EVASELIO A SOANE 4
4
Sesu mo te fafine Samalia
1I te iloi e te Aliki kua logo te kau faliseo ki te hahai age o te u tisipulo nee ina fakahoko, pea kua hahai age natou nee ina papitema ia Soane, 2logo pe nee mole ko Sesu ae nee faipapitema, kae ko ana tisipulo. 3Nee mavae leva ia i Sutea, pea nee toe liliu ia ki Kalilea.
4Kae nee tonu ke fakalaka ia i Samalia. 5Nee kaku leva ia ki he kolo o Samalia, nee higoa ko Sikale, e ovi ki te gaueaga ae nee foaki e Sakopo ki tona foha ko Sosefo. 6Nee tuu i ai te vaikeli o Sakopo. I tana kua gaegae i te fagona, nee heka leva ia Sesu i te laugutu o te vaikeli. Ko te hoata ape aia.
7Nee hau leva he fafine o Samalia o ohu vai. Nee ui leva e Sesu kia ia: Foaki mai ke au inu. 8Koteuhi nee olo ana tisipulo ki te kolo o totogi meakai. 9Nee ui leva e te fafine Samalia kia ia: E feafeai kia koe, ko he Sutea, ke ke kole mai kia au ko he fafine Samalia, ke ke inu? Koteuhi nee mole felogoi te hahai Sutea mo te hahai Samalia. 10Nee tali leva e Sesu kia ia: Kapau nee ke iloi te meaofa o te Atua pea mo ia e ina ui atu kia koe, foaki mai ke au inu, ko koe ae e ke kole anai kia te ia ke ke inu, pea e ina foaki atu anai kia koe te vai mauli. 11Kae nee ui leva e te fafine kia ia: Aliki, e mole hau mea ke ohu ai te vai, pea e loloto te vaikeli; pe e ke mau anai mai fea te vai mauli aena? 12Pe e ke lahi age i tamatou tamai ko Sakopo, ae nee ina foaki mai kia matou te vaikeli aeni, pea nee inu ia ki ai, mo ona foha pea mo ana faga manu? 13Nee tali leva e Sesu kia ia: Ko ae e inu ki te vai aeni e toe fia inu anai ia; 14kae ko ae e inu anai ki te vai ae e au foaki anai kia ia e mole toe fia inu anai ia, pea ko te vai ae e au foaki anai kia ia e liliu anai ia ko he matapuna vai ae e mapuhi anai o kaku ki te mauli heegata. 15Nee ui leva e te fafine kia ia: Aliki, foaki mai kia au te vai aena, ke aua naa au toe fia inu, pea ke aua naa au toe hau o ohu vai i heni. 16Nee ui leva e Sesu kia ia: alu, o paui mai tou ohoana, pea ke toe liliu mai ki heni. 17Nee tali leva e te fafine: E mole i ai hoku ohoana. Nee ui leva e Sesu kia ia: E ke palalau mooni: E mole i ai hoku ohoana. 18Koteuhi nee ke ohoana nima, pea ko ae e nofo nei mo koe e mole ko tou ohoana ia. I te mea aia, nee ke palalau mooni. 19Nee ui leva e te fafine kia ia: Aliki, e au sio ko te polofeta ia koe. 20Nee atolasio amatou tamai i te mouga aeni; kae ko koutou, e koutou lau, ko Selusalemi te kogamea e tonu ke atolasio ai. 21Nee ui leva e Sesu kia ia: Fafine, tui mai kia au, e hoko mai te hola e mole koutou toe atolasio anai ki te Tamai i te fuga mouga aeni, pe i Selusalemi. 22E kotou atolasio ki te mea e mole koutou iloi; ko matou, e matou atolasio ki te mea e matou iloi, koteuhi e hau te fakamauli mai te kau Sutea. 23Kae e hau te hola, pea kua hau foki ia, e atolasio anai ki te Tamai te kau atolasio mooni, i te laumalie mo te mooni; koteuhi koena te kau atolasio e kumi e te Tamai. 24Ko te Atua e Laumalie, pea e tonu kia natou e atolasio kia ia, ke natou atolasio kia ia i te laumalie mo te mooni. 25Nee ui leva e te fafine kia ia: E au iloi e tonu ke hau te Mesia e higoa ko te Kilisito; ka hau anai ia, e ina fakaha mai anai kia matou te u mea fuli. 26Nee ui leva e Sesu kia ia: E ko au, ia au aeni e palalau atu kia koe.
27I hena, nee kaku ake leva ana tisipulo, pea nee natou punamauli i tana palalau mo he fafine. Kae nee mole palalau leva he tahi: Pe kotea e ke kumi? Pe kotea te tupuaga o tau palalau mo ia? 28Nee tuku leva e te fafine tana foi vai, pea nee alu leva ia ki te kolo, o ui ki te hahai: 29Kotou omai o sisio ki he tagata nee ina fakaha mai kia au te u mea fuli nee au fai; pe e mole ko te Kilisito ia? 30Nee natou mavae leva mai te kolo, pea nee natou olo leva kia ia.
31I te lakaga aia, nee faiga age te kau tisipulo kia ia ke kai, o ui: Pule, kai. 32Kae nee ina ui leva kia natou: E i ai haku meakai e mole kotou iloi. 33Pea nee feuiaki leva e te kau tisipulo ia natou: Pe nee aumai e he tahi he meakai kia ia? 34Nee ui leva e Sesu kia natou: Ko taku meakai ko taku fai te finegalo o ia ae nee ina fekaui mai au, pea mo taku fakakatoa tana gaue. 35Pe e mole koa kotou ui, kei toe pe ni mahina e fa pea e hoko mai te taukai fulumeto? Kae e au ui atu kia koutou, kotou hiki ake okotou mata pea kotou sisio ki te u gaueaga fulumeto kua natou hihina ki te tanaki o te fulumeto. 36Ko ia ae e tanaki e ina tali he totogi, pea e ina tanaki he u fua ki te mauli heegata, o tupu ko ae e nunusi mo ae e tanaki ke na fakafiafia fakatahi. 37He mooni te taagalea aeni: E nunusi e te tahi kae tanaki e te tahi. 38Nee au fekau koutou ke kotou tanaki i te kogamea ae nee mole kotou gaue ai; ko ihi age nee kinakina, pea nee kotou hu ki tanatou gaue.
39Nee kaugamalie te hahai Samalia o te kolo aena nee natou tui leva kia Sesu uhi ko te kupu aia a te fafine: Nee ina fakaha mai kia au te u mea fuli nee au fai. 40Kae i te olo age leva a te kau Samalia kia ia, nee natou kole age leva kia ia ke nofo mua mo natou. Pea nee nofo leva ia o aho lua i ai. 41Nee toe hahai age natou nee tui leva kia ia uhi ko tana folafola; 42pea nee natou ui age leva ki te fafine: E mole matou tui uhi pe ko tau u tala; kua motou logo tonu kia ia, pea kua motou iloi e ko ia mooni te Fakamauli o te malamanei.
I Kalilea, fakamauli o te foha o he ofisa
43Hili te u aho aena e lua, nee mavae leva ia Sesu i hena o alu ki Kalilea; 44he ko ia totonu nee ina fakaha e mole he polofeta e fakaapaapai i tona fenua totonu. 45I tana kaku ki Kalilea, nee talitali lelei leva ia e te hahai Kalilea, koteuhi nee natou sisio ki te u mea fuli nee ina fai i Selusalemi i te lolotoga o te aho lahi; he ko natou foki nee natou olo ki te aho lahi. 46Pea nee toe liliu leva ia ki Kana i Kalilea, te kogamea ae nee ina fakaliliu ai te vai o vino. Nee i ai i Kafanaume he ofisa a te hau, pea nee mahaki tona foha. 47I te logo a te ofisa kua hau ia Sesu mai Sutea ki Kalilea, nee alu leva ia ki ai, pea nee kole leva kia ia ke hifo age o fakamauli tona foha, ae kua mehii mate. 48Nee ui leva e Sesu kia ia: Kapau e mole kotou sisio ki he u milakulo mo he u mea fakamana, e mole pe kotou tui. 49Nee ui leva e te ofisa a te hau kia ia: Aliki, fai mo hifo mai ia mua o te mate o taku fanau. 50Nee ui leva e Sesu kia ia: Alu la, kua mauli tou foha. Pea nee tui leva te tagata aena ki te folafola ae nee fakaha e Sesu kia ia, pea nee alu leva ia. 51Nee kei lolotoga hifo ia, mo te kaku age o tana u faifekau o fakafetaulaki kia ia, pea nee natou tala age kia ia te logo aeni: Kua mauli tau fanau. 52Nee ina fehui leva kia natou pe ko te hola fia ae nee kamata mauli ai ia; pea nee natou tala age leva kia ia: Ko anafi, i te hola tahi hilihoata, nee mavae ai te fiva ia te ia. 53Nee iloi leva e te tamai ko te hola tonu pe aia nee ui age ai e Sesu kia ia: Kua mauli tou foha. Pea nee tui leva ia, mo tona fale katoa.
54Nee toe fai foki e Sesu te lua milakulo aeni i tana hau mai Sutea ki Kalilea.
Pašlaik izvēlēts:
EVASELIO A SOANE 4: WB2011
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland