Amarku 16
16
Oksongybi
1Ambla ba Asabat a khwo nga, Emeri Amagadaliya ta la Esalomi ta la Emeri anaŋ Eyakubu, a gbmo awargi moa a la a khwa ekom la alo, okyku o khwa okom Eyesu. 2Endigigiŋ onda Aladi la etetne, moashe lo a gre ongybi. 3Omba moa a yi ongybi nga moa a lu ozhẽ ta la emo a lu mi le, Ayi á ba a byiŋ ayaŋ anyu ongybi á sku gi? 4Ayaŋ moa a shki anyu ongybi la alo, a wo agagre. Moa a gbu okro ongybi lo nga, moa a ka moa a sheŋ a byiŋ lo bgu. 5Moashe lo a mbli ongybi a ka nga, moa a ka ola anwye la a ygi ariga kyekyle a dzu agba obgori ongybi lo eshyẽ. Nga eyli e kpo mo. 6Ola anwye lo a nyuŋ mo a lu mi le, Agimi e kpo eyli mbo. Ame e yi ba agimi e klo Eyesu ba Anazarata moa a gne ŋa egŋe aki. Ambo a wo ahe nga mbo, a sheŋ a kso bgu. Agimi e ka, okro moa a shri ŋa a lom ma o wo ohi. 7Okyku eka he, agimi e yi e da Ebitru pa la moanwyeotum ahwõ oshpa lo. E lu mi le, Eyesu a gre gimi ori a yi Egalili. Agimi é ka ŋa eka baŋ a lu. 8Eyli e kpo moashe lo nzenze, okyku eka he moa a knye a sku ongybi lo. Moa a lu ekplo la e kpo a da arekyeŋ mbo okyku eshi moa a kpo eyli.
Emeri Amagadaliya a ka Eyesu
[ 9Ambla ba Eyesu a kso eku endigigiŋ onda Aladi, a da Emeri Amagadaliya a ka ŋa oriori. Aŋa a se egbgabi efoha a sku ashe lo. 10Ashe lo a gre a yi a da moanwyeotum baŋ oshpa baŋ a ka Eyesu. Omba he lo moanwyeotum a la a wu okũ. 11Omba ba ashe lo a lu a da mo ba Eyesu a kso ongybi nga baŋ a ka ŋa, moa a bmi ba adlidzi ku-ku mbo.
Moanwyeotum aha a ka Eyesu
12Ambla he nga, omba ba moanwyeotum aha a yi anwye osku, Eyesu a da mo a ka ŋa. 13Moaha lo a gre a yi a lu a da moanwyeotum ahwõ ba moa a ka Eyesu, ambo moa a bmi ba adlidzi mbo.
Eyesu a ba okro moanwyeotum okʼpoakyeŋ
14Okpyemgbyeŋ nga, Eyesu a ba okro moanwyeotum okʼpoakyeŋ omba moa a ri algo. A shrom mo nzenze okyku eshi omba moare a ka ŋa nga moa a lu a da mo baŋ a kso ongybi, moa a bmi ba adlidzi mbo okyku moa a shpi esõ mo. 15Eyesu a nyuŋ mo a lu mi le, Agimi e ngla obiŋ hi, nga e nyum Oshpaodzadzi e da moarehwi obiŋ hi mvye. 16Are la a bmi ba adlidzi nga moa a kpo ŋa abaptisma á gro. Are la a bmi ba adlidzi mbo, Ahogbrẽ á sõ ŋa ombgu. 17Moa la a bmi ba adlidzi á hwiŋ ekʼpo ba Ogbgaodzi okyku o se egbgabi eshko me, nga moa á lu elom andandandim. 18Nga, o wo moa a vu amabi abgo, o mbo le a wa ekpre, ekplokyeŋ é kpo pa la mo mbo. Nga o wo moa a tka moa la a no ololo le, moa á shaŋ.
Moa a sko Eyesu a gre Ongyeŋ
19Ambla ba Eyesu Adigi a lu odlo pa la moanwyeotum baŋ okʼpoakyeŋ a khwo nga, moa a sko ŋa a gre Ongyeŋ, nga a dzu obgori ba Ahogbrẽ. 20Moanwyeotum nga a gre a yi a nyum oshpa ayaŋ a mbo. Adigi-odne a kpo otum pa la moanwyeotum lo, nga a shri ekʼpo a da mo a kpo ayakplo egbregbre okyku o da moare a ka adlidzi ba oshpa lo.]
Pašlaik izvēlēts:
Amarku 16: EGONT74
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Eggon New Testament © United Bible Societies, 1974. Bible Society of Nigeria