YouVersion logotips
Meklēt ikonu

Oluka 10

10
Eyesu a hom moarehwi baŋ ekʼpoefoha otum
1Ambla he nga, Adigi-odne a sla moarehwi ekʼpoefoha nga a hom mo otum. A hom mo ahahaha, okyku o da mo a yi oskuyaŋ a mbo ta la okroyaŋ a mbo baŋ a zga eso ba o yi. 2Eyesu a nyuŋ mo a lu mi le, Algo ba oyoyla a wo ma nzenze, ambo moare la a wo ma okyku o yla lo a gaŋ mbo. Okyku eka he e fa olu okyku o da are-agbi a shri moare a shri a ba a ta ma okyku oyoyla. 3Agimi e yi! Ame é hom gimi otum eka ba ékylu e yi okro ba ebuakam. 4Agimi e sko abre amgbaŋ ba o shri amgbaŋ ma mbo. Agimi e sko abre mbo nga e shri akpadga mbo. Agimi e tspi e shko arekyeŋ ozhẽ mbo ku-ku. 5Ombayaŋ a mbo bimi e gbu odnekyeŋ le, agimi e zga esi e nyuŋ moa-odne lo e lu mi le, Opyapyaŋ ba eso o dzu ta la odne he lo. 6O wo ba arekyeŋ ba odlodzi a wo ma le, edgu oshko he lo o dzu ŋa la owlama, ambo o wo ba arekyeŋ ba odlodzi a wo ma mbo le, alo o bla o ba ibu bimi. 7Agimi e dzu odne he lo nga e ri e wa, eka ba moa a shri a da gimi. Okyku eshi o dzu omgbybi ba moa a shri ohre a da are la a kpo otum. E dzi adne moare wayawaya mbo. 8Ombayaŋ a mbo ba agimi e gre osku le, o wo moare ba osku he lo a yga gimi la ovyevye le, agimi e ri ekployaŋ a mbo ba moa a shri a da gimi. 9Nga agimi e shaŋ moare osku lo, nga e lu e da moare e lu mi le, Oreŋ Ahogbrẽ o ba osusku ka la gimi. 10Ambo ombayaŋ a mbo bimi e gre osku, o wo ba moarehwi ba osku lo a yga gimi la ovyevye mbo le, agimi e yi anyuŋ-ezhẽ nga e lu mi le, 11Agi e ndza abgo e sku gimi, ambo agimi e tne aga e ka, Oreŋ Ahogbrẽ o ba osusku ka la gimi a mo! 12Ame e lu e da gimi, Onda Ombgu tli le, Ahogbrẽ á ka Osodom a mbo ayiekŋe á gre edgu osku he lo.
Moarehwi ba esku la a bmi ba adlidzi mbo
13Aŋo Okoroziŋ, ta la Ebetseda! A ba eshri bimi! O wo ba moa a kpo edgu ayakplo ba egbregbre ba moa a kpo hi Ataya ta la Esidoŋ angyiŋ, e mbi, moare a sheŋ a dzu obiŋ nga a ygi ashezhga aknye nga a fa otutuŋ a ygi egʼba, okyku o tsa ba moa a ghwo obiŋ odlobi mo bgu! 14Olum Onda Ombgu ba Ahogbrẽ, Ahogbrẽ á ka Ataya ta la Esidoŋ la ayiekŋe la a gre ayiekŋe baŋ á ba a ka okyku gimi. 15Aŋo Akafanahum! Aŋo o klo o si eŋo o yi Ongyeŋ? Ambo, moa á shri ŋo á ta enzheovo!
16Nga a nyuŋ moanwyeotum baŋ lo a lu mi le, Areyaŋ a mbo la a yga odlo bimi le, a yga odlo me angyiŋ, nga areyaŋ a mbo la a tla gimi le, a tla me angyiŋ, nga areyaŋ a mbo la a tla me angyiŋ, a tla are la a hom me otum.
Moarehwi ekʼpoefoha lo a bla a ba
17Moarehwi ekʼpoefoha a ba la ovye nzenze nga moa a lu mi le, Adigi-odne, egbgabi a mbo moa a gno gi omba bi e kyku mo la eshko boŋ! 18Eyesu a tno mo ma a lu mi le, Ame e ka Eshitaŋ a mbo e gile e zgi ongyeŋ e ba obiŋ hi eka ayimom ba angyum-ogbu. 19Agimi e ngli e gno! Ame e shri ekʼpo e da gimi, okyku o da gimi e dzi amabi, ta la enaŋ a mbo, nga ame e da gimi ekʼpo la e gre ekʼpo pyeŋ ba Afpu bimi. Ekplokyeŋ é kpo gimi mbo ku-ku. 20Ambo, agimi e kpo ovye okyku ba egbgabi a mbo e gno gimi mbo! Ambo, agimi e kpo ovye okyku ba moa a sheŋ a ta ashko bimi Ongyeŋ bgu.
Eyesu a kpo ovye
21Omba he lo nga, Ogbgaodzi o bli Eyesu la ovye. A lu mi le, Aŋo Ada, Adigi-odne ba Ongyeŋ pa la ba obiŋ hi! Ame e vye la ŋo nzenze okyku boŋ o hwile eshyẽ odlo boŋ okyku moa la a yi engla mbo. Ohe lo aŋo o ghre moa la a wo okaobmye la o gyu ogyuŋ, pa la moa la a yi engla. Eka he a mi la, Ada, aŋo o kpo ekplo boŋ o klo nga o gno oraŋ ta la lo angyiŋ.
22Adugu a sheŋ a shri ekployaŋ a mbo a da me. Arekyeŋ a yi are la a wo Anwye lo mbo o wo le Ada sha. Arekyeŋ a yi are la a wo Ada mbo o wo le Anwye, pa la are ba Anwye lo a klo baŋ a yi ŋa sha.
23Ambla he nga Eyesu a zhiŋ a lu pa la moanwyeotum baŋ sha a lu mi le, Agimi e raŋ eshri e gre eshri eka bimi e hwiŋ ozhẽ e ka edgu ayakplo hi! 24Ame e lu e da gimi, moarehwi nzenze ba Ahogbrẽ a hom mo otum, pa la moareŋ, moa a klo o ka edgu ayakplo bimi e la e ka he, ambo moa a hwiŋ ozhẽ mbo. Nga moa a klo o gno edgu ayakplo bimi e la e gno, ambo moa a gno mbo.
Egŋe eshri alom ba Asamariya la a ka ayiekŋe
25Ambla he nga, arekyeŋ la a nye odaŋ a ba okyku o kpyi Eyesu. A zhĩ a lu mi le, Andakʼpo, ame é kpo eshi okyku o da me e hwiŋ eso ba gbagbu-amo? 26Eyesu a tno ŋa ma a lu mi le, Akpa ba Ahogbrẽ a lu eshi? Okaobmye boŋ o wo ekayaŋ odlo lo? 27A tno ma a lu mi le, O dzu omgbybi boŋ o klo Adigi-odne Ahogbrẽ boŋ la eso boŋ pyeŋ, la oshye egʼba boŋ pyeŋ, la aga boŋ pyeŋ, nga o klo a ba ekpazhi boŋ eka boŋ o klo eshri boŋ. 28Eyesu a tno ŋa ma a lu mi le, Otnoma boŋ hi o wo eka lo angyiŋ. Aŋo o kpo eka he lo bgu le, ó hwiŋ eso ba gbagbu-amo.
29Ambo are la a nye odaŋ he lo a klo o da Eyesu a ka ŋa baŋ a wo shasha angyiŋ eshri ozhiozhĩ he lo, okyku eka he a zhĩ ŋa a lu mi le, Ayi angyiŋ a wo a ba ekpazhi me? 30Eyesu a tno ma a lu mi le, Alomakyeŋ a gile a zgi Orushalima a yi Ejeriko, nga moasi a kpo ogʼga ka la ŋa. Nga moa a zhga ŋa egʼba a ta. Moa a dzu ŋa a zga anyu eku. 31Omba he lo andakʼpo olu ba Ahogbrẽ a ba a sõ ozhẽ he lo. Omba baŋ a ka alom he lo nga, a ngʼba a sõ eŋa agba ozhẽ shu a bre a gre. 32Alomakyeŋ ba Elivi a ba a sõ ozhẽ lo nga, a mʼmi ŋa ayi nga a ngʼba a sõ eŋa agba ozhẽ shu a bre a gre. 33Ambo alom ba Asamariya a mbo a sõ ozhẽ he lo. Omba baŋ a ba a bre a yi nga, a ka alom he lo nga a wo ŋa ayiekŋe. 34A gre okro baŋ nga a zhiŋ awargi, ta la ami anab a tsiŋ ŋa ekro ba moa a fa ŋa ero ma, nga a bʼbu ŋa ero lo. A sko ŋa a zga ashrishri baŋ a shri ŋa a gre odnekyeŋ nga a kpo a ghwo la ŋa. 35Onda oha nga a shri eyiamgbaŋ eha a da are-odne lo nga a lu mi le, Aŋo o kpo o ghwo la alom hi nga ekployaŋ a mbo boŋ o tpi ayi eshri baŋ o gre ekplo ame e shri e doŋ, omba ame é ba, ame é nyiŋ lo é doŋ. 36Nga Eyesu a zhĩ a lu mi le, Eka boŋ o ka, areyaŋ angyiŋ eshki moatra he lo a wo a ba ekpazhi ba alom ba moasi a kpo ogʼga ka la ŋa? 37Are la a nye odaŋ a tno ŋa ma a lu mi le, Are la a kpo a ghwo la ŋa he lo angyiŋ a wo a ba ekpazhi baŋ. Eyesu a tno ŋa ma a lu mi le, Aŋo a mbo o yi o kpo ekakahelo.
Eyesu a gre oklo odne ba Amata ta la Emeri
38Omba ba Eyesu, pa la moanwyeotum baŋ a wo ozhẽ a yi nga, moa a gbu anwye oskukyeŋ. Ashekyeŋ a wo ma, eshko baŋ e ri Amata. A yga Eyesu odne mo la ovyevye. 39Amata a wo la anáŋ ma, eshko baŋ e ri Emeri. Aŋa angyiŋ, a dzu eŋa egi ayi ba Adigi-odne nga a ngli atuŋ a gno onyenye baŋ. 40Ambo Amata a kpo olom okyku otum la o wo ma nzenze baŋ a la a kpo. Okyku eka he nga a ba a lu mi le, Adigi-odne, aŋo o ka eka ba anime a dzu ka la ŋo nga, a dzu otum a ta me sha a da me e la e kpo mbo? O lu o daŋ a ba a kpo a ghwo la me! 41Ambo Adigi-odne a tno ŋa ma a lu mi le, Amata, Amata! Aŋo o la o da ayakplo nzenze a kpo ŋo ewu eso! 42Ambo ekplokyeŋ sha moa a klo. Emeri a sla ekplo la e wo shasha, nga moa á ngʼga lo á sku ŋa mbo ku-ku.

Pašlaik izvēlēts:

Oluka 10: EGONT74

Izceltais

Dalīties

Kopēt

None

Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties

Lai personalizētu tavu pieredzi, YouVersion izmanto sīkfailus. Izmantojot mūsu vietni, tu piekrīti, ka mēs izmantojam sīkfailus, kā aprakstīts mūsu Privātuma politikā