Yọọn 3
3
Yisọs akpeeb Nikodimọs ñkpọ
1Amaaba awo Farisi keed a-akekereke Nikodimọs, keed ke atu mme akwaesop ukara mme Yuu. 2Anye amaadi adisoobo Yisọs akonayo keed anyʌñ abo anye ate, “Andikpeeb, ñnyịn imidiọọñọ ibo ke afo ado andikpeeb a-atooho Abasi. Sia awo ndomokeed ikpikanna inañña mme utịbe idiọọñọ ñkpọ a-afo anaññake adieke Abasi mmiibaaha mme anye.”
3Ke ibọọrọ Yisọs amaabo anye ate, “Ke ata akpanikọ ami ntañ inọ ndufo, ibọhọke awo amaana amana ufa, anye idiikanna ikịt abio ubọọñ Abasi.”
4Ado Nikodimọs abịp anye ate, “Awo adinam die imaana imana ke ini anye amaakesọñ? Ke aditʌm ntañ, anye ikanna itịmme ikidʌk idịb eka amọ ayọhọ ñkemba ikimaana imana!”
5Yisọs abọọrọ, “Ke ata akpanikọ ami ntañ inọ ndufo, ibọhọke awo amana ato mmọọñ ye Sịbidịd, anye ikemeke idʌk abio ubọọñ Abasi. 6Abʌkidem aman abʌkidem, ado Sịbidịd anyʌñ aman Sịbidịd. 7Ikpinaaha ukpa fiin idem Ami adibo, ‘Ana afo amaana amana ufa.’ 8Afịm afịme aka nte anye ama. Afo amekeme adikop uyom amọ ado ukanna utañ nte anye ato me nte anye aka. Ado ntodo mme afịd awo e-emanake eto Sịbidịd.”
9Nikodimọs abịp anye ate “Ami akeme die aditịppe?”
10Yisọs amaabo anye, “Afo ado andikpeeb ke Isred, ndin afo udiọọñọke mme ñkpọ ami? 11Ke ata akpanikọ ami ntañ inọ ndufo, ñnyịn itañ se ñnyịn idiọọñọ, inyʌñ itie ntiense inọ se ikịt, ado ndufo isʌkkọ inyenyịmme ntiense ñnyịn. 12Mmetañ ñkpọ abʌkidem ami unọ fiin ado afo unịmme ke akpanikọ; die ndin ke afo uduunịm ke akpanikọ adieke ntañña mme ñkpọ abio ubọọñ? 13Kpaanam awo ndomokeed ikaaha abio ubọọñ ibọhọke anye a-aketooho abio ubọọñ Abasi adi, adooho Ayịn Awo. 14Nte naña Moses akebenne udʌkikọd anyan ke akpautatan, ntodo ke ana ebenne Ayịn Awo, 15ma afịd awo e-enịmme anye ke akpanikọ enie nsi-nsi uwem.
16“Sia Abasi akeneenekke ama ederimbod asịn anye akenọ ukweeñe Ayịn keed anye anieeghe mbaak awo ake adodo anịmme anye ke akpanikọ akuutak ado anie nsi-nsi uwem. 17Sia Abasi ikinọọhọ Ayịn amọ adi ederimbod adibiom ederimbod ikpe, ado adinyaaña ederimbod. 18Awo ake adodo anịmme anye ke akpanikọ, awo idiibiommo anye ikpe, ado awo ake adodo a-mmiinịmme anye ke akpanikọ, ekap ebobiom anye ikpe, sia anye inịmme ke anyịñ ukweeñe Ayịn keed a-Abasi anieeghe ke akpanikọ. 19Anye ami ado ubiireikpe: Unwana adi ederimbod, ado mme awo etịmme ema akịm, utu ke unwana, sia se ammọ enañña ekedọññọ ndiọi. 20Awo keed ake adodo a-anamma idiọọkñkpọ asasua unwana ndin idiidʌkkọ itie unwana mbaak ediyaara mme idiọọkñkpọ ammọ. 21Ado awo aduuho uwem akpanikọ adʌk unwana, ma ekịt anwa-anwa ke se ammọ ekenam, ke enam eto Abasi.”
Yọọn Aduọkmmọọñ amaana atie ntiense abaña Yisọs
22Ke ñkpọ ami amaakeboiyo, Yisọs ye mbed amọ emaekaiya esịd idʌñ Yudia, nte anye akeba ye ammọ ke etək ini anyʌñ aduọk mme awo mmọọñ. 23Ndin Yọọn ñko akesʌk aduọk mme awo mmọọñ ke Anọn a-akpereke Sadịm, sia mmọọñ amaanekke aba ke udo ndin mme awo emaesidi do edibọ uduọkmmọọñ. 24Ami aketịppe mbemiso ekesịn Yọọn ke ufọk ñkpakọb. 25Mfaaña amaatọọñọ ke ufọọd usʌk mme mbed Yọọn ye awo Yuu keed kebaña edu adinam idem asana. 26Ndin ammọ edibịne Yọọn enyʌñ ekebo anye ate, “Andikpeeb, awo a-akebaaha ye afo ke edem inyañ Yọdan uko, anye a-afo akenọọhọ ikọ ntiense abaña, asʌk aduọkmmọọñ ndin afịd awo ekịppe ebịne anye.”
27Yọọn amaabọọrọ ammọ, “Awo akeme adibọ sʌk se enọ anye eto abio ubọọñ Abasi kpọd. 28Ndufo ke idem ndufo emekeme ido ntiense ebo ke mmaabo, ‘Ami ndooho Mesaya ado endọọdọñ ebo mbem anye iso ndi.’ 29Anwaan ndọ anie ebendọ. Ufan a-aseeghe ñkpọ abaña ebendọ ami atietie anyʌñ akpañ utọñ anọ anye, esịd anyʌñ ayọhọ ye idaara anye amaakop uyo ebendọ. Inemesịd ado ado ake mmi, ndin idahami esịd mmi ayọhọ mme idaara. 30Ana anye akpon añkan miin; ana nte ami nsịp.
31“Anye a-atooho anyọñ akpon akan afịd awo; anye a-atooho isọñ ami anie isọñ ami, anyʌñatañ ikọ nte awo a-atooho isọñ ami. Anye a-atooho abio ubọọñ ado adikan afịd awo. 32Anye ado ntiense anọ se anye akịd anyʌñ akop, ado awo ndomokeed inịmme ntiense amọ ke akpanikọ. 33Awo a-anịmme ikọ ntiense ami ke akpanikọ anyịmme ate ke Abasi ado akpanikọ. 34Sia awo a-Abasi adọññọ atañ ikọ atooho Abasi, sia Abasi anọ Sịbidịd ado ayọhọ-ayọhọ. 35Ete ama Ayịn ndin ayaak afịd ñkpọ asịn anye ke ubọk. 36Awo ake adodo anịmme Ayịn ke akpanikọ anie nsi-nsi uwem, ado awo keed ake adodo asịne Ayịn idiikịtte uwem, sia iyadesịd Abasi adoro anye ke idem.”
Pašlaik izvēlēts:
Yọọn 3: NAAM
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.