LUKAS 22
22
Yudas e Yesus botasimemtam atakam asakamtiwef
(Mat. 26:1-5; Mrk. 14:1-2; Yoh. 11:45-53)
1Barewen. E Bibit Opok Roti Pokbwi jofay sotop aenawefen. E pokbwi wun juwas Bakamsow Pokbwi arawen. 2E Allah atakam mamtaw tugas ow awutam, e Allah Jirmec mamememtam owam, Yesus bacatiw at aetiwfesen. Ar nat, e mami ow omar aefesen.
Yudas, Yesus, jokmen ow botasimemtam atakam asakamtiwef
(Mat. 26:14-16; Mrk. 14:10-11)
3Yesus amamkawi ow dua belas ajiwar aman, jipic cowok juwas Yudas aememefen. E Yudas wun juwas Iskariot arawen. Bare, Iblis e Yudas jak aman afiwapefen. 4E Yudasam ajisosefen. Ar masirin, e Allah atakam mamtaw tugas ow awutam, e Allah cem manmok batiw komandan owam, atakam aamtawfesen. Ar e Yesus e ow botasimemtam, atakam aamtawfesen. 5E owam jak akat cowok aememfesen. Ar Yudascin, uang, e Yudas batetam, atakam aamsakamtiwfesen. 6E Yudasam akat aeefen. Ar masirin, Yesus e ow botasimemtam asan akat, apowporefen. Ar e mami ow arke eras bapor arapoken.
Yesus pokbwi atakam atawef
(Mat. 26:17-25; Mrk. 14:12-21; Yoh. 13:21-30)
7Barewen. E Bibit Opok Roti Pokbwi jofay aenawefen. Er e Bakamsow Pokbwi domba jiwi bacatiw jofay arawen. 8Yesus masirin, e Petrusam, e Yohanesam, jirmec ajirimefen. “Caram cey. E doBakamsow Pokbwi pok mamkenemey. Dar eras aancomom.” Inim aeefen. 9E ow masirin, “Dar e pok ocenak asan akenemcom?” Inim aefesen. 10Yesus masirin, “Jakaperey. Car e kota afiwcokom, car jipic cowok bwis batowom biamnuk aemamtewcomokom. Car aramat ipic e afiwcow cem akac mamfiwey. 11Car masirin, inim atakam e cem aramat ipic mamotawey. ‘E guru jonow or atowmar ara. “Doram, e domamkawi owam, e Bakamsow Pokbwi memen ucim kamaram?” Inim jonow atowmar ara.’ Inim mameey. 12Aramat ipic masirin, op kamar awut e pok takas epcom aporomtamceman. Bare, car e Bakamsow Pokbwi pok erasan mamfafaytiwey.” Yesus inim aeefen. 13E ow masirin, ajisosfesen. Ar e pok takas e Yesus atakam atawefas jipu cowok aporfesen. Aram a Bakamsow Pokbwi pok akenemfesen.
Tuhan Perjamuan
(Mat. 26:26-30; Mrk. 14:22-26; 1Kor. 11:23-25)
14Barewen. Amos memen sotop aporef ara, Yesus aneypwikapefen. E atakam botaw batewosom owam, akac aneypwikapfesen. 15Aramat ipic masirin, atakam e ow aotawefen. “Dor a Bakamsow Pokbwi car bap akac memen jak aserememawiru. Asep ara masirin, ajurusemcimin. 16Jakaperey. Dor eras boemen opok— e Bakamsow Pokbwi anakat aemencey jofay ajiwara. E jofay nat, Allah Pemerintah aenawcow jofay ara.” Inim aeefen. 17Aramat ipic masirin, gelas anggur bwi epcom atewefen. Aram terima kasih atakam Allah aotawefen. Ar masirin, atakam e owam aotawefen. “A bwi batewey, wunam bantotorey. 18Jakaperey. Wow ajiwar, dor a anggur bwi boan opok— e Allah Pemerintah aenawcow jofay ajiwara.” Inim aeefen. 19Aramat ipicam amos atewef, wunam terima kasih atakam Allah aotawefen. Terima Kasih atakam Allah aotawef masirin, ar e amos akokomef, wunam e ow sey aseyetamefen. “Ar dodam das ara. Dor e dodam, car asan akat bomas, atetamamin. Car inimas mamemawarey. Eras car do binip bacomomas ara.” Inim aeefen. 20Amos anakurumfes ara, Yesus gelas inim inim atewefen. Aram atakam aotawefen. “A gelas bwi dores ara. Allah, asmat ow bajortew, ay atayi aeef. E dores airineycow, er e Allah ay atayi aeefas, atakamnak aporomtamcema. E dores ca bajortewas ara. 21E nat, jakaperey. E dor aotasimemtamcan ipic, amos dor akac aanmom. 22Bare, e Asmat Anakat Ajaworemef Ipic damir aafcema. Er e Allah atakam asakamtiwef jipu ara. E nat, e aotasimemtamcow ipic asan pwicaknakut aemapcema!” Inim aeefen. 23E amamkawi ow masirin, jonow aamtowporfesen. “E daramaman, e Yesus ca otasimemtamcow.” Inim aefesen.
Ow awut anakat
24E owam atakam aamtawfesen. “E dar awamcom ow, awut nat, cam?” Inim aefesen. 25Aramat ipicam atakam e ow aotawefen. “E Allah mamkawi amsom opok samatin samatin raja ow, jirmec awutut e mami ow ajirimcemes. Owam atakam aotawcemes. ‘E kepala ow, ow asan akat momomtam ow ara.’ Inim aecemes. 26Car ara nat, inimas opok. E caramaman ipic awut, e caramaman ipic kanim cimin baememcow. E caramaman kepala ipicam, kerja bwemtam ipic cimin baememcow. 27Jipic awut nat, cam? E amos memen emap ipicnew? E amos batowomattam ipicnew? E amos memen emap ipic, bare jipic awut araman.”
28“Ajurusemawiru ara, car akac aememawirirum. 29Doricipicam dor raja ipic atewemfan. Bare, doram raja ow, car atewemamin. 30Inimas ara, e doPemerintah aenawcow jofay, car amosam bwiam, dor akac aancomom. Caram raja fa bemap asan ton aemaptotorcomokom, wunam e Israel samat dua belas ajiwar, jirmec ajirimcomokom.”
Petrus e Yesus apacincowas
(Mat. 26:31-35; Mrk. 14:27-31; Yoh. 13:36-38)
31“Simon. Jakaperey. E Iblis or bwemporen. Aram janim Allah aanimef. Allah masirin, ‘Bare, e Simon inim aemporey.’ Inim aeef. 32Do nat, janim Allah aanimey. Or do basicim bakoremasin. Wunam, or bin dor aofirimcan, or e ojowow jak fak aemapomcemem.” Yesus inim aeefen. 33Petrus masirin, “Tuhan. Dor orcin penjara cem aman bemapnew, damir bafnew, bare akat ara.” Inim aeefen. 34Yesus masirin, “Petrus. Jakaperey. Wow ara, or atakam bar mamincop bap aotawescemem, ‘Dor e Yesus nomsom opok,’ Inim ajiescemem. E ayam jipic masirin, atakam asep akoreyescema.” Inim aeefen.
Uang eseam, pok eseam, atakam
35Barewen. Yesusam atakam e ow aotawefen. “Dor car atewosomfin, doram jirmec car ajirimfin. ‘Car uang eseam, pok eseam, sandalam, inim pok batew arapok,’ inim aefin. Car e pok batew opok ajisosfokom, car asan pwicak aememfokomnew?” Inim aeefen. E ow masirin, “Dar asan pwicak memem opok.” Inim aefesen. 36Aramat ipic masirin, “Wow nat, e uang ese epcom ow eras batewces. E pok ese epcom owam eras batewces. E owec parang opok ow, e abaju, owec parang bauwumtewces. 37E Alkitab atakam ara, ‘Ow atakam aotawfes, “Aramat ipic, Allah Jirmec bopow ipic ara.” Inim aefes.’ E Alkitab inim aema. Jakaperey. E atakam, doratakam ara. Owam e atakam jipu aemcemes. E atakam jipu emcesas, bare sotopnakap ara.” Yesus inim aeefen. 38E ow masirin, “Tuhan. Jakaperey. Owec parang jamnuk awompom.” Inim aefesen. Aramat ipic masirin, “Bare, ara.” Inim aeefen.
Yesus sikon op janim Allah aanimef
(Mat. 26:36-46; Mrk. 14:32-42)
39Barewen. Yesus e kota ajisefen. Ajisef masirin, e sikon juwas Saitun aapenefen. Bap ara, erasan inim ajisosa ajimepen. E amamkawi owam fa asoromfesen. 40Aramat ipic erasan ajaremef ara, aram atakam e ow aotawefen. “Janim Allah mamanimawarey. Iblis car dosa bwem bacajijimtawasin.” Inim aeefen. 41Aram e ow dasimin pim ameremefen. Ow, ek dasimin amerjiwitiwcemes, inim ajiwar ameremefen. Ar masirin, jine onok aneyotapefen. Aram janim Allah aanimefen. 42“Diwi. Or akat aporcem, dor bajurusem arapok. E nat, e akat aporminas jipu bwem arapok. E akat apormemas jipu cowok emey.” Inim aeefen. 43Malaikat cowokam onam op aewneyefen. Ar aramat ipic bipu ajisomefen. Ar jak fak e aramat ipic atetamefen. 44Aramat ipicam jak opok cowok aemapefen. Aram janim Allah faknakut aanimefen. E ajoperes, es awcawor aneypitimtiwefen. 45Barewen. Aramat ipic janim Allah aanimkurumefen. Ar masirin asitemefen. Aram e amamkawi ow aofasiomefen. Ar e ow, jak pwicak isi aemamesfes aporefen. 46Atakamam e ow aotawefen. “Car ucim isiam? Basitemey. Janim Allah mamanimawarey. Iblis car dosa bwem bacajijimtawasin.” Inim aeefen.
Yahudi Kepala ow e Yesus taw aatfes
(Mat. 26:47-56; Mrk. 14:43-50; Yoh. 18:3-11)
47Yesus atakam cowocemtawmepaw, ow arke awarimfisfesen. E jipic juwas Yudas e ow bap ajarefen. Ar e mamkawi ow dua belas ajiwar, wun ipic cowok arawen. Ar e Yesus ak bafop sotop ameromefen. 48Yesus nat, atakam aramat ipic aotawefen. “Yudas. Or e Asmat Anakat Ajaworemef Ipic, e ajewew ow botasimemtam, ak aafopmemnew?” Inim aeefen. 49E Yesus akac aememfes ow, e ow aemcesas aporfes, wunam atakam aotawfesen. “Tuhan. Dar a ow owec parang basakam arapen?” Inim aefesen. 50E Yesus akac aememef ipic cowok masirin, e Allah atakam mamtaw tugas ipic awut akerja bwemtam ipic bo jenmak asakamnemefen. 51Yesus nat, atakam aotawefen. “Inim arapok.” Inim aeefen. Ar masirin, e ipic jen jof ban akurumefen. Aram e jen ajaworomtewefen. 52E Allah atakam mamtaw tugas ow awutam, e Allah cem manmok batiw komandan owam, e ownucur owam, Yesus batew, erasan aememfesen. Yesusam atakam e ow aotawefen. “Car owec parangam, warim pokam, do batew atowotnawmokom ucimaram? Ca nat, dor pok ces bwetaw ipic, inim aranew? 53Join join dor e Allah cem car akac aemapa aefom. Ca nat, ban do bakimop opokut aema aefenokom. Wow nat, Allah car aemcokomas bwem, asan akat car atetamaman. Wowam e jiwicas momom ipic, apok bwem jofay ara.” Yesus inim aeefen.
Petrus, Yesus apacinef
(Mat. 26:57-58,69-75; Mrk. 14:53-54,66-72; Yoh. 18:12-18,25-27)
54Barewen. E ow Yesus ban akimomfesen. Aram aramat ipic atowomosfesen. Aram aramat ipic e Allah atakam mamtaw tugas ipic awut acem atowomiwfesen. Petrusam damasan opok Yesus fa asatefen. 55E ow e cemsan jicupum, jismak atowokomtiwfesen. Ar masirin, cowkon aneypwikapfesen. Petrusam e ow cowkon aneypwikapfesen. 56Bare, kerja bwemtam cowoc e aramat ipic jismak ak aemapef aporefen. Aram aramat ipic manmok atiwef masirin, atakam aotawefen. “Awap ipicam e Yesus akac aemawiri ipic ara.” Inim aeefen. 57Aramat ipic nat, apacinefen. “Ba! Dor e ipic nomsom opok.” Inim aeefen. 58Sarim inim ara masirin, wun ipicam e aramat ipic aporefen. “Oram e ow ajowow ipic ara.” Inim aeefen. E Petrus nat, atakam aotawefen. “Ba! Dor arapok.” Inim aeefen. 59Jam cowoknew aoemapfes masirin, wun ipicam atakam fak aotawefen. “Awap ipic, e Yesus akac aemawiri ipic araman. Ar Galilea capinmi ipic araman.” Inim aeefen. 60E Petrus nat, atakam aotawefen. “E atawmem atakam nomsom opok.” Inim aeefen. E aramat ipic atakam cowocemtawmepaw, ayam jipic atakam asarimkoreyefen. 61Tuhan masirin, bin afiromefen. Aram Petrus manmok atiwefen. E Petrus masirin, e Tuhan bap atakam atawefas, binip acomomefen. E atakam ara, “Or atakam bar mamincop bap aotawescemem, ‘Dor e Yesus nomsom opok,’ inim ajiescemem. E ayam jipic masirin, atakam asep akoreyescema.” Yesus inim atakam bap aotawef arawen. 62Bare, e Petrus cesen afisefen. Aram bwec awutut abwecefen.
Ow Yesus omop aaffes
(Mat. 26:63-68; Mrk. 14:65)
63E Yesus ban akimomfes ow masirin, e aramat ipic uc aomocfesen. Ar aramat ipic omop aaffesen. 64Aram aramat ipic manmok apirimomfes, wunam jonow atowporfesen. “Omop ca afan? Atakam otawcarowey.” Inim aefesen. 65Aram cemew atakam awut aramat ipic aatfesen.
Yesus e atakam mamsakam ow bipu aememef
(Mat. 26:59-66; Mrk. 14:55-64; Yoh. 18:19-24)
66Barewen. Jo apuamesefen. Jo apuamesef ara masirin, e Yahudi ownucur owam, e Allah atakam mamtaw tugas ow awutam, e Allah Jirmec mamememtam owam, ajarewsiapfesen. E ow, bare atakam mamsakam ow arawen. Ow e Yesus e ow bipu amertowomfesen. 67E ow masirin, atakam aramat ipic aotawfesen. “Or e Allah Aeremtewef Ipic aranew, atakam umuton botawcan.” Inim aefesen. Aramat ipic nat, “Dor atakam car aotawcennew, car e atakam basicim opok aemcomokom. 68Doram jonow car atowporcennew, caram atep bajit opokut aemcomokom. 69E nat, wow jofay ajiwar, e Asmat Anakat Ajaworemef Ipic, e faknakut Allah ban bo jamam aemapcema.” Yesus inim aeefen. 70E ow takas masirin, “Inimas ara, or Allah atiw aranew?” Inim aefesen. Aramat ipic masirin, “Caram, dor Allah atiw, atakam atawmokom, bare atakamnak ara.” Inim aeefen. 71E ow masirin, “Bare, dar atemen atakam jen boji arapok. Dar e aramat ipic atakam jen darma ajimom.” Inim aefesen.
Pašlaik izvēlēts:
LUKAS 22: LAICNS
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
LAI 1985