Gyn 15
15
Yeezu La A Dããteɛ Meŋɛ
1“Maa la a dããteɛ meŋɛ, kyɛ ka N Saa e a dããteɛ te-sɛllɛ. 2O maŋ kyɛ la ulee na zaa naŋ be N eŋɛ kyɛ ba wɔnɔ wɔmɔ bare. Ulee na zaa naŋ wɔnɔ wɔmɔ, O maŋ gbɛnne o la ka o na wɔŋ yaga. 3A N yelbiri N naŋ da yeli ko yɛ pɛge yɛ la ka yɛ yi baare. 4Yɛ be N poɔ aŋa lɛ N naŋ be yɛ poɔ. Aŋa lɛ teɛ ulee naŋ koŋ baŋ wɔŋ wɔmɔ ka o naŋ ba be a teɛ eŋɛ, a lɛ meŋ la ka yɛ kontoɔ̃ wɔŋ wɔmɔ ka yɛnee ba be N eŋɛ. 5Maa la a dããteɛ, kyɛ ka yɛ waa a ulli.#15:5 Teɛ ulee bee teɛ ulli: A Dagaaba mine maŋ boɔle la teɛ ulee bee teɛ ulli ka danu bee danuuri. Banaŋ naŋ be N poɔ ka N meŋ be ba poore maŋ wɔŋ la wɔmɔ yaga, bonso, ka yɛnee ba be N eŋɛ, yɛ kontoɔ̃ e yelzaa. 6Soba na zaa naŋ ba be N poɔ, ba na lɔɔ o la bare aŋa teɛ ulee ka o ko. A ulli ama taaba, ba na wuo a la lantaa a lɔɔ eŋ vũũ poɔ ka a di. 7Ka yɛnee wa be N poɔ, ka a N yelbie be yɛ poore, yɛ sɔre bonzaa yɛ naŋ boɔrɔ, kyɛ ba na e ko yɛ la. 8Ka yɛnee wɔnɔ wɔmɔ yaga kyɛ waa N potuuribo, ŋaa la na e ka N Saa yuori na nyɛ puubu. 9Aŋa lɛ a Saa naŋ nɔŋ ma, lɛ la ka N meŋ nɔŋ yɛ. Yɛ be a N nɔmmo poɔ. 10Ka yɛnee wa sagra a N nɔɛ, yɛ na be la a N nɔmmo poɔ, aŋa lɛ N naŋ sagra a N Saa nɔɛ a be a O nɔmmo poɔ lɛ. 11N da yeli la a yɛlɛ ama ko yɛ, ka N kyelloo na be yɛ zie, ka a yɛ kyelloo na nyɛ paaloo.”
12“A N noɔre la ŋa: yɛ nɔnɔ taa aŋa lɛ N naŋ da nɔŋ yɛ. 13Neɛzaa ba taa nɔmmo ka o gaŋ a ŋaa: ka neɛ na sage kpi o bamine zuiŋ. 14Ka yɛnee wa sagra N nɔɛ, yɛ waa la N bamine. 15N ba la kyɛnɛ boɔlɔ yɛ tontonema, bonso, tontonɔ ba maŋ baŋ bon a o neŋkpoŋ naŋ erɛ. Kyɛ N boɔlɔ yɛ la N bamine bonso, N eɛɛ la ka yɛ baŋ yɛlɛ na zaa N naŋ da woŋ yi a N Saa zie. 16Yɛnee naane kaa-iri ma, kyɛ maa la kaa-iri yɛ, a toŋ yɛ ka yɛ gaa te wɔnɔ wɔmɔ. Wɔmɔ na naŋ na bebe kɔɔre, ka a Saa pãã na ko yɛ bonna zaa yɛ naŋ sɔre yi O zie a N yuori eŋɛ. 17N korɔ yɛ la a nɔɛ ama ka ka yɛ na nɔnɔ taa.”
A Tendaa Noba Na Kyiiri Yɛ La
18“Ka a tendaa noba wa kyiire yɛ, yɛ baŋ velaa ka maa la ka ba da daŋ kyiiri kyɛ pãã wa kyiire yɛ. 19Ka yɛnee da poɔ a tendaa noba poɔ, ba da na nɔŋ yɛ la aŋa bamenne noba. N naŋ kaa-iri yɛ yi ne a tendaa noba poɔ, ka yɛ ba la poɔ ba poɔ la so ka a tendaa noba kyiire yɛ. 20Yɛ leɛ-teɛre a yelbiri na N naŋ da yeli ko yɛ, ‘Tontonema ba ganna ba neŋkpoŋ.’ Ka ba naŋ da dɔgre ma, ba na dɔgre la yɛ meŋ. Ka ba naŋ da sage de a N yɛlɛ, ba na sage de la yɛ meŋ yɛlɛ. 21Kyɛ ba na e yɛ la a ama zaa a N yuori zuiŋ, bonso, ba ba baŋ a soba na naŋ toŋ ma. 22Ba da koŋ taa yelsaanaa zaa ka maa da ba wa yeli yɛlɛ ko ba. Kyɛ ŋaa eŋ, ba ba taa gaafara zaa na tere kyaare ne a ba yelbebe. 23Soba na zaa naŋ kyiiri ma, kyiiri la N Saa meŋ. 24Ka maa da ba wa toŋ a toma ama neɛzaa naŋ daŋ ba toŋ zaa ba poɔ, ba da koŋ taa yelbieri zaa. Kyɛ pampana, ba nyɛɛ la kyɛ naŋ kyiiri ma ane a N Saa. 25A yɛlɛ ama eɛɛ la ka ka a na tu a yelbiri ba naŋ da sɛge eŋ a Naaŋmen begɛ poɔ, ‘Ba kyiiri ma la kyɛ ka N ba sãã yelzaa.’ ”
26“Ka a Soŋnɔ, a yelmeŋɛ Vooroŋ N naŋ na toŋ ka O yi a Saa zie wa, na wa di la N danseɛ. 27Yɛ meŋ na di la a N danseɛ, bonso, yɛ da be la N zie a yi a piiluu saŋ.”
Pašlaik izvēlēts:
Gyn 15: DNTTP
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
First New Testament in Dagaare Language © The Bible Society of Ghana, 2013.