Luka 21
21
Mningelo wa noni ya txisiwana
(Matewu 12:41-44)
1Ngako Jesu a txi guleta maso, a to wona vanyatithombe, va txi thela miningelo yawe amu ka txiya txa msengo wa Dithepele. 2A to wona ni wamsikati wa txisiwana, wa noni, a txi veka konamo simaleana simbidi. 3Se a txi khene: “Kha ditshuri, ni khani kwanu: Noni yiya ya txisiwana yi ningete kupala votshe. 4Nguko votshe va va nga humisa msengo wa Txizimu, va tekile kutalelwani kwawe; kambe awuwa, atxi a nga txi ningela, a txi tekile wusiwanani kwakwe, i di sotshe si a nga ti khene a na hanya ngu sona.”
Jesu a womba-womba ngu kukhundumuswa ka Dithepele
(Matewu 24:1-14; Marku 13:1-13)
5Ngako vamwani vokari va nga txi womba-womba ngu Dithepele, ti to di tshurisetwe ngu marigwi o tshura ni miningelo ya sithembiso, Jesu a to angula a txi khene: 6“Mata masiku, aawa, ka sotshe si mi si wonako, ku no mbi sala dirigwi txitimwi ka dirigwi: Sotshe si na khundumuselwa.”
7Vona va to mu wotisa va txi kha vona: “M'gondisi, ti na maheka ditshiku muni toneto kani? Njikombiso muni txi no woneka, kasi kuzivisa ti to eto ti lava kuhumelela kani?” 8Ene a xamute a txi khene: “Ti woneleni, mi si tumeli kukanganyiswa, nguko vavangi va nata ngu ditina dangu, va txi kha vona: ‘Ani ngani’, mwendo kambe ku kha vona: ‘Mbimo se yi hafuhi!’ Mi nga va londeteleni. 9Mbimo yi mi engisako va txi womba ngu tiyimbi ni mazunga, mi nga telweni ngu dizowa: Ti fanete kuthanga toneto ti txi humelela, kambe magwito a totshe kha ma na mbi woneka kunukunuko.”
10Sekoko a to va gela ku khene: Lixaka li na wukela limwani lixaka, mfumo wu na wukela wumwani mfumo. 11Ku na humelela kuzinginikela ka hombe ka mafu, se ka makhalo amangi ku nava ni tinzala ni mitungu. Ku na humelela sidiwukiso so thisa, ni sikombiso sa hombe nzumani.
12Aniko ti sinzi kumaheka totshe tiya, va na mi ñola, va txi mi xanisa, va txi mi ningela masinagogani, va txi mi sekela mikorani; va na mi yisa ka vakoma ni vafumeli ngu mhaka ya ditina dangu; 13Se eto ti na mi mahekela, kasi ku miva ni wufakazi. 14#Wona ni ka: Luk. 12:11-12. Ti bhaleni timbiluni kwanu ti to mi nga karatekeni ngu tile mi fanelako ku ti vhikelisa tona, 15nguko ani nipune ni na mi ninga mapswi a wuzivi, ayawa valala vanu va no mbi sikota ku ma xula, hambi ku ma kambula. 16Mi na ningelwa hambi ngu vatate vanu, ngu vananu ni maxaka anu, ni vandoni vanu; va na daya vamwani kwanu. 17Mi na vengelwa ngu votshe ngu mhaka ya ditina dangu. 18Aniko kha ku na mbi lova hambi msisi wumwewo wa ha msungoni kwanu. 19Ngu kutimisela kwanu, mi na hanyisa mimoya yanu.
Jesu a womba-womba ngu kukhundumuswa ka Jerusalema
(Matewu 24:15-21; Marku 13:14-19)
20Ngako mi txi wona Jerusalema a txi ranganyetwa ngu sikwata sa tiyimbi, zivani ti to kuvhandamuswa kwakwe ku hafuhi. 21Sekoko donedo ditshiku, ava va ku Judheya, va na thavele mimangoni; ava va ku didhoropani, va na hume. Se ava va ku tithembweni, va nga thuke ve wulela didhoropani; 22nguko masikuyo masiku a kupharela, kasiku totshe ti ti nga bhalwa ti hetiseka. 23Va nava ni dikhombo va sirumbu ni va kumamisa ka oneyo masiku! Nguko ku nava ni kuxaniseka ka hombe ha mafuni, ni kuhenyelwa ku na wela ditiko diya. 24Va na wa ngu kudawa ngu ditxhari, va na payulwa ve yiswa ka otshe matiko; se Jerusalema a na kandetelwa ngu vamatiko, kala kuza mbimo ya vamatiko yi va yi di tatisekile.
Kuta ka Mwanana wa M'thu
(Matewu 24:29-31; Marku 13:24-27)
25“Ku nava ku di ni sikombiso ha ditamboni, ha mtximani ni tinyeletini. Ha mafuni ku na vaho kuxaniseka ka matiko ngu kuthava diguwa da kudhuma ka mavimbi ni linene. 26Vathu va na tsivala ngu kuthava makhombo yawa ma no humelela ha ditikoni kotshe: Nguko mitamo ya nzumani yi na dekadekiswa. 27#Wona ni ka: Dhan. 7:13; Mtu. 1:7. Konako se va na wona Mwanana wa M'thu a txi txhika a di marefuni, ni mtamo ni wudhumo wa hombe. 28Mbimo yi ti no khata kuhumelela tiya, gulani maso mi txi wona txitimwi, nguko ku hafuhi kuhanyiswa kwanu.”
Txhamuselo ya mxanvu
(Matewu 24:32-35; Marku 13:28-31)
29Se a to womba txifananiso txiya: “Wonani mkuwu ni yimwani mindonga. 30Mbimo yi yi khatako kuthunga linyenvu, ma tiziva ti to ma hokile malanga. 31Ngu toneto, mbimo yi mi no wona kuhumelela tiya, ti ziveni ti taku wu hokile Mfumo wa Txizimu. 32Kha ditshuri na mi gela ku khani: Kha li na mbi pinda aliya liveleko, na ti sa humelela tiya. 33Nzuma ni mafu si na pinda, aniko mapswi angu kha ma na mbi pinda.”
Kulaveka ka kutiwonela
34“Kambe ti woneleni, kasiku timbilu tanu ti si thuki ti nemelwa ngu kwa mbi ti pimela, ni wudevi, ni kuvilela ngu sa wutomi wuwa, ti to ditshikudo di si mi ñoli ngu txidhukisa, 35nga mlawu, nguko di na wela votshe va va nga aka ha mafuni kotshe. 36Khutalani na mi txi khongela txotshe txikhati, kasiku mi va ni mtamo wa kuhuluka ka totshe ti ti no humelela, ni kuema mi di tsani masoni ka Mwanana wa M'thu.”
37 # Wona ni ka: Luk. 19:47. Ni mitshikari, Jesu a ti zumba a txi gondisa Dithepeleni, kambe ni wusiku a ti huma eya zumba mmangoni, awu wu dhanwako ku mbwa Olivheti. 38Se votshe vathu va ti vindukela ve ta kwakwe, Dithepeleni, kasi ku ta mu engisa.
Pašlaik izvēlēts:
Luka 21: BEC2016
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
A Bíblia em Txitxopi © Bible Society in Mozambique, 2016.