Duk 5
5
Yisọs akood mme akpa ibed amọ
1Usen keed, naña Yisọs adaha ke mben Ibiok Yenesaded, uwak awo emaediyọhọ ekanna anye ekʌk adikop ikọ Abasi. 2Anye amaakịt ubom iba a-mme akọiyak ekekappake ebon ke mben mmọọñ, sia ammọ ekewuọñọ eka adiyet iyịre ammọ. 3Anye amaadʌk ubom keed, a-akenieeghe Saimọn, anyʌñ abeeñe Saimọn ate anək ubom ado akpọñ mben esʌk etək. Anye ndin amaasuuk atie ke ubom akpeeb atu awo ado ñkpo.
4Ke anye amaaketañ ikọ ama, anye ate Saimọn, “Wat wuọ kaa utəñọ mmọọñ, ke top iyịre do muum iyak.”
5Saimọn abọọrọ anye ate, “Eteufọk, ñnyịn imaikpa utom afịd akoneyo ami, ado ikimʌmmọ ndomo ñkpọ keed. Ado sia adooho afo atañ, ñyaaduọk iyịre.”
6Ke ammọ emaekenam ntodo, ammọ emaemʌm ata uwak iyak tutu iyịre ammọ atọọñọ adikịppe. 7Ammọ emaenam idiọọñọ ekood mbon se ikisịne ke ubom anye ako ete edinwam mmimọ. Mbon ndo emaedi edidọñ iyak eyọhọ naña ubom iba tutu mme ubom ami etọọñọ adideñ.
8Saimọn Bita akekịt ñkpọ ami, anye amaaduọ Yisọs ke edọñ ate, “Dakka ñkpọñ miin Abọọñ, sia ami ndo anamidiọọk.” 9Sia idem amaanekke akpa anye ye mme nsaña amọ ke utọ uwak iyak se ammọ ekemʌm, 10ukem-ukem naña idem akekpa Yemsi ye Yọọn, nditọ Sebidi e-ekedoññoke nsaña Saimọn.
Ndin Yisọs ate Saimọn, “Kuuyak idem unyeñ, tọọñọ ke idahami ka iso, afo uduusukọ awo.” 11Ke ammọ emaekewat mme ubom ikiwuọ esʌk, ammọ emaekpọñ afịd ñkpọ enyʌñ ekeene anye.
Yisọs akọk awo akpamfia
12Usen keed, naña Yisọs akebaaha ke abio keed, awo a-akpamfia aketaaha afịd idem amaadi. Ke adikịt Yisọs, anye amaaduọ akʌp iso ke isọñ akpeiye anye ate, “Abọọñ, adieke afo anyịmmeke, amekeme inam ami nsana.”
13Yisọs amaanyan ubọk atuuk anye ate, “Mmenyịmme, sana!” Idaha-idaha ado, akpamfia amaakweeñe anye.
14Ndin Yisọs amaakpan anye ate, “Kuutañ unọ awo ndomokeed, ado ka ke wọt mme aku idem, nyʌñ wa uwa naña Moses aketemme abaña adinam afo asana, nọ ado ñkpọ ntiense anọ mme awo.”
15Ado etop amọ amaanenekke asuana, ndin umiañ atu awo emaewuọọñọ edi adikop ikọ amọ ye adibọ ukọk ke mme udọñọ ammọ. 16Ado Yisọs amaasikpọñ ammọ ke ini ke ini, aka itie se idobo, akebọñ akam.
Yisọs akọk awo akpaubeñ
17Akedo usen keed, idaha Yisọs akekpeebe mme awo ñkpọ, mme Farisi ye mme andikpeeb ibed emaebono do. Ammọ eketo afịd mme idʌñ ke Kadidi, ye Yudia, ye Yerusedem edi. Adudu Abọọñ amaaba ye Yisọs adikọk mme awo e-ekedọñọke. 18Akem mme awo e-ekebenne awo akpaubeñ ewañ ke aya, eyem usʌñ naña eben anye edʌk ufọk edinịm ke iso Yisọs emaedi. 19Ado akeene udịm awo se ikiba, ammọ ikikịtte ufañ naña eboiyo edʌk. Ado anam ammọ edọọk efʌkkọ akọm ufọk, esuuk anye ke aya e-ekewañña anye, enịm ke ufọọd atu awo, kpa do ke iso Yisọs.
20Yisọs amaakekịt mbuọdidem ammọ, anye amaabo awo ado ate, “Ufan, efeen ndiọiñkpọ mfo.”
21Mme akpeeb ibed ye mme Farisi etọọñọ adikere ke atu idem ammọ ete, “Anie awo idodo ami a-asappake Abasi? Anie akeme adifeen ndiọiñkpọ ke miibọhọke Abasi?”
22Yisọs amaadiọọñọ akikere ammọ, anyʌñ abịp ammọ ate, “Nso-o ido ntak a-ndufo ekereke utọ mme ñkpọ ami ke esịd ndufo? 23Ake-e imem ikan: adibo, ‘Efeen ndudue mfo,’ me adibo, ‘Dakka da saña’? 24Ado nyem inam ndufo ediọọñọ ke Ayịn Awo anie adudu ke isọñ adifeen ndudue.” Do ndin anye abo awo akpaubeñ ado ate, “Ami ubo fiin, dakka da, ben aya mfo, nyọñ ufọk mfo.” 25Kpa ke ukem idahado, anye adakka ada ke iso afịd ammọ, aben ñkpana amọ anyọñ ufọk, asaña asʌk atooro Abasi. 26Afịd awo ekeba ke ñkpaidem, ndin enọ Abasi ekọọm. Ndukpo amaamʌm ammọ, tutu ebo ete, “Ñnyịn imikịt utịbe ñkpọ mfịn.”
Yisọs akood Difai anyʌñ adia ñkpo ye mme anam ndiọi
27Ami amaakeboiyo, Yisọs amaawuọ usʌñ anyʌñ akekịt awo abọ taksi a-akereke Difai naña atie ke itie atayad ubọ taksi. Amaakood anye ate “Ñkeene miin.” 28Difai amaakpọñ afịd ñkpọ, adaka akeene anye.
29Ndin Difai amaanam ekamba usọrọ ke ufọk amọ anọ anye, ke atu mme abọ taksi ye mbon mfen e-ekediaaha ñkpọ ye ammọ. 30Ado mme akpeeb ibed ye mme Farisi edukuunọ ye mme ibed Yisọs ete, “Ntak a-anye adiaaha anyʌñ añwọñ ñkpọ ye mme abọ taksi ye ‘ndiọi’ awo-o?”
31Yisọs amaabọọrọ ammọ ate, “Mbon idem asọññọ isiyemme abiaibọk, ado mbon udọñọ esiyem. 32Ami ñkedieeghe adikood nti awo, ñkedi adikood ndiọi awo mbo ekappa esịd.”
Ebịp Yisọs ñkpọ ebaña utreudia
33Do ke ammọ ekebịp Yisọs ebo, “Ntak a-mme ibed Yọọn esitreke udia ndin-ndin, ebọñ akam, ukem ado ye ibed mme Farisi, ado ibed mfo eka iso edia enyʌñ enwọñ ñkpọ-ọ?”
34Yisọs amaabọọrọ ammọ ate, “Nte ndufo ekpaenam nditọufọk ebendọ etre udia naña ebendọ abaaha ye ammọ? 35Ado ini asʌk adi e-ediben ebendọ ikpọñ ammọ, ke mme usen ado ammọ eyaetre udia.”
36Ndin anye amaaatop ñke anọ ammọ ate, “Awo isiwaaha ibio ufa afọñ iben idian ke akaan ikịm. Akpenam ntom, ufa afọñ ayaawakka, ufa afọñ ado ñko idiidooho ukem ye akaan. 37Ñko, awo isibenne ufa ukọd idọñ ke akaan ikịm ukọd. Akpenam ntodo, ufa ukọd ayaabom ikịm ado, ukọd ado aduọkkọ, ikịm anyʌñ atak. 38Ana edọñ ufa ukọd ke ufa ikịm. 39Awo amaanwọñ ndañ ukọd ibooho iyem ufa, sia ebo, Ndañ ado afọn akan.”
Pašlaik izvēlēts:
Duk 5: NAAM
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.