GÉNESIS 8
8
Yacu juizhu tucurishcamanta
1Chai quipami, Diosca Noetapish, tucui animalcunatapish jatun huambuc huasipi cacta yuyarishpa, huairata cacharca. Chai huairami yacutaca ashancaman chaquichirca. 2Allpa ucumanta llucshic yacupish jahua pachamanta shamuc tamyapish pararircami. 3Cai pacha yacuca ashancamanmi chaquirishpa catirca. Patsac pichca chunga punzhacamanca ashtahuanmi chaquirca. 4Ña canchis quilla chunga canchis punzhapica huambuc huasica Ararat urcupimi saquirirca. 5Yacuca chunganiqui quillacamanmi chaquirishpa catirca. Chai quilla callari punzhami ña jatun urcucuna ricurirca.
6Chai quipa, chuscu chunga punzhapica Noeca pai ruhuashca huambuc huasi ventanata pascarcami. 7Shina pascashpami, cuervota cacharca. Chai cuervoca cai allpapi yacu chaquingacamanmi huairapi caiman chaiman puricurcalla. 8Shinallatac cai allpapi yacu chaquishcata alli yachangapacmi shuc palomata cacharirca. 9Cai pachapi yacu tiyacpiracmi, chai palomaca maipi mana tiyarinata pudishpa, huambuc huasiman cutimurca. Shina cutimucpimi, Noeca chai palomata japishpa, yaicuchirca.
10Canchis punzhapica Noeca cutinllatacmi palomata cacharirca. 11Amsayagricucpimi, palomaca picopi shuc uchilla olivos ramata apashca chayamurca. Chaita ricushpami, Noeca yacu chaquishpa caticushcata yachac chayarca. 12Chaimanta canchis punzhata shuyashpami, cutinllatac palomata cacharirca. Chashna cacharicpica, palomaca ña mana cutircachu.
13Noé sucta patsac shuc huatayuc cacpi, callari quilla, punta punzhapimi yacuca chaquirca. Chaimantami Noeca huambuc huasi catata anchuchishpa, ña chaquishca cashcata ricurca. 14Ishcai quilla, ishcai chunga canchis punzha tucucpica, allpaca ña chaquishcami carca.
15Chaimantami Diosca Noetaca: 16«Cambac huarmindi, churicunandi nueracunandi huambuc huasimanta llucshi. 17Canhuan cac tucuilaya animalcunatapish llucchi. Volac animalcunatapish, sacha animalcunatapish, pambata aisarishpa puric animalcunatapish, tucui cai pachata rishpa, mirarishpa achca tucuchun llucchi» nirca.
18Shina nicpimi, Noeca paipac huarmindi, churicunandi, nueracunandi huambuc huasimanta llucshirca. 19Tucui animalcunapish llucshircami. Chaica volac animalcunapish, pambata aisarishpa puric animalcunapish, chaipurami huambuc huasimanta llucshirca.
20Chai quipami Noeca Mandac Diosman altarta ruhuarca. Chaipimi Mandac Diosman cuna animalcunamantapish, volac animalcunamantapish shucta Mandac Diosman cushpa rupachirca. 21Shina rupachicpi, Mandac Diosman mishquilla ashnashpa chayacpimi paica: «Runapac juchamantaca cai pachataca jaicapi mana llaquichishachu. Runaca huambramanta pacha millaita yuyacunllami. Shinallatac mana cunan tucuchishca shina, tucui causaita charic animalcunataca tucuchishachu.
22Cai pacha tucuringacamanca
tarpushcapish, tamyapish,
usyaipish, chiripish,
cunucpish, tutapish,
punzhapish manatac tucuringachu» nirca.
Pašlaik izvēlēts:
GÉNESIS 8: QCA10
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.