La’biyaske 5
5
It Ananias Safira imbisak nen weyak kagakuka wene
1At Barnabas nen esigit diluk ʼbi wagike mende, ap omanggi endaga Ananias. Age Safira imbisak nen ineyagat omanggi indewerekma it amberek inoba onggo uang wagangguka. 2Waganggukasik nen, Ananias eti age imbisak nen,
“Esigit diluk kagasuwok o,” yiluk yisuka mende age etnogo iluat werek nggorlek, agun nen uang yomenogo pelakngge it inake ʼbakalok, pelaknggeat it Yesus nen inayonggo ʼbiluk laʼbiyasike mende yomenogo ininggimo ʼbi wagike. 3ʼBi wagikemo, at Petrus nen,
“Ananias. Iblis nen kakla nggagalkemo Allah Agurengge nuket diluk agat onggo pelakngge minggirlogo kinenggaerek kinake ʼbakalok wagan eti nenaluk. 4Agat eti kat nen it amberek inoba onggo waganggidek werek nggorlek, kat keyagat mendeat. Mende, it amberek wogisegenma onggo ʼbega mende eti kat mendeat o. Mende, wene kakla nen esigit diluk nggagalogo kagaken eti nenaluk. Kane kenggalat yegen eti, nit akoni yoknisegen ʼbuk. At Allah at yogoken o,” yiluk yogokike. 5Esigit diluk yogokonem, wene eti, at Ananias asuk kolkikesik nen, abusagat nduntogo wilagikesik nen ebe watlagike. Watlagikemo, it akoni inebe taʼbokogonat wene kagat lagike mende eti, inasuk kolkukasik nen inayuk nggogat aguka. 6Esigit diluk watlagikemo, it elege tawe mende unggisukasik nen, ebe warek etnogo su yilogo nen wolok dukisukasik, agat kulelogo sali laguka. 7Warek wolok dukisukama 3 jam kak ʼbugurlagat welagukasik nen, Ananias age wene kagat lagike etnogo onggodegat akerak unggisike. 8Unggisikemo, at Petrus nen,
“Agat kit mende etnogo onggo, yi pagaat wokisega nogo? Panorogo yoknisin,” yiluk yogokikemo, at nen,
“E o. Eti pagaat woknisega,” yiluk yogokike. 9Esigit diluk yogokikemo, at Petrus nen,
“Wene kit kagun kimbisagat,
Yigit diluk kagasuwok, yiluk yegesip nen ninombae Endaganggok Allah Agurengge aren mbaluwogoluk kagakep eti nenaluk. Kagun ebe warek agatma sali lagakasik, kat esigit dilugat wokarek dukuwogoluk su kambema iniyok ane wagaka eti,” yiluk yogokike. 10Esigit diluk yogoko nggorlek eranogoat Safira etnogo abusagat Petrus eragalilu nduntogo wilagikesik nen ebe watlagike. Watlagikesik werekma, it elege tawe mende yomenogo unggisukasik inilenggen kalok nen, ebe warek wolok agun warek sal di lagukama eragalilu sal di laguka. 11Esigit diluk kagat lagikemo nen, it Allah aʼburi mende taʼbokogonat inom, nen it akoni amberek inasuk kolkuka mende taʼbokogonat inom, inayuk aguka.
Yesus agoromi nen kagasusak dek mende elalinat kagarinako laguka wene
12Akoni dogalegat yomenogo inom dogolik, it Yesus nen inayonggo ʼbiluk laʼbiyasike mende yomenogo nen wene akoni nen diduwagaluk kagasusak dek mende elalinat kagarinako laguka. Kagarinako dogolik, it Allah aʼburi inebe taʼbokogonat Allah ago palekma monggarai endaga Salomo palekma omanggimo nandoko laguka. 13Nandokonem, it akoni dogalegat yomenogo nen pogorinako laguka mende, it akoni werlek mende nen it inoba unggu inayuk welaguka. 14Inayuk werek nggorlek, it Allah aʼburi kagat laguka mende werekma, it ap o, kumi o, inakla nen,
“Ninewe Endaganggok eberogonat,” yiluk inendainggen at oba panggot diluk, it inom dambukogo inebe mondok dogalegat ago laguka. 15Esigit diluk ago lagukama, it akoni u warek mende amberek o mberlago ʼbiyigik, amberek direngga ndalogo ʼbiyigik, ʼbyalok nen, Petrus wagonem amukak inoba mot ago kalok u dek asuwagaluk, kolagarlem ʼbiya wago laguka. 16Esigit diluk kagako nggorlek, it akoni amberek inago Yerusalem eragalilungge mende eloma nen wago dogolik, it amberek u warek mende inom, kugi inobabut weyak mende inakla unggiluk werekma kunu-gunu ago laguka mende inom, wogisek inoba wago lagukaat. Wogisek wagonem inebe taʼbokogonat pano kagarinako laguka.
Yesus nen laʼbiyasike mende yomenogo it akoni amberek nen, yi aik ndi aik kagarinako laguka wene
17-18Esigit diluk kagarinakonem, ilugun oba, it ap Allah indewerek mende inewe nggok mende agoromi inebe taʼbokogonat inom, it eti akoni Saduki mende inane waganggo laguka mende nen, it Yesus nen inayonggo ʼbiluk laʼbiyasike mende yomenogo esigit diluk kagakonem inoba uwa mbalko laguka. Esigit diluk uwa mbalko lagukasik, inebe paʼbiyalok nen, o akoni ininggi kerle warogo ʼbiyiligogoma ʼbiyasuka. 19ʼBiyasukama, werekma, malaikat ninewe Endaganggok nen yonggo wusa ʼbiya wirigogo mende yomenogo omanggi kibanggo wusa ʼbi wagikesik nen, o akoni ininggi kerle warek ʼbiyiligogoma, su larek mende kuwalogo nen inebe wogisek duki wagike. 20Wogisek duki wagikesik, at nen wene yogisasi dogolik,
“Kit kinebe Allah ago palekma lani o. Lalok etoma unggiluk mendek dogolik, wene pano wene kinebe kiniluk dogolik ngget ninat kagako dogusak wene eti taʼbokogonat yogisa lano,” yiluk yogisasike. 21Esigit diluk yogisasikemo, inasuk kol diluk, o wiko nggorlek, Allah ago palekma unggisukasik wene yanggul isasi laguka. Esigit diluk yanggul isasi nggorlek, it ap Allah indewerek mende inewe nggok etnogo agoromi inom nen ap inarluwendek Israel mende wene erlo mbilelko laguka mende taʼbokogonat, inayonggo ʼbisukasik inebe nandot diluk, inagoromi amberek nen, it Yesus nen inayonggo ʼbiluk laʼbiyasike mende ininggi kerle warogo ʼbiyasuka mende etnogo wogisek wisuwagaluk, o ʼbiyasukama etnogo laʼbiyasuka. 22Esigit diluk laʼbiyasukama, it etnogo laguka mende, it Yesus nen inayonggo ʼbiluk laʼbiyasike mende etnogo ininggi kerle warogo ʼbiyiligogoma inebe dekma. Inebe dek nen iniyogoba wagukasik, it ap yomenogo men yogisa waguka.
23“O akoni ininggi kerle warogo ʼbiyiligogoma etnogo, su aʼbetogo larek werek nggorlek, kerle warek mende inebe dukunogo yiluk, ap su kambema suwam dogoligogo mende yomenogo inebe werekma lago. Lagosik ninebe unggogo mende, o akla it ap yomenogo inebe dekma,” yiluk yogisasuka. 24Yogisasukama it ap Allah ago palek anggorlem welaguka mende yomenogo inom, Allah indewerek ineugi nggokndek yomenogo inom nen,
“It ap Yesus nen inayonggo ʼbiluk laʼbiyasike mende yomenogo ninggit diluk kagat lagakama nen yega,” yiluk inobaka mbalagukasik,
“Yabunggane ninggit diluk kagat lasigin,” yiluk inayuk aguka. 25Esigit diluk inayuk agukasik werekma, ap omanggi wagikesik nen,
“Warligi. Kit ap ininggi kerle warogo ʼbiyegep yomenogo, Allah ago palekma mendek dogolik, akoni wene yanggul isiligogi,” yiluk yogisasike. 26Esigit diluk yogisasi lagikemo, at ap nggok Allah ago palek anggorlem welagike mende etnogo agoromi inom lagukasik nen, it ap Yesus nen inayonggo ʼbiluk laʼbiyasike mende yomenogo wogisek waguka. Mende, wogisek wisuwogoluk inakla nen,
“Akoni dogalegat nen Yesus agoromi inirli waganogo nit nggit oba ninasunogo,” yiluk ininggi nggorlo liriyalok wogisek wisu inayuk nen erogat wogisek waguka. 27Wogisek wagukasik nen, ap wene erlo mbilelko laguka mende yomenogo inakla ndurlem mendiyasuka. Ndurlem mendiyasukasik nen, at ap Allah indewerek inewe nggok etnogo nen, wene men yogisasike,
28“Kit nen ap eti endaga mbalogo nen wene yanggul isagup o, yiluk nit nen kinasuk panorogo wako etnogo mende, kit nen wene eti wikakogo yanggul isasi lagapma nen, akoni o Yerusalem mende yoma taʼbokogonat inilu aga eti, at ap eti waka eti, wene nit ninoba ʼbuwogoluk kagako lagap kigi,” yiluk yogisasuka. 29Esigit diluk yogisasinem, it Petrus agarlagi inom Yesus nen inayonggo ʼbiluk laʼbiyasike mende yomenogo nen,
“Nit, akoni inane kologo kagasusak dek o. Allah wene etiat kologo kagasusak o. 30Kit nen Yesus ebe kininggi pagogo o paga mendiluk wakepma etnogo, at Allah ninakombalak nen apma unggiluk pogorako laguka mende etnogo nenat suguluk ilugut dekemo werek o. 31Ilugut dekemo werek eti, akoni Israel mende weyak kagarigogi mende eti togot diyalok inobabut kwalasumo, Allah nen it weyak kagarigogi mende eti sagalogo deget diyagaluk, Yesus ebe ilugut dekesik nen, at ebe ninewe Endaganggok dogolik ndil ninako dogowagaluk eragalilu mendekemo werek o. 32Esigit diluk kagake yiluk nit ninilenggen dikogo kogosik nen,
Eberogonat, yiluk ʼbukakogo yokisaligogi. Akoni Allah wene kologo kagarigogi mende, at Agurengge woknisiligogo eti ninom nenat wene eti yokisaligogi,” yiluk yogisasike.
33Esigit diluk yogisasikemo, it inakla agaga dagaluk ap Yesus nen inayonggo ʼbiluk laʼbiyasike mende yomenogo inasuwogoluk kagakuka. 34Inasuwogoluk kagakuka mende, ap omanggi it Farisi mende inawene pago dogolik, it inom wene erlo mbilelko laguka mende endaga Gamaliel. Ap eti wene Allah nen inasuk wakike wene etnogo yanggul isasinem, akoni taʼbokogonat nen,
“At pano,” yiluk inane panorogo yogoko laguka mende. At eti melagikesik nen, men yogisasike,
“Ap ininggi kerle warek mende yi, elalma sikmangge dogowak nen wula ʼbiyani,” yiluk yogisasike. 35Esigit diluk yogisasikemo wula ʼbiyasukama nen at nen wene men yogisasike,
“Kit ap Israel mende nagarlagi. Ap eti ninggit diluk kagarinabugun ambegep. Kinakla panorogo ebet diluk nen kagasusak o. 36Alebat, ap omanggi endaga Teudas melagikesik nen,
Nggok anat o, yiluk yisikemo, ap inebe dogalegat 400 negen at apma unggiluk omborlik noko laguka. Esigit diluk unggisuka mende, at ebe wakukama, agoromi at apma unggiluk omborlik noko laguka mende eti sirlik-mbirlikogo lo lagukama, at nen,
Esigit diluk kagasuwok, yiluk yisi lagike wene eti degat agike. 37Dek agikemo, yabunggane nggokndek pemerintah nen akoni inebe ininggi wenaginabuwogoluk kagakonem, ap omanggi ago Galilea mende, endaga Yudas melagike. Melagikesik akoni dogalegat inakla nggagalkikemo, at apma unggiluk omborlik noko lagukaat. Mende, at ebe wakik, agoromi apma unggiluk omborlik noko laguka mende sirlik-mbirlikogo mugiyigik, kagakuka o. 38-39Eti paga, wene yogondak yi pasik, an nen wene omanggi kinasuk wasik. Kit nen ap eti yigit diluk ndigit diluk omanggi kagarinakup. Wene it nen yanggul isasi dogolik kagarinabigogi eti, erlo akoni nen kalok, wene eti dek asigin o. Mende, wene eti erlo Allah at kalok, kit nen it kai diyausak erlok dek asigin o. Esigit diluk erlok dek agonem, kit nen Allah ebe kinom abusak kak kagat lasunogo nen, togot diyani o,” yiluk inendainggen sebelkike. 40Inendainggen sebelkikemo, it ap Yesus nen inayonggo ʼbiluk laʼbiyasike mende yomenogo waisasukama unggisukama ndugi inakukasik nen,
“Yesus eti endaga mbalogo, wene yabunggane esigit diluk yogisasi dogogup,” yiluk inasuk warogo wula ʼbiyasuka. 41Wula ʼbiyasinem, it ap wene erlo mbilelko laguka mende yomenogo togot diyalok dukisukasik nen, Yesus agoromi yomenogo it-it yisi dogolik,
“Allah nen,
Kit Yesus endaga ake akoni nen,
Kit weyak, yiluk mberisamo erlok, yiluk akla ambasi ndak-ndak mbet nisega eti pano,” yiluk inakla arlenggen kalok dukisuka. 42Dukisukasik, it yomenogo nen Allah ago palekma unggigik, akoni inaguma unggigik, kagako dogolik,
“Allah nen,
Ap omanggi nen akoni ndil kinabuwagaluk ayonggo ʼbiluk laʼbi wisigin, yisike etnogo, ebe Yesus Kristus etiat o,” yiluk Yesus nen kagakike wene, pano wene etnogo togot digidek kunik-kunigat yanggul isilik noko laguka.
Pašlaik izvēlēts:
La’biyaske 5: DNA
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties