Matiu 9
9
Yisọs afeen anọ anyʌñ akọk awo akpaubeñ udọñọ
1Yisọs amaasọiyọ adʌk ubom akanna akewuọ idʌñ ammọ. 2Mme awo emaeben awo udọñọ akpaubeñ a-akenaaha ke aya esọk anye. Ke Yisọs amaakekịt mbuọdidem ammọ, anye amaabo awo akpaubeñ ado ate, “Ayịn, sọọñ esịd, sia efeen mme ndiọiñkpọ mfo.”
3Ubaak mme akpeeb ibed ekekop ami, ammọ ebo ke esịd ammọ ete, “Awo ami a-asappa Abasi.”
4Yisọs akediọọñọ akikere ammọ, anye abo, “Ntaha ndufo enieeñeke utọ ndiọi akikere ami ke esịd ndufo-o? 5Ake-e imem ikan, adibo ‘Efeen mme ndudue mfo’ me adibo, ‘Dakka da saña’? 6Ado nọ ndufo ediọọñọ ke Ayịn Awo anie unen ke iso isọñ adifeen ndudue.” Ndin anye abo awo akpaubeñ ate, “Dakka da, ben aya mfo nyọñ ufọk.” 7Ndin awo ado adakka ada anyọñ ufọk. 8Ke ini atu awo ekịtte ñkpọ ami, ekamba ndịk amaamʌm ammọ, ammọ enyʌñ etooro Abasi, a-akenọọhọ mme awo utọ adudu ado.
Ikood Matiu
9Ke Yisọs akekpọñ do anye amaakịt awo e-ekoodo Matiu nte atie ke itie atayad ubọ taksi. Yisọs abo anye ate, “Ñkeene miin.” Ndin Matiu adakka ada akeene anye.
10Ke ini Yisọs akesʌkkọ adia ndidia ndubi ke ufọk Matiu, umiañ mme abọ taksi ye mme ndiọi awo emaedi enyʌñ edidia ndidia ye anye ye mme mbed amọ. 11Ke ini mme Farisi ekịtte ami, ammọ ebịp mme mbed Yisọs ebo, “Ntaha eteufọk ndufo asidiaaha ndidia ye mbon ubọ taksi ye mme ndiọi awo-o?”
12Ke adikop ami, Yisọs abọọrọ, “Idooho mbon nsọñidem esiyem abiaibọk, ado mme adọñọ udọñọ. 13Ikaa ikikpeeb se ami awuọọñọ: ‘Ami nyem mbọm, idooho uwa.’ Sia ñkedi ikood mme anam ndiọi, idooho mme nti awo.”
Ebịp Yisọs ebaña utreudia
14Ndin mme mbed Yọọn edibịp anye ete, “Nso-o ido ntak a-ñnyịn ye mme Farisi isitreke udia, ado mme mbed mfo itreke?”
15Yisọs amaabọọrọ ammọ ate, “Nte nditọ ebendọ ekeme itie abiọñ ke ini ebendọ asʌkkọ aba ye ammọ? Ado ini ayaadi e-ediiben ebendọ ikpọñ ammọ, do ndin ammọ eyaetre udia.
16 “Awo isibenne ufa afọñ ikịm idian ke akaan afọñ mbaak itie ado adiwakka adiọọk akan akpa. 17Ñko awo isibenne akaan ikịm idọñ ufa ukọd, mbaak adudu ufa ukọt adiduad ikịm nọ ukọd aduọkkọ. Ufa ikịm ikpọọñ ke ana ekama esịn ufa ukọd nọ ikịm ye ukọd ekpeene.”
Yisọs anam ayịn abọikpa aset anyʌñ akọk awonwaan udọñọ uwuọ iyiib
18Ke ini anye asʌkkọ atañ ikọ anọ ammọ, keed ke atu mme ikpọ akamautom itie ubọñ akam adi, adinyuuk iwuod ke iso amọ abo, “Ayịn abọikpa mmi asʌk akpa idahami, ado di didot anye ubọk, ndin anye ayaadu uwem.” 19Yisọs amaadakka ada ye mme mbed amọ ekeene anye.
20Ke ukem ini ado, awonwaan keed amaakedọñọ udọñọ uwuọ iyiib isua duob ye iba asaña akpere Yisọs ke edem anyʌñ atuuk mben afọñidem amọ. 21Sia anye akekere, “Mkpekan ntuuk afọñidem amọ, idem ayaansọñ.”
22Yisọs amaakanna iso ase anye, anyʌñ abo anye, “Sọñ idem, mbuọdidem mfo anam idem usọñ.” Kpa ke ukem ini ado idem amaasọñ mma ado.
23Ke Yisọs amaakewuọ ufọk ekamba adaukara itie ubọñ akam ami, anyʌñ akịt mme afịd adʌk ye mme atu awo naña enam uyom, 24anye amaabo, “Iwuọọñọ mi, etək abọikpa ami ikpaahakpa, anye adadaiya.” Ndin ammọ emaesaha anye. 25Ado ke mbon awo emaekewuọọñọ anwa, anye amaadʌk esịd ufọk akebenne etək abọikpa ado ke ubọk, ndin anye adakka ada. 26Do ndin mbʌk ami amaatara ayọhọ afịd esịd idʌñ.
Yisọs akọk mme nnan ye imuum
27Nte Yisọs akesʌkkọ asaña ke usʌñ, mme ideen iba e-ekedoññoke nnan esaña ebọọñ ekeene anye ete, “Itua ñnyịn mbọm, Yisọs Ayịn Defid.”
28Ndin ke Yisọs amaakewuọ ufọk ado, mme nnan iba ami emaekeene anye, ndin anye abo ammọ, “Ndufo emenịm ke ami mmekeme inam ñkpọ ami?”
Ammọ emaebọọrọ, “Abọọñ, iminịm.”
29Do ndin anye atuuk ammọ anyen, abo “Yak asu inọ ndufo nte mbuọdidem ndufo adooho,” 30ndin ammọ emaetịmme ekịt ñkpọ. Ado Yisọs amaanekke akpan ammọ, “Ikiiyak awo nte keed adiọọñọ abaña ami.” 31Ado ammọ emaekedaaña, emaesaaña ebʌk ebaña anye ke afịd ñkanñkʌk abio.
32Ammọ ekesʌk edadakka, emaeben awodeen ñkpọnsọb keed a-akedooho imuum esọk Yisọs. 33Ndin anye amaakebịne ndiọi sịbidịd ado isịññe, imuum ado amaatañ ikọ. Idem amaakpa mme awo, ammọ enyʌñ ebo, “Kpaanam akpa ikịtte utọ ñkpọ ami ke Isred ado ami.”
34Ado mme Farisi ekebo, “Anye akama adudu mme etubom ndiọi sịbidịd abịn mme ndiọi adudu ami asiooño.”
Mme anam utom iwakka
35Yisọs amaasaña isañ aka ke afịd-afịd mme abio ye mme idʌñ, akpeeb ñkpọ nti mbʌk abio ubọọñ ke mme itie ubọñ akam anyʌñ akọk mme nsio-nsio udọñọ. 36Ke anye akịtte umiañ atu awo, mbọm anam anye, sia ammọ emaeduọọk idodanyen, nte mme edọñ e-ediinieeghe andikpeme. 37Ndin anye abo mme mbed amọ ate, “Idọk anekke akpon, ado mme andidọk iwakka. 38Ibeeñe ndin Abọọñ idọk nọ anọ mbon utom nọ edi idọk amọ.”
Pašlaik izvēlēts:
Matiu 9: NAAM
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.