Mbete Za̧h 15
15
1Zezu ɓah hi̧ nzuk-dih fal yeri ra ɓáy ɓahri se : « A bi mí-i ɓa kpuh a ketina. Bah bi ɓa nzuk waka-u. 2Nzak ndɔk ké mgbahla mi gbam mí leh lehna ya le, baah ƴo te ku̧ kpah. Nzak ndɔk a a̧yri gbam ké leh lehna le, ke ƴo ser ɓay hi̧ nzak ndɔku ɓá leh ɓa ŋgi̧-u wɔsɔk wɔsɔk ɓáy. 3Mí ɓay woiri te-teh ɓay tul ɓay bi ké mi ɓah hi̧ wuri. 4I mbɔhlɔ mi le, i ƴo nzo mbih boɗo law bi. Nzak ndɔk kpuh mbɔhlɔ mun kpuh ya le, mah leh lehna ke tul mun ye ya. A woiri kara i mbɔhlɔ mi ya le, i mah ɓay hi̧ riŋ bah bi ɓá mgbe ya pi.
5A bi mi ɓa mun kpuh. A woiri ba, i ɓa nzak ndɔk kpuh-u. Nzukay ké mbɔhlɔ mi, mí boɗo bi rih ɓil law ye le, nzak ndɔk kpuh-u mah leh lehna ké ɓay ŋgi̧ wɔsɔk wɔsɔk ɓay fe le, ŋgerna-laɓ fe baah dan boɗo bi ta-a. 6Nzukay ké mbɔhlɔ mi ya le, baah ƴo te kan kpah kandɔk nzak ndɔk kpuh kú-u te kaŋ. Nzak ndɔk kpuh-aw ho̧k dale, ku fa̧h ku̧, mí ɓay se hɔrɔ.
7I ƴo ziŋ mi, mí ɓay bi ƴo ɓil law woiri le, ɓay fe a suŋ ké na law woiri mí i vbi mi ɓayu le, mi láɓ fe-u hi̧ wuri. 8Kandɔkaw mí riŋ ɗina bah bi mgbe ké tul fe ké hi̧ í leh lehna ɓa ŋgi̧-u wɔsɔk wɔsɔk, í mbi fe laɓna bi dih fal bi ɓa nzuk-dih fal biri. 9Baah sa mi. A bi kara mi sa wuri kaŋ pi. Í kaɓ ɓil law sana bi-aw. 10I ƴo tul bolkusol bi le, i kaɓ ɓil law sana bi kandɔk a bi ké mi ƴo tul bolkusol baah, mí-i kaɓ ɓil law sana ye kaŋ. 11Mi ɓah ɓayawri hi̧ wuri ɓay hi̧ law rihna bi ɓá na ɓa law rihna woiri, law woiri kara ɓá rih wuri keɗ keɗ pi. 12Bolkusol bi ra mí na-ay : Í sa wuri haniri kandɔk ké mi sa wuri kaŋ. 13Law sana a a̧y ké mba law sana a ɓoruri gbam ɓa law sana ké hi̧ nzuk poŋ mun ye hi̧ hul ɓay tul ya̧h yeri.
14I ɓa ya̧h biri gelke i ƴo tul bolkusol bi. 15Mi ta ɗi wuri ɓa mgbal mba. Mgbal tu fe laɓna bahgaŋ ye ya. A woiri le, mi ɗi wuri ɓa ya̧h ɓay fe le, ɓayri riw ké mi lah ké ta̧w bah bi mí-i el keni hi̧ wuri. 16A woiri mí i lu mi ya. Wara le a bi mí-i lu wuri. Mi lu wuri ɓay í ti ke laɓ fe a suki ké hi̧ riŋ ɗina baah mgbe kandɔk lehna kpuh a suki kaŋ, ɓay hi̧ lehna-aw ɓá puŋ ya. Mi lu wuri ɓay hi̧ baah ɓá laɓ ɓay fe a a̧yri ké i vbi ni ke riŋ bi. 17Kandɔkaw mí-i ɓah ɓayu hi̧ wuri ɓay í sa wuri hani.
18Nzuk tukalari fu̧y wuri dale, i tu ɓahri, ku fu̧y mi pol dara mí ku fu̧y wuri-aw ɓáy. 19Gelke i ɓa nzuk tukala le, nzuk tukalari yih nzuk tukala mbaŋ woyri. Mí ku fu̧y wuri ɓay fe le, i ɓa nzuk tukala ya. Wara le a bi mí-i lu wuri ku̧ ɓoɗ ke nzuk tukalari. Sa̧wu mí ku fu̧y wuri. 20Í ker wuri tul ɓay ké mi ɓah hi̧ wuri ra ɓahri se, mgbal mba tul bahgaŋ ye ya. Ku laɓ mi koseh le, ku ɓay laɓ wuri koseh kaŋ pi. Ku ƴo tul ɓay bi le, ku ɓay ƴo tul ɓay woiri pi. 21Mí nzuk tukalari poŋ ɓay bi poŋ bale, ku láɓ wuri koseh ɓay tul riŋ bi ké kan tul woiri ɓay fe le, ku tu nzuk ké pih mi ya.
22Mi gi ɓah ra ɓay hi̧ nzuk tukala ya le, suya ta mgba tul woyri ya. Aŋay mahful ya̧m mun woyri ta-a. 23Nzuk fu̧y mi le, fu̧y bah bi. 24Mi laɓ ra fe laɓnari ké nzuk a ɓoru mah laɓu ya le, suya ta mgba tul nzuk tukalari ya. Mí mi laɓ, mí ku ko-ko, mí ku fu̧y mi pi, ku fu̧y bah bi pi. 25Fu̧yna-aw ƴo hi̧ ɓay kú-u vbeh ɓil mbete bolkusol Ŋgerzah lewsa̧ laɓ ɔh ke gelu. Ɓayu ɓahri, ku fu̧y mi gɔr#15.25 Ɓayay na ɓil Mbete Siŋ (Psaumes) 35.19, 69.5. kaŋ.
26Gina nzuk-hew wuri ké ɓa a ye Tem baah ké mi ɓay pih ni gi ƴo ziŋ wuri ra, ke ɓa Tem Ketina ké-e ti̧h ke mun baah. Ke ɓay te-teh ɓay bi. 27Kandɔkaw mí a woiri kara i él te-teh ɓay bi pi ɓay fe le, i ƴo ziŋ mi ke titilu da̧y. »
Pašlaik izvēlēts:
Mbete Za̧h 15: SIAFNK
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© Wycliffe Bible Translators, Inc. All rights reserved.