Yọọn 6
6
Yisọs anọ awo tọsịn ition ndidia
1Etək ini amaakeboiyo, Yisọs amaaboiyo aka akpa Kadidi edem uko, adooho akpa Taiberia, 2ndin ekandịk atu awo emaekeene anye sia ammọ emaekịt mme idiọọñọ ñkpọ a-anye akenamma adikọk mbon udọñọ. 3Ndin Yisọs amaadọọk abod aketie ye mbed amọ. 4Usọrọ Basofa mme Yuu amaakpere.
5Anye akedịppe anyen akịt ekandịk atu awo nte esʌk edi ebịne anye, anye amaabo Fidib, “Mmọ-ọ ke idiidep ndidia inọ ibon ami edia?” 6Anye akebịp ami adidomo anye nse, sia anye amaanenie ke akikere amọ se anye akeyem adinam.
7Fidib amaabọọrọ anye, “Akʌk afiọñ itiokeed ikpikanna idep uyo nọ akem awo keed-e-keed se asʌk ata inua keed.”
8Mbed amọ keed mfen, Andru, ayịneka Saimọn Bita, amaasio uyo abo, 9“Se etəkayịn mi mme ntək uyo akpakpa ition ye iyak iba. Ami adikem awo ifañ?”
10Yisọs amaabo ammọ ate, “Nam mme awo esuuk etie.” Mbid amaaba ke itie ado (ndin ideen e-ekewakka ñkpọ nte tọsịn ition emaeba do.) 11Yisọs ndin aben uyo ition ami anọ ekọọm anyʌñ adeeme anọ mbio e-eketieeghe do. Ammọ eta naña ammọ ekeyem. Amaanyʌñ anam ukem ado ye iyak.
12Afịd ammọ emaekedia iyʌkkọ, anye amaabo mbed amọ, “Ikoono se iyọk isʌghọ. Ikiibaha ñkpọ ndomokeed.” 13Ammọ emaekoono se ikiyọk isʌghọ ito uyo ition a-mme awo eketaaha ayọọhọ akpasa duop mme iba.
14Mme awo emaekekịt mme idiọọñọ ñkpọntịbe a-Yisọs akenamma, ammọ etọọñọ adibo, “Ke akpanikọ awo ami ado Brọfed adidi ke ederimbod ami.” 15Ke adidiọọñọ mbo ke ammọ ekeyem adidinam anye adidem anye amama ye mmiimaaha, anye amaafeghe atịmme aka mme abod akeba do ke idem amọ ikpọọñ.
Yisọs asaña ke mmọọñ
16Akekem ndubi, mbed amọ emaediad eka ibiok, 17a-ammọ ekekedʌkkọ ubom eboiyo ibiok ado ekaiya Kapanọm. Ayo adikịm, Yisọs ikidibịneke ammọ dion. 18Ekamba ayobio akesʌk afịme ndin mmọọñ atọọñọ adubəkko. 19Ammọ emaekewat ubom ke ñkpọ nte itiad ita me inaañ, ammọ emaekịt nte Yisọs asaña ke anyọñ mmọọñ abịne ubom; ndin idem amaanyeñ ammọ ata eti-eti. 20Ado anye abo ammọ, “Ami ke ado, ikiinyek idem.” 21Ndin ammọ enyịmme adiben anye nsịn ke ubom, kpa ke idahado ubom amaasịm mbeghe ammọ ekekaaha.
22Ke edem usen mme atu awo e-eketieeghe ke edem ibiok uko emaedidiọọñọ ebo ke ubom keed akeba do, ndin ke Yisọs ididʌkkọ ubom ye mme mbed amọ, ado ke ammọ emaedakka sʌk ammọ-ammọ. 23Ndin usʌk ubom e-eketooho Taiberia emaekebeghe ekpere itie a-mme awo eketaaha uyo ke Abọọñ amaakenọ ekọọm. 24Ke ini mme awo ediọọñọke ebo ke Yisọs ikibaaha do, mbed amọ ñko ikinyʌññọ iba do, ammọ emaedọñọ ubom edaaña Kapanọm adikiyem Yisọs.
Yisọs uyo uwem
25Ke ini ammọ emaekekịt anye ke edem ibiok uko, ammọ ebịp anye, “Andikpeeb, afo akediwuọ umi idaha ake-e?”
26Yisọs amaabọọrọ ammọ: “Ke ata akpanikọ ami ntañ inọ ndufo, ndufo enyem miin, idooho ke ntak a-ndufo ekịtte mme idiọọñọ, ado sia emaeta uyo enyʌñ ekop uyʌkkọ. 27Ndufo ikiinam utom inọ ndidia adooho ayaabiara, ado inam inọ ndidia a-adiidat ikisịm nsi-nsi uwem, a-Ayịn Awo adinọ ndufo ke idem amọ. Sia Abasi Ete ke idem amọ awuuk idiọọñọ ke imọ imimek anye.”
28Ndin ammọ emaebịp anye, “Nso-o ke ana ñnyịn inam nọ inam utom Abasi ayemme?”
29Yisọs amaabo ammọ, “Utom Abasi ado ami: adinịm anye a-anye adọññọ ke akpanikọ.”
30Ñko ammọ emaebịp anye ebo, “Nso-o utịbe ñkpọ idiọọñọ ndin ke afo uduunọ ñnyịn nọ ñnyịn ikịt inyʌñ unịm fiin ke akpanikọ? Nso-o ke afo uduunam? 31Mme eteete ñnyịn emaeta mana ke akpautatan, naña ekewet ete: ‘Anye amaanọ ammọ uyo a-atooho abio ubọọñ Abasi eta.’ ”
32Yisọs amaabo ammọ ate, “Ke ata akpanikọ ami ntañ inọ ndufo, idooho Moses inọọ ndufo uyo atooho abio ubọọñ Abasi, ado Ete Mmi anọ ata uyo atooho abio ubọọñ Abasi. 33Sia uyo ake Abasi ado uyo a-atooho abio ubọọñ Abasi adi anyʌñ anọ ederimbod uwem.”
34Ammọ emaebo “Ete, sie inọ ñnyịn uyo ami afịd ini.”
35Yisọs amaabọọrọ, “Ami ndo uyo uwem, abiọñ idiidọññọ awo ndomokeed a-adieeghe ambịne miin; awo anyʌññọ annịm miin ke akpanikọ idiikoppo nsaditọñ tutu amama 36Ado nte mmaakidọkkọ ndufo, ndufo emeñkịt miin ado isʌkkọ inịm ke akpanikọ. 37Afịd awo se Ete annọ miin eyaedi embịne, ndin ami ndiibịneke awo ake adodo a-adieeghe ambịne miin. 38Sia ami mmeto abio ubọọñ Abasi ndi adinam uduak a-Abasi akendọññọ, idooho adinam uduak idem mmi. 39Ndin uduak se anye akendọñ miin ado, ke ami ñyaak awo ndomokeed ke atu ammọ a-anye akennọọhọ asop, ado ami nnam ammọ eset ke akpatre usen. 40Sia uduak Ete mmi ado ke awo akeadodo a-akịtte Ayịn amọ anyʌñ anịm anye ke akpanikọ ana anie nsi-nsi uwem, ñko ke ana ami nnam awo ado aset ke akpatre usen.”
41Idahado mme Yuu etọọñọ edukuunọ ebaña anye sia anye amaabo, “Ami ndo uyo a-aketooho abio ubọọñ Abasi adi.” 42Ammọ emaebo, “Idoho Yisọs ayịn Yosef, a-ñnyịn idiọọñọke ete ye eka amọ ado ami? Die ke anye akeme adibọ idahami, ‘Ami ñketo abio ubọọñ Abasi ndi?’ ”
43Yisọs, ke ibọọrọ amaabo ammọ, “Itre ndukuunọ ke atu idem ndufo. 44Awo ndomokeed ikemeke adimbịne miin ibọhọke Ete a-akendọññọ miin akoot anye, ñko ami ñyaanam awo ado aset ke akpatre usen. 45Nte ewette ke ñwed mme Brọfed: ‘Abasi adikpeeb afịd ammọ.’ Afịd awo se ibọ ukpeebñkpọ ito Ete, eyaedi embịne miin. 46Kpaanaanam awo ndomokeed ikịtte Ete ibọhọke anye a-atooho Abasi; anye ikpọọñ akịd Ete. 47Ke ata akpanikọ ami ntañ inọ ndufo, awo a-anịmme ke akpanikọ anie nsi-nsi uwem. 48Ami ndo uyo uwem. 49Mme eteete ndufo emaeta mana ke akpautatan ado ekesʌk ekpakpañña. 50Ado anye ami ado uyo a-atooho ke abio ubọọñ Abasi asọiyọ adi adooho awo ake adodo akeme adita ndin ikpaaha aba. 51Ami ndo uyo uwem aketooho abio ubọọñ Abasi asọiyọ adi. Awo ake adodo a-ataaha uyo ami ayaadu uwem ke nsi-nsi. Uyo ami ado ikpọkidem mmi, a-ami ndiinọ ke ubiọñ uwem ederimbod.”
52Ndin mme Yuu etọọñọ adifaaña mbiak-mbiak ke atu ammọ ete, “Die ke awo ami akeme adinọ ñnyịn ikpọkidem amọ nọ idia?”
53Yisọs abọọrọ ammọ: “Ke ata akpanikọ ami ntañ inọ ndufo, adieke ndufo mmiitaaha ikpọkidem Ayịn Awo inyʌñ inwọñ iyiib amọ, ndufo idiinieeghe uwem ke idem ndufo. 54Awo ake adodo a-ataaha ikpọkidem mmi anyʌñ anwọñ iyiib mmi anie uwem nsi-nsi, ndin ami ñyaanam awo ado aset ke ñkpa ke akpatre usen. 55Sia ikpọkidem mmi ado ata ndidia, iyiib mmi anyʌñ ado ata adinwọñ ñkpọ. 56Awo ake adodo a-ataaha ikpọkidem mmi anyʌñ inwọñ iyiib mmi aba mme ami, ami ñko ñnyʌñ mba mme anye. 57Nte ndu-ndu Ete akendọññọ ndin ami ñnyʌñ mbọ uwem nto Ete, ntodo ñko ke awo ake adodo a-ntaaha miin adidu uwem ke ntak mmi. 58Anye ami ado uyo aketooho abio ubọọñ Abasi adi. Mme eteete ndufo emaeta mana enyʌñ ekpañña, ado awo a-ataaha uyo anye ami adidu uwem ke nsi-nsi.” 59Yisọs aketañ mme ikọ ami ke idaha a-anye akpeebe ñkpọ ke sinakọk ke Kapanọm.
Uwak mbed ekpọñ Yisọs
60Ke emaekekop mme ikọ ami ema, uwak mme mbed se ikikeene anye emaebo, “Ikọ anye ami ado se awo mmiikanna iyọ. Die ke awo ndomokeed adinyịmme utọ ikọ ami?”
61Yisọs amaadiọọñọ ke mme mbed amọ esʌk edukuunọ, anye abịp ammọ, “Nte ikọ ami iyat ndufo esịd? 62Nso-o ke ekpenam adieke ndufo ekpekịtte Ayịn Awo nte adọọk aka itie a-anye akebaaha akpa! 63Sịbidịd anọ uwem, abʌkidem idooho ñkpọ ndomokeed. Mme ikọ a-ntañña inọ ndufo eyọhọ ye Sịbidịd, eyọhọ ye uwem ñko. 64Ado aba mme awo ke atu ndufo e-mmiinịmme.” Sia Yisọs amaakediọọñọ tọọñọ ke aditọọñọ awo ke atu ammọ a-mmiinịmme kpa anye adinyʌñ itap anye. 65Anye amaaka iso atañ, “Ntak ado ke ñkibo ndufo ke awo ndomokeed ikemeke adidi imbịne ibọhọke Ete anọ anye ukeme.”
66Ke ami amaakeboiyo, uwak mme mbed amọ emaedaaña enyọñọ, ikeeneke anye aba.
67Ndin Yisọs abo mme mbed duob ye iba ate, “Ndufo-o? Nte ndufo emeyem adiinyọñ ñko?”
68Saimọn Bita abọọrọ, “Abọọñ, anie ke ñnyịn idiibịne? Afo anie etob uwem nsi-nsi. 69Ñnyịn imidinịm ke akpanikọ inyʌñ ididiọọñọ ke afo ado Adisana Awo a-atooho Abasi.”
70Yisọs abọọrọ ammọ ate, “Nte ñkimekke ndufo duop mme iba? Ado keed ke atu ndufo ado setan.” 71(Anye aketañ abaña Yudas, ayịn Saimọn, Iskariọd, sia akpọsʌk ado anye akedooho keed ke atu mme mbed duob ye iba, a-adiitap anye inọ ke ini iso.)
Pašlaik izvēlēts:
Yọọn 6: NAAM
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.