मर्कूस 16
16
येसु सिउनी सैंसिद ओसोव
(मत्ती २८:१-८; लूका २४:१-१२; यूहन्ना २०:१-१०)
1ऩासिन्या छ्याम ओखेमोत मरियम मग्दलिनी, याकूबए ओआमा मरियम, नोनी निनैं सलोमीरास येसुए ओमोरोलाई थीद्यान्याए जूँनी चाव सी ङरो म़ासर अतरर लँःद, 2सातालाव उस॰कताव छ्याम घग ज़ घाम पले·क नोर खादर पोदा याबाज़्याक, 3नोराए, “गेलाई नो कसिउ लुँ सुए पल्तैद्यासिउके?” है लिद, 4खादरदा याभाल्सिक ते नो बनै घ्योःव लुँ पल्तैसिउ उलिज़्याव रँःकेर। 5नोर फरी खादर पुपल पसिद नल उजींल तोबो पालो क्वा क्वाइसिउ धापाज़ाकाव मिँ खादरए ओवोर त॰दा च़ुसिद उलिज़्याव रँःद बनै ज़ अचम्ब ताद यालिज़्याक ते, 6नोए, “अचम्ब ताताच्यो, नो जेखिम्ज़्याव क्रुसत यासैःव नासरतलाव येसु आल माले, सैंसिद सोधुके। अछादी आव यानैव पो चिऊचिकेदा, 7जे पत्रुस स़ोनो उपुर्काव उसिसराए ल्योदा बाद, ‘येसु जेङ़ादा ज़ गालीलदा बाज़्या दी। ओल है उलिज़्याव मिताव, होङ ज़ ओलस दैसिन्या जेले,’ है यारादोनाचिके,” है ओरादोव प़ाइँना, 8नोर ननी धोंःद याछ्याचेए बनै भुम भुम गूद सुलाई ज़ नो पाँ है मारादोधुकेर।
येसु ओसरैंःसिउ
(मत्ती २८:९-२०; लूका २४:१३-४९; यूहन्ना २०:११-२३; ओसाचीर १:६-८)
9[सातालाव उस॰कताव छ्याम छकाल्न्या घग ज़ येसु सिउनी सैंसिद ओसोवत प़ाइँरानी ङ़ादा मरियम मग्दलिनीए ओल्योक सरैंःसिके। नो मेंमाए ओक्याँतिन येसुए ङ़ादा सात गोता माचाव पुरूसर पले·द ओरानैज़्याव। 10है जैद नोए उसिसराए ल्योक बाद उरँःव भरी है यादोक्यो। नो बेलाक नोर यायुँ बनै माचाव दाद घरो ज़ यालिज़्याव। 11खाली नोराए, ‘येसु सैंसिके, ङा ज़ रँःद ङानै,’ है ओल्यो पाँ याथैज़्यावत ब मापतिकेर।
12फरी छींनी येसुए उसिसनी नाखारदा निबाज़्याक येमत येसु छुत सुरूप जैसिद निङ़ाक सरैंःसिके। 13नोनी ओल्द बाद उपुर्कावरालाई है निरादोक ते, नोनी निपाँ ब मापतिकेर।
14नकिन छींनी एघार जना उसिसर काँ याज़्युज़्याक येसु नोराए याङ़ाक ब सरैंःसिके। नोराए खाव यायुँए जूँनी येसु सिउनी ओसैंसिउत ओललाई रँःज़्यावराए यापाँत यायुँ ओमाहुबोए येसुए नोरालाई यासिङार्क्यो। 15स़ोनो, “जे आव संसार भरिल प़ाइँदा ज़ बाद चाव था प़ाइँलाई ज़ यारासथैनाच्यो। 16जोए उयुँ हुप्द परमेस्वरए उमिनत सछैंसिज़्या, हो बाँचिन्या ले। फरी जोए उयुँ माहुबे, होए परमेस्वरए ओसजा दैन्या ले। 17यायुँ हुप्ज़्यावराए याक्याँत इताव सरेसर ब तान्या लेर — ङा ङामिननी माचाव पुरूसर ब पले·न्या लेर, साःरो साःरो खामनी ब पाँन्या लेर, 18घुलरालाई याराक्योःदी ब, तुन्यार याज़्युदी ब कैज़ तान्या मालेर। याजोरो हुवराए याक्याँत याकुइ नैद याराएक नोर गराँन्या लेर।”
येसु स्वर्गत ओबाव
(लूका २४:५०-५३; ओसाचीर १:९-११)
19है जैद प्रभु येसुए ओपाँ भरी है ओरादोवत याङ़ाकिन ज़ स्वर्गदा छींसिद परमेस्वरए ओवोर्दा च़ुसिनाके। 20उसिसर ते ननी बाद परमेस्वरए ओपाँर प़ाइँदा ज़ यारासथैनाकेर। प्रभु यास यास ज़ लिद नो यारासथैज़्याव पाँत अचम्बलाव सरेसर जैद्याद नो यापाँ थैज़्याव भरिरालाई साचो ज़ थ·रैद याएक्यो। आमेन।]
Pašlaik izvēlēts:
मर्कूस 16: NKham
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2015, Wycliffe Bible Translators, Inc. All rights reserved.