Luk 21
21
Pɔgekoɔre Kaŋ Kyɔɔtaa Teroo Yɛlɛ
(Mak 12:41-44)
1A Yeezu da zɛge la O zu a nyɛ bondaanema naŋ eŋnɛ ba kyɔɔtaare a kyɔɔtaare daga poɔ. 2O da nyɛ la kopɔg-nembaala kaŋ meŋ ka o taa neeneene ayi wa eŋ a kyɔɔtaa daga poɔ. 3Ka a Yeezu yeli, “Yelmeŋɛ zaa ka N yele korɔ yɛ, a kopɔg-nembaala ŋa tere gaŋ la a noba zaa, 4bonso, a bama zaa, a ba bon-yaga ba naŋ taa poɔ la ka ba iri mine tere, kyɛ a kopɔge ŋa ne o nandaanoŋ zaa tere la bonna zaa o naŋ taa.”
Yeezu Naŋ Yeli A Ŋmendie Sããmo Yɛlɛ
(Mat 24:1-2; Mak 13:1-2)
5A noba mine naŋ da yele a Naaŋmen die yɛlɛ, a manna lɛ ba naŋ mɛ a o daŋkyime ne kuveɛle, ane a kyɔɔtaare ba naŋ maŋ korɔ Naaŋmen la ka Yeezu da yeli: 6“A boma ama zaa yɛ naŋ nyɛrɛ, bebiri kaŋ waana la ka a kuuri kanzaa koŋ la dɔgle o tɔ zu. A zaa pabo ka ba na daalɔɔ.”
Yelwulii Ane Dɔgroŋ Yɛlɛ
(Mat 24:3-14; Mak 13:3-13)
7Ba da soore la a Yeezu, “Wulwullo, boŋ saŋ la ka a yɛlɛ ama na e? Boŋ la na wuli ka a yɛlɛ ama eebo saŋ tara la?” 8Ka O yeli, “Yɛ gu yɛmenne velaa ka ba ta wa bɛlle yɛ. Bonso, noba yaga na wa la N yuori eŋɛ, a wa yeli, ‘Maa la o!’ kyɛ la yeli, ‘A saŋ peɛlɛɛ la!’ Yɛ ta wa tuuro ba.”
9“Ka yɛnee wa woŋ zɔɔre ane zie naŋ dɔɔnɔ yɛlɛ, yɛ ta zoro dabeɛ̃. Bonso, a ama zaa seŋ ka a daŋ e, kyɛ a teŋɛ baaroo koŋ ta a daadaalɛ.” 10Lɛ la ka O da yeli ko ba, “Paaloŋ na iri zɔɔrɔ ne la o tɔ paaloŋ, ka naaloŋ ŋa noba iri zɔɔrɔ ne naaloŋ kaŋ noba. 11A teŋɛ na gbigre la yaga, kyɛ ka kɔŋkpoŋ ane baaloŋ faa le a tendaa ziiri yaga. Pɔlteɛ yɛlɛ na e la kyɛ ka yelwulii sãã a sazu poɔ.”
12“A yɛlɛ ama zaa koŋ e sɛre, kyɛ ka ba nyɔgre yɛ, a dɔgre yɛ yaga. Ba na de yɛ la eŋ a puoruuderi ane a nempɔgderi poore. Ba na taa yɛ la wa ne a namine ane a gɔbena mine zie a N yuori zuiŋ. 13A ŋaa na ko yɛ la vuo ka yɛ toɔ̃ di N danseɛ. 14Azuiŋ, yɛ ta nare a yɛ teɛroŋ poɔ bonna yɛ naŋ na yeli faa yɛmenne; 15bonso, maa la na ko yɛ a yelbie ane a yɛŋ ka a yɛ dɔndɔnne kanzaa koŋ baŋ yeli lɔɔ yɛ. 16Haali gba, yɛ dɔgrebɔ ane yɛ yɔɔmine, yɛ noba ane yɛ bamine na nyɔge yɛ la eŋ dɔndɔnne nuuriŋ, kyɛ ko yɛ mine. 17A noba zaa na kyiire yɛ la a N yuori zuiŋ. 18Kyɛ yɛ zukɔɔloŋ kanzaa koŋ wɛ. 19A yɛ kannyiri diibu zuiŋ, yɛ na nyɛ la nyɔvore.”
Yeezu Naŋ Yeli A Gyɛruzɛlɛm Sããmo Yɛlɛ
(Mat 24:15-21; Mak 13:14-19)
20“Ka yɛnee wa nyɛ noba ka ba yi tammo a lɔɔ gyili a Gyɛruzɛlɛm, yɛ baŋ ka o leebu saŋ taɛ la. 21A saŋ na poɔ, a ferɛɛ la ka banaŋ naŋ be Gyudiya paaloŋ zo kpɛ a tanne poore, ka banaŋ naŋ be a teŋkpoŋ poɔ zo yi o poɔ, kyɛ banaŋ naŋ be wɛre poore ta wa leɛrɛ kulo. 22Bonso, a bebie ama na waa la woore bebie, ka a yɛlɛ na zaa ba naŋ da sɛge eŋ a ŋmen gane poɔ na tu a tuubu. 23Pɔgpoore ane banaŋ naŋ taa bilɛɛre ka ba ɛnnɛ a bebie na poɔ yuori la we! Bonso, dɔgɛɛ kpoŋ na wa la a teŋɛzu, kyɛ ka Naaŋmen suuri iri ne a noba ŋa. 24Ba na ko ba la ne zɔɔzɔɔ-soɔ, kyɛ nyɔge ba gaa ne tatenne ka ba te leɛ gbaŋgbaare. Ka Nemboore-yobo#21:24 Nemboore-yobo: Noba na zaa naŋ da ba waa Gyuumine la a Nemboore-yobo. di kpeɛ̃õ a Gyɛruzɛlɛm noba zu a te ta saŋ na a Nemboore-yobo naaloŋ naŋ na baare.”
A Nensaala Bie Waabo Yɛlɛ
(Mat 24:29-31; Mak 13:24-27)
25“Yelwulii na be la a ŋmenaa, a kyuu ane a ŋmarbie poore, kyɛ ka dɔgɛɛ page a nemboorɔ zaa, ka buriburi kpɛ ba, a mane ane a kɔmmie naŋ hoorɔ erɛ gɔmɔ zuiŋ. 26Noba na yĩĩe la ne dabeɛ̃, kyɛ pɔnne poore ne yɛlɛ naŋ waana ka a e a teŋɛzu, bonso, ba na zɛŋ la a sazu boŋkpeɛne zaa. 27Ba pãã na nyɛ la ‘a Nensaala Bie ka O yi a sagama poɔ waana’ ne kpeɛ̃õ ane puubu. 28Ka a yɛlɛ ama wa piili erɛ, yɛ iri are, a zɛge yɛ zuri, bonso, a yɛ faabo saŋ tara la.”
A Kaŋkanteɛ Yelwulaa
(Mat 24:32-35; Mak 13:28-31)
29A Yeezu pãã da lɔɔ la sekpɔgre ko ba, “Yɛ leɛ kaa a kaŋkanteɛ ane a teere zaa nyɛ; 30ka anaŋ wa te bɔrɔ vapaala, yɛ maŋ baŋ ka sẽɛ kpeɛrɛ la. 31A lɛ meŋ la, ka yɛnee wa nyɛ a yɛlɛ ama ka a erɛ, yɛ baŋ ka a Naaŋmen naaloŋ peɛlɛɛ la. 32Serɛzaa ka N yele korɔ yɛ, a zenɛ noba ŋa koŋ kpi baare sɛre kyɛ ka a yɛlɛ ama zaa e. 33A sazu ne teŋɛ na wa tɔle gaa la, kyɛ a N yelbie koŋ baŋ tɔle gaa togitogi.”
Meŋɛ Guubu Yɛlɛ
34“Yɛ gu yɛmenne velaa, a ta wa vɛŋ ka yɛ teɛroŋ zaa kyaare ne tige diibu ane dããnyukuoli, kyɛ bee a vɛŋ ka a teŋɛzu nyɔvore yɛlɛ dɔɔnɔ yɛ, ka a bebiri ta wa uri yɛ aŋa bɛraa. 35Bonso, a yɛlɛ ama na page la a noba zaa naŋ be a tendaa zaa zu. 36Yɛ gu yɛmenne wagre zaa, a puoro ka ka yɛ na taa faŋ a muri yi a yɛlɛ ama zaa naŋ na wa e poɔ, a kyɛ are a Nensaala Bie niŋesogɔ.”
37A Yeezu da maŋ kanna la a noba a Naaŋmen die poɔ bebiri zaa, kyɛ ka tensogɔ saŋ ka O yi gaa a zie na ba naŋ boɔlɔ Oliva Taŋ a te bebe a tensogɔ zaa. 38A noba zaa da maŋ daŋ iri la baguo saŋ a gaa a Naaŋmen die ka ba te woŋ a O kannoo.
Pašlaik izvēlēts:
Luk 21: DNTTP
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
First New Testament in Dagaare Language © The Bible Society of Ghana, 2013.