Duk 22
22
Yudas anyịmme aditap Yisọs
1Usen Usọrọ e-ekesidatta uyo awo mmiisịnne defịn inam, e-ekekoodo Basofa, amaakpere. 2Ndin mme ikpọ aku ye mme akpeeb ibed emaeyem ñkara usʌñ naña ammọ ediisaña imʌm Yisọs ikiwot, sia ammọ ekefegheke atu awo. 3Akedikem Setan amaadʌk esịd Yudas Iskariọd a-akedooho keed ke atu mme ibed Yisọs duob ye iba. 4Anye amaaka akeneme ye mme ikpọ aku ye mme akpeme tembịd usʌñ naña anye akpakeme aditap Yisọs inọ ammọ. 5Esịd amaadat ammọ enyʌñ enyịmme adinọ anye akʌk. 6Yudas amaanyịmme, anyʌñ atọọñọ iyem ufañ se anye aditap Yisọs inọ ammọ idaha atu awo mmiibaaha.
Akpatre ndidia ndubi
7Amaakedikem usen Usọrọ edatta uyo a-defịn mmiisịneke inam, a-akenaaha ewot edọñ uwa Basofa, 8Yisọs amaadọñ Bita ye Yọọn ate ammọ, “Ikaa ikinam ndutʌm ibaña ndidia usọrọ Basofa.”
9Ammọ ebịp anye ete, “Ke ñke ke ayem ñnyịn ikinam ndutʌm ami?”
10Yisọs amaabọọrọ: “Emaedʌk isọñ abio, eyaekịt awodeen keed nte akama abañ mmọọñ. Ikeene anye ika ufọk anye anyʌññọ aka, 11inyʌñ ibo anieufọk ado ite, ‘Andikpeeb ñnyịn abo ate: Ake-e ubeed isen ke ndiididia usọrọ Basofa ye mme mbed ado ake-e?’ 12Ndin anye ayaiwọt ndufo ekamba ubeed ke anyọñ, e-emaeketʌm ibeeñe ibet ñnyịn. Inam ndutʌm ke ndo.”
13Ammọ emaedakka edʌk isọñ abio enyʌñ ekekịt ukem-ukem naña Yisọs aketañ anọ ammọ, enyʌñ ebeeñe ndidia Basofa do.
14Ke ini amaakekem, anye amaakedʌk ufọk ado ye ibed amọ duob ye iba, esuuk etie ke akpokoro ndidia. 15Yisọs ndin abo ammọ ate, “Anekke añwʌt miin adidia Basofa ami ye ndufo mbemiso ami mbọ ndutʌkkọ. 16Sia ami ndiidiaaha Basofa mfen aba ye ndufo tutu adiwuọ asu ke abio ubọọñ Abasi.”
17Ke anye amaakeben kọọb, anye anọ Abasi ekọọm, ayaak anọ ammọ ate, “Ibọ ideeme ke atu idem ndufo. 18Ami ntañ inọ ndufo nte ke ami ndiiñwọọñọ se ito mfịd fain aba, tutu abio ubọọñ Abasi adi.”
19Akema anye amaaben uyo, anyʌñ akọọm Abasi, abuuñ, ayaak anọ ammọ ate, “Anye ami ado ikpọkidem mmi, i-inọọhọ ndufo; inam ami adidat intoiyo miin.”
20Ke ukem usʌñ ado, ke emaekeedia ndidia ndubi ima, anye amaaben kọọb, ate ammọ, “Kọọb ami ado ufa edioomo iyiib mmi, e-eduọkkọ inọ ndufo. 21Ado ubọkawo a-ayemme adintap miin mmọ mi ye ake mmi ke akpokoro. 22Ayịn Awo adiinyọñ naña ekebiire. Ado adọdiọọk anọ awo a-adiitap anye!” 23Mbed amọ emaetọọñọ adibịp idem ammọ me anie awo ke atu mmimọ idiinam utọ ñkpọ ami.
24Akem mfaaña ye eniin amaatọọñọ ke atu ammọ, me anie ke atu mmimọ ke ekere nte anye akpon itie akan. 25Yisọs ate ammọ, “Mbọọñ mme Yentaid ekara ammọ naña emama, ndin mme akama adudu edat mbọọñ ado nte mme anọ unwam. 26Yak akuudo ntodo ke atu ndufo. Utu ke ado, yak awo se ikpon ikan ke atu ndufo akappa atie nte etəkayịn, ndin yak adaiso ke atu ndufo akanna adise ñkpọ inọ ndufo. 27Anie awo ikpon ikan, anditie ke akpokoro ndidia me andiben ndidia ndinọ? Ke ido ederimbod, eteufọk atie ke akpokoro, nditọufọk ebeben ndidia edi. Ado idooho ntodo ke atu ñnyịn sia ami mba nte adise ñkpọ inọ ndufo. 28Ndufo edo mbon e-edaaha ye ami ke mme ini idomo mmi. 29Ndin ami mmenịm abio ubọọñ inọ ndufo, ukem-ukem naña Ete mmi akennọ miin, 30nọ ato do ndufo edia enyʌñ enwọñ ke akpokoro abio ubọọñ mmi, enyʌñ itie ke mme ebekpo ubiireikpe enọ mme esiin Isred duob ye iba.”
31Yisọs ndin abo Saimọn, “Saimọn, Saimọn, Setan amaayem naña ukeñ fiin nte awo akeñ abakpa. 32Ado ami mmaabọñ akam unọ fiin, mbaak mbuọdidem mfo adikpu, mbaak naña uduutịmme udemme ke mbuọdidem afo akan asọọñọ nditọ usọ idem.”
33Ado Saimọn amaabọọrọ anye ate, “Abọọñ, ami mmebeeñe idem adisaña ye afo akpọkọm ke ufọk ñkpakọb, me ke ñkpa.”
34Yisọs ate anye, “Udọkkọ fiin Bita, mbemiso akikọ akpọk mfịn, afo ayaañkañ ukpa ita ate ke indiọọñọke miin.”
35Yisọs awọññọ iso ate mbed, “Idaha a-ñkesịññeke ndufo ndọñ utom, nte ikiikama ekpad akʌk, me ndidia, me ikpaukod, anie naña ñkpọ akinana ndufo?”
Ammọ ebọọrọ, “Ñkpọ ikinanake.”
36Anye ndin amaabo ammọ, “Idahami yak ake anie ekpad akʌk, aben, ake anie ekpad ndidia, aben, akpedo unieeghe eduad nyam afọñidem dat ke dep. 37Ntañ ami inọ ndufo, ikọ ñwed Abasi ekewette ete, ‘Ndin emaebat anye esịn ke atu mme adue ibed,’ ana asu ke idem mmi. Ih, ke akpanikọ, se ekewet ami atọtọọñọ adisu.”
38Mbed amọ ete anye, “Abọọñ, se eduad iba mi.”
Anye ate ammọ, “Ado akem!”
Yisọs abọñ akam ke Abod Ọdif
39Yisọs ye mme mbed amọ emaeka ke Abod Ọdif, naña ido amọ akesido. 40Anye amaakesịm abod ami, ate ibed amọ, “Ibọñ akam mbaak ndufo ididʌk ke idomo.” 41Yisọs ndin asịkke akpọñ mbed ke idaha ubọk iyrọ keed, aketọọñọ edọñ abọñ akam, 42“Ete mmi, akpedo se afo anyịmme, ben kọọb ami sio fep nnọ miin; ado ke ado ke unyịmme mmi, yak ado naña afo anyịmme.” 43Ndin enyere amaato ke anyọñ adida anye ke iso anyʌñ asọọñọ anye idem. 44Ke mbʌññọ esịd, anye amaanekke asịn idem abọñ akam tutu adikpọ awuọọñọ anye ke idem, akappa abit umiana, atọi ke isọñ.
45Anye akekpọñ itie akam ado, atịmme abịne mbed amọ, akekịt ke ammọ esʌk edaiya anọ ekaha ye mfʌhọ. 46Anye amaatọi ammọ, abịp ate, “Nso-o ke edaiya? Idemme, ibọñ akam mbaak ndufo ididʌk idomo.”
Emʌm Yisọs
47Ke anye asʌkkọ atañ mme ikọ ami, atu awo emaediwuọ, keed ke atu ibed amọ Yudas aboiyo iso, asaña abịne Yisọs aketʌm anye inua, 48ado Yisọs abịp anye ate, “Yudas adi aditap Ayịn Awo ke ntʌminua?”
49Ke mbed Yisọs ekịtte se iyem aditịppe, ammọ emaebịp Yisọs ete, “Abọọñ, imikeme adikuum ammọ ke akañkañ?” 50Ndin awo ammọ keed amaasio eduad adiañña ayịnufọk akwa aku utọñ nnasia.
51Ado Yisọs amaabo ate, “Yak atre do!” Ndin anye aben utọñ ado adian, anye aba naña akeba.
52Yisọs ndin awọññọ ase mme ikpọ aku ye mme ikpọawo akpeme tembịd ye mme adaidaha e-ekedieehe adimʌm anye, ate, “Ndufo ewuọọñọ edi ye eduad ye ñkpeti nte eka adimʌm awo ntịme me inọ? 53Idaha a-ami ñkebaaha ye ndufo ke afe tembịd, ibaaha awo ndufo akenyanna ubọk antuuk miin. Ufañ ndufo ado ami, ini a-adudu akịm akara ke.”
Bita akañ Yisọs
54Idahado, ammọ emʌm anye eben edakka, eka ufọk akwa aku. Bita amaakpeeñ ñkpad isañ, akeene anye ke nsan-nsan. 55Ke ammọ emaekebara ikañ ke ufọọd esịd akwere, eyem itie ebono, Bita amaakekeene aketie ye ammọ. 56Ayịnufọk abọikpa keed akekịt naña Bita atie awue ikañ, awuuk anyen ase anye, ate, “Awo ami akesiba ye anye.”
57Ado Bita amaakañ ate, “Bọikpa, ami ndiọọñọke anye.”
58Etək ini akeboiyo, awo mfen amaase Bita, ate, “Afo ñko ado nsaña amọ keed.”
Bita amaana akañ ate, “Ete, ndooho!”
59Ñkpọ nte awa keed akeboiyo, awo mfen adi aditañ uko-uko ye Bita, ate, “Ke akpanikọ, awo ami ado nsaña amọ, sia anye ado ayịn Kadidi.”
60Bita amaabọọrọ ate “Ete, ami ndiọọñọke se afo atuum ado ke inua!” Bita aketañ ntodo, akikọ amaakpọk. 61Abọọñ Yisọs awọññọ iso ase Bita, ndin anye atoiyo ikọ Yisọs akeboogho anye ate, “Mbemiso akikọ akpọk mfịn ami, afo ayaañkañ miin ñke nta.” 62Ndin Bita amaawuọ esiin, aketua ndod-ndod ayịd.
Mbio ukpeme enọ Yisọs ñnyọ
63Ideen e-ekekpemeke Yisọs etọọñọ etọọñ anye ndọk enyʌñ etịm anye. 64Ammọ emaebọp anye ñkịm ke anyen, ete anye, “Tañ ñkukịt! Anie awo umia?” 65Ammọ emaenyʌñ esueeñ anye, etaañ ikọ usọñanyen edian anye.
Yisọs ke iso Baided ye Herọd
66Ayo amaakesieere, mme ikpọawo ke kọnsịn abio, ye mme ikpọ aku ye mme akpeeb ibed emaewuọ ebono itie keed, ndin emaeben Yisọs edi ke iso ammọ. 67Ammọ emaebo Yisọs, “Akpedo afo ado Mesaya, tañ inọ ñnyịn.”
Anye amaabọọrọ ate, “Ami ñkpetatañ, ndufo idiinnịmme miin ke akpanikọ, 68ñko ami ñkpibịp ndufo, idimbọọrọke. 69Ado tọọñọ ke idahami, Ayịn Awo aditie ke ubọk nnasia akwa Abasi.”
70Afịd ammọ emaedọñ uyo ebịp anye, “Nte afo ndin ado Ayịn Abasi?”
Anye ate ammọ, “Ado naña ndufo etañ ado ke ami ndo Ayịn Abasi.”
71Ammọ ndin edọñ uyo keed ete, “Nso-o uto ntiense mfen ke ñnyịn iyem? Ñnyịn imikop ke inua amọ.”
Pašlaik izvēlēts:
Duk 22: NAAM
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.