ʼbigik, nggokik, yiligogima korek lagike. 14Korek lagike etanem, kubulukngge pesta Paskah nilik luwogoluk, yi mende ndi mende ndugurogo ʼbisi nggorlek, jam 12 dinggagane enggendurlem korek lagike. Korek lagikesik, akoni Yahudi mende men yogisasike,
“Warligi yi. Ap yi kit kinewe endaganggok yi kinilenggen ʼbikani!” yiluk yogisasikemo 15it nen inaneyak nggokogo walko dogolik,
“Ebe watno! Ebe watno! O paga mendiluk watno o!” yiluk yisi mondok yogokukama, at Pilatus nen, men yogisasike,
“An nen kit kinewe endaganggok yi o paga mendiluk wasusak pano ambaligogi a?” yiluk yogisasikemo, it ap Allah indewerek ineugi nggokndek nen, men yogokuka,
“Nit ninewe endaganggok Kaisar arligat o. Omanggi dek o,” yiluk yogokukama, 16at Pilatus nen Yesus ebe o paga mendiluk wasuwagaluk wogisasike. Esigit diluk wogisasikemo, Yesus ebe wolok duki laguka.
Yesus o paga mendiluk wakuka wene
(Matius 27:32-44; Markus 15:21-32; Lukas 23:26-43)
17Wolok duki wisuwogoluk nen, o Yesus ebe mendiluk wasugun mende etnogo enggaerek nen wolok lowagaluk omorlo paga ʼbisukasik, o nit ninane paga, endaga Inunggulowak Mbalegem unggul yu kak, it akoni Ibrani mende inane paga, endaga Golgota etoma wolok duki waguka. 18Duki wagukasik etoma nen Yesus ebe o paga ndurlem mendiluk nen, it ap mbere ninat mende inom abel pelak-pelak mendiyasuka. 19Esigit diluk mendiyasukama, at Pilatus nen, kolal men yiluk mbalkike,
YESUS AGO O NAZARET MENDE AKONI YAHUDI MENDE INEWE ENDAGANGGOK,
yiluk kolal mbalogo wogisasikemo, o Yesus mendisuka etnogo paga ndetnokogo ʼbisuka. 20Kolal eti akoni Ibrani mende inom, Roma mende inom, Yunani mende inom, inane paga mbalogo ʼbisikemo werekma, o kota nen Yesus o paga mendiluk wakukama etoma walegat ʼbuk. Korogat eti paga, akoni Yahudi mende dogalegat kolal mbalek etnogo endaga wenako laguka. 21Kolal esigit diluk mbalogo ʼbisikemo, it ap Allah indewerek ineugi nggokndek nen Pilatus men yogokuka,
“Akoni Yahudi mende inewe endaganggok yiluk, kolal mbalugup o. At te, yigit diluk mbalin o.
Ap yi nen yisi dogolik,
An akoni Yahudi mende inewe nendaganggok, yeke yiluk mbalin o,” yiluk yogokuka mende, 22at Pilatus nen, men yogisasike,
“An kolal mbalki mende etiat mbalek dogowak o!” yiluk yogisasike. 23Esigit diluk yogisasikemo, it ap tentara nen, Yesus ebe o paga mendisukasik nen, iyom nonggorlek inebe dombok omanggi-omanggi korlawogoluk, su ebe 4 paga nen minggirlogo ʼbisuka. Nen, iyom nggarek dek uwanat, salukogo sikmangge yugu mende korlawogoluk, 24it ap tentara nen it-it omanggi nen omanggi yogoko dogolik,
“Su yi mbaluwok dek o. At ta kak korlagin yiluk omandok senggerlogo walkiligogi kak, nggit mende walkawok o,” yiluk yisuka. Esigit diluk yisuka eti Allah wene kolal mbalogo ʼbisukama, men werek,
“An niyom nonggorlek sumburasukasik nen, niyom sikmangge mende korlawogoluk nggit mende walkasuka o,” (Mzm. 22:18=TB 22:19)
yiluk yisuka mende kolal mbalogo ʼbisuka mende werek ndak-ndagat, it ap tentara nen esigit dilugat kagakukama eberogonat agike o. 25Esigit diluk kagako nggorlek, Yesus agoya inom, agoya agot inom, kwe Maria ap Klopas age inom, kwe Maria ago o Magdalena mende etnogo inom, o Yesus ebe mendisukama eragalilu mendek welaguka. 26Nen, at agoya inom, agoromi ane waganggo laguka mende omanggi endainggen kunik mondok welagike mende etnogo inom, eragalilu esigit diluk mendek werekma ilenggen iyasikesik nen, at agoya yogoko dogolik,
“Nagoya. Kat keyak etiat o,” yiluk yogokikesik, 27at agot ane waganggo laguka mende omanggi etnogo esigit diluk yogoko dogolik,
“Nagot. Kat kagoya etiat o,” yiluk yisi nggorlek eranogoat Yesus agoya etnogo, at agot eti nen pago dogowagaluk aguma wolok lagike.
Yesus ebe watlagike wene
(Matius 27:45-56; Markus 15:33-41; Lukas 23:44-49)
28Esigit diluk arat kagakukasikmo nen, at Yesus akla nen,
“Yi wene ndi wene taʼbokogonat ilugun nggobokogo arat kagaki,” yiluk ilu nogo nen, Allah wene kolal mbalogo ʼbisuka mende ndak-ndak asuwagaluk,
“An i abu,” yisike. 29Esigit diluk yisikemo, etoma iyak anggur enggen ambusu arle weyak mende kenago werekma, kwanggi isinggen negen mende magogo sokat oba kunogo nen Yesus ambema liyaʼbisuka. 30Esigit diluk wogokukama, induk walkasikesik nen, men yisike,
“Arat kagaki o!” yiluk yisikesik nen, urowak nggonokogo ebe arat watlagike.
Yesus arenggeyakma sege paga ndalkuka wene
31Etinem, kubulukngge ininggi 7 paga hari Sabat Allah ake werlegat doguwogoluk kagakuka. Mende, Allah ake werlegat kibitngge-yogongge dogoligogi kak ʼbuk. Ninat nggok mende doguwogoluk nogo nen, men yisuka,
“Nininggi 7 paga Hari Sabat Allah ake werlegat werek nggorlek it inebe o paga mendiyega mende eti warek o pagaat dogusak ninaʼit,” yiluk, ap warek eti inowak ndamelogo ʼbiluk, nggobologo wusa ʼbiya wisuwogoluk it ap Yahudi mende nen, at Pilatus nggino yogosi laguka. 32Esigit diluk nggino yogosi lagukama, it ap tentara yomenogo lagukasik nen, it ap Yesus inom o paga mendiyasuka mende yomenogo omanggi iyok owak ndamelogo ʼbigik, omanggi iyok owak ndamelogo ʼbigik, kagakuka. 33Esigit diluk kagakukasik nen, Yesus inilenggen ʼbikasuka mende, arat watlagikemo nen, iyok owak ndamelkidek togot disuka. 34Esigit diluk ndamelkidek togot disuka mende, ap tentara yomenogo omanggi nen, sege paga Yesus arenggeyakma ndaukogo wakikemo, sege elolangge amep inom, i inom, duki lagike. 35Esigit diluk kagat lagonem, ap omanggi ilenggen welagike mende nen, kit didubagik nen yiluk, at ilenggen kasike mende nen abok ʼbukakogo yiligogo yi. Nen, at nen,
“Eberogonat nilenggen dikogonat kigirik abok ʼbukakogo yokisigi,” yiluk, at iluat o. 36Wene esigit diluk kagat lagike eti Allah wene paga kolal men yiluk mbalogo ʼbisukama werek,
“At owak ndamel dugun mondok dek o,” (Kel. 12:46; Bil. 9:12; Mzm. 34:20=TB 34:21)
yiluk yisuka. 37Nen omanggi,
“At ebe sege paga ndaukogo wat diluk inilenggen kugun o,” (Zak. 12:10)
yiluk yisukama Allah wene paga kolal mbalogo ʼbisuka mende werekma ebeat asuwagaluk esigit diluk kagakuka.
Yesus ebe warek oila ʼbi laguka wene
(Matius 27:57-61; Markus 15:42-47; Lukas 23:50-56)
38Esigit diluk kagakukama, ap Yusuf, ago o Arimatea mende, Yesus apma unggisikesik, ap Yahudi mende ayuk nen, ane limago waganggo lagike mende eti nen, Yesus warek waganigiluk ap Pilatus nggino yogosi lagike. Esigit diluk nggino yogokikemo, at Pilatus nen,
“E o. Pano,” yiluk yogokikemo, at Yusuf nen Yesus warek etnogo wagani wagike. 39Esigit diluk wagani wagikemo, at Nikodemus, alebat kibanggo Yesus oba wagike mende etnogo nen, o mur enggen ambusu inom, o omanggi ambusu obasi pano mende inom, dambuk-pambukogo kagarogo anggin 30 kilo negen wolok Yusuf imbisak waguka. 40Imbisak esigit diluk wagukasik nen, it akoni Yahudi mende nen warek salinabigogi kagat, ambusu warogo su kain endaga lenan mende paga yilogo ʼbisuka. 41At Yesus o paga mendiluk wakukama eragalilu etoma yabu onggen yabu omanggi welagike. Yabula etoma oila nggerat elo perlelogo ʼbisukasik warek ʼbiyigidek mondok welagike. 42Esigit diluk werekma, kubulukngge it akoni Yahudi mende ininggi 7 paga hari Sabat Allah ake werlegat doguwogoluk, oila etnogo korogat nogo nen, warek etnogo oila etoma ʼbi laguka.
Pašlaik izvēlēts:
Yohanes 19: DNA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties