Dw Mukenye
Mukenye
Dwɔn Edwɛkpa ne ye Gyisɛse kile kɛ yemɔ a ɔle Nyamenle Edwɛkɛ ne mɔɔ ɛmbɔ aze ɛlɛ, na “ɔrayɛle sonla na ɔ nee yɛ dɛnlanle” la. Kɛmɔ buluku ne ɔdaye ɔka la, bɛhɛlɛle Edwɛkpa ɛhye amaa bɛdabɛ mɔɔ bɛkenga la bɛalie bɛali kɛ Gyisɛse a le Ngoanedievolɛ ne, mɔɔ le Nyamenle Ara ne mɔɔ bɛvale bɛbɔle ɛwɔkɛ la, amaa ɔlua bɛ diedi mɔɔ bɛlɛ ye wɔ ye nuhua la azo bɛanyia ngoane. (20.31)
Saa Edwɛkpa ne kilehile Nyamenle Edwɛkɛ ne mɔɔ ɛmbɔ aze ɛlɛ la anu kɛ yemɔ a ɔle Gyisɛse na ɔwie a, ɔfa nwanwane gyima mgbole mɔɔ Gyisɛse yɛle la ɔto gua ɔkile kɛ yemɔ a ɔle Ngoanedievolɛ ne, mɔɔ le Nyamenle Ara ne mɔɔ bɛvale bɛbɔle ɛwɔkɛ la. Adwelie mɔɔ kilehile nwanwane gyima ne mɔ anu la doa zo. Buluku ne foa ko ɛhye ka kɛ ɔzile ɔyɛle mɔɔ menli ne bie mɔ liele Gyisɛse lile na bɛdoale ɔ bo zo, na bie mɔ noko tiale ye na bɛkpole kɛ bɛnrɛlie ye bɛnrɛli la anwo edwɛkɛ. Mgbakyelɛ bulu nee nsa ne mɔɔ kɔ bulu nee nsuu ne azo la ka Gyisɛse nee ye ɛdoavolɛma ne ahualilɛ wɔ kenle ko ne nɔe ne mɔɔ bɛbahye ye, nee ye akɛnrazilɛ nee bɛ nwo zo ɛlalɛ nwo edwɛkɛ mɔɔ ɔvale ɔmanle bɛ wɔ nɔe ne mɔɔ aleɛ kye a bɛkɛbɔ ye meanubaka nu la anwo edwɛkɛ. Buluku ne awieleɛ ka Gyisɛse ɛhyelɛ nee ye edwɛkɛlilɛ, ye meanubaka nu ɛbɔlɛ nee ye ewudwazo, yɛɛ ɔ nwo mɔɔ ɔyele ɔhilele ye ɛdoavolɛma wɔ ye ewudwazo ne anzi la anwo edwɛkɛ.
Raalɛ ne mɔɔ bɛhyele ye kɛ ɔlɛto awuvolɛvalɛ mɛla ne la edwɛkɛ ne (8.1-11), mbuluku dɔɔnwo gyakyi ye nu, yɛɛ bie mɔ noko fa wulowula nu wɔ ɛleka gyɛne gyɛne.
Dwɔn ka ngoane mɔɔ ɛnlɛ awieleɛ ahyɛlɛdeɛ ne mɔɔ bɛdua Kelaese anwo zo a bɛnyia ye la edwɛkɛ ne si zo, na ɔkile kɛ ɔle ahyɛlɛdeɛ mɔɔ bɔ ɔ bo kɛkala, na bɛdabɛ mɔɔ bɛdie Gyisɛse bɛdi kɛ yemɔ a ɔle adenle ne, nɔhalɛ ne nee ngoane ne la a asa ka ye a. Debie ko mɔɔ yɛnwu ye wɔ Dwɔn Edwɛkpa ne anu la a le kɛ ɔfa ninyɛne mɔɔ le kɛ nzule, aleɛ, wienyi, mboaneneavolɛ nee ye mboane, nee vanye ɛya nee vanye ma mɔɔ sonla nye dua bɛ dahuu wɔ ɛbɛlabɔlɛ nu la a ɔkilehile sunsum nu ninyɛne mɔɔ wɔ ɛkɛ ne la anu a.
Edwɛkɛ Mɔɔ wɔ nu la
Ngilenu 1.1-18
Dwɔn Sɔnevolɛ ne nee Gyisɛse ɛdoavolɛma mɔɔ lumua 1.19-51
Gyisɛse bagua nu gyimayɛlɛ 2.1—12.50
Mekɛ mɔɔ li awieleɛ wɔ Gyɛlusalɛm nee ye ngameɛ ngameɛ 13.1—19.42
Awulae ewudwazo ne nee ɔ nwo mɔɔ ɔyele ɔhilele la 20.1-31
Adwulaleɛ: Gyisɛse yele ɔ nwo hilele bieko wɔ Galeli 21.1-25
Pašlaik izvēlēts:
Dw Mukenye: NB
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Bible in Nzema © Bible Society of Ghana, 1998.