Shiyanso 14
14
UAbulaamu ikimukulusa uLooti
1Uluhaavi lula avatwa vana, uAmulafeli uwa ku Shinaali,#14:1 Shinaali: Ilitaawa ilinji, Babeeli. uAliyokho uwa ku Elasali, uKedolawomeli uwa ku Elamu nu Tidaali uwa ku Goyimu, woope vakhandi vatwa va nyi saanave. 2Avatwa vana ava vakhandi vakungaanile, kiija vayanse kitovana na vatwa vasaanu va majumbi. Avatwa ava vava, uBeela uwa ku Sodoma, uBilisha uwa ku Gomola, uShinaabu uwa ku Adima, uShemebeli uwa ku Seboyimu nu mutwa uwa ku Beela. Ilijumbi ili, lino litambulwa Sowaali. 3-4Kwa luhaavi lwa maakha ishumi na gavili avatwa vasaanu awo, vakhandi vikimuyiitikha umutwa uKedolawomeli. Leelo umwakha ugwa ishumi na gatatu vamukhaanaga. Vavakungaaniaga panu pamo avasulukhali vaanave, vahuluta mu lifunkho lina lyatambulwagwa Sidiimu, uluganulo ulwa litaawa ilya Sidiimu Bahali ya Muunyo.
5Umwakha ugwa ishumi na gana, umutwa uKedolawomeli na vatwa vina vakhandi vakungaanile na woope, vakhandi vayansiise uwulugu, vavamenaga avaanu va Lefayimu ku lijumbi lya Ashitaloti-Kalinayimu, aVasusi ku lijumbi lya Hamu, aVaemi ku lunyikha lwa Kiliyatayimu. 6Vavamena aVahooli ku fidunda ifya kunyaanave ifya Seyili,#14:6 Seyili: Ilitaawa ilinji, Edomu. mbakha ku Elipalani mu nsala ya lunyikha. 7Baheene vaawuya mbakha ku Eni-Mishipati ilitaawa ilinji Kadeshi, vavatova na kitoola inyi yoona iya Vaamaleki na Vaamoli vina vakhandi viikhala mu lijumbi lya Hasasoni-Tamaali, baheene vavamena.
8-9Lino, avatwa vasaanu vala, vaaluta kiyipinya kiyansa uwulugu ku lifunkho lya Sidiimu, baheene vayansa kitovana na vatwa vana awo. 10Ilifunkho lya Sidiimu likhandi lina malindi minshi ga lami, yina yili ngaja napo. Avatwa va ku Sodoma na ku Gomola pina vakhandi viisiga uwulugu, baheene avaanu vaanave vamonga vagwililaga mu malindi, na vina vakulukhaga vasijilaga mu fidunda. 11Avatwa vana vala vavamena, vatoola uwusi woona uwa ku Sodoma na ku Gomola ni fyakiilya fyanave fyona, vawuukha. 12ULooti, umuswamuve wa munangʼana waakwe uAbulaamu, wáali ikhalaga ku Sodoma. Vamutoola woope, lumo ni fiinu fyakwe fyona.
13Umuunu yumonga wávapulumukhaga avatwa vana vala. Wámutwalila uAbulaamu uMuhebulaniya imola isa kikhatwa kwa Looti. Uluhaavi ulo, uAbulaamu akhandi iikhala nkholeela na mapishi amatali aga mwalooni aga Muamoli yumonga yuna akhandi itambulwa Mamule. UMamule akhandi maame nu Eshikoli nu Aneeli, woona ava vakhandi vaviishile ulufingo nu Abulaamu ulwa kitanjilisania uluhaavi ulwa wulugu.
14UAbulaamu wáganile kipulikha kiija umwana wa maame vamugalwile, baheene wávashemeela avajeleelo magana gatatu ni lishumi limo na munaana (318) vina vakhandi vasaviilwe pakhaaya yaakwe. Avajeleelo awo vina vakhandi vamanyisiiwe kitovana ku wulugu, vavafwata avatwa vana vala, mbakha mu lijumbi lya Dani. 15Paashilo wávabagulania avaanu vaakwe fipuga fipuga. Wáyansa kitovana na vatwa vala mbakha wávamena. Pina wávamenaga, wávadaga mbakha mu lijumbi lya Hoba, lina lili kunyiikho ya lijumbi ilya Damesiki. 16UAbulaamu wátoola uwusi woona wuna vakhandi vawugalwile, uLooti umuswamuve wa maame nu wusi waakwe, avashimaayi na vaanu woona vina vakhandi vavagalwile.
UMelikisedeki ikimuyimiilila uAbulaamu
17UAbulaamu pina akhandi iiwuya kihuma ku wulugu wuna akhandi amumenile umutwa uKedolawomeli na vayine, umutwa wa ku Sodoma wáaluta kimuwaawusa mu lifunkho lya Shawe (ilitaawa ilinji litambulwa lifunkho lya mutwa). 18Akhandi akwali umutwa wa lijumbi ilya Salemu yuna akhandi itambulwa Melikisedeki. Umwene wámuleetela uAbulaamu umukhaate ni divaayi. Umutwa uyu akhandi mutambule wa Nguluvi uMukhome. 19UMelikisedeki wámuyimiilila uAbulaamu wáaja,
“UNguluvi uMukhome, uMuwumba wulanga ni nyi,
akuyimiilile owe Abulaamu.
20Atunwajwe uNguluvi uMukhome,
kwa kiiva wávaviikha avalugu vaakho mu mawokho gaakho.”
Baheene uAbulaamu wámupeela uMelikisedeki ilifungu limo, kihuma mu mafungu ishumi mu fiinu fyona fina vafigalulaga kihuma ku wulugu. 21Gaganile kishila ago, baheene umutwa wa ku Sodoma wámujovela uAbulaamu, “Nilomba unipeele avaanu vangu, owe usigale nu wusi woona.” 22Leelo, uAbulaamu wámujovela umutwa wa ku Sodoma wáaja, “Nayiyiiga kwa Mutwa, uNguluvi uMukhome yuna wáwumbile inyi nu wulanga, 23one nisikwiliile kitoola shiinu shaakho shoshoona, hata lusawulwa hata ngalawo sa ndaatu, usaali ulogole kiija, ‘One namuyoolosa uAbulaamu.’ 24Kwa kiiva ya ilyo, nisitoola shiinu shaakho shoshoona, ila shina shaliwaagwa na vajeleelo vangu. Leelo kwa kiiva ya vala vina vali noone ava Aneeli, Eshikoli nu Mamule, awo vapeelaga ishipuga shaanave.”
Pašlaik izvēlēts:
Shiyanso 14: Shisangu
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2020, Wycliffe Bible Translators, Inc. All rights reserved.