BEGGAR 9
9
1Hoo Pwnbov Noannvn la mwwg ko tuup tulungam lvqcnum hoo bulam benum, “Mipar-gooiyiq gvdwl hoo dumtwq-miilyw gvdwl swcw so bwwr mvto. 2Swcw ao soqg svdin tulungv hoo doa aog pvta tulungv, ked ao soqg gwn-xarnbo mwlwngv hoo sa-svlo urag ngui mwlwngv nam bos soma vrram sotayin. Bulam noqg alaqho gvqlwq pakun. 3Biil-tabl swwnbo mwlwngv nulug dvs gob nyitayin. Hoo jeenbo nwmw-nwsin svvnam nulam jinam hvb, ngo hog mwlwngam nulam jigyin. 4Hvbmabde nulv vdin aiyaq lvgab hijum mam dvmabv, hoggab hijumho swwgv doodwn. 5Hoo nulug swwg hijum gab ngo xootwr naatayin: svdin vcw-at hoqgv hoo nyi hoqgv xootwr naatayin. Mwwg nyia ko ajin hoqgv ngo nyia ko swwgwg xootwram naatayin.
6“Hiyv lajaqkam nyi mengb nyiloqkam,
nyiv mwam mvtayin,
hoggab Pwnbov nyia koam mwam atam guss dvb pwnum.
7Hoo nulv mipar-gooiyiql hoo dumtwq-miilyw nvka, swcw nvg aoso naleqgo dumtwq-miilywl swwn ka.”
8Ho Pwnbov Noa nvla mwwg ko tuup tulug lvgab benum, 9“Kaato, ngoqg pvvb birnam mam ngo nulug lvgab mvp gviyin hoo noqg kokwb noqg hosiq gab mvp gviyin, 10hoo noqg lvgab dooba bo luuxy cwr swwl doonbo tulug lvgab, pvtangam, tuun-meengam, hoo swcw so noqg lvgab doonbo luuxy cwr gunggo-nyiiyongam, hulu ura hoqgv hog hwdgo lengk bo tulungam; hoggab soq si swcw soqg doonbo luuxy cwrwg gunggo-nyiiyo gab. 11Ngo noqg lvgab pvvb birnam mam mvp gviyin, ho lokta diidwr iss lvgab sa-hindu hengl nywywngam swwl doonbo tulungam twrkram, hoo lokta nywywngam sa-hindu hengl swcwngam twrkram.” 12Hoo Pwnbov benum, “Ngoq gvla noqg pengko ho hoo noqg lvgab dooba bo swwl doonbo svdin mwlw gab, ho kokwg hotam tulu gab, pvvb birwl apnam sam mwwpa mvdwb ngo soq muxnam ak sam mvgyin: 13Ngoqg illiam ngo haapam ho mvp pakun, hoo hoqhv ngo la swcw nvg pengko ho pvvb birwl apnam mam kaacil mwwpa mvdwb nyitayin. 14Hwdlo swcw aoso haapam mam ngo juumyin hoo haapam ho illiam kaapa tayin, 15ngo la nulv hoo swwl doonbo svdin mwlwg pengko ho ngoqg pvvb birwl apnam mam ngo mwwpa tayin. Hoo issiv nywywngam lokta sa-hindu henglayil swwl doonbo tulungam twrkram. 16Hwdlo illiv haapam aoho dooikam, ngo ham kaapayin hoo Pwnbo gvla swcw nvg aoso swwl doonbo svdin tulug pengko ho kuiyum xaqb pvvb birwl apnam mam mwwpa tayin.” 17Pwnbov Noannvn benum, “Soq si ngoqg la swcw nvg aoso swwl doonbo svdin tulug pengko ho pvvb birwl apnam mam kaacin dvb muxnamv.”
Noag Hotam tulu
18Hulu hoqgv lvvgwb lengkbo Noag ko tuup tulungv Sem, Ham, hoo Japet. (Ham Kanaanwg abwb nyiknum) 19Soq tuup oum si Noag ko tuupv, hoo soq tulu soqgv swcw soqg nyi mwlwngv peemwl lengnum.
20Noa rongo mvnbo nyi gob nyiknum, hoo mwv roo ann ak liinum. 21Mwv roo alangam twwnum hoo twwxum tvl mwwg tombu uraho vj koomab gel karnum. 22Hoo Ham, Kanaanwg abv mwwg abwg vj koomab talonam mam kaanum hoo mwwg vbw-boram vnyiam lvvgwb lengl betamnum. 23Ho Sem la Japet vj naalayil, vnyig gorbw ho tambaq tvl langk taqc yaab doqkur tvl wnv vj koomab talo tvl doonbo bulug abam tomlupnum. Bulug nyuqm mam langk yaab nywpaq tvl, hoo bulv bulug abwg vj koomab talonam mam kaamanum. 24Hwdlo Noa mwwg roo ala twwxumnam hoqgv huurab yukho hoggv mwwg ko tuup anyangv mwam nyiknum ham cengnum, 25mwv benum,
“Beenamv Kanaan aoho doon ka;
mwwg vbw-bor tulu gab nyera raasur akgob swwn ka.”
26Mwv hvlakam benum,
“Semwg Pwnbo At Swn paqyalinco;
hoo Kanaan mwwg nyera gob nyin ka.
27Pwnbov Japetnvn koi yaiya mvg nvka,
hoo mwam Semwg tombu uraho doom to,
hoo Kanaan mwwg nyera gob nyin ka.”
28Sa-hindu hengxo kokw so Noa vnyw 350 gob swwl doonum. 29Noag swwnam mam odum-apa yin vnyw 950 gob swwpe kul, hoo mwv siknum.
Pašlaik izvēlēts:
BEGGAR 9: NYISBSI
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.