Yowannisi 16
16
1Daakkiꞌi Yesuusi ishichiye: “Xugo ittoshin bi dichaachemmoyich ebi bullin ittoshich getteto taane. 2Ayihudeenaꞌo kiceebeeti kexoochee ittoshin yookkemminaꞌone; ebiyeenoo wotta ittoshin wuxemminaꞌo bullich boonoshi shuunoo Yeerich gaacheebeeto bi shaahemmi aabo woyemmone. 3Ebin ittoshi toommooch boonoshi tuniyemmo, Nihoo Yeerinoo taanoo boonoshi tuushitoyichiye. 4Ebin boonoshi tuniyemmi aabo waahooba, ittoshich ta getteton ittoshi shalligemmoyich, ebin ittoshich getteto taane” iye.
Yaafe Ayaano Shuunemmi Shuunoo
“Ittoshina tookkaa batt ta beetoyich, shiichaꞌa ittoshich ebin getaano taane. 5Tunetaa and taan wocheto waan hammaabeeto taane; ittoshi daggoocheenoo ‘Amoochiye ne hammaabeeto?’ getiree taan echemmo aalloone. 6Tunebaani ebin ittoshich ta gettetoyich, ittoshi maacoona oogichii ayinito ittoshine. 7Tunetaa iberoon ittoshich gettoye: Ta hamo qayigaata, Kupphiyecho ittoshi waan waataachemmone; ebich ta hamo ittoshich gaawiye. Ta hamigaata, biin ittoshich deejjemmo taane. 8Aroo waaree, alemoon axaaxeechon, cadiqeechonaa nalleechonon boonoshin ittibatemmone. 9Bi ittibatemmo axaaxeechon, ta toommooch mulloon tooꞌiyoon boonoshi qajjitoyichiye. 10Cadiqeechon, Nihoo Yeer waan ta hammaa beetoyich, ebiyee gubb, taan beegaachemmo ittoshi tunetoyichiye. 11Nalleechonoo, alemoon hajjiibeeto toommooch nalloo kinditoyichiye.
12“Batt ittoshich ta gettemmi wodde mooyo beetone; tunebaani and ittoshich ta getigaata, ittoshich maggemmone. 13Tunebaani iberoon bekkiibeeti Ayaano bi waahooba, iberoo bulliich ittoshin yaabemmone. Bi waayeton baach gettehalli, bi qellee aalloona getaachemmone; woyemmi mooyon ittoshich gettemmone. 14Aroo ta waanee bi waayeton ittoshich gettemmone; ebina taan oogiyemmone. 15Nihoo Yeerich beeto bulli taachone; ebich ‘Ta waanee bi waayeton ittoshich gettemmone’ iyoye” iye.
Ayinoyee Gubb Emiroo
16Ebichi hillooch Yesuusi “Giisheche aaboyee gubb taan beegaachemmo ittoshine; aree hillooch wotta giisheche aaboyee gubb taan beeggemmo ittoshine” iye.
17Bi dabbeenaꞌo daggoochee ikkikkeenaꞌo boonoshinaa boonoshina “ ‘Giisheche aaboyee gubb taan beegaachemmo ittoshine; wotta giisheche aaboyee gubb taan beeggemmo ittoshine; ebiyoo Nihoo Yeer waan ta hammaa beetoyichiye’ iꞌi nooch bi gettiibeeto ebi mooyo amoone?” iyeete. 18“Illa ‘Giisheche aabo’ bi ii beeto ebi amoone? Ama bi ii beeto gaata nooch aricheyaache” iyeete.
19Yesuusiyoo ebi mooyon bi waanee echeya boonoshi qaawoon ariiꞌi boonoshich ishichiye: “Ittoshinaa ittoshina echeebeeto, ‘Giisheche aaboyee gubb taan beegaachemmo ittoshine; wotta giisheche aaboyee gubb taan beeggemmo ittoshine’ ta itoyichiye? 20Iberoon ittoshich gettoye: Eeppemmo ittoshine; muushenemmo ittoshine; tunebaani alemo oogichi emiremmone. Ittoshi muushenemmo ittoshine; tunebaani ittoshi muusheno emirooch shaddeyemmone. 21Shiyemmi ure maaxoo biin maammona maacerahane; tunebaani bushoon bi shiyetoyee gubb, bushoo hini alemooch bi shiijjetoyich emiraꞌa, aafi bi xuuxoon battahan. 22Illa ittoshi and ayiniibeeto ittoshine; tunebaani wochinnoon ittoshin beeggemmo taane; arooba emiroona wucwuccemmo ittoshine; ittoshi emiroonoo boggemmo aalloone. 23Arooba amoonolla taan echeyaachemmo ittoshine. Iberoon ittoshich gettoye: Nihoo Yeeri ta shigoona ittoshi qollemmo bullin ittoshich immemmone. 24Hanaach beddaahaa ta shigoona amoonolla qolleyaano ittoshine; ittoshi emiroo bi ceennemmoyich qollebote. Ittoshi qollemmon danemmo ittoshine” iye.
Alemoon Yesuusi Kochii Wochoo
25“Hini mooyo bullin ittoshich ta getteto shaahiyoona bi tunetaanoona, Nihoo Yeerichon shaahiyoona tuneyaanoon kaacha ta gettemmi aabo woyemmone. 26Arooba Nihoo Yeerin ta shigoona qollehotalli, ta ittoshi keroyich qollemmo taane getiree getaache. 27Ebiyoo taan ittoshi shunnitoyich, Yeer waanee ta womon ittoshi iberiitoyich, Nihoo Yeeri bi qelloona ittoshin bi shunnii beetoyichiye. 28Nihoo Yeer waanee kechaꞌa hini alemooch waato taane; wochinnoon hini alemoochee wotteree Nihoo Yeer waan hammemmo taane” iye.
29Bi dabbeenaꞌo “And kaacha gettaabeeto neene; hini ne gettaabeeto shaahiyoona toonoone. 30Bulli mooyon ariibeeto ne tunoon, koniyoona neen echo qaawiyee bi qayonoo and ariito noone; ebich Yeer waanee ne womon iberiito noone” iyeete.
31Yesuusiyoo boonoshich ishichiꞌi wochiye: “And iberiitote? 32Waayebote! Ittoshi qelli qelloona ta ikkeeton dufiichi ittoshi kexi kexooch ittoshi shacemmi aabo woyemmone; andoo shaggitone. Tunebaani Nihoo Yeeri taanna tookkii bi tunetoyich, ta ikkeeto toono taane.
33“Taanna diggoo ittoshich bi tunemmoyich, ebi bullin ittoshich getteto taane. Alemo ittoshin duꞌiyemmone; tunebaani kupphebote; ta alemoon kochaa wochito taane” iye.
Pašlaik izvēlēts:
Yowannisi 16: KBRC
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
SIM International, 2020.