MATIUS 6
6
Pok, pok opok ow batetam
1“Caram pimicima. Car e akat aemamokomas, kawey ow bipu bwem arapok. E ow car e akat aemamokomas bwem manmok batiwasin. Car e carakatas kawey ow bipu aemcokomnew, e onam op caricipic asan akat car momom opok aemcema.
2Car pok e pok opok ow atetamcokom, eras, ow car manmok basirim bwem arapok. E pir bwe ow, pok e pok opok ow atetamces, ar e sembahyang cem amanam, e bokotpuam, ow manmok a basirimas aemcemes. Ar ow a basicim, jak aseremomcemes. Atakamnak ara, asmat ow cowok e ow asicimcemes. Allah nat, e ow basicim opok aemcema. 3Ca nat, pok e pok opok ow atetamcokom, umuton arapok. E cajowow anakatam e aemcokomas baporasin. 4Inimas e atetamcokomas, bare curuwas ara. E onam op caricipic masirin, e curuw aemcokomas aporcema. Inimas ar asan akat car aomcema.”
Janim Allah manim
(Luk. 11:2-4)
5“Janim Allah aanimcokomam, e pir bwe ow inim cimin ecokom. E ow e sembahyang cem amanam, e bokotpuam, janim Allah manim, jak aserememames. Ar, ow, e aemamesas manmok batiw, jak aserememames. Atakamnak ara, asmat owin, e ow asicimcemes. Allah nat, e ow basicim opok aemcema. 6Ca nat, janim Allah aanimcokom, e cakamar aman mamjiwtotorey, wunam e jimasap mamkapimapomey. Car masirin, janim Allah mamanimey. Ow caricipic bi bapor opok aemames. E nat, aramat ipic, e carop aecokomas aporcema. Ar masirin, asan akat car atetamcema.
7Janim Allah aanimcokom, e Allah amsom opok ow inim cimin desen atakam bataw arapok. E ow abi binip ara, ‘Dar atakam arke atawcom, Allah jen ajicemarow,’ inim bi binip aceceremames. 8Car janim e caricipic manim opok ara, aramat ipicam e asan pwicak aemapmokomas bap aporma. Inimas car e ow inim cimin bwe arapok. 9Janim Allah aanimcokom, inim janim mamanimey:
‘Daricipic onam op awapem.
Ow, e ojuwas akatnakut baporcenes.
10E o Pemerintah baenawcow. E onam op ow e akat apormemas jipu aemames.
Awames capinmi owam e akat apormemas jipu baemces.
11Wow e dajak banapitapas amos tetamcarowey.
12Dar ow e aomforowos pwicakas, bi binip emcajiwosomfom. Inimas ara, owam e aemorom pwicakas, bi binip biwosomey.
13Or Iblis dar dosa bwem bacajijimtaw batetam arapok. Oram e Jokmen Ipic da bajurusumas, ajortewcarowey.’
Inim janim Allah mamanimey. 14Car kawey ow e car aomfan pwicakas, bi binip ajiwosomcokom, e onam op caricipic e aemfokom pwicakas, bi binip ajiwosomcema. 15E nat, car kawey ow e car aomfokom pwicakas, bi binip biwosom opok aemcokom, e onam op caricipic e aemfokom pwicakas bi binip biwosom opok aemcema.”
Amos pok bamase
16“Car amos pok amaseemcokom, car e pir bwe ow inim cimin bi ciri memem arapok. E ow, wun bi ajaworemcemes. Eras, ar amos pok amaseemames baporomas ara. Atakamnak ara, asmat owin, e ow asicimcemes. Allah nat, e ow basicim opok aemcema. 17Car amos pok amaseemcokom, e cakus fin mamceceremey. E cabiam bwi mamcicikimey. 18Kawey ow, car amos pok bamaseem baporasin. E caricipic nat, aporcema. Ow, aramat ipic bi bapor opok aemames. E nat, aramat ipic, e carop aemamokomas aporcema. Aram asan akat car aomceman.”
Pok e onam op capinmi batawanim
(Luk. 12:33-34)
19“Caram pok awames capinmi batawanim arapok. Arasan ara, osot, pok, jof asesewma. Pokam as aapjitotorma. Osom owam e cem daniwis aamames, wunam pok osom aemes. 20Ca nat, pok e onam op capinmi mamtawanimey. Erasan ara, osot pok jof basesew opok. Pokam as bapji opok. Osom owam pok osom bwe, cem daniwis bam opok. 21Bare, car e capok asan bemap, jak aseremapmokom.”
Bi binip akatnew, jiwicnew, atakam
(Luk. 11:34-36)
22“Ow amanmok, e dam apelita inim cimin ara. E camanmok akat aranew, e cabi binipam takas umuton ara. 23E nat, e camanmok pwicak aranew, e cabi binipam takas jiwic ara. E casereas jiwic ajaworemcownew, bare car jiwicnakut aememcomokom.”
Pok bi binip cowok batamcomom arapok
(Luk. 16:13, 12:22-31)
24“Kerja bwemtam ipic, kerja aramat ipic jamnuk, inim kerja bwememtam asan opok. Ar wun ipic bifan afayomcema, wunam e wun ipic damos ajiomcema. Ar e wun ipic ajamkawicema, wunam e wun ipic pwicak aporcema. Car, Allah kerja bwemtamam, awames capinmi pok batewet bi binip awut baceceremam, a jamnuk takas cowkon bwemem asan opok.
25Inimas ara, caram jakaperey. E aancokom amos pok, car tetakay mememas ara. E nat, car e aancokomas, bi binip jirow arapok. Caram e cadam ajimomcokom pakaian, bi binip jirow arapok. Tetakay memem, bare penting awut ara. Amos pok nat, penting awut opok. Asmat damam penting awut ara. Pakaian nat, penting awut opok. 26E op sok manmok tiwporey. Ar pok akan batewapom opok. Aram amos bajow opok. Aram pok cem aman batawanimapom opok. E nat, e onam op caricipic amos pok e sok atatamama. Bare, car penting awutut ara. E sok nat, penting awut opok. 27Ow, pok bi binip jirow aceceremcesnew, aram e adamir aaffes jofay, bar cowoknakapam bwemotasimenem asan opok.
28Caram e ajimomcokom pakaian, ucim bi binip jirow ceceremamokom? E tawar esakam, manmok tiwporey. Ar kerja opok. Aram pakaian bakekem opok. 29Ca nat, jakaperey. Raja Salomo akatnakut aememefen. Aramat ipic nat, pakaian e tawar esakam inim akatipic, bajimom opok cowok arawen. 30Bare, e wasan pok, wow awamces. Asep jofay masirin, ow e pok jis afamtiwcemes. Allah nat, e pok akatipic aemapomef. Bare, aramat ipicam pakaian car atetamceman araman— e ca basicimkurum opok owam ara. 31Inimas car pok bi binip jirow arapok. Caram, ‘Ucim amos pok aancom? Ucim bwi aancom? Ucim pakaian ajimomcom?’ inim atakam arapok. 32E Allah amsom opok ow eras takas bi binip jirow aceceremcemes. E onam op caricipic, e aancokomas takasam, e ajimomcokom pakaian takasam, bare amsom ara. 33Ca nat, e Allah Pemerintah bi binip awut batakamceceremey. Caram ow tarowat batakamememporey. Aramat ipic masirin, e wunas takas car atatamceman. 34Inimas ara, e to aemcokomas, bi binip jirow arapok. Wow arop bajurusemas ara. Toam arop bajurusemas ara. Wun bajurusemas bi binip jirow arapok.”
Pašlaik izvēlēts:
MATIUS 6: LAICNS
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
LAI 1985