Amarku 14
14
Moa a fu eshri eshri Eyesu
1O ra elum eha ayga, moa a ri Abgo ba Apaska,#Abgo moa a ri okyku o tne aga omba ba Ahogbrẽ a se moaEyahuda a sku obiŋ ba Amasla. ta la Abgo ba Agbrotsa la a nyom mbo. Moandakʼpo olu ba Ahogbrẽ, pa la moa la a nye odaŋ a klo ozhẽ okyku o vu Eyesu shu nga o bga ŋa. 2Moa a tne tki nga a lu mi le, O raŋ bi e kpo eka he omba oriabgo he mbo, o mbo le moare á kso la ambgu.
Moa a khwa Eyesu awargi Ebetanya
3Eyesu a gre odne Esima la a gbu eshru anwye osku ba Ebetanya. Omba moa a ri algo nga, ashekyeŋ a shri embdzu ba ezhim alabasta a bli lo la awargi la a shka efpi nga a wo egbmo nzenze, moa a bzi lo onad. A gom embdzu lo nga a zhiŋ awargi a khwa Eyesu eshri. 4Moabze la a wo ma a ka, a kpo olom nga moa a lu ahihĩ ta la emo a lu mi le, Okyku eshi moa a tpi awargi hi ayi? 5Moa a nyuŋ ashe lo a lu mi le, O raŋ o gre boŋ o shri awargi lo o gbmo, o dzu mbo a gbu amgbaŋ Enaira ekʼpoefĩ. O raŋ o gre boŋ o shri lo o gʼba moaekŋe ó sku boŋ o shri lo o tpi ayi ototno. 6Eyesu a shrom mo a lu mi le, Agimi e kʼpi ashe lo ohwa mbo, okyku eshi a kpo ekplo okpoghwo angyiŋ okyku me. 7Moanekŋe a wo ka la gimi ombamba mvye, ombayaŋ a mbo bimi e klo, agimi e kpo e gbu bimi e kpo e ghwo la mo, ambo ame é dzu ka la gimi ombamba mvye mbo. 8A kpo ekplo baŋ a kpo a gbu angyiŋ. A khwa egʼba me la awargi okyku moa á ba a ngybi me. 9Agimi e ngli e gno, okroyaŋ a mbo obiŋ hi moa á ba a nyum Oshpaodzadzi he lo ma, ekplo ashe he a kpo moa á tne aga alo.
Eyahuda a bmi a yla Eyesu
10Eyahuda Eskariyoti, akyeŋ eshki moanwyeotum otsko ba Eyesu, a gre a yi a hwim pa la moandakʼpo olu ba Ahogbrẽ, baŋ á shri Eyesu á da mo. 11Moandakʼpo olu lo a gno oraŋ a gre eshri nga moa a hwim ka la ŋa moa á ba a hre ŋa amgbaŋ. Okyku eka he Eyahuda a klo ozhẽ okyku o yla Eyesu.
Eyesu a ri algo Apaska pa la moanwyeotum baŋ
12Onda oriori moa a kpo Abgo ba Agbrotsa la a nyom mbo, onda he lo angyiŋ moa a la a bga ekylu okyku oriabgo. Moanwyeotum a zhĩ Eyesu a lu mi le, Aŋo o klo ba gi é yi é nyuŋ okroyaŋ é kpo okyku o ri algo ba Apaska? 13Eyesu a nyuŋ moaha eshki mo a lu mi le, Agimi e yi Orushalima, agimi é ka arekyeŋ la eshyẽ ami eshri. 14E lu are he lo ma e yi odne baŋ a gre ma, nga e nyuŋ are-odne lo e lu mi le, Andakʼpo a klo boŋ o tsa gi aku baŋ ka la gi é ba e ri algo ba Apaska ma. 15Agimi é lu ka la ŋa eka he bgu, aŋa á tsa gimi aku a ba ongyeŋ a ba anzho odzu ma a wo ma. Ahe lo angyiŋ agimi é ba e nyuŋ anzho é kpo okyku o ri algo Apaska. 16Moanwyeotum aha lo a gre Orushalima nga moa a hwiŋ ekployaŋ a mbo eka ba Eyesu a lu, nga moa a nyuŋ ekployaŋ a mbo a kpo okyku o ri algo Apaska.
17Olum-ore nga Eyesu pa la moanwyeotum baŋ otsko a ba. 18Omba moa a ri algo nga Eyesu a lu mi le, Ame a lu e da gimi, akyeŋ eshki bimi la a ri algo pa la me, á yla me. 19Odlo baŋ a lu o tpi moanwyeotum esõ ayi o gre eshri, okyku eka he moa a zhĩ ŋa akyekyekyeŋ a lu mi le, Ame angyiŋ? Ame angyiŋ? 20Eyesu a lu mi le, Akyeŋ eshki bimi otsko he lo angyiŋ. Are la a ri algo pa la me otsotse angyiŋ á ba a yla me. 21Anwye Arehwĩ á kpu eka ba Akpa Ahogbrẽ a lu. Ambo o wo ekplo ongroeshri ta la are la á ba a yla Anwye Arehwĩ. O raŋ o gre e mbi moa a mbre ŋa mbo.
Abgoeku Adigi-odne
22Omba moa a la a ri algo nga, Eyesu a sko agbrotsa nga a vye Ahogbrẽ a kplu lo agbu, nga a shri lo a da moanwyeotum baŋ. A lu mi le, E yga e taŋ, a dzu egʼba me angyiŋ. 23Ambla he nga Eyesu a sko etku ami, a vye Ahogbrẽ, a shri lo a da mo, nga moa mvye a wa. 24Eyesu a nyuŋ mo a lu mi le, E ka, amanzhli me angyiŋ a wo ahi lo, alo angyiŋ moa a zhiŋ a ygi a bi okyku moare mvye. Amanzhli he lo angyiŋ a bli ohwihwim ba Ahogbrẽ. 25Ame e lu e da gimi, ame é wa etku ami hi nga mbo, o wo le onda ba ame é wa etku ami elehe Oreŋ ba Ahogbrẽ dne a mo. 26Ambla moa a ri algo Apaska a khwo nga, moa a fu abmo a zgi a gre Akũ Olivi.
Ebitru á kpo evom Eyesu
27Eyesu a nyuŋ mo a lu mi le, Agimi mvye é knye é dzu tne é zga okyku eshi Akpa ba Ahogbrẽ a lu mi le, Ahogbrẽ á bga are la a kpaŋ ékylu lo, nga ékylu é sla ayi. 28Ambo, ambla ame e kso eku bgu le, ame é gre gimi ori, é yi Egalili. 29Ebitru a nyuŋ Eyesu a lu mi le, O wo moanwyeotum ahwõ á knye á dzu ŋo á zga a mbo, ame é knye mbo ku-ku. 30Eyesu a tno ŋa ma a lu mi le, Ebitru o tne o ka, engo é tko engyi eha ayga aŋo ó ba o kpo evom me engyi etra okyukyku o ba anye he mbo. 31Ebitru a sa a lu osheshye a lu mi le, Ame é kpo evom boŋ mbo ku-ku, o wo ba ame é kpu okyku ŋo a mbo, ame e bmi. Moanwyeotum ahwõ a mbo a lu ekakahelo.
Eyesu a fa olu agbi ba Egetsemani
32Eyesu pa la moanwyeotum baŋ okʼpokyeŋ a ba agbi ba Egetsemani nga a nyuŋ mo a lu mi le, Agimi e dzu e bli me o tsa ame e yi e fa olu. 33Nga a sla Ebitru, ta la Eyakubu, ta la Eyohana. Omba he lo esõ e kpo ŋa ewu e gre eshri. 34Eyesu a gre agba pa la moatra lo nga a nyuŋ mo a lu mi le, Esõ e wo me wayawaya eka ame é kpu. Agimi e nyuŋ e dzu o tsa ame e ba. 35Eyesu a zhiŋ a gre agba nga, a kʼpu obiŋ, a fa olu a lu mi le, O wo boŋ o bmi, o sko ewu he lo o sku me. 36A sa a lu mi le, Ada, ekployaŋ a mbo é kpo é gbu okro boŋ. Aŋo o bmi le, o sko ewu he lo o sku me. O kpo ekplo boŋ o klo. 37Eyesu a ba nga a hwiŋ moatra lo a ndze enu. Eyesu a nyuŋ Ebitru a lu mi le, Esima aŋo o ndze? Aŋo o kpo o gbu boŋ o dzu ayi okyku awa akyeŋ a mbo mbo? 38Eyesu a nyuŋ mo a lu mi le, E kʼpu nga e fa olu okyku o da gimi e tsu e gbu obile mbo. Ame e yi ba agimi e bmi pa la me esõ bimi, ambo egʼba e shki gimi ami.
39Eyesu a gre agba a yi a fa olu eka ba oriori lo. 40A bla a ba nga a hwiŋ moanwyeotum atra a ndze enu. Moa a kʼpu a gbu mbo. Omba baŋ a ba a hwiŋ mo enu eka he nga, moa a yi ekplo ba olulu mbo.
41Omba ba Eyesu a bla a ba odgo otra nga, a zhĩ mo a lu mi le, Ma-me o ta ohuhuhi agimi e ndze enu nga e wo odzudum? E dzu gimi tki a mo. Omba lo o kpo bgu. E ka, moa a sheŋ a yla Anwye Arehwĩ pa la moandakʼpo ba odlobi bgu. 42E kso e da gi e yi a mo. E ka, are la a yla me a wo osusku.
Moa a vu Eyesu
43Omba ba Eyesu a lu odlo nga, Eyahuda, akyeŋ eshki moanwyeotum otsko a ba. Moare a shri akõ, ta la amgbu api a ba ka la ŋa. Moandakʼpo olu ba Ahogbrẽ, pa la moa la a nye odaŋ, pa la moandakʼpo ba obiŋ, moa a hom mo otum. 44Are la a yla Eyesu a tsa mo a lu mi le, Are ba ame e shri anyu me e tka anyu baŋ, aŋa angyiŋ a wo Eyesu. Agimi e vu ŋa e shri e yi.
45Eyahuda a gbu a khwo nga, a gre okro Eyesu a nyuŋ ŋa a lu mi le, Andakʼpo! Nga a shri anyu baŋ a shri a tka a ba Eyesu. 46Moaabaavuŋa. 47Akyeŋ eshki moanwyeotum la a tspi osusku a se akõ baŋ nga a hli anwye-odne ba anyuŋ-andakʼpo olu ba Ahogbrẽ otuŋ. 48Eyesu a nyuŋ moa la a ba okyku o vu ŋa, a lu mi le, Okyku eshi agimi e ba la akõ, la emgbu api okyku o vu me, eka ame e wo are la a gre abgo? 49Engyi oshushku ame e wo ka la gimi, nga e nye gimi Anyuŋ-akulu ambo agimi e vu me mbo. Ambo o dzu omgbybi ba odlo Akpa ba Ahogbrẽ o bli. 50Omba he lo, moanwyeotum ba Eyesu mvye a knye a dzu ŋa a zga.
51Ambo ola anwyekyeŋ la a bʼbu oknye la o wo kyekyekyle a lu Eyesu ma. Moa la a vu Eyesu, a klo o vu ola anwye he lo. 52Ambo, ola anwye lo a knye ososo nga a dzu oknye baŋ a zga.
Moa a sõ Eyesu ombgu
53Moa a shri Eyesu a gre odne anyuŋ-andakʼpo olu ba Ahogbrẽ, moandakʼpo olu, pa la moa la a nye odaŋ, pa la moandakʼpo a pla emo a shki odne lo. 54Ebitru a lu moa la a vu Eyesu okũ nga, a gre ekpazhi odne ba anyuŋ-andakʼpo olu ba Ahogbrẽ. A ghre ovo ma pa la moanwyeakyuŋ la a kʼpu odne lo. 55Moandakʼpo olu ba Ahogbrẽ, pa la moa la a sõ ombgu a klo egŋe akprokpro eshri Eyesu, okyku o da ombgu o bga ŋa nga o da mo a vu ŋa a bga. Ambo, moa a hwiŋ ekplokyeŋ eshri Eyesu mbo. 56Moare nzenze a zgi egŋe akprokpro eshri baŋ, ambo egŋe moa a la a zgi e pme eŋa mbo.
57Moarekyeŋ a kso a sheŋ akpro a lu mi le, 58Agi e gno Eyesu a lu mi le, Ame é kypi Anyuŋ-akulu moarehwi a mbdzi hi, ambla ba elum etra nga ame é mbdzi akulu ba moarehwi a mbdzi mbo. 59Egŋe moa a zgi he lo a mbo e pme eŋa mbo.
60Anyuŋ-andakʼpo olu ba Ahogbrẽ a tspi angyeŋ egi ayi eshki nga a zhĩ Eyesu a lu mi le, Aŋo o wo akplokyeŋ ba olulu eshri ohrẽ moa a lu eshri boŋ hi mbo? 61Eyesu a dzu eŋa tki, a lu akplokyeŋ mbo. Anyuŋ-andakʼpo olu ba Ahogbrẽ a sa a zhĩ ŋa a lu mi le, Aŋo angyiŋ o wo Emisiya Anwye ba Ahogbrẽ? 62Eyesu a tno ma a lu mi le, Ame angyiŋ e wo Anwye Esesla ba Ahogbrẽ. Agimi pyeŋ é ka Anwye Arehwĩ á dzu obgori ba Ahogbrẽ, nga á gile etabro ba ongyeŋ á sa á ba. 63Esõ e tpi anyuŋ-andakʼpo olu ba Ahogbrẽ ayi nga, a dle ariga baŋ a ygi egʼba, nga a zhĩ mo a lu mi le, Aku ombgu, agi e klo moa-egŋekyeŋ e gre eka he nga? 64Agimi e gno odlo ototno baŋ a lu. Agimi e klo e kpo ŋa eshi? Moa mvye a tno ma a lu mi le, Ombgu o vu ŋa. A tse ma moa a bga ŋa.
65Moakyeŋ eshki mo a ta akyi a ygi Eyesu. Moa a shki ŋa ayi nga a bga ŋa andzu. Moa a zhĩ ŋa a lu mi le, O boŋ o ka ayi a bga ŋo andzu? Moanwyeakyuŋ la a kʼpu okro a bga ŋa andzu.
Ebitru a kpo evom Eyesu
66Omba ba Ebitru a ghre ovo ekpazhi lo anwyeshe-odne anyuŋ-andakʼpo olu ba Ahogbrẽ a ba. 67Omba baŋ a ka Ebitru a la a kpoŋ ovo, a ka ŋa dzo, nga a nyuŋ ŋa a lu mi le, Aŋo a mbo o wo eshki moanwyeotum ba Eyesu ba Anazarata. 68Ebitru a tno ma a lu mi le, Ame e yi ekplo boŋ o lu mbo. Ebitru a lu eka he a khwo nga a gre odakyeŋ nga engo e tko. 69Anwyeshe lo a ka Ebitru nganga, nga a lu eka he a da moa la a wo osusku okro lo a lu mi ma Ebitru a wo akyeŋ eshki moanwyeotum ba Eyesu angyiŋ. 70Ambo Ebitru a dzu evom gaŋ. Ambla fi nga moa la a wo osusku a nyuŋ ŋa a lu mi le, Aŋo o kpo o gbu boŋ o dzu evom mbo. Aŋo o wo eshki moanwyeotum ba Eyesu angyiŋ okyku eshi aŋo o zgi Egalili angyiŋ o ba. 71Ebitru a kʼpi ashum a lu mi le, Ahogbrẽ a bga me o wo ba ame e lu adlidzi angyiŋ mbo. Adlidzi, ame e yi are bimi e la e lu odlo eshri baŋ hi mbo ku-ku. 72Ambla baŋ a dzu evom odgo otra a khwo nga, engo e tko odgo oha nga Ebitru a tne aga ekplo ba Eyesu a lu ka la ŋa a lu mi le, Aŋo Ebitru ó dzu evom me engyi etra ayga engo é ba e tko engyi eha. Ebitru a tne aga nga a wu okũ.
Pašlaik izvēlēts:
Amarku 14: EGONT74
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Eggon New Testament © United Bible Societies, 1974. Bible Society of Nigeria