Mateo 3
3
Yohane Baptisilɔ ɔ fiɛmi
(Marko 1.1-8; Luka 3.1-18; Yohane 1.19-28)
1Jamɛ a be ɔmɛ a mi ɔ, Yohane, Baptisilɔ ɔ, ba ba fiɛ ngɛ Yudea nga a nɔ, 2nɛ e de ke: “Nyɛɛ kpale kɛ je nyɛ blɔ yaya amɛ a nɔ, se hiɔwe matsɛ yemi ɔ su si ta.” 3Ejakaa nɔ nɛ ɔ ji nɔ he nɛ gbalɔ Yesaia de ngɛ ke:
“Nɔ ko ngɛ ngmlaa kpae boboobo ngɛ nga a nɔ ke:
‘Nyɛ dla Nyɔmtsɛ ɔ blɔ ɔ.
Nyɛ ha e blɔ ɔ nɛ da tlɔmɔɔ!’ ”
4Se Yohane ɔ afukpɔngɔ he bwɔmi a kɛ lo e tade ɔ, nɛ lohwe he womi kpa fi e mlɛ mi, nɛ e ni yeni ji baalɛ kɛ nga nɔ hwo. 5Kɛkɛ nɛ nihi je Yerusalem kɛ Yudea kɛ Yordan ni ɔmɛ a mi tsuo ba e ngɔ, 6nɛ e baptisi mɛ ngɛ Yordan mi benɛ a ngɛ a he yayami ɔmɛ jajee ɔ.
7Se benɛ Yohane na Farisifo ɔmɛ kɛ Sakukifo ɔmɛ a ti nihi fuu nɛ ma e baptisimi ɔ he ɔ, e de mɛ ke: “Sinɔhi a nina, mɛnɔ tsɔɔ nyɛ ke nyɛɛ tu muklii mi la nɛ ma a nya fo? 8Ke nyɛ tsake nyɛ tsui ɔ lɛɛ nyɛɛ wo yiblii nɛ sa tsui tsakemi mɔ! 9Nɛ nyɛ ko susu ngɛ nyɛ mi nɛ nyɛ de ke: ‘Wɔ ɔ lɛɛ wa tsɛ ji Abraham;’ se i ngɛ nyɛ dee ke: Mawu ma nyɛ kaa a tleɔ bihi a si kɛ jee tɛ nɛ ɔmɛ a mi ngɔ haa Abraham. 10Se amlɔ nɛ ɔ ɔ, gbiɛ ɔ fɔ́ɔ si ngɛ tso poku ɔmɛ a nɔ momo, konɛ tso tsuaa tso nɛ wui yiblii kpakpahi ɔ, a po lɛ ngɔ fɔ si, nɛ a sake ngɔ fɔ la mi. 11Imi lɛɛ nyu i kɛ ngɛ nyɛ baptisie ha tsui tsakemi, se nɔ nɛ ma ngɛ ye se ɔ he wa pe mi, e tokotahi tete i sɛ́ nɔ nɛ hɛo; lɛ e kɛ Mumi Klɔuklɔu kɛ la maa baptisi nyɛ. 12Nɔ nɛ hɛɛ e nɔ mi sami tsimi ngɛ e dɛ, nɛ e maa bɛɛ e zugba a nɔ fitsofitso nɛ e ma bua ngma a nya ngɔ to e gba mi; se tsakati ɔ, e kɛ la nɛ gbo we maa sa.”
Yesu baptisimi
(Marko 1.9-11; Luka 3.21-22)
13Kɛkɛ nɛ Yesu je Galilea kɛ ba Yohane ngɔ ngɛ Yordan nya konɛ Yohane nɛ baptisi lɛ. 14Se Yohane ka lɛ blɔ tsimi ke: “Imi mohu nɛ e hia kaa mo o baptisii mi ɔ, nɛ mo o ma ye ngɔ nɛ ɔ?” 15Se Yesu he nɔ nɛ e de lɛ ke: “Moo kplɛɛ kɛkɛ, se kikɛmɛ a blɔ nɔ a maa gu kɛ pee Mawu suɔmi nya ni.” Kɛkɛ nɛ Yohane kplɛɛ ha lɛ.
16Nɛ benɛ e baptisi Yesu ɔ, e je kpo amlɔ kɛ je nyu ɔ mi nɛ oʼɛ, a bli hiɔwe nya ha lɛ, nɛ e na Mawu Mumi ɔ nɛ ngɛ si kplee kaa okpo kɛ ma e nɔ. 17Nɛ oʼɛ, gbi ko je hiɔwe ke: “Nɔ nɛ ɔ ji ye suɔmi bi nɛ i ngɛ e he tsui ɔ nɛ.”
Pašlaik izvēlēts:
Mateo 3: DAN77
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Dangme New Testament © United Bible Societies, 1977.