Maak 16
16
Yisọs ased ke ñkpa
1Ke usen Sabad amaakeboiyo, Mmeri Makdadin ye Mmeri eka Yemsi, ye Sadomi emaekedep inem ufịk adan nọ eben ekefiọññọ akpo Yisọs. 2Ke akpa ubakusen ke akpa usen udua, idaha utịn atọọñọke adinyan iso, ammọ edika udi 3ammọ emaeneme ke idem ammọ ete, “Me anie idiikikpat itiad isio ke inua udi?”
4Ado ammọ ekekewuọ edịppe anyen ese, ammọ ekịt ke emaekpakpat itiad esio ke inua udi, itiad amaakenekke ikpon. 5Ke ini ammọ ekeesọiyọke edʌk udi, ammọ emaekịt akparawa keed akesịneke anyan afia afọñidem naña atie do ke ubọk nnasia, ndịk amaanam ammọ.
6Anye ammabo ammọ ate, “Ikiikop ndịk. Ndufo eyem Yisọs Ayịn Nasared e-ekekọññọ ke eto krọs. Anye amaaset! Anye ibaaha mi. Idi idise itie e-ekenịmme anye. 7Ado ika ikidọkkọ mbed amọ, ye Bita ibo ke, ‘anye abem ndufo iso aka Kadidi. Do ke ndufo ediikịk anye naña anye aketañ.’ ”
8Ye ñnyeñidem ye ñkpaidem, ibaan ado emaefeeñe ewuọọñọ ke udi. Ammọ ikiitañña ñkpọ ntekeed inọ awo, ato naña ndịk akeanam ammọ.
[Mme uwak ñwed emaekememịñ ye mme ntiense esed inieehe mme ufañ usʌkkeed tutu asịm edịb 9-20.]
9Ke Yisọs amaakeset ubakusen ke akpa usen udua, anye amaato ayaara idem anọ Mmeri Makdadin, awonwaan a-anye akebịnne ndiọi sịbidịd itiaba asiooño ke idem. 10Mmeri ndin aka akebʌk anọ mbon e-ekesibaagha ye anye, e-ekebonoke ke mfʌhọ ye ntua ayịd. 11Ke ammọ ekoppo ke anye amaaset, ke Mmeri amaakịt anye, ammọ ikiinimme ke akpanikọ.
12Ndubi usen ado, anye ayaara idem anọ awo ammọ iba ke usʌñ naña esañake eka abio inwañ; ado ammọ ikidiọọñọke anye sia anye amaakpəho idem asịn ke uduod mfen. 13Ndin ammọ emaeka eketañ enọ mbon ñko; ado ndomo awo ammọ keed ikinịmme ke akpanikọ.
14Akekem anye amaayaara idem anọ mbed duob ye keed ke itie ammọ ekebonoke edia ñkpọ. Anye anyʌñ asua anọ ammọ ke isọñesịd ammo enieghe ye unana adinịm mbon se ikikịt anye emaekeditañ inọ ammọ.
15Anye ndin abo ammọ ate, “Ikaa ke afịd ekondo ikikwọrọ eti etob ami inọ afịd awo. 16Awo ake adinịm ke akpanikọ, anyʌñ abọ uduọkmmọọñ, eyaenyaaña anye, ado awo ake atre adinịm ke akpanikọ, ikpe ayaabiom anye. 17Ndin mme idiọọñọ ami eyaekeene mbon se inịm ke akpanikọ: ke anyịñ mmi ammọ eyaebịn mme ndiọi sịbidịd; eyaesem ufa usem; 18ammọ eyaemʌm udʌkikọd ke ubọk, ndin adieke ammọ enwọññọ ibọk ñkpa, idiinamma ammọ idiọọk; ammọ eyaedot mbon udọñọ ubọk ndin ammọ eyaekop nsọñidem.”
19Ke Abọọñ Yisọs amaaketañ mme ikọ ami ima, emaeben anye edọọk ke hefịn, anye anyʌñ asuuk atie ke ubọk udom Abasi. 20Ndin ibed ewuọọñọ ekekwọrọ ikọ afịd itie, Abọọñ anyʌñ adat ammọ anam utom, ndin anyʌñ asọọñọ ukwọrọ ikọ ammọ ke adinam mme utịbe idiọọñọ.
Pašlaik izvēlēts:
Maak 16: NAAM
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.