Yohanes 16
16
1At Yesus nen wene esigit diluk yogisasikesik nen, yabunggane omanggi men yogisasike,
“Kit kinakla mbuk atluk, an nebe nggolelogo togot danunogo yiluk, wene eti taʼbokogonat yokisigi o. 2Akoni o sembayan yiligogoma nen kit kininggi nggorlo nggigilogo wula ʼbinagagun o. Nen, yabunggane it akoni kit kinasugun mende inebe dombok inakla nen,
Allah ake pano inako, yiluk, yugun mende weregat o. 3It nen esigit diluk kagat kinabugun eti, an Nombae nimbisak ninebe inonggodek eti paga kagat kinabugun o. 4Esigit diluk kagat kinako kalok, kinakla nen,
Wene yi, at nen alebat yoknisasike etnogo, arat kagat ninabigogi yi, yiluk kinakla ebesubagik nen yiluk, wene eti taʼbokogonat yokisigi o,” yiluk yogisasike.
Yesus nen, “Allah Agurengge nen esigit diluk kagat kinako dogogin,” yiluk yogisasike wene
At Yesus nen wene esigit diluk yogisasikesik nen, yabunggane omanggi men yogisasike,
“An pagane kit ninom yoma werek eti paga, wene yi taʼbokogonat kinayonggo ʼbinagaluk yokisigidek welagagi mende, 5yabunggane, at an nebe laʼbani wagike mende etnogo oba ligin mende, kit amberek nen,
Newe. Kat o nggoma ligin, yiluk noba kinok woknabigogi mondok dek o. 6An nen wene yokisigi eti paga, kit kinakla mondok weyak aga mende, 7an nen wene ebe ʼbukakogo yokisak o. An ligin dek dogolepma, at kit Yamakiyasi dogogin mende eti kinoba witlep dek mende, an ligin eti paga, at eti an nen kinoba laʼbi wisigin o. An ligin eti paga, kit kinake pano mondok asigin, yiluk eberogonat yokisigi o. 8At eti ebe witluk nen, it akoni agat oba mende nen kagarigogi mende pasik selekmarogo yogisasi dogolik,
Kit kinakla eberigogi eti weyak kagarigogi mende pasik inom, mot kagako dogusak mende pasik inom, Allah nen wene inoba ʼbigik, nggokik, kagarigogo mende pasik inom, kinakla nggorlo eberigogi o, yiluk selekmarogo yogisa wisigin o. 9At witluk,
Kit nen kinendainggen at Yesus oba panggot digidek werek eti weyak, yiluk selekmarogo yogisa wisigin o. 10Nen, omanggi, an Nombae werekma lagonem, kit kinilenggen niyagun mondok dek eti paga, at Yamakiyasi dogogin mende eti witluk, wene mot-mot kagako dogusak mende pasik selekmarogo yokisa wisiginat. 11Nen, omanggi, Allah nen akoni agat oba mende inewe nggok etnogo wene oba ʼbiluk kai disikemo werek eti paga, at Yamakiyasi dogogin mende eti witluk nen, Allah nen wene inoba ʼbigik, nggokik, kagarigogo eti pasik selekmarogo yogisa wisigin o. 12An nen wene dogalegat yokisausak mende, kit waganusak erlok dek aga o. 13Esigit diluk mende, Allah Agurengge, ebe wene yiligogo mende eti witluk nen, kolak inonggodekma inilu mende nen yanggul isiligogi eti kak, ebe wene taʼbokogonat didubagik nen yiluk yanggul kisasi dogogin o. Esigit diluk yanggul kisasi dogogin eti wene at akla nen nggagalogo yisi dogogin dek o. Mende, at asuk koligogo mendeat yisi dogolik, yabunggane kagat lasigin mende yokisasi dogogin o. 14An nane yanggul kisaligogo mende eti at nen waganiluk, kit yanggul kisasi dogogin eti an pogot nako dogogun o. 15Yi mende ndi mende Nombae mende taʼbokogonat, an mende eti paga, Allah Agurengge eti an nane kologo waganiluk, kit yanggul kisasi dogogin yiluk yokisigi o,” yiluk yogisasike.
Yesus nen, “Kinakla weyak atlukmo nen yabunggane kinakla arlenggen kugun o,” yiluk yogisasike wene
16At Yesus nen wene esigit diluk yogisasikesik nen, omanggi men yogisasike,
“Nininggi mbereat dogoluk nen, an nebe kinilenggen niyagun dek o. Esigit diluk kinilenggen niyigidek kininggi mbereat dogoluk nen, yabunggane kinilenggen niyagun o,” yiluk yogisasikemo inasuk kolkukasik nen, 17at agoromi ane waganggo laguka mende yomenogo amberek nen, it-it wene yisi dogolik men yisuka,
“At nen,
Nininggi mbereat dogoluk nen, an nebe kinilenggen niyagun dek o. Esigit diluk kinilenggen niyigidek kininggi mbereat dogoluk nen, yabunggane kinilenggen niyagun o, yigik,
An Nombae oba ligin, yigik, yeke eti, wene ebe ninggit diluk mende pasik yeke ambegep?
18An ninggi mbereat dogogin, yiluk yeke eti, ebe nena pasik yokniseke ambegep? Nit didogo mondok dek o,” yiluk yisuka. 19Esigit diluk yisukama, at Yesus nen,
“It yi wene an noba kinok wokniyawogoluk yiligogi kigi,” yiluk enggagat didiyasikesik nen, men yogisasike,
“Nagarlagi. Nininggi mbereat dogoluk nen, an nebe kinilenggen niyigidek dogogun o. Nen, kininggi mbereat dogoluk nen yabunggane an nebe kinilenggen niyagun o, yiluk yokisigi eti pasik kit-kit yiligogi a? 20Yabunggane kit kinakla nen di ako, de ako, yugun mende, it akoni agat oba mende inakla arlenggen kugun o. Esigit diluk mende, kit kinakla weyak dogogun mende eti yabunggane pano agonem kinakla arlenggen mondok kugun o, yiluk, eberogonat yokisigi o. 21Kwe omanggi eyak korok endasigiluk kenet weyak wasusak oba kenet weyak warigogo mende, eyak etnogo arat endak kalok nen,
Neyak arat endakigi, yiluk akla arlenggen mondok kasi dogolik, kenet weyak wako etnogo obarlikma arigogo o. 22Kit esigit dilugat. Yogondak kinakla weyak werek mende, yabunggane an ninom abuk asugun etinem, kinakla arlenggen nggogat kugun o. Nen, kit kinakla arlenggen eti it akoni amberek nen deget dugun mondok dek o. 23Kurli eti kurli arat asi lalok nen, kit nen wene omanggi an noba kinok wokniyagun mondok dek o. Eti paga, an nen wene omanggi yokisak,
Kit nen yi mende ndi mende an nendaga mbalogo Nombae nggino yogosugun kalok, at nen wokisagin o, yiluk eberogonat yokisigi. 24O alebat nen kurli yogondak kurli, an nendaga mbalogo yi mende ndi mende omanggi nggino yigidek welagapma o. Eti paga, kinakla arlenggen nggogat kobagik nen, at nggino yogoko dogono. Esigit diluk yogoko dogumo, wokisasi dogoginat o,” yiluk yogisasike.
Yesus nen, “Akoni agat oba mende arat obatne deget diyigi,” yiluk yisike wene
25At Yesus nen wene esigit diluk yogisasikesik omanggi men yogisasike,
“Wene taʼbokogonat eti wene oba lisogo yokisasi lagi mende, yabunggane Nombae abok yisi dogolik, oba lisogo yokisagin dek o. ʼBukakogonat yokisagin oba werek o. 26-27Kit nen,
Yesus ebe Allah werekma nen wagike mende, yiluk, didanggo dogolik, naʼbuwarogo woknakigip eti paga, Nombae nen kit kinaʼbuwa werek o. Kit pasik an nen Nombae nggino yogosigin yiluk yokisiligogo dek o. O etinem, kit kinenggaerek nen an nendaga mbalogo Nombae nggino yogosugun o. 28An nebe Allah werekma nen akoni agat oba mende inoba wusa wagagi mende, yogondak kit agat oba yoma ʼbinagaluk Nombae oba niyogoba dagigin o,” yiluk yogisasikemo, 29at Yesus agoromi ane waganggo laguka mende yomenogo nen, men yogokuka,
“Newe. Yogondak kat nen wene oba lisogo yoknisigidek. ʼBukakogonat yoknisegen o. 30Kat akoni amberek nen wene omanggi kinok wokakidek kalok, wene ebe konggodek ʼbuk o. Kat yi wene ndi wene taʼbokogonat kilu arlek kiyogo o. Kat kebe eberogonat Allah nen laʼbagi wagikemo wagan, yiluk yogondakne didagogo o,” yiluk yogokuka. 31Esigit diluk yogosugun ambasuka, at Yesus nen,
“Yogondakne arat didanggep a?” yiluk yogisasike. 32Esigit diluk yogisasikesik nen, omanggi men yogisasike,
“Kit taʼbokogonat sirlik-mbirlikogo mukiyamo, an narligat togot daniluk kinagumangge dombok lo lugun oba awan werek mende, yogondak arat asi waga o. Kit esigit diluk sirlik-mbirlikogo lamo, an Nombae nimbisak dogogun eti paga, narligat dogogin dek o, yiluk eberogonat yokisigi o,” yiluk yogisasikesik, 33omanggi men yogisasike,
“Kit an ninom kunik dogolik, kinakla dirlukogo dogobagik nen yiluk, wene eti taʼbokogonat yokisigi o. Kit akoni agat oba mende nen yi aik ndi aik weyak kagat kinako dogogun o. Mende, akoni agat oba mende arat obatne deget diyigima eti kinayuk dekogo dogono,” yiluk yogisasike.
Pašlaik izvēlēts:
Yohanes 16: DNA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties