Luk 9
9
Gyisɛse soa ɛdoavolɛma bulu nee nwiɔ ne
(Mat 10.5-15; Mak 6.7-13)
1Mekɛ guale nu ekyii la, Gyisɛse vɛlɛle ɛdoavolɛma bulu nee nwiɔ ne na ɔmanle bɛ tumi kɛ bɛva bɛdu sunsum ɛtane ne mɔ na bɛyɛ ewule ngakyile ayile. 2Akee ɔzoanle bɛ kɛ bɛhɔbɔ Nyamenle Belemgbunlililɛ ne nolo na bɛyɛ wuleravolɛma ayile; 3na ɔzele bɛ kɛ, “Wɔ bɛ adendulɛ ne anu bɛmmafa debie biala mɔɔ le kɛ kpɔma anzɛɛ kodoku, aleɛ anzɛɛ ezukoa, yɛɛ bɛmmafa tɛladeɛ bieko bɛboka mɔɔ bɛwula la anwo. 4Awuke biala mɔɔ bɛkɛlie bɛ nu la, bɛdɛnla ɛkɛ ne kɔkpula mekɛ mɔɔ bɛkɛvi sua ne azo la, 5#Luk 10.4-11; Gyi 13.51 na ɛleka biala mɔɔ menli ne anlie bɛ la, bɛvi sua ne azo bɛhɔ na bɛkpokpo bɛ gyakɛ abo anwea ne bɛgua zolɛ bɛmaa ɔyɛ daselɛ ɔtia bɛ.”
6Ɛdoavolɛma ne hɔle na bɛhɔkpɔsɛkpɔsale namunamu ne mɔ amuala azo, bɛbɔle Edwɛkpa ne nolo na bɛyɛle menli ayile.
Hɛlɔdo adwenle zɛkyele
(Mat 14.1-12; Mak 6.14-29)
7 #
Mat 16.14; Mak 8.28; Luk 9.19 Hɛlɔdo mɔɔ ɛnee le Galeli maanzinli zo neavolɛ la dele mɔɔ ɛlɛkɔ zolɛ la amuala, na ye adwenle zɛkyele. Ɔluakɛ ɛnee bie mɔ ɛlɛka kɛ, Dwɔn Sɔnevolɛ ne ɛzia ɛra ngoane nu. 8Bie mɔ noko se Yilaegya ɛye ɔ nwo ɛhile, yɛɛ bie mɔ eza se mɔmoane Nyamenle kpɔmanvolɛma ne mɔ anu ko a ɛra ngoane nu bieko la. 9Hɛlɔdo zele kɛ, “Memanle bɛpɛle Dwɔn ati, na nwane noko a le ɛhye mɔɔ bɛlɛka ye edwɛkɛ la?” Na ɔbɔle mɔdenle kɛ ɔkɛnwu Gyisɛse.
Gyisɛse maa menli apenle nnu aleɛ
(Mat 14.13-21; Mak 6.30-44; Dw 6.1-14)
10Ɛdoavolɛma ne ziale rale rahanle mɔɔ bɛyɛle la amuala bɛhilele Gyisɛse. Na ɔvale bɛ ɔ nee bɛ hɔle sua bie mɔɔ bɛfɛlɛ ye Bɛteseeyeda la azo. 11Mɔɔ menli ne mɔ dele la, bɛdoale ye wɔ lɔ. Na ɔliele bɛ, ɔhanle Nyamenle Belemgbunlililɛ ne anwo edwɛkɛ ɔhilele bɛ, na ɔyɛle bɛdabɛ mɔɔ bɛnde kpɔkɛ la ayile.
12Mɔɔ sɛnzɛne ne ɛlɛkɔ ahɔdɔ la, ɛdoavolɛma bulu nee nwiɔ ne rahanle hilele Gyisɛse kɛ, “Maa menli ye adenle maa bɛhɔ namunamu ne mɔ mɔɔ bikye ɛke la azo kɛ bɛkɛnyia dabelɛ nee aleɛ, ɔluakɛ kpɔkɛ ye anu ɛhwee ɛnle ɛke.”
13Gyisɛse buale bɛ kɛ, “Bɛdabɛ bɛmaa bɛ debie bɛli.”
Bɛbuale ye kɛ, “Yɛlɛ kpanwo ahunguma nnu nee fɛlɛ nwiɔ ala. Ɛkpondɛ kɛ yɛkɔtɔ aleɛ yɛmaa menli ɛwolaa ɛhye ɔ?” 14Menli ne, saa ɛye ngakula nee mraalɛ nu a bɛkɛyɛ apenle nnu.
Gyisɛse zele bɛ kɛ, “Bɛmaa menli ne ɛdɛnlɛdɛnla aze ekpunli ekpunli, ekpunli ko biala anu amra ɛyɛ abulanlu.”
15Ɛdoavolɛma ne yɛle ye zɔhane na bɛmanle bɛ muala bɛdɛnlanle aze. 16Gyisɛse vale kpanwo nnu ne nee fɛlɛ nwiɔ ne, ɔnleanle anwuma, ɔyɛle Nyamenle mo, ɔbubule nuhua, ɔvale ɔmanle ye ɛdoavolɛma ne kɛ bɛhyɛ bɛmaa menli ne mɔ. 17Bɛ muala bɛlile debie bɛ ko yile, na bɛsesale ɔ bo zo ne ahɛndɛne bulu nee nwiɔ.
Pita se Gyisɛse le Mɛzaya
(Mat 16.13-19; Mak 8.27-29)
18Kenle ko bie mɔɔ ɛnee Gyisɛse angome a ɛlɛyɛ nzɛlɛlɛ la, ye ɛdoavolɛma ne rale ɔ nwo ɛkɛ ne, na ɔbizale bɛ kɛ, “Menli se mame a le nwane?”
19 #
Mat 14.1-2; Mak 6.14-15; Luk 9.7-8 Bɛbuale ye kɛ, “Bie mɔ se wɔmɔ a le Dwɔn Sɔnevolɛ ne, bie mɔ noko se wɔmɔ a le Yilaegya, yɛɛ bie mɔ se mɔmoane Nyamenle kpɔmanvolɛma ne mɔ anu ko a ɛzia ɛra ngoane nu a.”
20 #
Dw 6.68-69
Na ɔbizale bɛ kɛ, “Na bɛdabɛ noko ɛ? Bɛse mame a le nwane?”
Pita buale kɛ, “Wɔmɔ a ɛle Nyamenle Mɛzaya ne!”
21Na Gyisɛse duale bɛ kɛ bɛmmaka ɛhye bɛkile awie biala.
Gyisɛse ka ye amaneɛnwunlɛ nee ye ewule nwo edwɛkɛ
(Mat 16.20-28; Mak 8.30—9.1)
22Akee Gyisɛse zele bɛ kɛ, “Medame Sonla Ra, ɔwɔ kɛ menwu amaneɛ somaa na mgbanyima ne, sɛlɛvolɛ mgbanyinli ne, yɛɛ mɛla kilehilevolɛma ne mɔ kpo me. Bɛbahu me, na ye kenle nsa ne anzi Nyamenle badwazo me ara ngoane nu.”
23 #
Mat 10.38; Luk 14.27 Na ɔhanle ɔhilele bɛ muala kɛ, “Saa awie kpondɛ kɛ ɔ nee me dua a, ɛnee ɔkpo ɔ nwo, ɔva ye (amaneɛnwunlɛ) meanubaka ne ɔdo ɔ kɔme zo kenle biala, na ɔdoa me. 24#Mat 10.39; Luk 17.33; Dw 12.25 Ɔluakɛ awie biala mɔɔ pele ye ngoane nwo la minli ye, na awie biala mɔɔ kɛminli ye ngoane wɔ me ti la kɛlie ye ɛkɛla ngoane. 25Saa sonla nyia ewiade ninyɛne muala na ɔminli ɔdaye mumua ne ɔ nwo anzɛɛ bɛko bɛfa ye a, ɛnee duzu nvasoɛ a ɔnyia ye a? Ɔnnyia ɛhwee! 26Awie biala mɔɔ me nwo nee me ngilehilelɛ ne kɛyɛ ye nyiane wɔ ɛtane ewiade ye anu la, ɔdaye noko ɔ nwo bayɛ medame Sonla Ra nyiane wɔ mekɛ mɔɔ menwɔra anyunlunyia nee Selɛ ne nee Anwuma soanvolɛma nwuanzanwuanza ne anyunlunyia nu la. 27Bɛhakye ɛhye! Bie mɔ wɔ ɛke mɔɔ bɛnrɛwu kɔkpula kɛ bɛkɛnwu kɛ Nyamenle belemgbunlililɛ ne ɛra la.”
Gyisɛse hakyile
(Mat 17.1-8; Mak 9.2-8)
28 #
2 Pit 1.17-18
Ɔhanle ɛhye mɔ ɔwiele na ye kenle mɔtwɛ ne anzi, Gyisɛse vale Pita, Dwɔn, yɛɛ Gyemise na ɔ nee bɛ hɔle boka bie azo kɛ ɔkazɛlɛ. 29Mɔɔ ɔwɔ zo ɔlɛsɛlɛ la, ɔ nyunlu hakyile, na ye tɛladeɛ ne mɔɔ ɔwula la yɛle fufule nwohyee mɔɔ wowɔ ɛnyelɛ zo a. 30Na nea, menli nwiɔ nee ye dendɛle, bɛmɛ a le Mosisi nee Yilaegya. 31Bɛyele bɛ nwo bɛhilele wɔ anwuma anyunlunyia nu, na bɛ nee Gyisɛse hanle Nyamenle ngyehyɛlɛ ne mɔɔ fane Gyisɛse ewule mɔɔ ɔbawu Gyɛlusalɛm la anwo edwɛkɛ. 32Mekɛ ne anu ɛnee Pita nee bɛdabɛ mɔɔ bɛwɔ ɔ nwo ɛkɛ ne la ɛlafe. Bɛdunwuele la bɛnwunle Gyisɛse anyunlunyia ne nee menli nwiɔ ne mɔɔ nee ye gyi ɛkɛ ne la. 33Mɔɔ menli nwiɔ ne kpondɛ avi Gyisɛse anwo ɛkɛ ne ahɔ la, Pita zele Gyisɛse kɛ, “Yɛmenle, ɔle kpalɛ kɛ yɛwɔ ɛke a. Maa yɛbɔ nzeseɛ nsa, wɔ ɛdeɛ ko, Mosisi ɛdeɛ ko yɛɛ Yilaegya ɛdeɛ ko.” (Ɛnee Pita ɛnze edwɛkɛ mɔɔ ɔdaye mumua ne ɔlɛka la.)
34Mɔɔ Pita anloa wɔ zolɛ ɔlɛtendɛ la, amungu rahedale bɛ nwo zo, na ɛzulolɛ hanle bɛ. 35#Aye 42.1; Mat 3.17; 12.18; Mak 1.11; Luk 3.22 Ɛnelɛ bie vi amungu ne anu zele kɛ, “Me Ra mɔɔ mekpa nu meye ye la ɛne, bɛdie ye!”
36Ɛnelɛ ne dendɛle wiele la, ɔhale Gyisɛse angome. Ɛdoavolɛma ne hanle bɛ nloa dole nu, na bɛanga mɔɔ bɛnwunle ye la anwo bie bɛangile awie biala wɔ mekɛ ne anu.
Gyisɛse yɛ kakula nrenya mɔɔ sunsum ɛtane wɔ ɔ nwo la ayile
(Mat 17.14-18; Mak 9.14-27)
37Aleɛ hyenle la Gyisɛse nee ɛdoavolɛma nsa ne vi boka ne azo tolole rale, na menli dɔɔnwo kpalɛ rayiale ye. 38Nrenya bie vi menli ne anu deanle nu kɛ, “Kilehilevolɛ, mesɛlɛ wɔ, nea me ra nrenya ye maa me, me ra ala ɛne. 39Sunsum ɛtane bie bawolo ye maa ɔteɛdea nu, ɔpɛ ɔfi, na ɔ nloa wu awubue, yɛɛ kɛ ɔgyi ɔ nwo ɔbodɛboda ye ala ɛne. Ɔngyakyi ye fee zɛhae. 40Membodole wɔ ɛdoavolɛma ne mɔ kɛ bɛdu ye wɔ ɔ nwo bɛmaa me, noko bɛangola.”
41Gyisɛse buale kɛ, “Bɛmɛ mɔɔ bɛnlɛ diedi na ɛvonlɛ ala a bɛfo a! Me nee bɛ ɛdɛnla ɔhɔkpula kenlenzu? Menyia bɛ nwo abotane ɔhɔkpula kenlenzu?” Na ɔzele nrenya ne kɛ, “Fa ɛ ra ne bɛla ɛke.”
42Mɔɔ kakula ne ɛlɛba la, sunsum ɛtane ne manle ɔpɛle ɔfinle na ye mgbutike ne rale. Gyisɛse deanle sunsum ɛtane ne nu, ɔdule ye, ɔyɛle kakula ne ayile, na ɔvale ye ɔmanle ɔ ze. 43Na Nyamenle tumi kpole ne yɛle menli dɔɔnwo ne amuala azibɛnwo.
Gyisɛse ka ye ewule nwo edwɛkɛ bieko
(Mat 17.22-23; Mak 9.30-32)
Mɔɔ ɛnee menli ne anye ɛha Gyisɛse anwo wɔ ye nwanwane ninyɛne mɔɔ ɔlɛyɛ la anwo la, ɔzele ye ɛdoavolɛma ne kɛ, 44“Bɛmaa ɛhye ɛhɔ bɛ nzo nu! Bɛbaye medame Sonla Ra bɛawula menli sa nu.” 45Na ɛdoavolɛma ne ande ɛhye abo. Bɛvale bɛveale bɛ, yemɔti bɛande ɔ bo, eza bɛzulole kɛ bɛkɛbiza ye mɔɔ ɔhanle la anwo bie.
Nwane a le kpole a?
(Mat 18.1-5; Mak 9.33-37)
46 #
Luk 22.24
Kpolerazulɛ radɔle ɛdoavolɛma ne avinli kɛ bɛkpondɛ kɛ bɛnwu bɛ nuhua ko mɔɔ le sonlakpole kpalɛ a. 47Gyisɛse nwunle mɔɔ bɛlɛdwenledwenle nwolɛ la, yemɔti ɔzɔle kakula ko ɔziele ɔ nwo ɛkɛ ne, 48#Mat 10.40; Luk 10.16; Dw 13.20 na ɔzele bɛ kɛ, “Awie biala mɔɔ kɛlie kakula ɛhye wɔ me duma nu la, ɛlie medame; yɛɛ awie biala mɔɔ kɛlie me la, ɛlie ahenle mɔɔ zoanle me la noko. Ɔluakɛ mɔɔ le bɛ nuhua ekyi la a le sonlakpole kpalɛ wɔ bɛ avinli a.”
Mɔɔ ɛngyi wɔ la wɔ wɔ afoa
(Mak 9.38-40)
49Ɛdoavolɛma ne ko mɔɔ bɛfɛlɛ ye Dwɔn la hanle hilele Gyisɛse kɛ, “Yɛmenle, yɛnwunle nrenya bie kɛ ɔlɛ wɔ duma ɔlɛtu mbɔnsam na yɛduale ye, ɔluakɛ ɔmboka yɛ nwo.”
50Gyisɛse zele ye nee ɛdoavolɛma ne amuala kɛ, “Bɛmmatua ye, ɔluakɛ sonla mɔɔ ɛngyi bɛ la wɔ bɛ afoa.”
Samɛlea sua ko azo amra kpo Gyisɛse
51Mɔɔ ɛnee mekɛ asɛɛ ɛdwu kɛ Nyamenle fa Gyisɛse kɔ anwuma la, Gyisɛse zile ye ahonle kɛ akee ɔkɔ Gyɛlusalɛm. 52Yemɔti ɔzoanle menli ɔmanle bɛlumuale ɔ nyunlu wɔ Samɛlea sua bie azo kɛ bɛhɔziezie ɛkɛ ne bɛmaa ye. 53Na menli ne anlie ye, ɔluakɛ ɛnee yela ali wienyi kɛ ɔkɔ Gyɛlusalɛm. 54#2 Arl 1.9-16 Mɔɔ ye ɛdoavolɛma, Gyemise nee Dwɔn, nwunle ɛhye la bɛzele kɛ, “Awulae, ɛkulo kɛ yɛka yɛmaa senle vi anwuma bayela bɛ ɔ?”#9.54 Mbuluku bie mɔ fa sɔ zolɛ kɛ: kɛmɔ Yilaegya yɛle la.
55Gyisɛse hakyile ɔ nwo na ɔhwile bɛ nyunlu [na ɔzele bɛ kɛ, “Bɛnze sunsum holɛ ko mɔɔ bɛle ye ɛdeɛ la, ɔluakɛ Medame Sonla Ra, meamba kɛ mebazɛkye menli ngoane, membale kɛ mebalie bɛ ngoane.”] 56Na Gyisɛse nee ye ɛdoavolɛma ne hɔle sua fofolɛ zo.
Bɛdabɛ mɔɔ bɛbayɛ Gyisɛse ɛdoavolɛma la
(Mat 8.19-22)
57Mɔɔ bɛlua adenle zo bɛlɛkɔ la, nrenya bie zele Gyisɛse kɛ, “Ɛleka biala mɔɔ ɛkɔ la me nee wɔ bahɔ.”
58Gyisɛse zele ye kɛ, “Ɛzonlɛ lɛ bɛ mbɔne, yɛɛ nloma lɛ bɛ sane, na mame Sonla Ra, menlɛ ɛleka mɔɔ meto me ti a.”
59Ɔzele awie ko noko kɛ, “Bɛla maa yɛhɔ.”
Na sonla zɔhane zele ye kɛ, “Yɛmenle, maa menlumua mengɔnzie egya kolaa na meara.”
60Gyisɛse buale ye kɛ, “Gyakyi menli mɔɔ ɛnde Nyamenle Edwɛkɛ ne abo la ati, bɛle kɛ avunli la maa bɛzie bɛ avunli. Wɔmɔ kɔ na kɔbɔ Nyamenle Belemgbunlililɛ ne nolo.”
61 #
1 Arl 19.20
Awie ko noko hanle hilele Gyisɛse kɛ, “Yɛmenle, mekulo kɛ me nee wɔ kɔ; noko maa menlumua mengɔngɛla me sua nu amra.”
62Gyisɛse zele ye kɛ, “Awie biala mɔɔ kɛzɔ koanlɛ nu wɔ ye ɛya nu na ɔkɛtoto ɔ nye ɔ nzi la ɛnfɛta Nyamenle Belemgbunlililɛ ne.”
Pašlaik izvēlēts:
Luk 9: NB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible in Nzema © Bible Society of Ghana, 1998.