YOHANES 4
4
Yesusam, Samaria cowocam, atakam
1Bare. E Parisi ow inim atakam jen ajifes. “Ow arke e Yesus ajamkawimes. Aramat ipicam ow arke bwi abwimama. E nat, ow arke opok inim, e Yohanes ajamkawimes. E Yohanesam ow arke opok inim, bwi abwimama.” Inim atakam jen ajifes. 2(Yesus aramat ipic nat, ow bwi babwim opok aemef. E amamkawi ow, ow bwi arop abwimfes.) 3Yesusam e Parisi ow inim atakam jen ajifes aporef. Inimas ar e Yudea capinmi bakan ajiosef, wunam Galilea capinmi aofasief. 4E bowsec ajaref ara, ar Samaria capinmi aokorsakayenef.
5Yesus e Samaria capinmi ajaref ara, aram kota juwas Sikar ajarapef. Ametnak ara, Yakub, capinmi, e atiw juwas Yusuf atetamefen. Bare, Sikar e capinmi sotop ara. 6Ametnakam, Yakub bwi afwisemefen. E bwiam erasan awse. Bare, Yesus e capinmi jirow ajaref, aram namjipi aememef. Inimas ar e bwi ak aneyapef. Eras jok jam dua belasnew aemef.
7Samaria cowocam bwi bajur aapenawef. Yesus masirin, atakam e cowoc aotawef. “Bwi seya.” Inim aeef. 8(Bap ara, e Yesus mamkawi ow, amos baytin, e kota ajisosfes.) 9E Samaria cowoc masirin, “Or Yahudi ipic ara. Dor masirin Samaria cowoc ara. Inimas bwi janim do manim ucimaram?” Inim aeef. (Bare, Yahudi ow, Samaria ow atakam mamtawji opok.) 10E Yesus masirin, “Or e Allah mami atetamamaras omsom opok. Oram e bwi janim aanimamar ipic omsom opok. Or eras omsom ayaw, or e ipic janim aanimcemem. E ipic masirin, jiwne bwi or atetamceman.” Inim aeef.
11E cowocam, “Tuan. Or ember opok. E bwi fopnakut ara. Or e jiwne bwi ocenak asan jurtewcem? 12E dawicut juwas Yakub a bwi atewsemtamforowen. Ametnak ara, aramat ipic a bwi ajurtewenefen. E atiperesam, e abinatangam, a bwi aanfesen. E nat, or ow awut ara. E dawicut Yakub ow kanim ara. Inim arawe?” Inim aeef.
13E Yesus masirin, “A bwi aances ow takas, bwito aoememcemes. 14E nat, e atetamamin bwi aances ow, bwito boem opok cowok aememcemes. E atetamamin bwi, e ow jak aman basarse opok bwi cimin aemsecema. Inimas e owam jiwnenak aatamemawarcemes.” Yesus inim aeef.
15E cowocam, “Tuan. E bwi dor pajurtetamcan. Do bwito boemasin. Doram bwi bar arasan bafafasi arapok.” Inim aeef.
16E Yesusam, “Bare, oram e ormipic bayte, wunam arasan mamofasiey.” Inim aeef.
17E cowoc atakam, “Dor ower opok.” Inim aeef. Yesus masirin, “‘Dor ower opok,’ emem, bare atakamnak ara. 18Or owerow lima ajiwar ajuwuta aefem. Wunam awomcem ipic, ormipic arapok. Bare, e atakam atawmemas, atakamnak ara.” Inim aeef.
19E cowoc, “Tuan. Or Allah atakam botaw ipic apormin ara. 20E darafasut, a sikon op, Allah asicimawiris. E nat, ca Yahudi ow atakam, ‘E Allah basicim asan, e Yerusalem cowok ara,’ inim aemokom.” E cowoc inim aeef.
21E Yesus masirin, “A atawmin atakam basicimey. Asep jofay, e Allah asicimcokom asan, a sikon op arapok. E Yerusalemam arapok. 22Ca Samaria ow e asicimamokomas camsom opok. E nat, e asmat bajortew ipic Yahudi samat ipic ara. Inimas da Yahudi ow e asicimamomas namsom ara. 23Asep jofay, Allah Roh, e afakas, ow atetamcema. Inimas e ow Allah basicimnak aemcemes. E owam e atakamnak jipu, Allah asicimcemes. Allaham inim ow a basicim jumec ajumama. 24Bare, Allah jipir ara. Inimas e Allah basicim ow, jak amanam basicimces. Aram atakamnak jipu, Allah basicimces.” Yesus inim aeef.
25E cowoc masirin, “E Allah Aeremtewef Ipic aenawcema. Bare, dor inimas nomsom. E ipic juwas ‘Kristus’ ara. Aenawcow ara, e atakam takas aotawcemarow.” Inim aeef.
26E Yesusam, “E orcin atakam aamtawmem ipic, e ipic ara. Dor e Allah Aeremtewef Ipic awapey ara.” Inim aeef.
27Bare, e Yesus mamkawi ow asarimfasifes. Aram Yesus cowoc cowok atakam aamtawfes aporfes, wunam junum aefes. E nat, ar, “Or ucimasam?” inim jonow e cowoc batowpor opok aememfes. Aram, “Or a cowoc atakam aamtawmem ucimaram?” inim jonow Yesus batowpor opokam aememfes.
28Bare, e cowoc e abwias bakan ajiosef, wunam e kota ajisosef. Aram atakam e kota ow aotawef. 29“Jipic cowok, e aemawiruas, atakam dor aotawan. Caram dey! E ipic baporey. Ar e Allah Aeremtewef Ipic arapenow.” Inim aeef. 30Bare, e owam e kota bakan ajiosfes, wunam e aramat ipicpu awarimenfes.
31E ow e bowsec ajarfes, e Yesus mamkawi owam, atakam fak e aramat ipic aotawfes. “Guru. Amos memeney!” Inim aefes.
32E aramat ipic nat, “Dor amos pok awompey. E nat, car e amos pok camsom opok.” Inim aeef.
33E mamkawi ow masirin, jonow aramaman aamtowfes. “Ow, amos pok, e aramat ipic atowotnawtameresnew?” Inim aefes.
34E Yesus masirin, “Dor e atewenamfan ipic akat apormaras jipu aemcey, wunam e jirmec ajirimfan kerja afafakurumtiwcey, jak akat aememcimin. Er ow amos jak banapitem jak akat aememcemes cimin ara. 35Caram atakam atawmokom, ‘Pir empat ajiwar emapcom, e cesa pok anakat piwi asereytepcema. Ow masirin, e cesa pok anakat piwi akokomtawcemes.’ Inim aemokom. Do nat, atakam car aotawmin. E cesa pok anakat manmok atiwey. Bare, piwi emesesereytepef. E bakokomtaw jofay, bare emeenawef. 36Allah gaji e anakatas bakokomtaw ow atatamcema. E akokomtawcesas, bare jiwnenak batamemawaras ara. Inimas e eke atawapomces owam, e anakatas akokomtawces owam, jak akat akac aememcemes.” 37Ow atakam atawcemes, “Wun ow cesa pok eke atawapomcemes. Wun ow masirin, e anakat akokomtawcemes.” Inim aecemes. E atakam, bare atakamnak ara. 38“Dor car cesa pok anakat bakokomtaw inim cimin atawosomfin. Ca nat, e cesa pok eke batawapom opok aemfokom. Kawey ow e eke batawapom kerja awut aemfes. Inimas car asan akat aememamokom.” Yesus inim aeef.
39Bare, e cowoc, atakam e kota ow aotawef ara, “Jipic cowok e aemawiruas, atakam dor aotawan.” Inim aeef. Samaria ow arke masirin, e atakam aporfes, wunam Yesus asicimfes. 40E Samaria owam e aramat ipicpu aapenfes ara, ar aramat ipic ar akac memem janim aanimfes. Aramat ipicam bar jamnuk e ow akac aomomef. 41Wun ow arkeam e Yesus atakam jen ajifes, wunam aramat ipic asicimfes. 42Aram atakam e cowoc aotawfes. “Bap ara, or e aramat ipic atakam dar aotawforowem. Inimas dar aramat ipic asicimfom. Wow nat, dar aramat ipic atakam jen darma ajimom. Daram e aramat ipic asmat bajortew ipic anakat apormom ara.” Inim aefes.
Yesus, raja kerja bwemtam ipic atiw, dam ajaworomtewef
43-44Bare. Yesus atakam atawef. “Asamat ow, Allah atakam botaw ipic basicim opok aemcemes.” Inim aeef. Inimas Yesus bar jamnuk erasan aemapef, wunam Galilea capinmi aojisosef. 45Bap ara, e wun Galilea ow e Bakamsow Pokbwi e Yerusalem ajamemfes. Aram e Yesus aemefas takas aporfes. Inimas aramat ipic e Galilea ajaremef, e ow asan akat aramat ipic aomomfes.
46Bare, aramat ipic Galilea capinmi kota juwas Kana aofasief. Bap ara, erasan, bwinak, e anggur bwi ajaworomsemef. Erasan ara, raja kerja bwemtam ipic cowok aememef. E atiwam kota Kapernaum dam aemamesef. 47E ipic, Yesus e Yudea capinmi ewenawef, wunam Galilea capinmi ajaremef, inim atakam jen ajief. Ar masirin, Yesuspu aapenef. Aram aramat ipic e atiw aemamesef asan bwenaw, wunam e atiw dam baworomtew, janim aanimef. E atiw bare damir bafken aemamesef. 48Yesusam atakam e ipic aotawef. “Car junum bweas awut bapor opok emcokom, caram do basicim opokut aemcemenokom.” Inim aeef.
49E raja kerja bwemtam ipic nat, “Tuhan. Basarimenawey. E dojiwi damir bafasin.” Inim aeef.
50E Yesus masirin, “Cey, bare, baysosey. E otiw ajaworsitma.” Inim aeef.
Bare, e ipic, Yesus e atawef atakam asicimef. Ar masirin, ajisosef. 51Aram e bowsec ajaref ara, a akerja bwemtam ow, biamnuk aemamtewfes. “Bare, e otiw asan akat awap.” Inim aefes. 52E aramat ipic masirin, “E jiwi asan akat aoemapef, ucim jamaram?” Inim aeef. E ow masirin, “To jok jam satu, e dam amop ajufamef.” Inim aefes. 53Bare, to ara, e jam cowokam, e Yesus, “E otiw ajaworsitma,” inim atakam aotawef. E jiwi aricipicam inimas aporef. Inimas aram, e acem ow takasam, e Yesus asicimfes.
54Yesus e Yudea capinmi ewenawef, wunam e Galilea capinmi ajaremef, ar eras aemef. Er e aemef junum bweas kedua ara.
Pašlaik izvēlēts:
YOHANES 4: LAICNS
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
LAI 1985