मर्कूस 3
3
येसुए उकुइ थँवलाई ओसगराँव
(मत्ती १२:९-१४; लूका ६:६-११)
1फरी तछा येसु धर्मसास्त्र झ़िमल बाके। नल उकुइ थँव मिँ तोबो उलिज़्याव। 2नल लिज़्यावराए येसुए ओपाहा झाःद्यान्याए जूँनी ऩासिन्या छ्याम नो उकुइ थँवलाई मासगराँज़्याव ब्याँ लिद चिऊद यानैज़्याव। 3नाःत ज़ येसुए नो उकुइ थँवलाई, “आक हुद च्याँःसिन्के,” है दाद, 4नोरालाई, “ऩासिन्या छ्यामकाव य़ेन चाव जैन्या सैं माचाव जैन्या? मिँलाई बाँचैन्या सैं बले·न्या? कानुनए कै उलिज़्याव?” है ओरादोक ते, सुए ज़ घाइ मालिकेर। 5येसुए, काता नाः यायुँ खावर यालिज़्याव लिद उयुँ माचाव दाद उरिसए प़ाइँलाई तछ्योनी चिऊद नो उकुइ थँवलाई, “नकुइ तङ्गैके,” है ओदोक ते, उकुइ ओतङ्गैव प़ाइँना सोजोकाव ज़ ताके। 6नो फरिसीराए निताव रँःद लाँःदा पुलुस्द, ‘आवलाई कै जैद सैःन्या ओताव?’ लिद बेहार ज़ हेरोद राजासकावरास गुमुस्ता दोनाकेर।
येसुए ल्योक हुज़्याव माहोल्यार
7येसु उसिसरास ननी हाइसिद गालील दह जीदा बाकेर। नल कुधु मिँर गालील स़ोनो यहूदिया खन्दनी उछींत याहुज़्याव। 8येसुए ओय़ेनर थैद ख्वार यरूसलेम सहरनी, ख्वार इदुमिआ खन्दनी, ख्वार यर्दन भै होफतिन, ख्वार तुरोस स़ोनो सीदोन जीनी ब याहुज़्याव। 9है जैद मिँर बनै काला मुलु ताद ओललाई बनै छिला छिला याजैवए उसिसरालाई दोङ्गा तोबो रैव यापरींक्यो। 10मिँर बनै कुधु ओरासगराँवए याजोरो हुज़्याव भरिए येसुलाई छाप्न्याए जूँनी बनै याछुइसिहुज़्याव। 11जोक ब माचाव पुरूसराए येसुलाई यारँःव प़ाइँना होक ज़ ओङ़ाक फुलुप्सिद, “नँ परमेस्वरए ओज़ा ज़,” है लिद याक़िज़्याव। 12खाली येसुए नोरालाई, “ङा परमेस्वरए ओज़ा ज़ लिन्या सुलाई ज़ है तारादोच्यो,” है ओरादोज़्याव।
येसुए बाह्र जना ओसाचीर
(मत्ती १०:१-४; लूका ६:१२-१६)
13नकिन येसु तोबो दाँदात पुलुस्द उयुँलाव मिताव मिँ भरिलाई ओराखुल्क नोर ओल्योक हुकेर। 14नो भरिरानी बाह्र जना ओलस लिन्या ओसाचीर जैद नोरालाई चाव था सथैन्या, 15स़ोनो माचाव पुरूसर पले·न्या हक ब याएक्यो। 16नो बाह्र जनाराए यामिनर आवर ज़ — सिमोन (छींनी होए उमिन पत्रुस जैदिक्यो), 17जब्दियाए ओज़ानी याकूब स़ोनो यूहन्नानी (छींनी नोनी निपाँःच्या ‘बोअनर्गेस’ नैद निएक्यो। नोए ओअर्थ ‘गर्जिज़्यावनी’।) 18नकिन अन्द्रियास, फिलिप, बारथोलोमाइ, मत्ती, थोमा, अल्फयसए ओज़ा याकूब, थेदियस, देसभक्ता सिमोन, 19स़ोनो छींनी येसुलाई धोका याज़्याव यहूदा इस्करियोत।
येसुलाई सैताननिकाव याजैव
(मत्ती १२:२२-३२; लूका ११:१४-२३; १२:१०)
20येसु फरी उझ़िमक उहुक मिँर बनै काला मुलु याहुज़्यावए उसिसरास ज़्यावर ब ज़्युव मादैकेर। 21ख्वाराए येसुलाई ‘दासानी बिसा ताज़्या’ है ब यादोज़्याव। ओक्याँदाङावराए फरी निताव पाँर थैद येसुलाई च़िहुकेर। 22यरूसलेमनी हुव सास्त्रीराए मनी, “आवए ओक्याँत ते माचाव पुरूसराए याघेप्पा बालजिबुल च़रिद ले। होए उमिननी ज़ माचाव पुरूसरालाई ओरापले·ज़्याव ची,” है लिकेर।
23येसुए नोरालाई ओल्योदा खुल्द अइ लिद घर्ती झाःद याएक्यो, “सैतानए ओल सैतानलाई कै जैद ओपले·ज़्याव? 24तोबो राज्यालाव मिँर या या यामाखैकिन नो राज्या माथ॰रिए। 25हो मिताव ज़ तोबो झ़िमलावर या या यामाखैकिन चितराँ पुतराँ तान्या लेर। 26है जैद सैतानए ओराज्यालावर ब या या माखैद तँदा तँदा याजैसिकिन नोर मनी माथ॰रिद यामिन ज़ म़ान्या ले। 27फरी तोबो ओर्सा ल्यो मिँलाई ङ़ादा यामाकिवा पै उझ़िम पा·द ओजा-यार हाइद मालाँधुर।
28“ङा जेलाई साचो है ङादाचिज़्या, मिँराए जो पाप यादोदी ब, परमेस्वरए उमिन याबले·दी ब नोराए यापाप क्यालो दैसिए। 29खाली जोए परमेस्वरए छैंव उपुरूसए उमिन बले·दिज़्याव, होए ओपाप क्यालो मादैसिए। नितावए ओपाप खर्क ज़ माखेमे,” है लिद यासथैक्यो। 30नो सास्त्रीराए ‘येसुए ओक्याँत माचाव पुरूस च़रिद ले’ है यादोज़्यावए येसुए आव पाँ ओरासथैव।
येसुए ओआमार ओभाइर
(मत्ती १२:४६-५०; लूका ८:१९-२१)
31हाःत ज़ येसुए ओआमा स़ोनो ओभाइर हुद लाँःक च्याँःसिद येसुलाई क़िउ यारापरींकेर। 32झ़िमल येसुए ओलापक मिँर माहोल्या च़ुसिद यालिज़्याव। है जैद नो क़िउ यारापरींवराए, “लाँःक नआमा स़ोनो नभाइर नँस दैसिना हुद लेर,” है यादोक ते, 33येसुए, “ङाआमार ङाभाइर कितावर?” है लिद, 34ओलापक च़ुसिद लिज़्यावराए ल्योदा भाल्सिद, “चिऊचिके, ङाआमार ङाभाइर आवर ज़। 35जोराए परमेस्वरए ओपाँ थैद दोज़्यार, होर ज़ ङाआमार ङाभाइ बैंनीर,” है लिके।
Pašlaik izvēlēts:
मर्कूस 3: NKham
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2015, Wycliffe Bible Translators, Inc. All rights reserved.