Mɑɑtieo 15
15
B yejɑnm kɑɑl lɑbɑɑl
(Mɑɑlk 7.1-13)
1L yuo nɑ k Fɑɑliisiɑnnbɑ nɑn *senniwɑntieb nyii Selusɑɑlenm k bɑɑl tɑn boi Yiesu ɑ: 2«Bee k ɑ *puolpoweitieb k wɑɑ t yejɑnm kɑɑl i? K mɑɑn b k nit b nii kɑɑ wɑɑ, ŋɑɑn di.»
3K Yiesu mun boi’b ɑ: «Bee k i mun k sɑk Yennu *senni weiu ŋɑɑn wɑɑ i yejɑnm kɑɑl i? 4Yennu e din yet ɑ: ‹Bɑɑk ɑ bɑɑ nɑn ɑ nɑɑ,› k biɑ yet ɑ: ‹Wun nbɑ tɑn pol u bɑɑ ɑmi u nɑɑ mɔb, bin kpi’u.› 5Ŋɑɑn yinm ŋɑnin yɑɑ ɑ, nilɔ i yet u bɑɑ ɑmi u nɑɑ ɑ: ‹Mɑɑ bo sɑɑ tul’i lin nbɑ nɑ, ŋɑɑn l kpɑnt Yennu yɑl ɑ,› ɑ 6l ji k tie miɑl kɑɑ nɑn wun tul u dɑnm siɑl. Yɑɑ tuun biɑnŋ nbɑ nɑ, i yiin Yennu senni yɑnn ɑ, i yejɑnm kɑɑl pɑɑk. 7Yinm kpinkpɑnni dɑnm nɑ, *Yennu sɔkni Esɑɑyi nbɑ din pɑk i po nɑ, set tie mɔni e, ɑ:
8‹Niib nɑ tien’n bɑɑkl mɔi ni e,
ŋɑɑn b pɑlɑ fɔk nɑn’n sɑɑn ɑ.
9B jiɑntl’n yɑnn e,
k mɑɑn b diɑ nisɑɑli kɑɑ e k wɑnt niib
nɑn l set tie min Yennu senni e nɑ.› »
Lin nbɑ be nisɑɑlk pɑl ni
(Mɑɑlk 7.14-23)
10Ŋɑnn e k Yiesu yiin nibul nɑ k tɑn yet’b ɑ: «Gbiintl mɑn, k bɑnn lin nbɑ k n yɑɑ n yet’i nɑ pɑɑk. 11Lin nbɑ kuɑ nisɑɑlk mɔb ni kɑn fit tien’ɔ jɑknt u pɑl ni, ŋɑɑn lin nbɑ nyi u mɔb ni e tien’ɔ jɑknt.»
12Ŋɑnn e k u puolpoweitieb bɑɑl u buol ni k tɑn boi’ɔ ɑ: «A mi nɑn Fɑɑliisiɑnnbɑ nɑ nbɑ gbɑt ɑ mɑɑn mɑnŋ nɑ, b dukn nɑn ɑ sukl’b e k l k mɑnŋ’b ii?»
13K u jiin yet’b ɑ: «Tiik nbɑ kul k n Bɑɑ nbɑ be sɑnpɑɑpo nɑ k wuu, sie k b tɑn ŋɑbl e k lu. 14L pɑɑk, ŋɑɑnt’b mɑn k bii sɑɑ, k mɑɑn b tie nɑn juɑni nɑ e k dɑɑl b juɑnlei, k l i tie k juɑnŋ dɑɑl u luɑ, sie k b kul ɑ bɑɑ buotuk ni.»
15Ŋɑnn e k Piɑl jiin k yet’ɔ ɑ: «Wɑnt’t bɑljouk nɑ pɑɑk.»
16K Yiesu jiin ɑ: «I mun biɑ lek dɑɑ k fit bɑnn n mɑɑn nɑ pɑɑk ii? 17I k mi nɑn lin nbɑ kuɑ mɔb ni, l yɑɑ lin sik puol ni e, k kpɑnt bint k nyi ii? 18Ŋɑɑn bɑlbiit nbɑ k nisɑɑlk piɑk u mɔb ni, l nyii u pɑl ni e, ŋɑnn mun e tien’ɔ jɑknt. 19K mɑɑn nilɔ pɑl ni e k dudukbiit nyi, nɑn nikpinu, nɑn boncuncontuonɑ, nɑn nɑn-yukn, nɑn fɑɑk siɑlɑ, nɑn sɑnjɑɑɔnŋ. 20Lin nbɑ nɑ nbɑ e tien nisɑɑlk jɑknt, ŋɑɑn niijɑknɑ dinu k fit tien nilɔ jɑknt.»
Kɑɑnɑɑn puo tien Yiesu yɑdɑ
(Mɑɑlk 7.24-30)
21Tɔn, k Yiesu nyii lenŋ k sɑɑn Tiil nɑn Siidɔn bɔkl po. 22Ŋɑnn e k Kɑɑnɑɑn#L din tie duo nbɑ k Yennu din senn mɔsonn nɑn u sɑɑ tul Islɑɑeltieb nɑ sɑnn e. Dinnɑ b yi l duo Islɑɑel e. Yenn-yuo mun, b biɑ yi duo mɑnŋ e Pɑɑlestiinn. tinŋ ni puosuɑ nnɑ mun din be bɔkl mɑnŋ po, k tɑn bɑɑl Yiesu buol ni, k yien ɑ: «Yonmdɑɑnɔ, * Dɑɑfiid yɑɑbuonn, tin’n ninbɑɑɔk. Nɑlnbiiuk be n bipuo ni, k muks’ɔ bonciɑnn.» 23K Yiesu din k jiin siɑl, ŋɑɑn k u puolpoweitieb yet’ɔ ɑ wun bel puo nɑ, k mɑɑn u mɔk fuut.
24Ŋɑnn e k Yiesu jiin ɑ: «Islɑɑeltieb nbɑ tie nɑn pei nbɑ bot nɑ, ŋɑnm kuukuɑ e k Yennu tun’n ɑ mɑn sɑɑn b buol ni.»
25K puo mɑnŋ bɑɑl k tɑn gbɑɑn Yiesu tuɑnn, ŋɑɑn yet’ɔ ɑ: «Yonmdɑɑnɔ, sonmt’n»
26K Yiesu jiin yet’ɔ ɑ: «L k ŋɑn k nilɔ n jii wɑɑs jiet k tul bɔi.»
27Ŋɑnn e k puo nɑ jiin ɑ: «Yonmdɑɑnɔ, l set tie mɔni e, ŋɑɑn bɔi nbɑ duɑ b dɑɑnɔ sɑɑŋmɑni buol nɑ k kɔnŋt jebulɑ nbɑ bɑɑ tinŋ ni k tɔki di.»
28Ŋɑnn e k Yiesu ji yet’ɔ ɑ: «A tien’n yɑdɑ bonciɑnn. Lin nbɑ k ɑ luon nɑ, Yennu n tun nnɑ k tul’ɑ.» K u bipuo mɑnŋ lɑ lɑɑfiɑ l tɑɑkpɑɑk ni.
Yiesu te k bɑɑtb bonciɑnn pɑɑk
29L puolpo e k Yiesu nyii lenŋ k gɑl Gɑɑliile mɔkgbenŋl kpinŋ, k sɑɑ duo kɑl juɑl pɑɑk. 30K nibulciɑɔnŋ bɑɑl u buol nɑn wɔbi, nɑn juɑni, nɑn mui, nɑn diɑni, nɑn bin nbɑ yiɑl yiɑlbuolu buolu kul ɑ, k tɑn bil’b u tuɑnn, k u te k b kul ɑ pɑɑk. 31K nibul nɑ nbɑ lɑ k mui piɑk, k diɑni pɑɑk, k wɔbi sonm, k juɑni lɑɑt nɑ, k l yɑɑl ŋɑɑn lit’b, k b piɑk dont Islɑɑeltieb Yennu nɑ sɑnn.
Yiesu dinn jɑb tusɑ ŋɑnnɑ
(Mɑɑlk 8.1-10)
32K Yiesu yiin u puolpoweitieb k tɑn yet’b ɑ: «Ninbɑɑɔk mɔk’n nɑn niib nɑ, k mɑɑn dɑɑ ŋɑntɑ e nɑ k b be n buol nnɑ, ŋɑɑn k mɔk jiet k di. N k luon mɑn kunn’b kon, k b tɑn sɑɑ mɑnn fib kon.»
33K u puolpoweitieb boi’ɔ ɑ: «Lee k t sɑɑ lɑ jiet muuk nɑ ni k tul nibulciɑɔnŋ nɑ k bin di k gbuo?»
34K u boi’b ɑ: «I mɔk pɑɑni ŋɑnŋɑ e?»
K b jiin ɑ: «Ŋɑnlole, nɑn jɑnbis wɑɑnm-nnɑ.»
35K u yet niib nɑ ɑ bin kɑl tinŋ ni, 36ŋɑɑn jii pɑɑni ŋɑnlole nɑn jɑnbis nɑ, k tul Yennu niipuouk l pɑɑk, ŋɑɑn ŋmit ŋmit tul u puolpoweitieb, k b jii tol tol niib mɑnŋ. 37K niib nɑ kul dii k gbuo ŋɑɑn k l tenn. K u puolpoweitieb lɑkn jiet nbɑ tenn nɑ, k l gbie kpɑncubt ŋɑnlole. 38K niib nbɑ dii mɑnŋ din tie jɑb tusɑ ŋɑnnɑ, k puob nɑn wɑɑs kɑnn k pukn lenŋ. 39L puolpo k Yiesu cɑb niib mɑnŋ, ŋɑɑn kuɑ bulgbetl ni k puot kuɑ Mɑɑgɑɑdɑn tinŋ ni.
Pašlaik izvēlēts:
Mɑɑtieo 15: MOBANT07
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Moba-Lok New Testament © Bible Society of Togo, 2007.