Mak 15
15
Gyisɛse gyi Paelɛte anyunlu
(Mat 27.1-2,11-14; Luk 23.1-5; Dw 18.28-38)
1Nwonlomɔ mangyee ne ala, sɛlɛvolɛ mgbanyinli ne mɔ yiale Dwuu mgbanyima ne, mɛla kilehilevolɛma ne, yɛɛ ayiama ne mɔ amuala na ndɛndɛ ne ala bɛvale adwenle. Bɛguale Gyisɛse nwɔnzɔnwɔnzɔ na bɛvale ye bɛhɔmanle Wulomu Amɛnlado Paelɛte. 2Na Paelɛte bizale ye kɛ, “Wɔmɔ a ɛle Dwuuma belemgbunli ne la ɔ?”
Gyisɛse buale kɛ, “Ɔdaye ne ala a wɔha la.”
3Sɛlɛvolɛ mgbanyinli ne mɔ doɔdoanle Gyisɛse dɔɔnwo kpalɛ, 4yemɔti Paelɛte bizale ye bieko kɛ, “Ɛnrɛbua nwolɛ bie ɔ? Tie edwɛkɛ dɔɔnwo mɔɔ bɛlɛkeha bɛagua ɛ nwo zo la!”
5Noko Gyisɛse andɛ ɔ nloa anu, na ɔyɛle Paelɛte azibɛnwo.
Paelɛte bua Gyisɛse ewule fɔlɛ
(Mat 27.15-26; Luk 23.13-25; Dw 18.39—19.16)
6Saa Akpabɛnwo Ɛvoyia ne dwu zo a, Paelɛte ye pilizanli ko mɔɔ menli ne kɛbiza la maa bɛ. 7Mekɛ ne anu ɛnee nrenya bie mɔɔ bɛfɛlɛ ye Balabase, mɔɔ nee maamɔvoma bie yɛle adwenle na bɛhonle bɛtiale arane, bɛhunle menli la la efiade. 8Mɔɔ menli ne yiale la, bɛzɛlɛle Paelɛte kɛ ɔyɛ mɔɔ ɛvoyia ne dwu a ɔyɛ la ɔmaa bɛ. 9Na ɔbizale bɛ kɛ, “Menye Dwuuma belemgbunli ne memaa bɛ ɔ?” 10Paelɛte ze kɛ ɛkpɔlɛ ti a sɛlɛvolɛ mgbanyinli ne mɔ ɛva Gyisɛse ɛrɛlɛ ye a.
11Sɛlɛvolɛ mgbanyinli ne mɔ lile wulale menli dɔɔnwo ne kɛ bɛbiza Paelɛte bɛmaa ɔye Balabase ɔmaa bɛ. 12Paelɛte bizale menli ne kɛ, “Ɛnee duzu a bɛkpondɛ kɛ meyɛ sonla ye mɔɔ bɛfɛlɛ ye Dwuuma belemgbunli la a?”
13Bɛdeɛdeanle nu bɛhanle kɛ, “Bɔ ye meanubaka nu!”
14Paelɛte bizale bɛ kɛ, “Duzu ɛtane a yeyɛ a?”
Na bɛdeɛdeanle nu mgbole kɛ, “Bɔ ye meanubaka nu!”
15Paelɛte nyianle adwenle kɛ ɔyɛ mɔɔ menli dɔɔnwo ne kpondɛ la. Yemɔti ɔyele Balabase ɔmanle bɛ. Na akee ɔmanle bɛbilale Gyisɛse empele, na ɔvale ye ɔwulale sogyama ne mɔ asa anu kɛ bɛhɔbɔ ye meanubaka nu.
Sogyama golo Gyisɛse anwo
(Mat 27.27-31; Dw 19.2-3)
16Sogyama ne vale Gyisɛse hɔle Amɛnlado ne suakunlu ɛkɛ ne na bɛvɛlɛle bɛ ekpunli ne anu amra bɛmanle bɛrayiale. 17Bɛvale tɛladeɛ kɔkɔlɛ bie mɔɔ arelemgbunli ala a wula la bɛwulale Gyisɛse na bɛvale evileni bɛnwonle abɔtile bɛkpolole ɔ ti. 18Bɛgolole ɔ nwo bɛhanle kɛ, “Dwuuma Belemgbunli! Nyi kyɛ.” 19Bɛvale baka bɛbobɔle ɔ ti avinli, bɛtotole nyɛlɛ ɔ nyunlu, bɛzile ye amgbu na akee bɛahoto ye, bɛabɔ bɛ ti aze bɛamaa ye. 20Bɛwiele ɔ nwo golo la, bɛyele arelemgbunli tɛladeɛ kɔkɔlɛ ne, bɛvale ɔdaye ye adɛladeɛ ɛdeɛ ne mɔ bɛwulowulale ye na bɛvale ye bɛhɔle kɛ bɛkabɔ ye meanubaka nu.
Bɛbɔ Gyisɛse meanubaka nu
(Mat 27.32-44; Luk 23.26-43; Dw 19.17-27)
21 #
Wulo 16.13
Bɛzile nu mɔɔ bɛkɔ la, bɛ nee nrenya bie mɔɔ bɛfɛlɛ ye Saemɔn, mɔɔ ɛnee vi ye namule nu ɛlɛba suakpole ne azo la yiale, na bɛhyele ye bɛmanle ɔzoale Gyisɛse meanubaka ne. (Saemɔn ɛhye a le Alɛzɛnda nee Lufɛse bɛ ze ne. Ɔvi Saelin maanle nu.) 22Bɛvale Gyisɛse bɛhɔle ɛleka bie mɔɔ bɛfɛlɛ ye Hibulu nu “Gɔlogɔta” la, (ɔ bo a le “Etile Kanrɛlɛ Ɛleka.”) 23Ɛkɛ ne bɛmanle ye nwanye mɔɔ bɛva alufuanlɛ bɛkpoto nu la kɛ ɔnlo; na Gyisɛse anno. 24#Edw 22.18 Bɛbɔle ye meanubaka nu na bɛhwenle adunyi bɛhyɛle ye adɛladeɛ ne mɔ. 25Nwonlomɔ dɔne ngɔnla ne anu yɛɛ bɛbɔle ye meanubaka nu a. 26Bɛhɛlɛle ye ɛzonledonlɛ kɛlata ne azo kɛ, “Dwuuma Belemgbunli ne ɛne!” 27Eza bɛbɔle nwule nwiɔ bie meanubaka nu bɛbokale Gyisɛse anwo, ko wɔ ye fema zo yɛɛ ko noko wɔ ye bɛne zo. [ 28#Aye 53.12 Ɛhye manle Nyamenle edwɛkɛ ne mɔɔ se, “Bɛdianle ye bɛbokale mɛlatovolɛma anwo” la yɛle nɔhalɛ.]
29 #
Edw 22.7; 109.25; Mak 14.58; Dw 2.19 Menli mɔɔ pɛle nu ɛkɛ ne la kpusule bɛ ti na bɛgolole Gyisɛse anwo bɛhanle kɛ, “Wɔmɔ ɛse ɛbabubu Ɛzonlenlɛ Sua ne na wɔava kenle nsa wɔazi. 30Ɛvi meanubaka ne azo dwu aze na die ɛ nwo ɛ!”
31Zɔhane ala yɛɛ sɛlɛvolɛ mgbanyinli ne nee mɛla kilehilevolɛma ne mɔ golole Gyisɛse anwo na bɛhanle kɛ, “Ɔliele awie mɔ, noko ɔngola ɔ nwo die! 32Bɛmaa yɛnlea kɛ Mɛzaya ne, mɔɔ le Yizilayɛ Belemgbunli ne, kɛvi meanubaka ne azo kɛdwu aze kɛkala, na yɛkɛlie ye yɛkɛli.”
Nwule nwiɔ ne mɔɔ bɛbɔle bɛ meanubaka nu bɛbokale Gyisɛse anwo la noko yɛle ye aholoba.
Gyisɛse ewule
(Mat 27.45-56; Luk 23.44-49; Dw 19.28-30)
33Ɔdwule sɛnzɛngyinla la, awozinli hedale maanle ne azo dedee dɔnehwele nsa. 34#Edw 22.1 Na bɛbɔle ewiazo dɔne nsa la, Gyisɛse deanle nu zele kɛ, “Yilowae, Yilowae, lɛma sabaketani?” Ɔ bo a le, “Me Nyamenle, me Nyamenle, duzu ati a wɔkpo me ɛ?”
35Bɛdabɛ mɔɔ bɛwɔ ɛkɛ la dele mɔɔ ɔhanle la na bɛzele kɛ, “Bɛdie, ɔlɛfɛlɛ Yilaegya!” 36#Edw 69.21 Na bɛ nuhua ko nriandile hɔvale emiane bɔle nwanye ɛnwonle nu vale zianle baka ti duale Gyisɛse anloa na ɔhanle kɛ, “Bɛgyinla. Bɛmaa yɛnlea saa Yilaegya kɛraye ye wɔ meanubaka ne azo a!”
37Na Gyisɛse deanle nu kpole bie na ɔwule.
38 #
Ade 26.31-33
Ɛkɛ ne ala, Ɛzonlenlɛ Sua ne anu mgbɛnu ɛdanlɛ ne anu dele sinli nwiɔ, ɔvi anwuma ɔrapenle aze. 39Sogya kpanyinli ne mɔɔ ɛnee gyi meanubaka ne anyunlu ɛkɛ ne la dele kɛ Gyisɛse zile deanle nu wule la, na ɔhanle kɛ, “Amgba, nrenya ɛhye le Nyamenle Ara.”
40 #
Luk 8.2-3
Ɛnee mraalɛ bie gyi ahane ɛlɛnea mɔɔ ɛlɛkɔ zolɛ la. Bie mɔ a le Mɛle mɔɔ vi Magedala la, Salome, yɛɛ Mɛle mɔɔ le Gyemise Ekyi nee Dwosefi bɛ nli ne. 41Ɛnee mraalɛ ɛhye mɔ doa Gyisɛse wɔ Galeli na bɛsonle ye; yɛɛ mraalɛ gyɛne dɔɔnwo mɔɔ nee ye a rale Gyɛlusalɛm la noko wɔ ɛkɛ ne bie.
Gyisɛse ɛzielɛ
(Mat 27.57-61; Luk 23.50-56; Dw 19.38-42)
42-43Aleɛ ne bɔle ɔ nloa aze la, Dwosefi mɔɔ vi Arelematia la rale. Ɔle Ayia mgbanyima ne mɔ ko mɔɔ menli di ye eni kpalɛ a. Ɔ nye la Nyamenle Belemgbunlililɛ ne ɛralɛ adenle. Kɛmɔ kenle ne le Anwoziezielɛ Kenle, na aleɛ kye a ɔkye Ɛnwomenlelielɛ Kenle la ati, Dwosefi zile ye ahonle hɔle Paelɛte ɛkɛ ne na ɔhɔzɛlɛle ye kɛ ɔdie Gyisɛse funli ne. 44Paelɛte dele kɛ Gyisɛse ɛwu dɛbadɛba la, ɔzinle ɔ nwo. Ɔvɛlɛle ye sogya kpanyinli ne na ɔbizale ye kɛ, “Amgba Gyisɛse ɛwu ɔ?” 45Na Paelɛte dele vile ye sogya kpanyinli ne ɛkɛ ne kɛ Gyisɛse ɛwu la, ɔvale funli ne ɔmanle Dwosefi. 46Dwosefi dɔle kisane, ɔyele funli ne wɔ meanubaka ne azo, ɔvale kisane ne ɔkyekyele nwolɛ, ɔvale ye ɔdole nla bie mɔɔ bɛpɛ ye bodane bie anu la anu na bɛhundole bolɛ kpole bie bɛnyinle ɔ nloa. 47Ɛnee Mɛle mɔɔ vi Magedala la nee Mɛle, mɔɔ le Dwosefi ɔ nli ne anye dua bɛ, bɛnwunle ɛleka mɔɔ bɛziele Gyisɛse la na bɛyɛle ɛkɛ ne nzonlɛ.
Pašlaik izvēlēts:
Mak 15: NB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible in Nzema © Bible Society of Ghana, 1998.