Yọọn 1
1
Ikọ adikappa abʌk
1Ke aditọọñọ ikọ akebaaba, ikọ ami akeba ye Abasi, ndin ikọ ami akedo Abasi. 2Anye amaaba ye Abasi ke editọọñọ. 3Aketo anye afịd ñkpọ adibañña; ibaaha ñkpọ a-mmikitooho anye. 4Ke anye ke uwem akeba, ndin uwem ado akedo unwana afịd awo. 5Unwana ami ayamma ke akịm, ado akịm ikanna ifʌk unwana ami.
6Awo keed amaadi, a-Abasi akedọññọ; anye akekere Yọọn. 7Anye akedi nte ntiense, nọ atie ntiense abaña unwana ami, nọ ato ke anye afịd awo enịm Yisọs Krais ke akpanikọ, 8Idooho Yọọn ke idem amọ akedo unwana ami; ado anye akedi nte ntiense anọ unwana ami.
9Ata akpan unwana a-ayamake anọ afịd awo akesʌk adi ke ederimbod. 10Anye amaaba ke ederimbod, ndin akpesʌk ado ekenamma ederimbod eto anye, ederimbod ikidiọọñọke anye. 11Anye amaadi ubon ammọ, ado ammọ ikidaarake anye. 12Ado afịd mbon e-ekedaarake anye, mbon e-ekenịmme anyịñ amọ ke akpanikọ, anye amaanọ ammọ ayọhọ unen adikappa ndo nditọ Abasi, 13nditọ e-mmiikimanake ito uduod awo, mme udọñ abʌkidem, me uduak ebe, ado amana ato Abasi.
14Ikọ amaakappa ado awo anyʌñ adʌñ mi ke ederimbod ke atu ñnyịn. Ñnyịn inyʌñ ikịt ubọọñ amọ a-anye anieeghe ato Ete nte ukwueeñe Ayịn Abasi Ete a-ayọhọke ye mfọn ye akpanikọ.
15(Yọọn amaatie ntiense ami abaña anye. Anye amaabọñ anwa-anwa ate, “Anye ami ado anye ami ñketañña mbaña, ke ini a-ami ñkebooho, ‘Anye a-akeñkeeneke miin ke edem mmi akpon añkan miin asʌk adi, sia anye amaababa ke ata anyan ini mbemiso ami mmana.’ ”) 16Afịd ñnyịn imibọ mfọn ito akpakʌb inie a-anye akebenne isọk ñnyịn ye edidiọñ ke edidiọñ a-akenwaññake ifʌk ñnyịn. 17Sia Moses akinọ ibed ikpọọñ, ado mfọn mme akpanikọ ato Yisọs Krais. 18Awo ndomokeed akenam ikịtte Abasi, ado Ayịn Abasi ikpọọñ-ikpọọñ, a-anyʌññọ ado Abasi ke idem amọ, a-atieeghe ke ñkañ Abasi, anam eyaara anye.
Yọọn Aduọkmmọọñ abo ke imọ idoho Mesaya
19Ami akedo ntiense Yọọn, ke ini mme Yuu edọññọ mme aku ye mme Difaid eto Yerusedem ekebịp anye ebo, afo ado anie? 20Anye amaatañ anwa-anwa ate, “Ami ndooho Mesaya.”
21Ammọ emaebịp anye ete, “Ndin afo ado anie? Afo ado Edaiya?”
Anye abọọrọ, “Ami ndooho.”
“Afo ado Brọfed?”
Anye abọọrọ, “Iyo-o.”
22Ke akpatre ammọ emaana ebịp anye ete, “Ndin afo ado anie? Idọkkọ ñnyịn sia ana iben ibọọrọ isọk mbon e-ekidọññọ ñnyịn. Afo anie so aditañ mbaña idem mfo?”
23Yọọn amaaben ikọ brọfed Aisaya abọọrọ ate, “Ami ndo uyo awo a-atuaaha ke akpautatan, ‘Ineeñe usʌñ inịm inọ Abọọñ.’ ”
24Ndin mme Farisi e-ekesiooho edọñ 25emaebịp anye ete, “Nsinam afo aduọk mme awo mmọọñ adieke afo mmuudooho Mesaya, udooho Edaiya, unyʌññọ udo Brọfed ado?”
26Yọọn amaabọọrọ ammọ ate, “Ami ñkama mmọọñ nnịm uduọkmmọọñ, ado aba awo ke atu ndufo, a-ndufo miidiọọñọke. 27Anye ado awo a-ñkeeneke miin ke edem, ado ami ndotto aditat udʌk ikpaukod amọ.”
28Mme ñkpọ ami eketịppe ke Betani, idʌñ abaaha ke edem inyañ Yọdan, itie Yọọn akenịmme uduọkmmọọñ.
Yọọn atie ntiense abaña Yisọs
29Usen mfen, Yọọn amaakịt Yisọs nte asaña abịne anye, anye anyʌñ abo ate, “Sese Ayịn Edọñ Abasi a-abenne mme idiọọkñkpọ ederimbod afep! 30Anye ado anye ami ñketañña mbaña ke ini a-ami ñkebooho, ‘Awo a-akeñkeeneke miin ke edem akpon añkan miin asʌk adi, sia anye amaababa ke ata anyan ini mbemiso ami mmana.’ 31Ami ke idem mmi ñkediọọñọke anye, ado ntak a-ñkekamake mmọọñ nnịm uduọkmmọọñ akedo ma eben anye ewọt Isred anwa-anwa.”
32Ñko Yọọn anọ ikọ ntiense añwa-añwa ate: “Ami mmaakịt Adisana Sịbidịd nte asọiyọ ato abio ubọọñ Abasi adidoro anye ke idem nte ibiom. 33Ami ñkpekediọọñọke anye ke idem mmi, ado anye a-akendọññọ ndiduọk mmọọñ amandọkkọ miin, ‘Awo a-afo akịtte nte Adisana Sịbidịd adidoro ke idem ado anye a-adiikama Adisana Sịbidịd inịm uduọkmmọọñ.’ 34Ami mmekịt ñnyʌñ nnam ediọọñọ ke anye ado Ameemek ake Abasi.”
Mme mbed Yọọn ekeene Yisọs
35Edem usen Yọọn amaana akeda ye mbed ammọ iba. 36Yọọn akekịt naña Yisọs adisaña afrọ, anye ate, “Sese, Ayịn Edọñ Abasi.”
37Ke ini mbed iba ami ekoppo se Yọọn aketañ ammọ emaekeene Yisọs. 38Yisọs akanna iso, akịt ammọ nte ikeene anyʌñ abo ate, “Nso-o ke ndufo eyem?”
Ammọ emaebọọrọ ete, “Rabbi” (awuọọñọke “Andikpeeb”), “afo adʌñ mọ-ọ?”
39Anye amaabọọrọ ammọ ate, “Edi ke eyaenyʌñ ekekịt.”
Ndin ammọ eka enyʌñ ekekịt nte anye akedʌñ, enyʌñ eba ye anye usen ado. Akedo ñkpọ nte ñkanika inaañ uweemeayo.
40Keed ke atu iba e-ekekappake edo ibed Yisọs ke emaekekop se Yọọn aketañ akedo Andru, ayịneka Saimọn Bita. 41Akpa ñkpọ Andru akenamma akedo adiyem ayịneka amọ Saimọn nnyʌñ ndọkkọ anye mbo, “Ñnyịn imikịt Mesaya” (awuọọhọ Krais). 42Ndin anye amaaben Saimọn abịne Yisọs.
Yisọs amaase anye anyʌñ abo, “Afo ado Saimọn, ayịn Yọọn. Eduukood fiin Kefas” (awuọọñọke Bita).
Yisọs akood Fidib ye Natanied
43Edem usen, Yisọs amaabiire adika Kadidi. Anye akekịt Fidib, anye amaabo anye ate, “Ñkeene miin.”
44Fidib aketo Bedsaida, idʌñ keed mme Andru ye Bita. 45Fidib amaakịt Natanied anyʌñ abo anye, “Ñnyịn imikịt anye a-Moses ke ñwed Ibed ye mme brọfed, ekewette ebañña, anye ado Yisọs ayịn Yosef, a-atooho Nasared.”
46Natanied amaabịp anye, “Ato Nasared? Nte eti ñkpọ ndomokeed akeme ito udo?”
Fidib amaabọọrọ anye, “Kap di se.”
47Ke ini Yisọs akekịtte Natanied nte adi, anye amaabo, “Ata ayịn Isred ado ami, abiaaña ndomokeed isịneke anye ke idem.”
48Natanied amaabịp anye ate, “Andiọọñọ die miin?”
Yisọs amaabọọrọ, “Mbemiso Fidib akedukood fiin, ami mmaukekịt ke idak eto fik.”
49Natanied amaabọọrọ ate, “Andikpeeb, afo ado Ayịn Abasi, afo ado adidem Isred.”
50Yisọs amaabo anye, “Afo annịm miin ke akpanikọ sia mmaubo ke mmaukịt ke idak eto fik. Afo ayaakekiid mme ñkpọ se ikpokpoon ikan ado.” 51Ndin, Yisọs amaana adian, ate: “Ke ata akpanikọ ke ami udọkkọ, afo ayaakịt nte abio ubọọñ Abasi abeere, akịt mme enyere Abasi nte edọdọọk enyʌñ esọsọiyọ ebịne Ayịn Awo.”
Pašlaik izvēlēts:
Yọọn 1: NAAM
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Ñwed Abasi Ke Ikọ Ibibio Ayo Mfịn™
Mme anie unen ñwed ami tọọñọ ke isua © 2020 ado Biblica, Inc.
Ebọ unyịmme eto Biblica, Inc. Emʌm afịd unen ke afịd ederimbod enọ Biblica.
Ibibio Contemporary Bible™
Copyright © 2020 by Biblica, Inc.
Used with permission. All rights reserved worldwide.